Usihuínninu rizaláʼdxinu binni ra gúʼyanu xi caquiiñecabe
1 Jiobá Dios ne Jesucristu nánnacabe xipeʼ ndiʼ caquiiñeʼ binni ne racanécabe laacaʼ, peru irútiruʼ tu zanda guni nga (2 Cró. 16:9; Mar. 6:34). Yanna, pa udiʼnu cuenta xii nga riuulaʼdxiʼ binni ne xii riguu laacabe xizaa la? qué zaca diʼ nagana para laanu idxélanu xidé inínenu laacabe ora maʼ ziucheechenu diidxaʼ.
2 Biiyaʼ chaahuiʼ xi caquiiñecabe. Jesús la? nabé biiyaʼ chaahuibe xi caquiiñeʼ binni (Mar. 12:41-43; Luc. 19:1-6). Zacaca laanu, pa ante de uxhídxinu ra puertaʼ lidxi binni gúʼyanu cá xiixa cueʼ lídxicabe ni ruluíʼ de sti religión laacabe, o cá xiixa cueʼ xcárrucabe, o lu xpátiucabe nexheʼ xiixa ni riguite xcuidi la? zánnanu ximodo uzulunu inínenu laacabe ca diidxaʼ nacubi ne galán stiʼ Dios ca jma jneza.
3 Modo nuu lú ti binni ne modo iniʼbe zudiʼnu cuenta xi cayácabe o xi caquiiñebe (Pro. 15:13). Zándaca caquiiñebe chuʼ tu quixhedxí ladxidoʼbe purtiʼ guti tuuxa binnilídxibe o cadíʼdibe xiixa endananá. Ne zándaca dede udiibe xquíxepeʼ laanu ra gúʼndanenu laabe ti textu ni caníʼ de ni caquiiñebe (Pro. 16:24). Ñee huadxélanu tuuxa binni maʼ ziree ralidxi o ziné ti xiiñiʼ cayuunaʼ lu ná la? Pa zacá ni, ni jma neza nga gábinu binni ca zabiguétanu ra nuu sti hora. Pa laanu gápanu xpiaʼnu ne usihuínninu riénenu laabe o «ilaselaʼdxi saa[nu], [...] casi enda biʼchiʼ» la? zándaca ucaadiágabe laanu ora ibiguétanu sti biaje (1 Ped. 3:8).
4 Guníʼ de ni runibiáʼ binni. Ora biiyaʼ Pablu ndaaniʼ guidxi Atenas nuu ti altar ra cá «Para dios ni qué runibiáʼ du», laabe bichaabe modo uníʼnebe laacaʼ ca diidxaʼ nacubi ne galán que ne gúdxibe laacaʼ: «Ne dios ni rusisaca tu sin gunibiáʼ tu ca, nga pe nga canayué stiidxaʼ». Modo uníʼnebe ca binni que la? qué ñuninabe laacaʼ, ngue bicaa laacabe ucaadiágacabe ne guni crécabe Stiidxaʼ Reinu stiʼ Dios ne ácacabe xpinni Cristu (Hech. 17:23, 34).
5 Zaqueca nga laanu, pa guuyaʼ chaahuinu xi caquiiñeʼ binni la? zudiʼnu cuenta xii ndiʼ riuuláʼdxicabe ne zacá zaninenu laacabe de ni racaláʼdxicabe gánnacabe. Laaca naquiiñeʼ inabadiidxanu ni caninenu ca para ganda iniʼbe ximodo ruuyabe ni caninu ca. Iníʼ íquenu de caadxi textu ni zeeda ndaaniʼ Biblia ni zanda acané laabe chuláʼdxibe jma ni caninu ca (Pro. 20:5). Guuyaʼ chaahuinu xi caquiiñeʼ binni ne usihuínninu dxandipeʼ racaláʼdxinu acanenu laacabe, nga zacané laanu ucheechenu ca diidxaʼ nacubi ne galán ca jnézapeʼ.