Quixhe íquenu gúʼndanenu binni Biblia
1 «Laindisa lú, laguuya ca ñaa ca guʼya tu ma nuu cani para iree cani guela», zacá gudxi Jesús cani guzané laa (Juan 4:35). Ca diidxaʼ ni guniʼbe que cayaca cani ca dxi nabáninu riʼ.
2 Pur guiráʼ ca binni ni cayuunisa guiráʼ iza ne cayácacaʼ xpinni Cristu, rihuinni dxichi nuuruʼ binni racalaʼdxiʼ guiziidiʼ xi ndiʼ na Jiobá gúnicaʼ. Pa riuuláʼdxinu gúʼndanenu binni Biblia, xi zanda gúninu yaʼ.
3 Quixhe íquenu ugaandanu ni. Primeru naquiiñeʼ quixhe íquenu cadi gusaana de gúʼndanenu binni Biblia. Guiníʼ íquenu ni gudixhe íquenu ca ora maʼ zigucheechenu diidxaʼ. Ni dxandíʼ nga guiranu naquiiñeʼ guyúbinu modo gúninu jma lu xhiiñaʼ Dios ne gúʼndanenu binni Biblia, purtiʼ ngapeʼ nga dxiiñaʼ stinu: gusíʼdinu binni ne cadi gucheechesinu diidxaʼ (Mat. 24:14; 28:19, 20).
4 Xcaadxi cosa ni zanda gacané laanu. Naquiiñeʼ guinábanu Dios lu oración gacané laanu. Nuu tiru huadxélanu binni ni canabaʼ Dios chuʼ tu gacané laa para gunibiáʼ Dios. Nga runi, pa guinábanu Dios gacané laanu guidxélanu binni ni racalaʼdxiʼ guiziidiʼ de laabe la? zaguu ndaayabe laanu (Ageo 2:7; Hech. 10:1, 2).
5 Ti gunaa Testigu gunabaʼ lu oración stiʼ guʼndané tuuxa binni Biblia. Xi bíʼnibe para gunda bíʼndanebe binni Biblia yaʼ. Bisaanabe ra dxiiñaʼ stibe caadxi tratadu ni láʼ Ñuláʼdxiluʼ niziidiluʼ jma de lu Biblia la? Qué nindaa bidxiña ti gunaa gucuaa ti tratadu ne biindani. Ora bizulú bicaa gunaa riʼ neza deche tratadu que bidxiña bizánanu que laabe ne qué nindaa bizulú biindané laabe Biblia.
6 Laaca zanda guinábanu cani rucheeche diidxaʼ ni nanna modo guzulú guʼndané binni Biblia gacané laanu ti ganda gúʼndanenu tuuxa binni. Cadi gusaana de guinábanu Dios gacané laanu, ne ora guidxélanu ti binni la? guzulúcanu gúʼndanenu laa. Pa gúninu zacá la? qué zandaa zúʼndanenu binni Biblia ne nga zusiecheʼ laanu.