Guizíʼdinu de ca publicador ni maʼ xadxí rucheeche diidxaʼ
Nabé rusisácanu ca publicador ni maʼ xadxí rucheeche diidxaʼ. Nuu de laacabe maʼ ziné stale iza de cayuni xhiiñaʼ Jiobá. Xcaadxi zándaca deruʼ biziidiʼ gucheeche diidxaʼ jma jneza. Guirácabe maʼ bidiicabe cuenta Jesucristu nga riguixhe xi gaca ndaaniʼ congregación lu ca últimu dxi riʼ ne cayacané guireeche diidxaʼ ne guiziidiruʼ binni de Dios (Mat. 28:19, 20). Cumu maʼ stale iza nga cucheeche ca publicador riʼ diidxaʼ la? maʼ nápacaʼ «enda nandxóʼ stiʼ» Dios, ne nga huayacané laacaʼ gudxiilucaʼ intiica guendanagana (2 Cor. 4:7). Laacabe nabé riuuláʼdxicabe gusiidicabe binni cani maʼ biziidicabe ne laanu laaca zanda guizíʼdinu stale cosa de laacabe (Sal. 71:18). Ximodo zanda gúninu ni yaʼ.
Laga cucheechenu diidxaʼ. Para ganna cani nacubi gucheechecaʼ diidxaʼ jma jneza la? caquiiñeʼ guiziidicaʼ de cani maʼ xadxí rucheeche diidxaʼ. Stale ni zaziidicaʼ ra gúʼyacaʼ modo runi predicar ca publicador ni jma maʼ nanna gucheeche diidxaʼ. (Biiyaʼ Torre stiʼ ni rapa 15 stiʼ febrero 2015, tema «Cadi guireeluʼ gana de gucheecheluʼ diidxaʼ», guionna párrafo stiʼ subtítulo «Gucané cani nacubi».) Xi huabeenduluʼ ra huacheecheluʼ diidxaʼ né ca publicador ni maʼ xadxí runi dxiiñaʼ riʼ.
Galán pa guni invitarluʼ tobi de ca publicador ca para gucheechetu diidxaʼ juntu. Pa huarabe la? gatigá zanda chineluʼ tobi de ca binni ruundaneluʼ Biblia ra lídxibe para gúʼndaneluʼ laa raqué. Guiluxe gúʼndasitu zanda guinábaluʼ publicador ni maʼ xadxí rucheeche diidxaʼ ca gabi lii pa jneza biindaneluʼ binni ca ne gunabaʼ laa gudii lii xiixa conseju.
Gulee tiempu chúʼneluʼ laacabe juntu. Biʼniʼ stipa pur gunibiaʼluʼ ca publicador riʼ. Biʼniʼ invitar tobi de laacabe ora gápatu adoración en familia ne biʼniʼ entrevistar laa. Gunabadiidxaʼ laabe ximodo biziidibe de Biblia, ximodo huaguu Jiobá ndaayaʼ laabe, xi guiráʼ huadxaa ndaaniʼ congregación stitu dede dxi nácabe Testigu ne xi experiencia galán huayápabe ra cayúnibe xhiiñaʼ Dios. Pa huará publicador riʼ la? zanda cheluʼ ra lídxibe para gápatu adoración en familia raqué.
Cadi guiníʼ íqueluʼ zanda gacanécabe lii lu guiráʼ ni caquiiñeluʼ ne biene laacabe. Cásica guiranu, gadxé gadxé gracia nga bidii Dios cani maʼ napa stale iza de cucheeche diidxaʼ (Rom. 12:6-8). Cumu stale de laacabe maʼ huaniisicabe la? zándaca qué ziuunécabe laanu stale tiempu. Neca zacá, zanda guizíʼdinu de laacabe pur guiráʼ experiencia nápacabe ra qué huasaana de gúnicabe xhiiñaʼ Jiobá.