Tu laa naquiiñeʼ gusiidiʼ laacabe de Dios
«Tobi ni caziidi la? qué ziuu dxi tidi lú jmaistru, sínuque ora ma binduuxe, ma nanna biaʼ nanna jmaistru.» (LUCAS 6:40)
NUU binni runi sentir qué zanda gusiidiʼ ca xiiñiʼ de Dios. Zándaca riníʼ íquecaʼ zacá purtiʼ qué nizacaʼ scuela roʼ o huaxiéʼ nánnacaʼ de religión. Nga runi, qué rizaaláʼdxicabe gúnicabe ni ne rusaanacabe ni lu náʼ tuuxa binnilídxicabe o tuuxa binni ni nanna de religión.
Peru tuu nga naquiiñeʼ gusiidiʼ laacabe ni dxandíʼ de Dios ne gudii conseju laacabe para guibánicabe galán yaʼ. Guidúʼyanu xiná Biblia, ne guchaaganu ca conseju ni cudiini né ni riníʼ ique ca binni ni nanna de tema riʼ.
Ti dxiiñaʼ risaca ni naquiiñeʼ guni hombre ni napa xiiñiʼ
Ni rusiidiʼ Biblia: «Cadi guni tu xiixa para uchiichi si tu xiiñi tu, sínuque lausiidi laacabe ne laulidxe laacabe. Lausiniisi laacabe modo na Señor» (Efesios 6:4).
Ni riníʼ ique ca binni ni nanna: Ora guni cré bixhoze binni ni rusiidiʼ religión stiʼ de guidubi ladxidóʼ, ximodo racaneni laacaʼ. Ti guiʼchiʼ ni biree lu iza 2009 ni láʼ Fathersʼ Religious Involvement and Early Childhood Behavior [Religión stiʼ ca binni ni napa xiiñiʼ ne xpiaʼ ca xcuidi] na: «Ora napa ti hombre religión stiʼ racaneni laa gusiniisi xiiñiʼ jneza. Racaneni laa guidxaaga xcaadxi binni, ne laaca rusiidini laa xcaadxi cosa ne conseju ni zacané laa lu xquendanabani».
Biblia ruzeeteʼ pabiáʼ risaca dxiiñaʼ ni runi ti hombre ora rusiniisi ca xiiñiʼ ne ora rusiidiʼ laacabe (Proverbios 4:1; Colosenses 3:21; Hebreos 12:9). Peru ñee naquiiñeruʼ guni ca hombre ca ni yanna la? Ti Universidad ni nuu Florida gulee ti guiʼchiʼ lu iza 2009 ra caníʼ pabiáʼ racané o runiná ti hombre ca xiiñiʼ pur modo laa. Ca binni ni ruundaʼ de tema riʼ maʼ bidiicaʼ cuenta ora gusiidiʼ bixhoze ca xcuidi ca laacaʼ, racaneni laacaʼ gudiicaʼ cuenta zanda gúnicaʼ xiixa dxiiñaʼ de laasicaʼ ne guizaaláʼdxicaʼ xcaadxi binni. Ca hombrehuiiniʼ jma ruzuubacaʼ diidxaʼ ne ca dxaapahuiiniʼ jma jneza riníʼ íquecaʼ. Rihuínnica racaneruʼ guiráʼ ni rusiidiʼ Biblia binni dede yanna.
Ti dxiiñaʼ risaca ni naquiiñeʼ guni gunaa ni napa xiiñiʼ
Ni rusiidiʼ Biblia: «Cadi gusiaandaluʼ ley stiʼ jñaaluʼ» (Proverbios 1:8).
Ni riníʼ ique ca binni ni nanna: Lu iza 2006 biree ti libru ni cusiene de modo riníʼ ique ca xcuidihuiiniʼ, ne luni rieeteʼ: «Ca gunaa ni napa xiiñiʼ riuunecaʼ ca xiiñicaʼ dede ti 65 hasta ti 80% jma de tiempu que ca hombre, ne zacagá rihuinni ndaaniʼ stale guidxi» (Handbook of Child Psychology). Cumu xadxí nga riuuné ca hombrehuiiniʼ ca jñaacaʼ juntu la? jma riziidicabe de ca diidxaʼ ni riniʼcaʼ, cani rúnicaʼ, modo laacaʼ. Ne ni guiziidicabe ca guizáʼ zacanécani o zuninácani laacabe ora maʼ ziniisicabe.
Ora gacanesaa hombre ne gunaa para gusiidicaʼ ca xiiñicaʼ de Dios, zeeda gácani casi ora nusigáʼdecaʼ laacabe chupa cosa nabé risaca. Primé la? racanecaʼ laacabe gaca xhamígucabe Dios, Bixhózecabe ni nuu guibáʼ, ne nga zacané laacabe biaʼ dxi guibánicabe. Guiropa la? zuuyacabe ximodo racanesaa bixhózecabe ne jñaacabe para ugaandacaʼ ca cosa risaca ni gudixhe íquecaʼ (Colosenses 3:18-20). Neca chuʼ xcaadxi binni gacané laacabe para gusiniisicabe ca xiiñicabe, peru laacabe nga naquiiñeʼ guiniʼnécabe laacaʼ de Dios ne de ca conseju ni rudii para guibaninécabe binnilídxicabe nayecheʼ.
Yanna, ximodo nga naquiiñeʼ gusiidicabe ca xiiñicabe yaʼ. Ximodo nga jma jneza gúnicabe ni.