Chuunu guiráʼ ca guendaridagulisaa ca la? risaca cani stale
1 Para ca familia ni zinanda Cristu la? risaca stale nga chécabe guiráʼ ca guendaridagulisaa ni rápacabe. Peru, modo nabani binni yanna riʼ la? zándaca guedaneni xiixa guendanagana. Ñee cabaʼnaʼ ca buelta raca ra yoo, dxiiñaʼ, o ca tariá stiʼ scuela ca tiempu ni maʼ nexheʼ para gaca adorar Jiobá la? Gúʼyanu ca cosa ca casi modo ruuyaʼ Dios la? zacané laanu gúninu primé cani naquiiñeʼ gaca (1 Sam. 24:6; 26:11).
2 Ti biaje, ti israelita laapeʼ biʼniʼ pur qué nuzuubaʼ stiidxaʼ Jiobá ra yetopa yaga ti sábadu. Zándaca guníʼ íquebe de que cayúnibe ni para guyaanabe binnilídxibe o nabe gastiʼ naca pa gúnibe ni o coʼ. Peru, ni guníʼ Jiobá gaca que la? bisihuinni de que cadi naquiiñeʼ diʼ gúninu sti dxiiñaʼ gadxé lu ca hora ni maca nexheʼ para guni adorarnu laabe (Núm. 15:32-36).
3 Gudxíʼlunu guendanagana ca. Stale tu ruyubi ximodo guni ti cadi gucueeza xhiiñacaʼ laacaʼ de checaʼ guiráʼ ca guendaridagulisaa. Nuu tu huayuni stipa de guiniʼne patrón stiʼ, ruchaa turnu stiʼ ne tuuxa compañeru ra dxiiñaʼ, ruyubi sti dxiiñaʼ o ruyúbicaʼ modo ibánicaʼ jma sensiu. Dxandíʼ, ca stipa raca pur gaca adorar Dios sicaríʼ la? laabe riuláʼdxibe cani (Heb. 13:16).
4 Gaca ca tariá stiʼ scuela laaca zanda guedaneni xiixa guendanagana. Na ti baʼdudxaapaʼ: «runeʼ caadxi de ca tariá stinneʼ ante chaa guendaridagulisaa ne xcaadxi ora ibiguetaʼ ralidxeʼ». Nuu tiru ora ca baʼduʼ scuela ca qué ganda guilúxecaʼ ca tariá sticaʼ dxi raca guendaridagulisaa la? ca bixhózecabe riníʼnecaʼ ca maistru ne rusiénecabe laacaʼ de que para binnilídxicabe, chécabe ca guendaridagulisaa ca nabé risaca cani stale.
5 Gacanésaanu ne quixhechaahuinu cani chigúninu la? riquiiñeʼ cani stale para chuʼ guirani listu ti ganda chindá ca binnilídxinu ante guzulú ca guendaridagulisaa ca (Pro. 20:18). Cani nahuiiniʼ ca la? laaca zanda guiziidicaʼ gácucaʼ lari ne chuʼcaʼ listu dede ante. Cani napa xiiñiʼ naquiiñeʼ gusiidicaʼ laacabe guiráʼ ora pabiáʼ nga risaca chécabe guiráʼ ca guendaridagulisaa ca (Pro. 20:7).
6 Ra maʼ ziyaca jma nagana modo nabani binni yanna la? naquiiñepeʼ nga chuunu guiráʼ ca guendaridagulisaa stinu. Cadi gusaananu de gúʼyanu ca cosa ca modo ruuyaʼ Jiobá, ne ni naquiiñeʼ guisaca jma lu guendanabani stinu nga cadi guiáʼdxanu ca guendaridagulisaa ca (Heb. 10:24, 25).