Usihuínninu rizaaláʼdxinu binni ora gábinu laacaʼ jneza ni cayúnicaʼ
1 Ora de idubi ladxidoʼno rábinu binni jneza ni cayuni la? nga rucaa laacabe gunirúcabe ni jneza ne rusiécheni laacabe. Stale de cani rucheeche diidxaʼ huayuuyacabe riuulaʼdxiʼ binni ucaadiaga ne gabisícabe laacaʼ chupa chonna diidxaʼ ni uguu gana laacaʼ ora maʼ ziucheechecabe diidxaʼ. Yanna, ximodo zanda gábinu binni jneza ni cayuni ora maʼ ziucheechenu diidxaʼ yaʼ.
2 Gatananu. Bibiguetaʼ si Jesucristu ibáʼ, biiyabe jneza dxiiñaʼ biʼniʼ gadxe neza binni ridagulisaa ni uyuu Asia Menor dxiqué (Apo. 2:2, 3, 13, 19; 3:8). Zacaca nga laanu, pa dxandipeʼ rizaaláʼdxinu ca binni nabeza neza ra rucheechenu diidxaʼ la? nga zucaa laanu uyúbinu modo ganda uguʼnu gana laacabe. Laga pa idúʼyanu ti jardín izáʼ sicarú ra lidxi tuuxa binni o idúʼyanu tuuxa binni cusihuinni nadxii xiiñiʼ, o iree tuuxa binni idxagalú laanu galán de cuxidxihuiiniʼ yaʼ. Ñee riquiiñenu cani maʼ bieeteʼ riʼ para ganda uguʼnu gana binni la?
3 Ucaadiaga chaahuinu. Ora maʼ canaucheechenu diidxaʼ la? galán nga inabaʼ diidxanu binni xiixa ni ucaa laacabe icábicabe laanu ne ucaadiaga chaahuinu ora iníʼcabe, zacá zusihuínninu runi respetarnu laacabe (Rom. 12:10). Dxandipeʼ zaníʼcabe xiixa ni ucaa laanu uguʼnu gana laacabe ne nga zanda acané laanu inínenu laacabe de ni runibiáʼcabe.
4 Iníʼ ique chaahuinu xi ininu. Xi riquiiñeʼ gúninu pa binni ca iníʼ xiixa adxé de ni rusiidiʼ Biblia yaʼ. Cadi gábicanu laabe cadi jneza ni riníʼ íquebe, sínuque udiʼnu xquíxepeʼ laabe pur uniʼbe ni riníʼ íquebe ne gábinu laabe: «Cadúʼyadu nabé riuuláʼdxiluʼ tema riʼ» (Col. 4:6). Ne ora chuʼ tuuxa acalaʼdxiʼ ucaalú laanu pur ni caninu la? zanda gábinu laabe galán nga riuuláʼdxibe de tema caninu ca. Ora ininu ne diidxaʼ nadóʼ, zanda ucuudxinu tuuxa binni ni qué riuulaʼdxiʼ ucaadiaga ca diidxaʼ nacubi ne galán zinenu ra nuu (Pro. 25:15).
5 Ora de ladxidoʼno gábinu binni jneza ni cayuni la? zucaani laacabe gunirúcabe ni. Ne ora gúninu zacá rusisácani Jiobá ne zanda ucaani binni chuladxiʼ ucaadiaga ca diidxaʼ stiʼ Reinu.