Racalaʼdxiʼ Dios gapa lii
LU BIBLIA nga zeeda ca conseju jma galán, purtiʼ Dios peʼ nga guníʼ xi guicá luni. Dxandíʼ, cadi ti libru de medicina ni, peru rudii ni laanu caadxi conseju para ganda gudxíʼlunu ca guendanagana stinu, para cadi guniná ca ni riníʼ íquenu laanu, para ganda gatadxí ladxidoʼno ne para chuʼnu jma galán pa huará cuerpu o guendabiaaniʼ stinu.
Ne laaca rusiidiʼ Biblia laanu ti cosa nabé risaca: Jehová,a Dios ni bizáʼ laanu, laa nga ni jma riene ni riníʼ íquenu ne ni runi sentirnu. Racaláʼdxibe gápabe laanu ne chuʼbe gaxha de laanu ora cadídinu ra nagana. Guníʼ ique ni ná guiropaʼ textu stiʼ Biblia ni zeeda raríʼ. Zaguu ca ni gana lii.
«Nuu Jehová gaxha de ca ni maʼ gucadé ladxidóʼ; rulabe ca ni maʼ biree gana» (SALMO 34:18).
«Purtiʼ naa, Jehová Dios stiluʼ, naazeʼ dxiicheʼ naluʼ ladu derechu; naa nga cayabeʼ lii: “Cadi guidxíbiluʼ. Naa zacaniaʼ lii”» (ISAÍAS 41:13).
Peru ¿ximodo racané Jehová laanu pa cayuniná xiixa guendahuará guendabiaaniʼ stinu yaʼ? Lu xcaadxi artículo ca zuuyaluʼ dxandíʼ peʼ racalaʼdxiʼ Jehová gapa laanu, nga runi rudiibe laanu guiráʼ ni zanda gacané laanu.
a Jehová nga lá Dios (Salmo 83:18).