XI GÚNINU TI CADI GACA NANALÁʼDXINU BINNI
1 | Bisisaca guiráʼ binni
Biblia ná:
«Biaʼca risaca guiráʼ binni nezalú Dios, ne runi aceptar ca ni ridxibi laa ne rúnicaʼ ni jneza, intiica guidxi laacaʼ» (HECHOS 10:34, 35).
¿Xi riniʼni?
Guiráʼ binni risaca para Jehováa gastiʼ naca xi guidxi, xi raza, xi color laa o xi costumbre napa. Purtiʼ ni jma risaca para laabe nga ni riníʼ íquenu ne ni runi sentirnu. Biblia ná: «Binni ruuyaʼ ni rihuinni si, peru Jehová ruuyaʼ ni nuu ndaaniʼ ladxidóʼ binni» (1 Samuel 16:7).
Biʼniʼ stipa gúniluʼ ndiʼ:
Neca qué zanda guidúʼyanu xi nuu ndaaniʼ ladxidóʼ binni, peru zanda guidúʼyanu binni casi ruuyaʼ Jehová laacaʼ. Cadi guiníʼ íqueluʼ tobi si modo naca guiráʼ binni, biʼniʼ stipa gunibiáʼ chaahuiluʼ ximodo peʼ naca cada tobi. Pa gudiiluʼ cuenta qué riaba tuuxa lii pur raza o guidxi stiʼ, gunabaʼ Dios gudii stipa lii ti qué chuʼruʼ dxi guni sentirluʼ zacá (Salmo 139:23, 24). Gunna dxiichiʼ zanda gacanebe lii (1 Pedro 3:12).
a Lá Dios nga Jehová (Salmo 83:18).
«Qué huayuudxí guieeguaʼ ti güeru […]. Yanna huaxa maʼ nuaaʼ lade ca binni ni dxandíʼ nadxiisaa» (TITUS).