«Laganaxhii Jiobá, guiratu, cani qué rusaana laabe» Guendaguti stiʼ Jesús Zietenaláʼdxinu ni 4 stiʼ abril
1 Maʼ raca iza la? dxi ca comunista biʼniʼ mandarcaʼ Ucrania, ca gobiernu de raqué guizáʼ bindaachicaʼ ca testigu stiʼ Jiobá, ne jmaruʼ si ora maʼ zeeda idxiña dxi gúnicabe Guendaroxhi stiʼ Señor, purtiʼ nuucaʼ gánnacaʼ paraa ridagulisaacabe. Ndiʼ la? nabé guluuni laacabe ra nagana purtiʼ ca gobiernu que nánnacaʼ padxí nga Rietenaláʼdxicabe Guendaguti stiʼ Jesús. Xi guni ca bíchinu riʼ yanna yaʼ. Ra lidxi ti bizánanu que la? nuu ti yoohuiiniʼ ndaaniʼ yu daʼ nisa. Cumu ca gobiernu que qué liica nidiʼdiʼ ndaaniʼ íquecaʼ pa nidagulisaacabe raqué la? bíʼnicabe casi ti puente lu nisa ni rindá de lu xíbicabe que. Nécapeʼ bitopa ñeecabe para gunda gurícabe ne nuucabe gaxha de ique yoohuiiniʼ que la? ne stale guendanayecheʼ Bietenaláʼdxicabe Guendaguti stiʼ Jesús ne qué ñuu tu nuchiiñaʼ laacabe.
2 Modo biʼniʼ ca bíchinu de Ucrania riʼ de guzuubacaʼ diidxaʼ para guietanaláʼdxicaʼ Guendaguti stiʼ Jesús que la? bisihuínnini pabiáʼ nga nadxiicabe Dios (Luc. 22:19; 1 Juan 5:3). Ora idxagalunu endanagana la? guiníʼ íquenu ni bizaaca ca bíchinu riʼ ti uguuni gana laanu, ne quixhe íquenu chuunu Guendaroxhi stiʼ Señor 4 stiʼ abril riʼ. Gúninu zacá la? zuluinu de que riníʼ íquenu casi Dabid ni biindaʼ sicaríʼ: «Laganaxhii Jiobá, guiratu, cani qué rusaana laabe» (Sal. 31:23, NM).
3 Gucané xcaadxi gusiniisi guendarannaxhii ni nápacaʼ Dios. Guendarannaxhii ni nápanu Dios ca laaca rucaani laanu guni inbitarnu xcaadxi binni cheʼ ra chiguietenaláʼdxinu Guendaguti stiʼ Jesús. Guiʼchiʼ ni rizaané Xhiiñaʼ Reinu ni Rúninu stiʼ febrero bicaa laanu gúninu ti lista de ca binni ni cá íquenu guni inbitarnu para dxi ca. Ñee maʼ cayuni inbitarluʼ cada tobi de cani nápaluʼ lu lista ca la? Cueenu tiempu para gusiénenu laacabe xiñee nga risaca guendaridagulisaa riʼ. Zándaca chuláʼdxicabe chécabe pa guiníʼnenu laacabe galán ora gusietenaláʼdxinu laacabe dxi ne hora chiguietenaláʼdxinu Guendaguti stiʼ Jesús, ne pa naquiiñeʼ la? zanda guininu de que laanu chicaanu laacabe.
4 Ora maʼ nuunu racá la? gúninu stipa pur ugapadiúxinu guiráʼ cani biʼniʼ inbitarnu ne idxagalunu laacabe galán. Ximodo zanda gacaneluʼ laacabe gusiniisicabe guendarannaxhii ni nápacabe Jiobá yaʼ. Guyuu listu ti icábiluʼ cani inabadiidxacabe. Ne pa gudii tiempu la? gudxi laacabe pa zaa gúʼndaneluʼ laacabe de Biblia. Biʼniʼ inbitar laacabe chécabe ca guendaridagulisaa ni rápanu. Ca binnigola ca naquiiñeʼ guni terdércabe cani maʼ qué rucheeche diidxaʼ ni cheʼ dxi ca. Zanda chigánnacabe ne uguucabe gana laacaʼ ti ibiguétacaʼ sti biaje, ne zanda gusiénecabe jma de xiixa ni bieeteʼ lu libana ni gudiʼdiʼ ra bietenaláʼdxinu Guendaguti stiʼ Jesús para guiníʼnecaʼ laacabe (Rom. 5:6-8).
5 Gúninu jma naguidxi guendarannaxhii ni nápanu Jiobá. Guiníʼ íquenu ni bisigaʼdeʼ Jiobá laanu ra biseendabe Jesús beeda gati pur laanu la? zúnini jma naguidxi guendarannaxhii ni nápanu laabe ne ni nápanu Xiiñibe (2 Cor. 5:14, 15). Ti bizánanu ni maʼ huayé stale biaje ra Rietenaláʼdxicabe Guendaguti stiʼ Jesús la? guniʼbe sicaríʼ guti si bixhózebe: «Ne stale guendanayecheʼ nga ribézadu dxi Guietenaláʼdxidu Guendaguti stiʼ Jesús. Cada iza tiidiʼ la? risaca ni jma para laadu. Rietenalaʼdxeʼ maʼ raca gande iza dxi bizulú bisaca jma para naa ni gudixe Jesús riʼ, dxi zuhuaa gaxha de ra nexhe gueʼtuʼ bixhozeʼ cayuuyadxie laa. Ante que la? ni gudixe Jesús ca biiyaʼ ni casi xiixa ni gune cresiaʼ. Maca nannaʼ guiráʼ ca textu ni caníʼ de laani ne randa rusieneʼ cani. Peru dede dxi bineʼ sentir pabiáʼ nga naná yuubaʼ stiʼ guendaguti la? ladxeduaʼ guizáʼ guyuu nayecheʼ pur ca ndaayaʼ ni chiguedané guendaguti ni nabé risaca ni bidii Jesús para laanu» (Juan 5:28, 29).
6 Ra maʼ zeeda idxiña dxi Guietenaláʼdxinu Guendaguti stiʼ Jesús iza riʼ la? cueenu tiempu para uguunu listu ladxidoʼno para laani (2 Cró. 19:3). Guiníʼ íquenu ra bibí para guiuundaʼ Biblia semana gaca ni, casi cá lu foyetu Examinando las Escrituras diariamente 2004 ne lu Calendario 2004. Nuu tu riulaʼdxiʼ guʼnda ca capítulo 112 dede 116 stiʼ libru El hombre más grande ora maʼ cayuundané binnilidxi. Xcaadxi la? ruyúbicaʼ jma ni caníʼ de laani ndaaniʼ ca libru ne guiʼchiʼ ni rudii moso ni nuu xpiaaniʼ ne ni runi jneza ca laanu (Mat. 24:45-47). Ora runi orarnu Jiobá de idubi ladxidoʼno la? zanda guzeetenu de ni gudixe Jesús riʼ (Sal. 50:14, 23). Ya, ca dxi mayaca Guietenaláʼdxinu Guendaguti stiʼ Jesús la? galán guiníʼ íquenu guiráʼ hora lu guendarannaxhii ni napa Jiobá laanu ne guyúbinu ximodo zanda guluinu de que dxandíʼ nadxiinu laabe (Mar. 12:30; 1 Juan 4:10).