Chuʼnu listu para gúninu intiica ni jneza
1 Ante guzulú Jesús guseendaʼ ca discípulo stiʼ gucheeche diidxaʼ la? guleebe tiempu para gusiidibe laacaʼ ximodo gúnicani (Mat. 10:5-14). Laanu, neca nabé riuu xhiiñanu la? zabeendunu stale cosa galán pa cueenu chupa chonna si minutu para chuʼnu listu ante de gucheechenu diidxaʼ de yoo pur yoo (2 Cor. 9:6).
2 Ximodo chuʼnu listu. Para chuʼnu listu la? naquiiñeʼ gánnanu xidé caníʼ ca revista ne ca libru ni chigusaananenu binni. Laaca naquiiñeʼ guiníʼ íquenu xii nga ni riguu xizaa ca binni ni nabeza ladu ra rucheechenu diidxaʼ ne xi runi crecaʼ. Zanda gúʼyanu lu Xhiiñaʼ Reinu ni Rúninu ne lu libru Razonamiento a partir de las Escrituras para gánnanu ximodo guinínenu binni.
3 Galán gúninu pa gucaadiaga chaahuinu ca bizáʼnanu ora tiidicaʼ lu Guendaridagulisaa stiʼ Dxiiñaʼ Stinu para guluiʼcaʼ ximodo zanda gusaananu revista. Ne ora jma maʼ ziguizíʼdinu la? jma huaxiéʼ tiempu zaquiiñenu para gúʼndanu de ni chiguininu ante chigucheechenu diidxaʼ; peru neca zacá la? caquiiñeʼ gúninu ni jma jneza ne guiníʼ íquenu xi gábinu binni cada chigucheechenu diidxaʼ. Sti cosa ni naquiiñeʼ gúninu nga gúʼyanu ndaaniʼ portafoliu o bolsa stinu pa nuu cani zaquiiñenu para gucheechenu diidxaʼ.
4 Xi zanda gúninu para guietenaláʼdxinu ni chiguininenu binni yaʼ. Zanda guininu stale biaje ne nadipaʼ ni racaláʼdxinu guininu ti cadi guiaandaʼ ni laanu. Nuu caadxi xpinni Cristu rúnicaʼ zacá ora gúʼndanecaʼ binnilídxicaʼ. Nuu xcaadxi rucaacaʼ lu ti guiʼchiʼ ni chiguiniʼcaʼ ne ruuyaʼ cani ante chuʼcaʼ ra puertaʼ lidxi binni.
5 Xiñee galán gúninu ni. Ora chuʼnu listu dede ante la? racaneni laanu gucheechenu diidxaʼ jma jneza ne jma riuuláʼdxinu gúninu ni. Ne racaneni laanu cadi guidxíbipenu ora guinínenu binni. Zacá jma zúʼyanu ximodo gacanenu binni ca lugar de guiníʼ íquenu xi gábinu laabe. Ne pa nánnanu xiná ca revista o libru ni chigusaananenu binni la? jma ne gana zuluinu ni laacaʼ.
6 Biblia cayabi laanu chuʼnu listu para gúninu intiica ni jneza (Tito 3:1). Ne dxiiñaʼ ni jma galán gúninu yanna nga gucheechenu diidxaʼ. Ora chuʼnu listu dede ante modo gúninu ni la? cusihuínninu runi respetarnu binni ni cucaadiaga laanu ne Jiobá, Dios ni zinenu Stiidxaʼ (Isa. 43:10).