Xi libru o xi folletu zanda gacané cani qué runi cré Dios o cani qué runi cré Biblia
1. Xiñee nuu binni qué riuulaʼdxiʼ guidúʼndanenu laa libru Xipeʼ ndiʼ cusiidiʼ Biblia.
1 Para ganda gaca tuuxa ti xpinni Dios la? naquiiñeʼ guiziidiʼ ni zeeda lu Biblia. Peru caadxi de ca binni ni cadi zinanda Cristu, qué rinacaʼ guni crecaʼ pa dxandíʼ Stiidxaʼ Dios nga Biblia. Xcaadxi qué runi crecaʼ ni zeeda lu Biblia ne qué runi crecaʼ Dios. Ca binni riʼ zándaca qué ziuuláʼdxicaʼ gúʼndanenu laacaʼ libru Xipeʼ ndiʼ cusiidiʼ Biblia. Yanna, xi libru o xi folletu zanda iquiiñenu para gacanenu laacabe yaʼ. Guidúʼyanu xi huayuni cani rucheeche diidxaʼ ni nuu ndaaniʼ 20 guidxi roʼ.
2. Pa chuʼ tu gabi laanu qué runi cré Dios, xi naquiiñeʼ gánnanu, ne xiñee.
2 Cani qué runi cré Dios. Pa gabi tuuxa laanu qué runi cré Dios la? galán gánnanu xiñee. Ñee runi crebe evolución la? Ñee maʼ qué gápabe fe pur ca cosa ni cadi jneza cayaca o pur ruuyabe qué runi ca religión ni rusiidiʼ Biblia la? Ñee zeedabe de ti guidxi ra qué runi cré binni Dios la? Ñee laabe nga tobi de ca binni ni riníʼ ique cadi caquiiñeʼ guni cré Dios la? Stale de cani rucheeche diidxaʼ maʼ bidiicaʼ cuenta ora rinabadiidxacaʼ «Ñee maʼ xadxí riníʼ íqueluʼ zacá la?», racaneni binni gusiene xi riníʼ ique. Galán gucaʼdiáganu sin guchúʼgunu lu stiidxabe, purtiʼ para ganda guidxélanu ximodo gacanenu laabe, primeru naquiiñeʼ gánnanu xiñee qué runi crebe Dios. Zacatiʼ nga zánnanu xi guininu ne xi libru o xi folletu zanda gusaananenu laabe (Prov. 18:13).
3. Ximodo zanda gusihuínninu runi respetarnu binni ne ni runi cré.
3 Ora guiníʼneluʼ binni la? bisihuinni runi respetarluʼ modo riníʼ íquebe. Guidúʼyanu xi bicaa Betel ni nuu Estados Unidos: «Nabé risaca guni respetarnu derechu ni napa binni para guni cré ni riuulaʼdxiʼ. Cadi galán diʼ gacaláʼdxinu gábinu laabe cadi jneza modo riníʼ íquebe, jma galán guinabadiidxanu laabe xiixa ni gucaa laabe guiénebe ti gánnabe xi naquiiñeʼ guni crebe». Ngapeʼ nga ni runi ti binnigola ni riganna ca guendaridagulisaa roʼ. Ora maʼ bicaadiágabe xi riníʼ ique binni, rinabadiidxabe laa: «Ñee maʼ huaníʼ íqueluʼ sti cosa ni chiguzeeteʼ riʼ la?». De racá maʼ riniʼbe xi laani.
4. Xi naquiiñeʼ gánnanu ora gucheechenu diidxaʼ ra nuu ca budista.
4 Raca nagana para stale budista guni crecaʼ nuu ti Dios ni bizáʼ guiráʼ cosa. Ñee nannuʼ xi runi cani rucheeche diidxaʼ de Gran Bretaña ora riníʼnecaʼ ca binni riʼ la? Riquiiñecabe folletu Cómo hallar paz y felicidad duraderas. Ora maʼ biindanécabe binni xiixa ni zeeda lu ca primé yaza stini, ridíʼdicabe lu ndaa stini ra na «¿Existe un Creador todopoderoso?». Sti biaje chécabe, maʼ ruundanécabe binni ndaa ra na «Una guía para toda la humanidad». De racá, pa gúʼyacabe zanda la? ribeecabe libru Xipeʼ ndiʼ cusiidiʼ Biblia ne rábicabe binni: «Neca qué runi creluʼ Dios, zabeenduluʼ stale cosa galán pa gúʼndaluʼ ca conseju sicarú zeeda lu Biblia». Ti precursor ni rucheeche diidxaʼ ra nuu ca binni ni riníʼ diidxaʼ chinu ndaaniʼ guidxi Estados Unidos guníʼ: «Nabé riuulaʼdxiʼ ca binni ni nuu neza ra rucheechedu diidxaʼ gúʼndacaʼ, nga runi ora chigánnadu cani gucuaa xiixa libru o folletu, mápeca biluxe biindacaʼ cani. Peru raca nagana para stale de laacabe guiénecabe xiñee caquiiñeʼ chuʼ tu guʼndané laacabe Biblia. Nga runi, primeca biaje guinieniáʼ laacabe, riuuladxeʼ guluéʼ laacabe folletu ni láʼ Ca diidxaʼ sicarú ni zeeda de Dios, ni guca para ganda güínenu binni diidxaʼ». Ti binnigola ni riganna ca neza binni ridagulisaa ni riníʼ diidxaʼ chinu ndaaniʼ guidxi Estados Unidos guníʼ laaca zanda guluinu libru Xipeʼ ndiʼ cusiidiʼ Biblia primeca biaje chigánnanu binni. Nga runi, lugar de iquiiñenu capítulo 1, ni jma cusiene de Dios la? jma galán guzulunenu laabe capítulo 2, purtiʼ cusiéneni xi guiráʼ zeeda lu Biblia.
5. Xiñee naquiiñeʼ gápanu paciencia.
5 Cadi casi zeʼ binni nga zanda gapa fe Dios, nga runi, naquiiñeʼ gápanu paciencia. Zándaca qué zuni cré binni nuu ti Dios ni bizáʼ guiráʼ cosa primeca biaje güínenu laa diidxaʼ. Peru ora maʼ yegánnanu laabe chupa chonna biaje, zándaca maʼ zanabe guni crebe nuu ti Dios o guiénebe xiñee nuu binni runi cré Dios.
6. Xiñee nuu binni qué riuulaʼdxiʼ ganna xi rusiidiʼ Biblia.
6 Cani qué riuulaʼdxiʼ ganna xi rusiidiʼ Biblia o cani qué runi cré ni. Gatigá ridxaaganu binni ni runi cré Dios, peru qué runi crecaʼ pa de Dios zeeda Biblia, nga runi, qué riuuláʼdxicaʼ gánnacaʼ xi rusiidini. Zacá nga riníʼ ique ca binni ni nabeza ndaaniʼ ca guidxi ra nuu stale tu qué runi cré Cristu ne ra riníʼ íquecaʼ zeeda Biblia de ca religión ni runi cré Cristu. Ngaca nga ni rizaaca ndaaniʼ ca guidxi roʼ ra nuu stale binni ni runi cré Cristu, peru riníʼ íquecaʼ qué zanda gacané Stiidxaʼ Dios laacaʼ. Xi zanda gúninu para gacanenu laacabe chuuláʼdxicabe ni zeeda lu Biblia ti ganda gúʼndanenu laacabe libru Xipeʼ ndiʼ cusiidiʼ Biblia yaʼ.
7. Ximodo zanda gacanenu binni chuulaʼdxiʼ ganna xi rusiidiʼ Biblia.
7 Guidúʼyanu xi bicaa Betel ni nuu Grecia: «Modo jma galán gacanenu binni ni qué riuulaʼdxiʼ ganna xi rusiidiʼ Biblia nga guxhélenu ni ne guluinu laacabe xiná ni. Stale de cani rucheeche diidxaʼ maʼ bidiicaʼ cuenta jma rindá ni gúʼndacabe lu Biblia ndaaniʼ ladxidóʼ binni que intiica si ni guiníʼcabe (Heb. 4:12). Stale binni riuulaʼdxiʼ guiziidiruʼ jma cásipeʼ guʼyaʼ zeeda lá Dios lu Biblia». Ne Betel ni nuu India bicaa: «Ca binni hindú nabé riuuláʼdxicaʼ gánnacaʼ ni rusiidiʼ Biblia de guendanabani ne guendaguti. Laaca riuuláʼdxicaʼ gánnacaʼ zadxiña dxi gacané Dios binni para cadi guiníʼ ique jma risaca que stobi ne dxi maʼ guirutiʼ guni menu sti binni». Ora güínenu binni de ca guendanagana ni riguu xizaa laanu racaneni para ganda guxhélenu Biblia ne guluinu laacabe ximodo chiguni chaahuiʼ Reinu stiʼ Dios cani.
8. Xi zanda gábinu tuuxa ni riníʼ cadi jneza ni rusiidiʼ Biblia pur ni ruuyaʼ runi ca religión ni na zinanda Cristu.
8 Pa nuu tu riníʼ cadi jneza ni rusiidiʼ Biblia pur ni ruuyaʼ runi ca religión ni na zinanda Cristu la? naquiiñeʼ gusiénenu laabe cadi lu Stiidxaʼ Dios diʼ zeeda ni rusiidiʼ ne ni runi ca religión ca. Betel ni nuu India que bisiene: «Nuu tiru naquiiñeʼ gacanenu binni guiene ndiʼ: ca religión ni na zinanda Cristu la? cadi dxandíʼ diʼ nga rúnicabe ni na Biblia». Ne laaca bizeeteʼ Betel riʼ nabé riuulaʼdxiʼ binni hindú guidapa ndaa stiʼ folletu ¿Qué propósito tiene la vida? ¿Cómo descubrirlo?, ni rusihuinni ximodo huayacalaʼdxiʼ stale religión guchaa ni rusiidiʼ Biblia o gunitilú Stiidxaʼ Dios. Ti precursor de Brasil rabi binni: «Stale binni maʼ gudixhe ique guʼndaʼ Biblia purtiʼ riuulaʼdxiʼ ganna xi rusiidini, ne cadi pur rucaa ti religión laa guni ni. Xiñee qué guʼnuʼ cásica rúnicabe. Zándaca ziuuláʼdxiluʼ ni rusiidini ora gúʼndaluʼ ni».
9. Xiñee cadi naquiiñeʼ guiabayunu ora gabi tuuxa laanu qué riuulaʼdxiʼ ganna xi rusiidiʼ Biblia.
9 Ruuyaʼ Jiobá xi nuu ndaaniʼ ladxidóʼ guiráʼ binni (1 Sam. 16:7; Prov. 21:2). Ne racanebe binni nayá ladxidóʼ para chuʼ ndaaniʼ religión ni rusiidiʼ ni dxandíʼ (Juan 6:44). Stale de laacabe qué huayuu dxi gunibiáʼcabe Dios ne gúʼndacabe Biblia. Peru zanda gacanenu laacabe gánnacabe «ni dxandíʼ» ora maʼ zigucheechenu diidxaʼ ti ganda guilácabe (1 Tim. 2:4). Nga runi, pa chuʼ tu gabi laanu qué riuulaʼdxiʼ ganna xi rusiidiʼ Biblia la? cadi guiabayunu. Lade guiráʼ ca libru, folletu ne xcaadxi guiʼchiʼ nápanu, guyúbinu ni zanda gacané binni chuulaʼdxiʼ ganna xi rusiidiʼ Biblia. Despué, pa guidúʼyanu maʼ riuulaʼdxiʼ binni guiziidiʼ jma la? óraca maʼ zanda iquiiñenu libru Xipeʼ ndiʼ cusiidiʼ Biblia para guidúʼndanenu laacaʼ.
[Foto ne dibuju ni zeeda lu yaza 4]
Ximodo gacanenu cani qué runi cré Dios
• Para ganda gánnanu xiñee qué runi cré ti binni Dios la? guinabadiidxanu laabe: «Ñee maʼ xadxí riníʼ íqueluʼ zacá la?».
• Pa budista laabe la? zanda iquiiñenu yaza 9 dede 12 stiʼ folletu Cómo hallar paz y felicidad duraderas.
• Pa runi crebe evolución la? zanda iquiiñenu tobi de cani zeeda raríʼ:
Tema «¿Casualidad o diseño?», ni reeda lu revista ¡Despertad!
Videu Las maravillas de la creación revelan la gloria de Dios
Guidapa ndaa stiʼ folletu Cómo lograr una vida llena de satisfacción, ne ca folletu ¿Es la vida obra de un Creador? ne El origen de la vida. Cinco cuestiones dignas de análisis
• Pa maʼ qué gápabe fe Dios pur ca cosa ni cadi jneza cayaca o pur ruuyabe modo cayacaná binni la? zanda iquiiñenu ca ndiʼ:
Capítulo 10 stiʼ libru ¿Existe un Creador que se interese por nosotros?
Ndaa 6 stiʼ folletu ¿De veras se interesa Dios por nosotros? ne ndaa 6 stiʼ folletu ¿Qué propósito tiene la vida? ¿Cómo descubrirlo?
• Cásipeʼ guzulú guiene binni dxandíʼ nuu ti Dios la? zanda guluinu laabe libru Xipeʼ ndiʼ cusiidiʼ Biblia. Ne zándaca jma galán guidúʼndanenu laabe capítulo 2 stini o sti tema ni chuuláʼdxibe.
[Foto ne dibuju ni zeeda lu yaza 5]
Ximodo gacanenu cani qué runi cré ni rusiidiʼ Biblia
• Iquiiñenu capítulo 17 ne 18 stiʼ libru La vida... ¿cómo se presentó aquí? ¿Por evolución, o por creación?
• Pa hindú laabe la? zanda iquiiñenu folletu ¿Por qué debemos adorar a Dios con amor y verdad?
• Pa judíu laabe la? zanda iquiiñenu folletu ¿Habrá algún día un mundo sin guerra?, yaza 3 dede 11 (maʼ qué riree diʼ ni diidxastiá).
• Gusihuínninu pabiáʼ risaca chinanda binni ca principiu zeeda lu Biblia. Ne zanda gúninu zacá pa iquiiñenu tobi de cani zeeda raríʼ:
Tema ni láʼ «Ayuda para las familias», ni reeda lu revista ¡Despertad!
Videu La Biblia: el poder que ejerce en su vida
Ndaa 9 ne 11 stiʼ folletu Ca diidxaʼ sicarú ni zeeda de Dios, yaza 22 dede 26 stiʼ folletu Un libro para todo el mundo (maʼ qué riree diʼ ni diidxastiá) ne guiropa ndaa stiʼ folletu Cómo lograr una vida llena de satisfacción
Pa budista laabe la? yaza 3 dede 7 stiʼ folletu El camino de la paz y la felicidad
Pa musulmán laabe la? ndaa 3 stiʼ folletu La fe verdadera, la puerta a una vida feliz
Pa nabeza binni riʼ ti lugar ra qué riuulaʼdxiʼ binni ganna xi rusiidiʼ Biblia la? zándaca primé biaje chigánnanu laabe jma galán cadi guzéʼtenu paraa riree guiráʼ conseju sicarú ni rusíʼdinu binni
• Gusiénenu ximodo huayaca ni na ca diidxaʼ riguixhená zeeda lu Biblia. Ne zanda iquiiñenu cani zeeda raríʼ para gúninu ni:
Videu La Biblia: historia exacta, profecía confiable
Folletu Un libro para todo el mundo, yaza 27 dede 29 (maʼ qué riree diʼ ni diidxastiá)
• Cásipeʼ guidúʼyanu maʼ cayuulaʼdxiʼ binni ganna jma de ca tema zeeda lu Biblia la? zanda guluinu laabe libru Xipeʼ ndiʼ cusiidiʼ Biblia.
[Foto ne dibuju ni zeeda lu yaza 6]
Pa gabi tuuxa laanu: «Qué runeʼ cré Dios»
• Zanda guinabadiidxanu: «Ñee nannuʼ xi bicaa naa guneʼ cré dxandíʼ nuu ti Dios ni bizáʼ guiráʼ cosa la?». De racá maʼ guzéʼtenu caadxi de cani zeeda lu yaza 87 dede 89 stiʼ libru Razonamiento. Laaca zanda gábinu laabe zabiguétanu ra nuube para gudiʼnu laabe ti libru o ti folletu ni gucané laanu.
• Laaca zanda guinabadiidxanu: «Pa ñuu ti Dios ni bizáʼ guiráʼ ni nuu, xi guenda ñuuláʼdxiluʼ ñápabe». Stale binni ricabi naquiiñeʼ gácabe ti Dios ni runi jneza, qué runi jma pur ti binni si, nachaʼhuiʼ ne riá guiráʼ binni. Gucaʼdiágasinu laabe, zanda iquiiñenu Biblia para guluinu laabe dxandíʼ napa Dios ca guenda riʼ. (Zanda iquiiñenu primé capítulo stiʼ libru Xipeʼ ndiʼ cusiidiʼ Biblia ne gúʼndanenu laabe párrafo 6.)
Pa gabi tuuxa laanu: «Qué runeʼ cré ni rusiidiʼ Biblia»
• Zanda guicábinu sicaríʼ: «Stale binni riníʼ ique zacá. Nuu tu riníʼ cadi biaʼsi diʼ ni zeeda lu Biblia né ni rusiidiʼ ca científicu o maʼ huaxiéʼ racané ca conseju stini binni ca dxi riʼ. Peru ñee maʼ huayuundaluʼ Biblia la? [Cuézanu guicábibe. De racá zanda guluinu laabe xiná párrafo 1 ne 2 stiʼ guionna ndaa stiʼ folletu Cómo lograr una vida llena de satisfacción.] Sti biaje guendaʼ la? ñuuladxeʼ niquiiñeʼ folletu riʼ para guluéʼ lii caadxi conseju sicarú ni zeeda lu Biblia».
• Laaca zanda guininu: «Stale binni maʼ huayabi laadu zacá. Peru ñuuladxeʼ nuluéʼ lii ti versículo ni gucané naa stale [guidúʼndanenu laabe Job 26:7 o Isaías 40:22, ca textu riʼ rusihuínnicani biaʼsi ni zeeda lu Biblia né ni riníʼ ca científicu]. Lu Biblia laaca zeeda stale conseju sicarú para ca familia. Ñuuladxeʼ nibiguetaʼ sti biaje para guluéʼ lii tobi de laacani».
• Sti modo zanda guicábinu: «Xquíxepeʼ lii pur guʼdxuʼ naa xi runi creluʼ. Peru pa nusaanané Dios laanu ti libru, xi guiráʼ ñuuláʼdxiluʼ nucaabe luni». De racá maʼ guluinu laabe ti textu ra zeeda xiixa de ni bizeetebe.