CANI RINABADIIDXAʼ BINNI DE BIBLIA

Xi para guyáʼ Guidxilayú

Guyáʼ Guidxilayú riʼ para ganda guibani binni ndaaniʼ ni. Napa ni ziáʼ nisa, ne ngapeʼ nga ni caquiiñeʼ para guibani binni. Modo nandagaa eje stiʼ Guidxilayú riʼ, modo rudiini bieque ne órbita stini nexheʼ chaahuiʼ cani para cadi gaca ca oceáno ca hielu o gaca evaporar nisa stiʼ cani. Laaca napa ni ti atmósfera ne ti campo electromagnético ni racané para cadi guniná radiación ni nuu lu espaciu ca binni. Dede né ca maniʼ ne ca yaga ca nabánicaʼ galán. Ora guʼyaʼ binni guiráʼ ndiʼ, stale de laacaʼ riníʼ íquecaʼ nuu xi pur bizáʼ Dios Guidxilayú riʼ. (Biindaʼ Isaías 45:18.)

Peru nuu tu riníʼ ique pa maca gudixhe Dios gacaná binni ne guidxá Guidxilayú riʼ de cosa ni qué iquiiñeʼ. (Biindaʼ Deuteronomio 32:4, 5.)

Ñee zaca cumplir ni nexheʼ gacaʼ lu Guidxilayú riʼ la?

Guyáʼ Guidxilayú riʼ para ganda guibani binni nayecheʼ ndaaniʼ ni, para guni respetarsaacaʼ ne gannaxhiicaʼ Dios ni bizáʼ ni. Nga rusihuinni nuu xi pur guyáʼ binni guidxilayú ne jma risaca xquendanabánicaʼ que ca yaga ne ca maniʼ. Laanu riénenu tu bizáʼ laanu ne zanda guidúʼyanu guiráʼ ni bizaʼbe ne gannaxhiinu xcaadxi binni ne gúninu ni jneza cásica rúnibe. (Biindaʼ Eclesiastés 12:13 ne Miqueas 6:8.)

Dios ni bizáʼ laanu zanda guni guiráʼ ni quixhe ique, ngue runi zanda chuʼnu seguru zabeebe guiráʼ ni cayuniná binni, cani cadi cayaca jneza ne zúnibe Guidxilayú riʼ ti lugar ra zanda guibani binni nayecheʼ. (Biindaʼ Salmo 37:11, 29 ne Isaías 55:11.)