Naquiiñeʼ usíʼdinu binni Stiidxaʼ Dios
1 Apóstol Pablu biiyabe izáʼ naquiiñeʼ ucheechebe Stiidxaʼ Dios. Gúnnabe maʼ udixhe Jiobá ximodo ilá iráʼ clase binni pur rini risaca bixhii Jesús (1 Tim. 2:3-6). Ngue runi uniʼbe: «Naa napa xidé güe stiidxa Cristu lade iráʼ, cásica ra nuu cani nabeza ndaani guidxi roʼ, zaqueca ra nuu cani nabeza guiʼxhiʼ, cásica ra nuu cani nuu xpiaaniʼ, zaqueca ra nuu cani huaxiéʼ riene». Pablu biʼniʼ dxiiñaʼ riʼ sin niziilaʼdxiʼ para bisiidiʼ binni ca diidxaʼ nacubi ne galán ca (Rom. 1:14, 15).
2 Cásica Pablu, cani zinándanu Cristu yanna riʼ laaca nabé ruyúbinu modo ganda gábinu ca xpesínunu ca diidxaʼ nacubi ne galán ca. Cumu maʼ gaxha nuu dxi jma nagana ca la? riquiiñeʼ uyúbinu ca binni nayá ladxidóʼ ca jma nagueenda. Ne cumu dxandíʼ nadxiinu binni la? nga rucaa laanu gúninu dxiiñaʼ stinu jma jneza ti ganda ilá binni (Mat. 24:21; Eze. 33:8).
3 Naquiiñeʼ usíʼdinu binni. Ni jma naquiiñeʼ gúninu ti ucheechenu ca diidxaʼ nacubi ne galán nga chuunu de yoo pur yoo. Ora raca nagana para laanu idxélanu binni ra lidxi la? naquiiñeʼ ucaʼnu xi yoo ne pa neza ni ne ibiguétanu raqué sti hora (1 Cor. 10:33). Sti modo zanda gábinu binni ca diidxaʼ nacubi riʼ nga chuunu ndaaniʼ ca tienda ca, ndaaniʼ calle, ra parque, ra ruzuhuaa binni xcarru ne pur teléfono. Inabadiidxanu laca laanu: «Ñee cayuneʼ stale stipa pur iquiiñeʼ iráʼ cani zeeda raríʼ ti ganda gabeʼ binni ca diidxaʼ ni rudii endanabani ca la?» (Mat. 10:11).
4 Ti precursora nánnabe naquiiñeʼ iníʼnebe iráʼ binni ni nuu neza ra rucheechebe diidxaʼ. Ti dxi cadi canaucheechebe diidxaʼ biiyabe zuhuaa ti carru frente ti yoo, nabé riaana xeleʼ ca ventana stini peru irutiʼ qué riree ora iníʼcabe raqué. Qué ninádibe nidíʼdibe ra yoo que zaquesi, sínuque bixhídxibe timbre stini. Biree ti hombre ni bicaadiaga laabe ne na zaa chigánnabe laa, precursora riʼ ne xheelaʼ yegánnacaʼ laabe chupa chonna biaje. Despué uniʼbe zaa guʼndanécabe laabe Biblia, ne yanna maʼ uyuunísabe. Riéchebe stale purtiʼ precursora riʼ qué nusaana diʼ de nucheeche diidxaʼ.
5 Maʼ huaxiéʼ dxi ziyaana, nga runi yanna nga tiempu para quixhe íquenu usíʼdinu binni ra gúninu jma stipa pur ucheechenu diidxaʼ (2 Cor. 6:1, 2).