Guni crenu Jiobá yanna purtiʼ mayaca guinitilú guidxilayú
«Cadi gusaana de guni cretu Jiobá.» (ISA. 26:4)
1. Ximodo nga gadxé ca xpinni Jiobá de xcaadxi binni.
NDAANIʼ Guidxilayú ra nabáninu riʼ, millón de binni maʼ qué runi crecaʼ guirutiʼ, zándaca purtiʼ maʼ huayuu tu huaguite laacaʼ ne maʼ huayacanacaʼ. Peru laanu ca xpinni Jiobá ¡maʼ gadxé laanu! Rudiʼnu lugar guluíʼ Dios laanu xi gúninu purtiʼ nuu xpiaaniʼ ne nánnanu ti guendahuati nga guni crenu guiráʼ ni nuu lu guidxilayú ne ca «binni ni risaca» nuu luni (Sal. 146:3). Lugar de gúninu zacá la? rusaananu xquendanabáninu lu náʼ Jiobá ne maʼ qué riuʼnu xizaa pur ni guizaaca despué, purtiʼ nadxiibe laanu ne qué rusaanabe de gúnibe ni maʼ bizabiruaabe (Rom. 3:4; 8:38, 39).
2. Xi guníʼ Josué ni bisihuinni zanda guni cré binni Dios.
2 Maʼ raca stale siglu, Josué guníʼ zanda guni cré binni Dios. Ra maʼ zeeda guidxiña dxi gátibe, gúdxibe ca binni xquídxibe ca diidxaʼ riʼ: «Laatu nanna dxíchitu de guidubi ladxidoʼto ne guidubi xhiálmatu huayaca guiráʼ diidxaʼ sicarú ni huayabi Jiobá laatu, Dios stitu. Maʼ guca guirácani para laatu» (Jos. 23:14).
3. Xi rizíʼdinu de Dios pur ni riníʼ labe.
3 Jiobá runi guiráʼ ni ruzabiruaa purtiʼ nadxii ca xpinni. Peru nuu sti razón jma risaca para gúnibe ni: rúnibe ni pur labe (Éxo. 3:14; 1 Sam. 12:22). Sicaríʼ rieeteʼ ra ruzulú ti Biblia ni nuu lu diidxaʼ inglés ni nabé runibiáʼ binni: ora gunadiáganu lá Dios riníʼ íquenu zanda gúnibe guiráʼ ni maʼ bizabiruaabe, purtiʼ nácabe ti «Dios ni zanda guidxela modo guni ni cá ique neca guizaaca intiica cosa, ne neca chuʼ xiixa guendanagana [...]. Zaca guiráʼ ni maʼ guniʼbe, [...] zanda gusihuínnibe xi chiguizaaca, rusietenaláʼdxibe cani laanu ne laapebe zuuyabe gaca ni maʼ guniʼbe. Dios qué zusaana de guni ni na pur lá; qué ziuu dxi guituí lube pur labe» (The Emphasized Bible, stiʼ J. B. Rotherham).
4. 1) Xi cucaa Isaías 26:4 laanu gúninu. 2) Xi chiguidúʼndanu lu tema riʼ.
4 Guinabadiidxanu laca laanu: «Ñee maʼ runebiaʼyaʼ Jiobá stale para guneʼ cré zacanebe naa la? Ñee qué ridxibeʼ pur ni chiguizaaca despué purtiʼ nannaʼ lu náʼ Dios nuu guiráʼ cosa la?». Isaías 26:4 cudii conseju riʼ laanu: «Cadi gusaana de guni cretu Jiobá, purtiʼ Jah Jiobá nga zeeda gaca casi Guié ni maʼ xadxí de nuu». Dxandíʼ nga maʼ qué rúnibe milagru yanna para gacanebe binni casi bíʼnibe ni dxiqué. Peru cadi cusaanabe de gácabe casi «Guié ni maʼ xadxí de nuu», nga runi zanda guni crenu laabe biaʼ dxi nabáninu. Ximodo racané Bixhózenu Jiobá laanu, cani qué rusaananu de gúninu ni nabe yaʼ. Rúnibe ni de chonna modo: rudiibe stipa laanu para gucáʼnanu cani ruquiinde laanu gúninu cosa malu, racanebe laanu guni huantarnu ora qué naʼ binni gucaadiaga o chuʼ tu sananda laanu ne riguube gana laanu ora nuu xiixa ni riguu xizaa laanu. Ora guidúʼndanu guionnaʼ modo riʼ, cadi guiaandaʼ laanu guiníʼ íquenu ximodo zanda gusihuínninu jma runi crenu Jiobá.
Guni crenu zacané Dios laanu ora chuʼ xiixa ni gacalaʼdxiʼ gucaa laanu gucheʼnu
5. Pora nga zaca jma nagana para laanu gusihuínninu runi crenu Dios.
5 Zándaca cadi gaca nagana para laanu guni crenu zuni Jiobá xiixa ni maʼ bizabiruaa, casi gúnibe Guidxilayú riʼ ti paraísu o guindísabe ca gueʼtuʼ ca. Peru zándaca jma gaca nagana para laanu gúninu ni na ca ley stibe ra na ximodo naquiiñeʼ guibani binni. Para ganda gúninu nga naquiiñeʼ guiénenu jneza nga chinándanu ca mandamientu stibe ca ne ora gúninu cani zabáninu jma nayecheʼ. Rey Salomón bidii ti conseju sicarú laanu ora guníʼ: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu» (Pro. 3:5, 6). Lu textu ca cayeeteʼ de «neza». Diidxaʼ riʼ caniʼni cadi naquiiñeʼ si gápanu fe lu cani maʼ guníʼ Dios chiguni, sínuque laaca naquiiñeʼ gusihuínninu ni lu guiráʼ ni gúninu lu xquendanabáninu. Yanna guidúʼyanu ximodo zanda gusihuínninu runi crenu Jiobá ora chuʼ xiixa ni uquiinde laanu gúninu ni cadi jneza.
6. Xi zacané laanu para gucáʼnanu ca cosa dxabaʼ reeda ndaaniʼ íquenu.
6 Ca cosa malu ni runi binni la? ruzulú cani de lu xquendabiaaniʼ, nga runi naquiiñeʼ chuʼnu cuidadu ni (biindaʼ Romanos 8:5 ne Efesios 2:3). Xi zanda gacané laanu para gucáʼnanu xiixa cosa malu tiidiʼ ndaaniʼ íquenu yaʼ. Guidúʼyanu gaayuʼ modo zanda chuʼnu cuidadu laanu: 1. Guinábanu Dios gacané laanu (Mat. 6:9, 13). 2. Guiníʼ íquenu de ca ejemplu ni rieeteʼ lu Biblia de cani bizuubaʼ stiidxaʼ Jiobá ne guleendú ni galán, ne zaqueca de ejemplu stiʼ cani qué nuzuubaʼ diidxaʼ ne gucanacaʼ (1 Cor. 10:8-11).a 3. Guiníʼ íquenu xi yuubaʼ ne guendananá zápanu ne zapa ca binnilídxinu pa gucheʼnu. 4. Guiníʼ íquenu ximodo zuni sentir Jiobá ora tobi de ca xpinni gucheené laa. Sicaríʼ na Biblia: «¡Guiráʼ ora qué nuzuubacabe stiidxabe lu desiertu que, bininácabe ladxidoʼbe lu desiertu ra nabidxi que! Qué nusaanacabe de nucheenécabe Dios, ne bisiuubacabe ladxidóʼ Dios ni nayá stiʼ Israel» (Salmo 78:40, 41). 5. Guiníʼ íquenu pabiáʼ nayecheʼ runi sentir Dios ora ruuyabe rucaanáʼ ca xpínnibe ca cosa malu ca ne rúnicaʼ ni jneza ora nuucaʼ stúbicaʼ ne ora nuuca nezalú stale binni (Sal. 15:1, 2; Pro. 27:11). Dxandíʼ, pa chinándanu ca conseju riʼ zaguidxi fe ni nápanu Jiobá.
Guni crenu zacané Jiobá laanu ora qué náʼ binni gucaadiaga laanu ne ora gucaalucaʼ laanu
7. Xi guendanagana gudiʼdiʼ Jeremías, ne ximodo biʼniʼ sentirbe.
7 Stale xpinni Jiobá rucheechecaʼ diidxaʼ ca lugar ra naquiiñeʼ guni huantar binni. Nga nga ni bizaaca Jeremías, ti hombre ni gudixhená ndaaniʼ guidxi Judá ca últimu dxi maʼ para guinitilú reinu que. Guiráʼ dxi gupa xidé bisihuínnibe fe ni nápabe Dios ora guiniʼbe modo chigusabanáʼ Dios guidxi que. Ti biaje dede Baruc secretariu stibe maʼ biree gana modo guyuu que (Jer. 45:2, 3). Ñee guyuu Jeremías triste la? Ti biaje guyuube triste dede guniʼbe ca diidxaʼ riʼ: «¡Riguaadí dxi guleʼ! [...] Xiñee biree de [...] ndaaniʼ jñaaʼ para guuyaʼ dxiiñaʼ naná ne guiuubaʼ ladxiduáʼ ne para guituiluáʼ ora gateʼ» yaʼ (Jer. 20:14, 15, 18).
8, 9. Casi na Jeremías 17:7, 8 ne Salmo 1:1-3, xi naquiiñeʼ gúninu para cadi gusaananu de gúninu xhiiñaʼ Jiobá.
8 Neca zaqué, qué niree diʼ ni riguixhená que gana. Qué nusaana de ñápabe fe Jiobá. Ne pur ngue, gunda biiyabe guca ca diidxaʼ ni zeeda lu Jeremías 17:7, 8: «Chuʼ ndaayaʼ hombre nadipaʼ ni runi cré Jiobá de guidubi ladxidóʼ, ne Jiobá maʼ beeda gaca ni runi crebe de guidubi ladxidoʼbe. Ne dxandipeʼ zeeda gácabe casi ti yaga ni zuhuaa ruaa nisa, ni rindá xcu ra cuxooñeʼ nisa; ne qué zuuyaʼ ora gueeda tiempu nandáʼ, sínuque nagáʼ ziuu ca bandaga stiʼ. Ne tiempu qué riaba nisaguié qué ziuu xizaa, ne qué zusaana de gudii cuananaxhi».
9 Cásica ti yaga nagaʼ «ni zuhuaa ruaa nisa» ni ruzee ti jardín, qué nusaana Jeremías de ñuni xhiiñaʼ Jiobá, zacá nga beeda gácabe casi ti yaga ni qué rusaana de «gudii cuananaxhi». Lugar de nulábibe guiráʼ binni ni biʼniʼ burla laabe que, guyuube jma gaxha de Jiobá, ti lugar ra ridá «nisa» ni rudii guendanabani ne bíʼnibe ni gudxi Jiobá laabe. Sicaríʼ na Biblia: «Nayecheʼ nga riuu hombre ni qué huayuu dxi chinanda conseju stiʼ binni malu, ne qué ruzuhuaa lu neza stiʼ ca binni ruchee, ne qué ribí lu banguʼ stiʼ cani runi burla. Riuulaʼdxiʼ guʼndaʼ ley stiʼ Jiobá, ne dxi ne gueelaʼ ruundaʼ ni chaahuidugá. Ne dxandipeʼ zeeda gaca casi ti yaga ni zuhuaa ra cuxooñeʼ nisa, ni rudii cuananaxhi stiʼ xhi ne ca bandaga stiʼ qué riguunduʼ, ne guiráʼ ni guni zaree ni laa galán» (Salmo 1:1-3; Jer. 20:9). ¡Nabé sicarú ejemplu ca para guiranu, jma para cani rucheeche diidxaʼ ti lugar ra nagana! Pa zacá nuunu, cadi gusaananu de gápanu fe Jiobá. Laabe zacanebe laanu guni huantarnu ne «cadi guiaana dxí nu de usisaca nu» labe (Heb. 13:15).
10. Xi ca ndaayaʼ nga cacaanu tiempu riʼ, ne xi zanda guinabadiidxanu laca laanu.
10 Para ganda guni huantarnu ca últimu dxi nabáninu riʼ, Jiobá cudii laanu ti cosa ni zeeda gaca casi ti paraísu. Xcaadxi ndaayaʼ ni huadiibe laanu nga, guidubi naca Biblia, laani jnézapeʼ modo cabíʼxhini lu xcaadxi diidxaʼ. Ne pur «mozo ni nuu xpiaaniʼ ne ni runi ni jneza» nga nápanu ni caquiiñenu. Ne laaca rudiibe lugar gápanu stale xhamígunu ni racané laanu ra ridagulisaanu ne lu ca guendaridagulisaa roʼ ca. Ñee caquiiñenu cani cudiibe laanu ca la? Guiráʼ tu cayuni ni la? «zúnicaʼ ridxi purtiʼ nayecheʼ ziuu ladxidoʼcaʼ». Peru cani qué náʼ gucaadiaga Dios la? «zúnicaʼ ridxi purtiʼ ziuubaʼ ladxidoʼcaʼ ne zacaaláʼdxicaʼ purtiʼ ziuucaʼ triste» (Isa. 65:13, 14).
Guni crenu zacané Dios laanu ora chuʼnu xizaa
11, 12. Pur guiráʼ guendanagana nuu lu guidxilayú riʼ, xii nga ni jma jneza guni binni.
11 Casi modo maca bieeteʼ, nabé nuu guendanagana lu guidxilayú tiempu riʼ (Mat. 24:6-8; Apo. 12:12). Ora guiree guiiguʼ, ni jma runi binni nga nagueendaca riguiʼbaʼ ique yoo o sti lugar ra jma nasoo. Zacaca nga rizaaca ca dxi nabáninu riʼ, cumu nabé stale guendanagana nga ridxaagalú millón de binni la? stale de laacaʼ runi crecaʼ zanda gacané ca bancu laacaʼ, ca políticu o ca religión ca, laaca runi crécabe ni riníʼ ca científicu ca ne ca cosa ni nacubi caree tiempu riʼ. Xiñee runi crécabe cani yaʼ. Purtiʼ para laacabe zeeda gaca cani casi ti lugar nasoo ra zanda guilácabe. Peru nin tobi de ca cosa ni maʼ bizéʼtenu riʼ qué zanda gulá laacabe (Jer. 17:5, 6). Peru laanu ca xpinni Dios maʼ gadxé laanu, nápanu ti lugar ra dxandíʼ zanda guilanu, laani nga: «Guié ni maʼ xadxí de nuu» (Isa. 26:4). Salmista que guníʼ: «Guidxi, biʼniʼ cré laabe guiráʼ hora. Laguiníʼ guiráʼ ni nuu ndaaniʼ ladxidoʼto nezalube. Ra nuu Dios nga zanda guilanu». (Salmo 62:8). Yanna, xi naquiiñeʼ gúninu para guilanu ra nuu Guié naroʼbaʼ riʼ ya.
12 Ridxíñanu jma gaxha de Jiobá ora rinándanu guiráʼ ni na Stiidxabe, neca para binni cadi jneza cani rúninu (Sal. 73:23, 24). Zándaca cani zinanda modo riníʼ ique binni guidxilayú gudiicaʼ ca conseju riʼ laanu: «Ti biaje si nga ribani binni; biʼniʼ guiráʼ ni zanda laga nabanuʼ». «Biindaʼ ndaaniʼ xiixa scuela roʼ para cueenduluʼ stale cosa galán.» «Biʼniʼ ganar stale bidxichi.» «Guzíʼ guiráʼ ni ganda.» «Yegunibiáʼ guiráʼ lugar gapuʼ gana.» Peru cani rinanda modo riníʼ ique Dios la? rúnicaʼ ni na conseju riʼ: «Cani caquiiñe de ni nuu ndaani guidxilayú ri la? cadi para nga si ibani caʼ. Purti ma cadiʼdi guidxilayú caduʼya nu riʼ» (1 Cor. 7:31). Laaca rinándacabe conseju bidii Jesús de guyúbicabe gúnicabe primeru ni na Reinu stiʼ Dios ne guyúbicabe gápacabe «ni risaca ibáʼ» racá nga jma jneza uguu chaahuicabe ni nápacabe (Mat. 6:19, 20).
13. Ora guiníʼ íquenu ni na 1 Juan 2:15-17, xi naquiiñeʼ guinabadiidxanu laca laanu.
13 Guinabadiidxanu laca laanu: «Ñee rusihuinneʼ pur modo ruuyaʼ ca cosa nuu lu guidxilayú riʼ ne cani nuu ndaaniʼ ni runeʼ cré de guidubi ladxiduáʼ zacané Jiobá naa la?» (1 Juan 2:15-17). «Ñee ruuyaʼ jma risaca ca cosa ni rudii Dios laanu ne ca dxiiñaʼ ni nápanu ndaaniʼ xquídxibe que ca cosa ni rudii guidxilayú riʼ laanu la?» (Fili. 3:8.) «Ñee runeʼ stipa pur guuyaʼ ni jneza la?» (Mat. 6:22.) Rihuínnica qué racalaʼdxiʼ Dios gácanu ti binni ni qué riníʼ ique o qué rizaalaʼdxiʼ guni xhiiñaʼ jneza, jmaruʼ si pa napa ti familia ni naquiiñeʼ guni tender (1 Tim. 5:8). Peru laabe ribézabe guyúbinu gacanebe laanu ne cadi guicá íquenu gacané guidxilayú stiʼ Binidxabaʼ riʼ laanu, purtiʼ mayaca guinitilú ni (Heb. 13:5).
14-16. Xi huabeendú stale xpinni Cristu purtiʼ huayuuyacaʼ ni jneza ne ruyúbicaʼ gúnicaʼ xhiiñaʼ Reinu primeru lu xquendanabánicaʼ.
14 Guiníʼ íquenu de ejemplu stiʼ Richard ne Ruth, ti guendaxheelaʼ ni napa chonna xiiñiʼ. Richard guníʼ sicaríʼ: «Dede ndaaniʼ ladxiduáʼ runeʼ sentir zándaruʼ guneʼ jma lu xhiiñaʼ Jiobá. Nabé nayecheʼ nuaaʼ pur modo nabaneʼ, peru bineʼ sentir nabé huaxiéʼ tiempu cudieeʼ Jiobá. Bineʼ orar siaʼ Jiobá de ni guníʼ iqueʼ que ne biiyaʼ xi zanda guneʼ, naa ne Ruth gudixhe íquedu maʼ cadi guneʼ diaʼ dxiiñaʼ guidubi semana, sínuque tapa gubidxa si. Ne zaqué gudxeʼ ni patrón stinneʼ, neca nabé stale binni qué gapa bueltu ca dxi que. Bidii patrón que lugar guneʼ dxiiñaʼ biaʼ gudxeʼ laa que ne ra bisaa ti beeu maʼ gunda bineʼ dxiiñaʼ biaʼ gudxeʼ laabe». Ximodo runi sentir Richard pur ni biʼniʼ que yaʼ.
15 Laabe guniʼbe sicaríʼ: «Neca maʼ huaxiéʼ riaxaʼ la? yanna napaʼ 50 dxi lu ti iza para chuaaniáʼ binnilidxeʼ ne gusiniiseʼ ca xiiñeʼ. Yanna jma stale hora runeʼ ora maʼ zigucheecheʼ diidxaʼ, ne laaca jma maʼ stale binni riguundaniáʼ Biblia ne jma jneza modo runeʼ tender neza binni ridagulisaa ra riaaʼ. Ne cumu jma stale tiempu ridiideniáʼ ca xiiñeʼ la? maʼ randa raca Ruth precursora auxiliar caadxi beeu. Maʼ gudixheʼ iqueʼ guneʼ sicaríʼ laga zanda».
16 Guidúʼyanu ejemplu stiʼ Roy ne Petina, neca nápacabe ti xiiñidxaapacabe ralídxicabe la? maʼ gudixhe íquecabe cadi gunipécabe dxiiñaʼ ti ganda gúnicabe jma lu xhiiñaʼ Jiobá. Sicaríʼ guníʼ Roy: «Runeʼ dxiiñaʼ chonna gubidxa lu ti semana, ne xheelaʼ runi chupa si gubidxa. Laaca maʼ yebiʼdu ndaaniʼ ti cuartu, purtiʼ racá qué runítidu stale tiempu para gusiadu ni. Laadu maca gúcadu precursor ante gápadu guiropaʼ xiiñidu, ne gudixhe íquedu ziuu dxi gácadu ni sti biaje. Nga runi, ora biniisicabe la? gúcadu precursor sti biaje. Ne gastiʼ sti cosa jma risaca lu Guidxilayú riʼ, biaʼ risaca ca ndaayaʼ ni cudii Jiobá laadu».
Gudiʼnu lugar «quixhe dxí Dios» ladxidoʼno
17. Ximodo huaguixhedxí Biblia ladxidoʼloʼ neca nuu ni riguu xizaa lii.
17 Qué gánnadinu xi zanda guizaacanu guixíʼ, purtiʼ «tiempu ne ni málasi rizaaca rugaandani guiranu» (Ecl. 9:11). Neca riguu nga xizaa laanu, cadi naquiiñeʼ diʼ guiníʼ ique xhaatanu xi zándaca gueeda guizaacanu ne pur nga maʼ cadi gatadxí ladxidoʼno, casi rizaaca né cani cadi xhamigu Jiobá (Mat. 6:34). Lugar de nga la? naquiiñeʼ chinándanu conseju ni bidii apóstol Pablu: «Cadi chuʼ tu xizaa de gastiʼ, sínuque lainíʼ né Dios. Lainaba laa irá ni caquiiñe tu, ne laudii diuxquixe laa. Ne óraque zaguixhe dxí ladxidóʼ to dede iruti zanda guiene ximodo ni. Ma qué zadxibi ladxidóʼ to, ne zata dxí xquenda biaani tu» (Fili. 4:6, 7).
18, 19. Ximodo riguixhedxí Dios ladxidoʼno. Bizeeteʼ ti ejemplu.
18 Stale xpinni Cristu neca huadxaagalucaʼ guendanagana huaguixhedxí Jiobá ladxidoʼcaʼ. Sicaríʼ guníʼ ti gunaa xpinni Cristu: «Stale biaje gucalaʼdxiʼ ti doctor nuchibi naa para nicayaʼ rini. Primé ca ni gúdxibe naa nga: “Xii nga na xpiaaniluʼ qué naluʼ guicaluʼ rini pue”. Dxi gúdxibe nga naa ne xcaadxi biaje bíʼnibe ni la? bineʼ orar Jiobá ne gutadxí ladxiduáʼ. Neca nabé nayati nuu ladeʼ ne huaxiéʼ hemoglobina napaʼ la? bineʼ sentir naguidxi nuu fe stinneʼ casi ti guié ne gunda bisieneʼ laabe né Stiidxaʼ Dios xiñee qué zanda guicayaʼ rini».
19 Nuu biaje riquiiñeʼ Dios ti xpinni para quixhedxí ladxidoʼno o nuu tiru riquiiñebe ca libru ne revista ni ribee mozo ni nuu xpiaaniʼ ne ni runi jneza órapeʼ jma caquiiñenu cani. Dxandíʼ nga, maʼ huayunadiáganu guiníʼ tuuxa sicaríʼ: «Tema ca beedani órapeʼ caquiiñeʼ ni. Zuluasiáʼ para naapeʼ gucuá ni». Neca cayácanu intiica cosa o caquiiñenu xiixa, Jiobá zusihuinni nadxii laanu ne cayápabe laanu pa guni crenu laabe. Ne nácanu «dendxuʼ» stibe, ne guidxi ni maʼ bidiibe labe (Sal. 100:3; Juan 10:16; Hech. 15:14, 17).
20. Xiñee qué zadxibi ca xpinni Jiobá ora guiluxe guidxilayú stiʼ Binidxabaʼ.
20 Ra maʼ zeeda guidxiña dxi stiʼ Jiobá zacadé guiráʼ ni na ca binni guidxilayú stiʼ Binidxabaʼ riʼ zulá laacaʼ. Qué zulá diʼ oro stícabe laacabe, nin plata stícabe nin sti cosa risaca ni nápacabe qué zaquiiñeʼ ni laacabe para gastiʼ (Sof. 1:18; Pro. 11:4). Tobi lucha si Dios nga zanda gulá, purtiʼ laabe nga «Guié ni maʼ xadxí de nuu» (Isa. 26:4). Nga runi, gusihuínninu runi crenu laabe ra guzúʼbanu stiidxabe ne cadi guiree cueʼnu de ca neza stibe, gucheechenu diidxaʼ neca nuu binni qué náʼ gucaadiaga laanu o sanándacaʼ laanu, ne gusaananu luguiabe guiráʼ ni naguu xizaa laanu. Tu guni zacá la? «zabani ne ziuu tu zapa laa ne maʼ guirutiʼ tu zuchiichi laa ne qué zadxibi guiaba xiixa desgracia luguiáʼ» (Pro. 1:33).
[Cani cá ñee yaza]
Ñee ñanda nicábiluʼ ni la?
Bisiene ximodo rihuinni runi crenu Dios ora:
• chuʼ tu gucaa laanu gúninu cosa ni cadi jneza
• sanándacabe laanu o cadi gucaadiágacabe laanu ora rucheechenu diidxaʼ
• guidxaagalunu xiixa guendanagana ne pur laani chuʼnu xizaa
[Dibuju/foto ni zeeda lu yaza 13]
Pa qué gusaana de gúninu ni na Dios la? zabáninu nayecheʼ
[Dibuju/foto ni zeeda lu yaza 15]
Jiobá nga «Guié ni maʼ xadxí de nuu»