Guidxaagalunu laacabe galán
1. Padxí nga galán guinínenu binni de Dios, ne xiñee.
1 Galán dxi guietenaláʼdxinu guendaguti stiʼ Cristu para guinínenu binni de Dios. Iza riʼ zándaca zie jma de chii millón binni chigucaadiaga ximodo bisihuinni Jiobá ne Jesús nadxiicaʼ binni ra gudíxecaʼ pur laanu (Juan 3:16; 15:13). Ne laaca zánnacabe xi guiráʼ ndaayaʼ zanda guicaacabe pur ni bidii Dios laanu riʼ (Is. 65:21-23). Peru cadi ni chigudii si libana ca nga zanda guiniʼné cani biʼniʼ invitarnu de Dios. Guiráʼ cani rucheeche diidxaʼ zanda gúnini ra guidxaagalucaʼ laacabe galán (Rom. 15:7).
2. Xi zanda gúninu para guni sentir ca binni ni chiganna laanu galán.
2 Lugar de cuinu lugar stinu ne cuézanu dede ora guzulú guendaridagulisaa ca la? jma galán gudíʼnanu ca binni ni chiganna laanu ni zuba gaxha de laanu ne guininu tu lanu. Zándaca cadxibi huiinicabe purtiʼ qué gánnacabe ximodo chigácani. Nga runi galán guxidxinenu laacabe ne ora ugapadiúxinu laacabe gusihuínninu cayéchenu yegánnacabe laanu, ti zacá guni sentírcabe galán. Zándaca guyécabe purtiʼ gucuaacabe ti invitación. Para gánnanu pa zacá ni la? galán guinabadiidxanu laacabe pa deruʼ primé biaje nga zeedacabe ti guendaridagulisaa o pa runibiáʼcabe tuuxa ni ridagulisaanenu. Zanda gábinu laacabe pa zabinenu laacabe ne guidúʼndanenu laacabe lu Biblia stinu ne libru ra cá diidxaʼ riuundaʼ stinu. Pa chiguietenaláʼdxinu guendaguti stiʼ Cristu ndaaniʼ Yoo stiʼ Reinu, galán guluinu laacabe xcaadxi lugar nápani. Guiluxe si libana ca, guinabadiidxanu laacabe pa nuu xiixa ni qué ñénecabe. Pa naquiiñeʼ guireʼnu nagueenda purtiʼ chiguiquiiñeʼ sti neza binni ridagulisaa Yoo stiʼ Reinu ca la? galán guinabadiidxaʼ laacabe: «Ñuuladxeʼ ñannaʼ ximodo biiyaluʼ guendaridagulisaa riʼ. Padxí zanda guininu sti biaje». De racá biiyaʼ padxí ne pora chigánnaluʼ laabe. Pa cheʼ ca xpinni Cristu ni maʼ qué rucheeche diidxaʼ la? ca binnigola ca naquiiñeʼ gacanecaʼ ne uguucaʼ gana laacabe.
3. Xiñee naquiiñeʼ quixhe íquenu guidxaagalunu binni galán.
3 Stale de ca binni ni chiganna laanu, primeruʼ biaje nga chiguuyacabe pabiáʼ nayecheʼ nuu ca xpinni Jiobá, nuudxicaʼ ne nuucaʼ tobi si, casi ñaca maʼ nuucaʼ ndaaniʼ ti paraísu (Sal. 29:11; Is. 11:6-9; 65:13, 14). Xi zaníʼ ique ca binni ni chiganna laanu de neza binni ridagulisaa ra riuunu yaʼ. Zaníʼcabe galán de laanu pa guidxaagalunu laacabe galán.