Ñee zanda acaneluʼ tuuxa la?
1 Jiobá nabé ruyubi modo acané xpinni ni qué rusaana laa (2 Cró. 16:9; Isa. 41:10, 13). Isaías uníʼ de que nácabe casi ti pastor ni nadxii ca dendxuʼ stiʼ ora uníʼ ca diidxaʼ riʼ: «Ne nabe zutópabe ca dendxuʼ huiiniʼ ca; ne ndaaniʼ nabe zinebe laacaʼ. Ne stale cuidadu zinebe cani cugadxi» (Isa. 40:11). Idúʼyanu ximodo zanda acanenu xcaadxi ne endarannaxhii, casi modo runi Jiobá.
2 Ucané cani nacubi. Zanda udíʼnanu cani nacubi ra guni invitarnu laacabe chuʼnécabe laanu nayecheʼ ti ratu ne güinenu laacabe diidxaʼ ni acané iniisicabe lu Stiidxaʼ Dios (Pro. 13:20). Ti bíchinu rietenalaʼdxiʼ modo ucanécabe laa dxi bizulú guyé ca endaridagulisaa ca, nabe: «Stale biaje la? ti familia nabé biʼniʼ invitarcaʼ naa ora maʼ chiguundacaʼ Biblia ne binnilídxicaʼ. Ne ra ziyannaʼ jma de lu Stiidxaʼ Dios la? nabé biʼniʼ invitar ti endaxheelaʼ ni zaniruʼ lu endarucheeche diidxaʼ naa ireeniaʼ laacaʼ iráʼ dxi. Nabé uyuláʼdxidu inidu de lu Stiidxaʼ Dios». Ne uníʼrube sicaríʼ: «Ante chuaanisa la? nabé yezayaʼ ca viernes ne sábadu huaxhinni. Peru despué, ra maʼ bidxaagaʼ ca bicheʼ ne ca bizanaʼ la? bidieʼ cuenta de que laacabe nga ca xhamiguaʼ ni caquiiñeʼ». Ne stale endarannaxhii ucané ca binni ridagulisaa que laabe, ngue biquiiñeʼ para uca fe stibe jma naguidxi, yanna maʼ rúnibe dxiiñaʼ Betel (Col. 2:6, 7).
3 Acané saanu para iniisinu. Zándaca rudiʼnu cuenta de que naquiiñeʼ udíʼnanu ca bíchinu ne ca bizánanu ora cadíʼdicaʼ ra nagana. Ñanda niguixhe chaahuiluʼ cani rúniluʼ ti ñanda ñacaneluʼ tuuxa ni huará nucheeche diidxaʼ pur teléfono, o ñanda ñuni invitarluʼ laabe ora gúʼndaneluʼ tuuxa Biblia ne nineluʼ ni caziidiʼ ca ra lídxibe la? Ñee ñulaʼdxiʼ tuuxa ni napa xiiñiʼ nahuiiniʼ ñacaneluʼ laa ora maʼ ziucheeche diidxaʼ la? Ñee nuu tuuxa ni rucheeche diidxaʼ natuí ni ñanda ñacaneluʼ laa ora ibiguetaʼ chiganna tuuxa o para ucheechebe diidxaʼ sti modo la? Ni zucaa laanu uyúbinu ximodo iniisi ca bíchinu ne ca bizánanu nga, icá íquenu acanenu laacabe ne stale endarannaxhii (Rom. 14:19).
4 Ora racanenu ca xpinni Jiobá ne stale endarannaxhii casi rúnibe la? racané saanu para chuʼnu naguidxi, racanenu chuʼ ca binni ridagulisaa ca tobi si ne endarannaxhii ne zacá rusisácanu Bixhózenu ni nuu ibáʼ (Efe. 4:16).