CA TEMA NI ZEEDA LU CA PRIMÉ YAZA | LII ZANDA GACA XHAMÍGULUʼ DIOS
Zanda guiniʼluʼ xhamíguluʼ Dios la?
«Ora xhamíguluʼ Dios qué zadxíbiluʼ ne qué zaguu xaíqueluʼ xiixa. Zuni sentirluʼ cayápabe lii guiráʼ ora ne racaláʼdxibe chuʼluʼ galán.» (CHRISTOPHER, TI HOMBREHUIINIʼ DE GHANA)
«Ruuyaʼ Dios ora nuuluʼ triste, ne ora nuuluʼ zacá jma rizaaláʼdxibe lii ne jma rannaxhiibe lii que biaʼ riníʼ íqueluʼ.» (HANNAH, TI DXAAPAHUIINIʼ DE ESTADOS UNIDOS NI NAPA 13 IZA)
«Ora gannaʼ ruuyaʼ Dios naa casi ti xhamiga racaneni naa guneʼ sentir nuu tu cayapa naa. Gacaʼ xhamiguaʼ laabe nga ni jma risaca para naa.» (GINA, TI GUNAA DE JAMAICA NI NAPA BIAʼ 45 IZA)
Cadi Christopher, Hannah ne Gina si nga cani riníʼ ique zacá. Stale binni ni nuu lu guidubi Guidxilayú nánnacaʼ ruuyaʼ Dios laacaʼ casi xhamigu. Yanna lii yaʼ. Ñee runi sentirluʼ nuuluʼ gaxha de Dios la? Ñuuláʼdxiluʼ ñaca xhamíguluʼ laabe la? o ñuuláʼdxiluʼ ñaca xhamíguluʼ laabe jma. Zándaca guinabadiidxaluʼ laca lii: «Zanda xa gaca xhamigu ti binni qué risaca casi naa Dios ni jma napa poder».
ZANDA GACA XHAMÍGUNU DIOS
Biblia cayabi laanu zanda gaca xhamígunu Dios ni bizáʼ laanu. Casi lu Isaías 41:8 rieeteʼ gudxi Dios ti patriarca hebreu láʼ Abrahán «xhamiguaʼ». Laaca zanda gúʼyaluʼ xi invitación cayuni Santiago 4:8 laanu: «Laidxiña gaxha de Dios, ne laa zadxiña gaxha de laatu». Ca diidxaʼ ca rusihuínnicani zanda gaca xhamígunu Dios. Peru, ximodo zanda guidxíñanu laabe pa qué ridúʼyanu laabe yaʼ.
Para guicábinu guendarinabadiidxaʼ ca guiníʼ íquenu ximodo raca xhamigu chupa binni. Primé biaje gunibiáʼcabe la? riníʼcabe tu lácabe. Pa qué gusaana de güícabe diidxaʼ, chaahuiʼ chaahuiʼ zunibiáʼsaacabe ne qué zandaa zaca xhamígucabe. Ne jma raca xhamígucabe ora gacanésaacabe. Zacaca nga ruzulú raca xhamigu ti binni Dios. Guiduʼyaʼ chaahuinu ni lu sti tema ca.