Cadi guiníʼ íqueluʼ qué zanda
1. Xiñee nuu tu raca nagana para laa guʼndané binni Biblia.
1 Ñee ridxíbiluʼ gúʼndaneluʼ tuuxa binni Biblia purtiʼ si riníʼ íqueluʼ qué zanda gusiiduʼ laabe la? Guyuu caadxi xpinni Dios ni bibani dxiqué, casi Moisés ne Jeremías, laaca guníʼ íquecaʼ qué zanda gúnicaʼ dxiiñaʼ bidii Dios laacaʼ (Éx. 3:10, 11; 4:10; Jer. 1:4-6). Yanna, xi zanda gúninu ora guni sentirnu zacá yaʼ.
2. Xiñee cadi naquiiñeʼ guiníʼ íquenu de yoo pur yoo si nga zanda gucheechenu diidxaʼ ne maʼ gadxé tu guʼndané binni Biblia.
2 Primeru naquiiñeʼ guietenaláʼdxinu qué ziuu dxi guinabaʼ Jiobá laanu xiixa ni qué zanda gúninu (Sal. 103:14). Cumu nánnabe zanda gusíʼdinu binni ne gacanenu laacaʼ gácacaʼ xpinni Cristu la? pur nga cayábibe laanu gúninu ni (Mat. 28:19, 20). Ne Jiobá cadi cusaanané dxiiñaʼ riʼ ca binni si ni jma nanna gucheeche diidxaʼ ne cani zanda si guni ni (1 Cor. 1:26, 27). Nga runi, cadi naquiiñeʼ guiníʼ íquenu de yoo pur yoo si nga zanda gucheechenu diidxaʼ ne maʼ gadxé tu guʼndané binni Biblia.
3. Ximodo racané Jiobá laanu para ganda gúʼndanenu binni Biblia.
3 Rusiidiʼ Jiobá laanu. Jiobá peʼ nga rusiidiʼ laanu para ganda gacanenu binni gaca xpinni Cristu (2 Cor. 3:5). Laabe riquiiñebe xquídxibe para gusiidibe laanu xii nga ni dxandíʼ ni qué riene ca binni ni jma nuu xpiaaniʼ ni nuu lu Guidxilayú riʼ (1 Cor. 2:7, 8). Lu Biblia ridúʼyanu xi guiráʼ modo biquiiñeʼ Jesús, Maestru ni jma nanna gusiidiʼ, para bisiidiʼ binni. Ne ra ridagulisaanu laaca rusiidicabe laanu gatigá. Laaca nápanu stale libru ne revista ni nabé jneza modo rusiene cani zeeda lu Biblia, casi libru Xipeʼ ndiʼ cusiidiʼ Biblia. ¡Yanna huaxa maʼ qué zaníʼ íquenu nagana nga gúʼndanenu binni Biblia!
4. Xiñee nánnanu dxandipeʼ zacané Jiobá laanu.
4 Jiobá gucané Moisés ne Jeremías para gunda bíʼnicaʼ dxiiñaʼ ni bidiibe laacaʼ (Éx. 4:11, 12; Jer. 1:7, 8). Nga runi, naquiiñeʼ guinábanu Jiobá gacané laanu. Nánnanu dxandipeʼ zacanebe laanu, purtiʼ ora rúʼndanenu binni Biblia racanenu laacaʼ gunibiáʼ chaahuicaʼ laabe ne nga nabé rusiecheʼ ladxidoʼbe (1 Juan 3:22). Pur nga, galán quixhe íquenu gúʼndanenu binni Biblia. Pa gúninu ni, ziuʼnu nayecheʼ ne zacaanu stale ndaayaʼ.