Ñee naquiiñeʼ güiné binni xiiñiʼ de Dios la?

«Cani huazíʼdinu de religión huayacanécani laanu para gacananaláʼdxisaanu ne cadi para gannaxhiisaanu.» (JONATHAN SWIFT, TI HOMBRE DE IRLANDA NI RUCAA LIBRU)

NECA lu siglu XVIII que nga guníʼ hombre riʼ ca diidxaʼ ca, peru dede yanna stáleruʼ binni riníʼ ique zacá. Nuu binni ni nabeza ndaaniʼ caadxi guidxi nacaʼ guirutiʼ gapa derechu güiné ca xiiñiʼ de Dios. Riníʼcabe qué riniisi xcuidi galán ora napa familia stiʼ religión.

Lii xi rábiluʼ yaʼ. Gunáʼ de cani zeeda raríʼ rábiluʼ jma jneza.

● Cadi naquiiñeʼ diʼ nudiicabe lugar ñuiʼné binni ca xiiñiʼ de Dios.

● Cani napa xiiñiʼ naquiiñeʼ cuézacaʼ guiniisicabe para guiníʼnecaʼ laacabe de religión.

● Cani napa xiiñiʼ naquiiñeʼ gusiidicaʼ ca xiiñicaʼ ni runi crecaʼ de religión laga nahuiinirúcabe. Peru galán gúnicabe cúʼcabe gana laacaʼ ora maʼ guiniisicaʼ para guyúbicaʼ gánnacaʼ pa dxandíʼ cani bisiidicabe laacaʼ.

● Ca xiiñiʼ binni naquiiñeʼ guni crecaʼ laca cani runi cré bixhózecaʼ ne jñaacaʼ sin guinabadiidxacaʼ pa jneza cani.

Ñee dxandíʼ qué racané religión ca xcuidi ca la?

Nin ti binni nga qué racalaʼdxiʼ guniná ca xiiñiʼ. Pur guiráʼ ni ribeendú binni ni napa religión, ñee jneza nga ni nácabe ora riníʼcabe cadi galán gusiidiʼ binni ca xiiñiʼ de religión la? Ca binni ni ruundaʼ de tema riʼ maʼ zinecaʼ stale iza de cayuundacaʼ ximodo racané cani runi cré binni lu xquendanabani ca xiiñicaʼ. Xi huabeendúcabe de guiráʼ ni huayuundacabe ca yaʼ.

Maʼ bidiicabe cuenta cadi dxandíʼ cani riníʼ binni ora na cadi gusiidiʼ binni xiiñiʼ de religión, sínuque racaneni guiniisi ca xcuidi ca galán. Lu iza 2008 gucuá ti informe lu revista Social Science Research, luni bieeteʼ: «Huahuinni racané religión ca xiiñiʼ binni para ganda chúʼnecaʼ bixhózecaʼ ne jñaacaʼ tobi si».a Laaca bizeeteruni: «Rihuinni nabé risaca ganna ca xcuidi ca de religión ne gánnacaʼ naquiiñeʼ chuʼcaʼ gaxha de Dios, ne racaneni laacaʼ guibaninecaʼ familia sticaʼ galán». Cásica rieeteʼ lu informe riʼ, zacaca nga guníʼ Jesús: «Nayecheʼ cani nanna naquiiñeʼ chuʼ gaxha de Dios» (Mateo 5:3).

Yanna, xi zanda guininu de ca binni ni na guiniisi si ca xiiñiʼ ti güiné laacabe de Dios ne de religión yaʼ. Ca binni ni riníʼ sicaríʼ riaandaʼ laacaʼ pa zeeda gaca xquendabiaaniʼ ti xcuidi casi ti guiʼchiʼ ni gastiʼ cá lú. Nga runi, zanda guni bixhózecabe ne jñaacabe chupa cosa: o gusiidicabe xiiñicabe guni ni jneza lu xquendanabánicaʼ ne gusiidicabe laacaʼ guni crecaʼ ni rábicabe zanda gacané laacaʼ la? o gudiicabe lugar chuʼ guiráʼ ni riníʼ ique binni ndaaniʼ xquendabiaanicaʼ ne ndaaniʼ ladxidoʼcaʼ.

Xi huayacané laacabe

Biaʼ tiempu huabani binni huahuinni randa rucaa religión binni guiníʼ mal de stobi ne gaca nanaláʼdxisaacaʼ. Yanna, xi zanda guni binni para cadi guibani ca xiiñiʼ casi na ca diidxaʼ ni guníʼ Jonathan Swift, ni bizéʼtenu luguiáʼ ca. Ximodo zanda gusiidicabe laacaʼ ni runi crécabe ti ganda gannaxhiicaʼ xcaadxi binni yaʼ.

Ni zanda gacané ca binni ni napa xiiñiʼ nga ni cacabi guionnaʼ guendarinabadiidxaʼ riʼ: 1) xi caquiiñeʼ guiziidiʼ ca xiiñicabe, 2) tu laa naquiiñeʼ gusiidiʼ laacaʼ, ne 3) gunáʼ nga ca modo jma galán para guiziidicaʼ.

[Cani cá ñee yaza]