Stale binni zaníʼ galán gúcani
1. Xiruʼ zándaca chuulaʼdxiʼ binni neca guyuuláʼdxicaʼ libana ca.
1 Xi laani yaʼ. Dxi rietenaláʼdxinu guendaguti stiʼ Cristu. Nga runi, cayúninu stale stipa pur guni invitarnu binni para checaʼ dxi ca. Ne qué ribézasinu chuuláʼdxicabe ni gucaadiágacabe, sínuque laaca chuuláʼdxicabe ni gúʼyacabe. Despué de guyé ti gunaa dxi rietenaláʼdxinu guendaguti stiʼ Cristu, bizeeteʼ pabiáʼ nachaʼhuiʼ ca binni nuu raqué ne pabiáʼ sicarú ne nayá lugar que, ne racanecaʼ guihuinni ni galán sin guiáxacaʼ. Xi rizíʼdinu de ni guníʼ gunaa riʼ yaʼ. Rizíʼdinu cadi ni chigudii si libana ca nga naquiiñeʼ gacané para guiníʼ binni galán guca guendaridagulisaa ca, sínuque guiranu nga zanda gacanenu para gácani galán (Efe. 4:16).
2. Xi zanda gúninu para guiníʼ binni guyuulaʼdxiʼ guendaridagulisaa ca.
2 Bidxagalú ca binni ni cheʼ dxi ca né stale guendanayecheʼ. Ora guidxaagaluluʼ ca binni ni cheʼ dxi ca, galán guxidxineluʼ ne ugapadiúxiluʼ laacabe. Ra gúniluʼ zacá, zaníʼcabe guyuuláʼdxicabe guendaridagulisaa ca (Juan 13:35). Nécapeʼ qué zanda guiníʼneluʼ guiráʼ binni ni cheʼ dxi ca la? zanda guidxíñaluʼ cani cuí gaxha de lii ne güíneluʼ laacaʼ diidxaʼ (Heb. 13:1, 2). Guyuu listu para guidxagaluluʼ tuuxa ni ruluíʼ qué runibiáʼ guirutiʼ, zándaca guyebe purtiʼ gucuaabe invitación ni bidii tuuxa laabe ca dxi biaaziʼ ni. Zanda guinabadiidxaluʼ laabe: «Ñee deruʼ primé biaje zeeda gánnaluʼ laadu la?». Pa zacá ni, gudxi laabe pa zaa cuíneluʼ laabe, ne pa nuu xiixa ni cadi cayénebe la? gudxi laabe zanda guinabadiidxabe lii. Yanna, pa naquiiñeʼ guireetu nagueenda purtiʼ chiguiquiiñeʼ sti neza binni ridagulisaa lugar ca la? zanda gaʼbuʼ laabe: «Ñuuladxeʼ ñannaʼ ximodo biiyaluʼ guendaridagulisaa riʼ. Ñee nuu modo ñanda ñuinu diidxaʼ sti dxi la?».
3. Xi zanda gúninu dxi ca para gacanenu cani maʼ qué ridagulisaané laanu.
3 Guidxagalunu cani maʼ qué ridagulisaané laanu né stale guendanayecheʼ. Zándaca cheʼ stale de ca xpinni Cristu ni maʼ qué rucheeche diidxaʼ dxi riʼ, dede né ca binni ni ridagulisaanecaʼ laanu ti biaje lu ti iza, dxi rietenaláʼdxinu guendaguti stiʼ Cristu. Gudxi laacabe galán bíʼnicabe stipa guyécabe ne bisihuinni nuuluʼ nayecheʼ pur biiyaluʼ laacabe (Rom. 15:7). Tiidiʼ si guendaridagulisaa riʼ, zanda cheʼ ca binnigola ca ralídxicabe para uguucaʼ gana laacabe chécabe ca guendaridagulisaa rápanu. Rinábanu lu ca oración ni rúninu gusísaca stale de ca binni ni cheʼ guendaridagulisaa ca Dios, ne cadi gúnicabe ni pur ni gucaadiagasícabe, sínuque gúnicabe ni ra gúʼyacabe «pabiáʼ jneza [rúninu]» (1 Ped. 2:12).