Usihuínninu rizaaláʼdxinu binni ra inínenu laacabe de ni caquiiñecabe
1 Apóstol Pablu nabé uníʼnebe stale binni de ca diidxaʼ nacubi ne galán stiʼ Cristu, peru ante gúnibe ni uníʼ íquebe modo naca binni ne ximodo riníʼ íquecaʼ (1 Cor. 9:19-23). Laanu laaca riquiiñeʼ gúninu casi bíʼnibe. Ne iníʼ íquesinu caadxi zánnanu ximodo iquiiñenu cani reeda lu Xhiiñaʼ Reinu ni Rúninu para inínenu ca binni ni nabeza neza ra rucheechenu diidxaʼ de ni caquiiñeʼ gánnacaʼ. Ante uxhídxinu ra puertaʼ lidxi binni, zándaca gúʼyanu xiixa ni gabi laanu xi nga riuulaʼdxiʼ binni nabeza ra yoo ca ne zanda inínenu laabe de laani. Peru nuu sti modo zanda inínenu binni de ni caquiiñeʼ.
2 Ucaadiáganu ni icabi binni laanu. Ora riucheechenu diidxaʼ, rinabadiidxanu binni xiixa ne ribézanu icábicabe laanu. Xi rúniluʼ ora icábibe lii yaʼ. Rucaadiágasiluʼ laabe ne riniʼluʼ ni maca cá íqueluʼ iniʼluʼ la? o riníʼneluʼ laabe de ni racaláʼdxibe gánnabe. Pa dxandíʼ rusisácaluʼ ni icabi binni lii, zanda inabadiidxaruluʼ laabe xcaadxi cosa para gánnaluʼ xipeʼ nga riníʼ íquebe (Pro. 20:5). Zacá zanda ganna chaahuiluʼ xi ndiʼ naguu laabe xizaa ne iníʼneluʼ laabe tobi de ca cosa ni chiguni Reinu stiʼ Dios.
3 Ra gúninu cani maʼ uninu ca, zusihuínninu racaláʼdxinu inínenu binni de ti tema ni qué niníʼ íquenu ora bixhídxinu ra lídxibe. Zándaca ora uzulunu ininu de xiixa ni bininá binni ni biree lu noticia, peru binni que uzeeteʼ de xiixa ni uca neza ra lidxi o xiixa ni bizaacabe. Pa aca ndiʼ la? zanda inínenu laabe ti tema zeeda lu Biblia de ni naguu laabe xizaa, zacá zusihuínninu racaláʼdxinu acanenu laabe (Fili. 2:4).
4 Inínenu binni de ni caquiiñeʼ. Pa binni ca inabadiidxaʼ xiixa zanda icábinu laabe despué, ora maʼ bíʼndanu jma de ni unabadiidxabe laanu. Laaca zanda usaananenu laabe ti libru o ti folletu ni zeedaníʼ jma de ni caquiiñeʼ gánnabe. Pa gúninu zacá la? zusihuínninu rizaaláʼdxinu binni ne racaláʼdxinu acanenu laacabe para gunibiáʼcabe Jiobá (2 Cor. 2:17).