Zalá iráʼ clase binni
1. Xi naquiiñeʼ gúninu ti ganda chuʼnu galán ne Dios.
1 Endanachaʼhuiʼ stiʼ Jiobá ni cadi naquiiñeʼ icaanu maʼ bixhaleʼ ni ti neza para ganda ilá binni, purtiʼ Dios «racalaʼdxi ulá irá binni, ne ganna ca ni dxandíʼ» (1 Tim. 2:3, 4). Ziuʼnu galán ne Dios, peru cadi pur raza stinu, bueltu ni nápanu, ne cadi purtiʼ nánnanu gúninu xiixa o pur modo rihuínninu, sínuque pur fe ni gápanu lu endaguti stiʼ Jesús (Juan 3:16, 36). Cumu runinenu Dios dxiiñaʼ la? naquiiñeʼ cueenu iráʼ ni ucaa laanu iníʼ íquenu qué zanda iziidiʼ binni de Jiobá, pa laabe nabe zanda ácacabe xpínnibe.
2, 3. Xi zacané laanu ti cadi guni juzgarnu binni pur modo rihuinni.
2 Cadi guni juzgarnu. Jiobá ruuyaʼ ximodo naca binni dede ndaaniʼ ladxidóʼ, sin iníʼ ique mal ne sin cuí binni (1 Sam. 16:7). Laabe laaca ruuyabe xi zanda ugaanda tuuxa. Nga runi, para laabe risaca iráʼ binni ni racalaʼdxiʼ guni ni nabe (Ageo 2:7). Ñee rúʼyanu iráʼ binni casi modo ruuyaʼ Dios la?
3 Zándaca ora chigucheechenu diidxaʼ zadxaaganu binni ni qué chuláʼdxinu modo laacaʼ. Zándaca nácucabe lari yuxe o ni huaxiéʼ galán, qué rigá guicha ruaacaʼ o nuu aníu xiicaʼ o ruaacaʼ o qué gápacaʼ lídxicaʼ. Xcaadxi zándaca iníʼnecaʼ laanu naduxhuʼ. Cadi ininu de que zándaca qué ziuu dxi guni adorárcabe Jiobá, jma jneza nga iníʼ íquenu galán de laacabe, «purti laanu laca guca nu nahuati chiqué, qué nuzuʼba nu stiidxa Dios, ne uzá renda nu» (Tito 3:3). Nga runi, zúninu stipa pur inínenu iráʼ binni, dede ne cani ruluíʼ qué zaná iziidiʼ.
4, 5. Xi rusiidiʼ ca ejemplu stiʼ Jesús ne Pablu laanu.
4 Ca ejemplu de primé siglu. Jesucristu ulee tiempu para ucané binni dede cani ruluíʼ maʼ qué zanda acachaahuicaʼ (Luc. 8:26-39). Neca qué ñuláʼdxibe iráʼ ca endaquéiquiiñeʼ ni biʼniʼ binni, bidiibe cuenta de que zanda guiaba binni lu cani (Luc. 7:37, 38, 44-48). Ngue runi biénebe ne biabe laacaʼ «purti nuu cabe casi dendxu sin pastor» (Marcos 6:34). Ñee zanda gúninu casi bíʼnibe ca la?
5 Bichácabe guié apóstol Pablu, udíñecabe laa ne uluucabe laa ndaaniʼ lidxi guiibaʼ (Hech. 14:19; 16:22, 23). Peru, ñee uníʼ íquebe maʼ qué risácabe pur cani úcabe que ne cunítisibe xtiémpube ndaaniʼ ca guidxi que ne ca binni de sti raza que la? Coʼ xa. Laabe bidiibe cuenta nuu binni nayá ladxidóʼ lade iracaʼ, ne udixhe íquebe idxélabe laacaʼ. Yanna, ñee zacaca nga rúʼyanu ca binni ni nuu neza ra rucheechenu diidxaʼ ni zeedacaʼ de sti ladu ne gadxé gadxé modo biniisicaʼ la?
6. Xi zuni ca binni ni deruʼ primé biaje zecaʼ ti endaridagulisaa stinu ora gúʼyacaʼ modo laanu.
6 Idxagalunu binni ne endanayecheʼ. Stale de cani nuu ndaaniʼ xquidxi Dios la? nuucaʼ nayecheʼ purtiʼ ca bíchinu o ca bizánanu bidxagalucaʼ laacabe ne endanayecheʼ neca cadi zuchaahuicabe galán ora uyécabe ti endaridagulisaa stinu. Ti hombre de Alemania ni qué rigá guicha ruaa, ne ziuulaʼ guicha ique dede lu xiʼqueʼ ne nabiidiʼ xhaba biuu ndaaniʼ ti Yoo stiʼ Reinu. Neca huaxiéʼ galán modo rihuínnibe, bidxagalúcabe laabe ne endanayecheʼ ra endaridagulisaa que. Bidxagayaabe stálepeʼ ne bibiguétabe sti semana que. Qué nindaa bichaabe modo laabe, bisaana de cúbabe gueza ne bichaganabe gunaa nabezanebe que. Despué la? irópacabe ne ca xiiñicabe bizulú cayúnicabe ni na Jiobá.
7. Ximodo zanda gúninu casi runi Dios stinu ni qué ribí binni.
7 Gúninu casi runi Dios stinu ni qué ribí binni, guni invitarnu iráʼ clase binni para icaa ca ndaayaʼ ni chigudii Dios pur endanachaʼhuiʼ stiʼ.
[Box on page 3]
«Risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:34, 35).