Udiʼnu xquíxepeʼ Jiobá pur endarannaxhii ni qué rusaana stiʼ
Guendaguti stiʼ Cristu zietenaláʼdxinu ni 24 stiʼ marzo
1. Ximodo hualuíʼ Jiobá endarannaxhii ni qué rusaana stiʼ laanu.
1 Tobi de cani bicaa ti salmo uníʼ sicaríʼ: «Lagudii xquíxepeʼ Jiobá pur guendarannaxhii ni qué rusaana stiʼ, ne pur ca guendaridxagayaa ni bíʼnibe para ne xiiñiʼ binni» (Sal. 107:8). Endarannaxhii ni qué rusaana stiʼ Dios rucaa ni laabe gúnibe jma que guiénesibe binni. Ne ndiʼ rihuinni ni lu ca diidxaʼ ni cusisaca laabe riʼ: «Guendarannaxhii ni qué rusaana stiluʼ, Jiobá, gucané ni naa» (Sal. 94:18). Biiyaʼ pabiáʼ ndiʼ naroʼbaʼ endarannaxhii ni qué rusaana bisihuinni Jiobá ra bidiibe tobi lucha Xiiñibe pur iranu (1 Juan 4:9, 10).
2. Ximodo zanda usihuínninu de que cudiʼnu xquíxepeʼ Jiobá.
2 Cumu maʼ nánnanu zeeda idxiña dxi guietenaláʼdxinu guendaguti stiʼ Cristu la? ximodo zanda usihuínninu de que cudiʼnu xquíxepeʼ «Dios de guendarannaxhii ni qué rusaana» ca yaʼ. (Sal. 59:17.) Iranu naquiiñeʼ cueenu tiempu para iníʼ íquenu de ca últimu dxi bibani Jesús lu Guidxilayú riʼ (Sal. 143:5). Zanda chinándanu ni maʼ nexheʼ ra guiuundaʼ Biblia para ca dxi guietenaláʼdxinu guendaguti stiʼ Jesús ni zeeda lu folletu Examinando las Escrituras diariamente 2005, ne pa ganda la? zanda gúʼndanu xi ná xcaadxi libru ni caníʼ de laani, casi ni zeeda lu capítulo 112 dede 116 stiʼ libru El hombre más grande. Iníʼ ique chaahuinu de ca historia ca ne udiʼnu lugar guiaaziʼ cani ladxidoʼno ora maʼ cayúʼndanu (1 Tim. 4:15). Guni orarnu para iníʼ íquenu de Stiidxaʼ Dios la? cadi zuquídxisini ladxidoʼno sínuque zacá laaca zusihuínninu pabiáʼ nadxiinu Jiobá (Mat. 22:37).
3, 4. 1) Ximodo zanda gúninu casi biʼniʼ ca bíchinu ne bizánanu de Liberia. 2) Tu cá íqueluʼ guni invitarluʼ ra guietenaláʼdxinu guendaguti stiʼ Jesús.
3 Ucané xcaadxi ti udiicaʼ xquíxepeʼ Dios. Iza udiʼdiʼ ca la? guyé 16.760.607 binni ra bietenaláʼdxinu guendaguti stiʼ Jesús lu idubi naca Guidxilayú. Ndaaniʼ ti guidxi stiʼ Liberia, ca bíchinu ne bizánanu bicaacabe ra nuu xaíque guidxi que de que racaláʼdxicabe gúnicabe Guendaroxhi stiʼ Señor. Xaíque riʼ bidiibe lugar ácani ra riguítecabe futbol ne biʼniʼ mandarbe guieeteʼ ni ndaaniʼ guidxi que para gaca invitar iráʼ binni de raqué. Nécapeʼ gaayuʼ si ni rucheeche diidxaʼ nga nuu raqué la? guyé 636 binni ra bietenaláʼdxinu guendaguti stiʼ Jesús.
4 Casi laacabe, laanu laaca racaláʼdxinu guni invitarnu biaʼ gándatiʼ binni para cheʼ ra guietenaláʼdxinu guendaguti stiʼ Jesús. Xiñee qué guʼnuʼ ti lista ra ucaaluʼ lá ca binni ni racaláʼdxiluʼ guni invitarluʼ yaʼ. Zanda iquiiñeluʼ ca dibuju ni cá lu últimu yaza stiʼ ¡Despertad! 8 stiʼ marzo ne La Atalaya 15 stiʼ marzo 2005 para guni invitarluʼ laacabe. Stobi ni zanda guʼnuʼ nga usaananeluʼ laacabe ti invitación ra icá ne letra galán pora ne paraa chigaca ni. Ra maʼ zidxiña 24 stiʼ marzo ca bisietenalaʼdxiʼ ni laacabe ne biaanané laacabe ximodo chécabe.
5. Ximodo zanda acanenu cani maʼ ruundaʼ Biblia para checaʼ.
5 Ximodo zanda acanenu cani maʼ rúʼndanenu Biblia ni caʼruʼ checaʼ ca endaridagulisaa ca ti ganda iziidicabe xiixa lu ni chigaca riʼ yaʼ. Biquiiñeʼ chupa chonna minutu cada chiguundaneluʼ laacabe ti ganda usiéneluʼ laacabe pabiáʼ nga risaca endaridagulisaa riʼ. Zanda iquiiñeluʼ ni cá lu La Atalaya 15 stiʼ marzo 2004, yaza 3 dede 7, ne libru Razonamiento, yaza 83 dede 86.
6. Xiñee naquiiñeʼ idxagalunu cani cheʼ ra guietenaláʼdxinu guendaguti stiʼ Jesús.
6 Bidxagalú cani uca invitar. Ra guietenaláʼdxinu guendaguti stiʼ Jesús ca, bidxiña cani deruʼ zeʼ ne gudxi laacabe de que galanpeʼ nga beedacabe (Rom. 12:13). Urí gaxha de cani biʼniʼ invitarluʼ ne biiyaʼ gápacabe ti Biblia ne libru stiʼ diidxaʼ riuundaʼ. Cani jma naquiiñeʼ idxagalunu primé ca laanu nga tuuxa bíchinu o bizánanu ni maʼ qué rucheechecaʼ diidxaʼ purtiʼ bíʼnicabe stipa pur uyécabe. Ra gúʼyacabe pabiáʼ nadxiinu laacabe la? zándaca nga ucaa laacabe ibiguetaʼ idagulisaacabe sti biaje (Luc. 15:3-7). Dxi nabé risaca riʼ, naquiiñeʼ gúninu biaʼ gándatiʼ para acanenu xcaadxi binni idaagucaʼ laanu ne udiicaʼ xquíxepeʼ Jiobá pur «guendarannaxhii ni qué rusaana» ni nápabe laanu (Sal. 31:21).