Jeremías 33:3 | «Bicaa ridxi naa, ne naa zacabe’ lii»

«Bicaa ridxi naa, ne naa zacabe’ lii ne zueniá’ lii cosa ni zadxagayaalu’, ne ni qué ziénelu’, cosa ni lii qué gánnalu’» (Jeremías 33:3, Traducción del Nuevo Mundo).

«Bicaa ridxi naa, ne naa zacabe’ lii, ne zusiide’ lii cosa nabé naro’ba’ ne ni naga’chi’ ni lii qué runibia’lu’» (Jeremías 33:3, Reina-Valera, 1960).

Significadu sti’ Jeremías 33:3

Né ca diidxa’ ri’, cayuni invitar Dios laanu guni orarnu laa, ne ca binni guicaa invitación ca zului’be laaca’ ni chiguizaaca despué.

«Bicaa ridxi naa, ne naa zacabe’ lii». Ora riete’ diidxa’ «bicaa ridxi naa», cadi caní’sini guininu lá Dios ora guca’nu ridxi laa nadipa’. Laaca raca significarni guni orarnu laabe para guinábanu laabe gacanebe laanu ne gábibe laanu xi gúninu (Salmo 4:1; Jeremías 29:12).

Zándaca gucuá ca diidxa’ ri’ para guidxi Israel ni guyuu dxiqué. Ca israelita que bixélecabe de Dios ne bicaalú ejércitu sti’ Babilonia laacabe (Jeremías 32:1, 2). Gudxi Jehováa laacabe guidxíñacabe laa sti biaje ne guni orárcabe laa para gacanebe laaca’.

«Zueniá’ lii cosa ni zadxagayaalu’, ne ni qué ziénelu’, cosa ni lii qué gánnalu’». Ca cosa ni cayuni prometer Jehová guluí’ laanu zadxaagayaanu ca ni, purti’ pa qué ñábibe ca ni laanu qué ñuu dxi ñanna binni guidxilayú ca ni. Diidxa’ «zadxagayaalu’» laaca zanda gaca traducirni casi «ni naga’chi’».

¿Xii nga «ni naga’chi’» ni bisiene Dios que ya’? Laani nga ca ni chiguizaaca despué, zanitilú Jerusalén ne guiruti’ zabeza ndaani’ ni, peru despué zucuícabe ni sti biaje (Jeremías 30:1-3; 33:4, 7, 8). Peru Dios laaca guní’ qué zanitilú guidubi xquidxi (Jeremías 32:36-38).

Contextu sti’ Jeremías 33:3

Gucuaa profeta Jeremías mensaje sti’ Jehová lu iza 608 ante de ca dxi stinu, dxi ma’ ziné rey Sedequías 10 iza de cayuni mandar. Maca guní’ Jeremías ziaba Jerusalén lu ná’ ca babilonio ne zanaazecabe Sedequías. Cumu qué ñuula’dxi’ rey que ni guní’ Jeremías la? biseguyoobe laa (Jeremías 32:1-5; 33:1; 37:21).

Pur guirá’ ni cazaaca ri’, guní’ Dios ca diidxa’ ni zeeda lu Jeremías 33:3. Peru rey Sedequías ne stale binni de guidxi que qué nucaaca’ ridxi Jehová ne qué nuyúbica’ laabe. ¡Aque triste purti’ qué nusaana de ñácacabe rebelde! (Jeremías 7:26; 25:4). Ti iza despué, bisaana Sedequías de gaca rey, binitilú Jerusalén ne yenécabe stale de ca ni bilá que Babilonia (Jeremías 39:1-7).

Ca dxi ri’ laaca rusietenala’dxi’ ca diidxa’ sti’ Jeremías 33:3 laanu, zanda gacané Dios laanu guiziidi’ chaahuinu «ni racala’dxi’» ne ca «cosa sti’ Dios ni jma nagana», pa guni estudiarnu Biblia ne guinánabanu gacanebe laanu guiénenu ca ni (Colosenses 1:9; 1 Corintios 2:10). Ma’ cadi candaa, lade ca cosa nagana ca nuu ca ni cayuni prometer Jehová laanu chiguni (Apocalipsis 21:3, 4).

Para gánnalu’ xidé caní’ libru sti’ Jeremías, biiya’ videu ri’.