Ximodo zanda gacanenu cani cheʼ ra chiguietenaláʼdxinu guendaguti stiʼ Jesús
1. Xi guiráʼ cosa nabé risaca nga zaziidiʼ binni 22 stiʼ marzo 2008.
1 Millón de binni de guidubi naca Guidxilayú zaziidicaʼ stale cosa nabé risaca 22 stiʼ marzo 2008. Cani cheʼ ra chiguietenaláʼdxinu guendaguti stiʼ Jesús ca zánnacaʼ pabiáʼ nadxii Jiobá binni, ngue runi bidiibe xiiñibe gati pur guiráʼ xixenu (Juan 3:16). Laaca zaziidicabe ximodo chiguiquiiñeʼ Jiobá Reinu stiʼ para gaca ni na lu guidubi naca Guidxilayú (Mat. 6:9, 10). Ne ora guidxaagalunu laacabe la? zuuyaʼ dxíchicabe pabiáʼ nadxiisaa ca binni nuu ndaaniʼ xquidxi Dios ne zuuyacabe nuucaʼ tobi si (Sal. 133:1).
2. Ximodo zanda gacanenu cani rúʼndanenu ni cheʼ ra chiguietenaláʼdxinu guendaguti stiʼ Jesús.
2 Cani rúʼndanenu de Biblia. Cumu zie binni ni nacubi cusiidinu laa de Biblia la? galán pa chinenu laacabe gunibiáʼcabe xcaadxi bíʼchinu ne bizáʼnanu ni nuu raqué, gusiénenu laacabe ximodo raca ca guendaridagulisaa stinu ne guluinu laacabe ximodo nga ndaaniʼ Yoo stiʼ Reinu. Ne ni gudii libana ca zaguu gana laacabe cadi gusaanacabe de guiniisicabe jma lu stiidxaʼ Dios, ne ni guiniʼbe ca zanda guzeetenu ni para uguʼnu gana laacabe.
3. Xi zanda gúninu para uguʼnu gana cani maʼ qué rucheeche diidxaʼ ni cheʼ dxi guietenaláʼdxinu guendaguti stiʼ Jesús.
3 Cani maʼ bisaana de gucheeche diidxaʼ. Dxi riʼ laaca zie caadxi de cani maʼ bisaana de gucheeche diidxaʼ. Xiñee qué guidxíñanu laacabe ne gudiʼ nanu laacabe yaʼ. Peru naquiiñeʼ guiníʼ íquenu xi gábinu laacabe ne cadi guininu o guinabadiidxanu xiixa ni gusituí lúcabe. Ca binnigola stiʼ ca binni ridagulisaa laaca zaguixhe íquecaʼ chigánnacaʼ laacabe purtiʼ guyécabe ra bietenaláʼdxinu guendaguti stiʼ Jesús tiidiʼ si caadxi dxi, ne zaguucaʼ gana laacabe pur stipa bínicabe para guyécabe ne zuni invitarcaʼ laacabe chécabe sti guendaridagulisaa ni gápanu.
4. Xi zanda guni cada tóbinu para gacanenu cani chiganna laanu.
4 Cani chiganna laanu. Zándaca laaca zie caadxi de cani runibiaʼnu o ca binnilídxinu ni gudixhe ique guidagulisaané laanu dxi ca, o ca binni ni gucuaa invitación ni gudíʼsinu. Pa gúʼyanu tuuxa ni qué racabiaʼnu la? galán gudiʼ nanu laabe ne gábinu laabe tu lanu. Zándaca deruʼ primé guendaridagulisaa nga chebe. Ne ora maʼ caninenu laabe zándaca gábibe laanu paraa nabézabe ne ximodo guidxélanu laabe; zacá zanda chigánnanu laabe o guinínenu laabe pur teléfono tiidiʼ si caadxi dxi de guietenaláʼdxinu guendaguti stiʼ Jesús, ti chuuláʼdxibe guiziidibe jma ne guzulú gúʼndanenu laabe de Biblia.
5. Xi zanda guininu para guzulú gúʼndanenu binni de Biblia.
5 Ora chigánnanu laacabe la? zanda guininu de ni bieeteʼ lu libana ni gudiʼdiʼ ra bietenaláʼdxinu guendaguti stiʼ Jesús para guluinu laacabe ni zeeda lu libru Xipeʼ ndiʼ cusiidiʼ Biblia. Bíʼchinu ni gudii libana ca zuundabe textu stiʼ Isaías 65:21-23. Zanda guzéʼtenu de textu ni guniʼbe ca ora chigánnanu binni ca ne gábinu laa: «Chigulué lii xcaadxi ndaayaʼ ni zanda gápanu purtiʼ guti Jesús pur laanu». Óraca zanda gúʼndanenu laabe yaza 4 ne 5 stiʼ libru Xipeʼ ndiʼ cusiidiʼ Biblia. O laaca zanda guininu: «Stale tu rinabadiidxaʼ padxí ndiʼ gaca ni na ca diidxaʼ riʼ», ne despué guluinu laabe capítulo 9 ne gúʼndanenu laabe párrafo 1 dede 3. Sti modo nga guinísinu de ni bizeeteʼ bíʼchinu lu libana stiʼ, de racá guluinu laabe libru Xipeʼ ndiʼ cusiidiʼ Biblia ne gusiénenu laabe ximodo riuundaʼ ni.
6. Xi zanda gúninu ora guietenaláʼdxinu guendaguti stiʼ Jesús casi modo biʼniʼ mandarbe yaʼ.
6 Nuu stale modo zanda gacanenu cani cadúʼndanenu de Biblia, cani maʼ bisaana de gucheeche diidxaʼ ne xcaadxi binni chiganna laanu ra chiguietenaláʼdxinu guendaguti stiʼ Jesús (Luc. 22:19). Dxandipeʼ zaguu ndaayaʼ Jiobá guiráʼ stipa ni gúninu lu xhiiñaʼ Reinu.