Oni Wiriki Manga Gu Zerangbaduse Nga Ga Yekova
“Gbia narungbura nga pati gako kidohe . . . te; ono ko du na gbanga hipai [“zerangbaduse,” NW].”—2 PETERO 3:9.
1. Gini gamunihe kiipaha kisusi kura ahe dũ Yekova nafuhe fu aboro?
YEKOVA fu guhe fu rani ka kura aboro arengbanga ka fuhe ya. Si nga guhe ngbaa bakere gbe na duna kikiipaha bakere gbe, ono wa vura duhe wo, ka boro ngbenga gi he ngaha re te na ka ni manginga sunge tipa ka gbiaha a te. Guhe ko afuhe fu rani re, si nga gu gamunihe nga nyenye unga, tipa dungu rani, si nga gu unga zanga digidoho rogo paradiso auru kpotosende. (Yoane 3:16) Nangbaa gupai nikangiaha re! Agu apai naye na bakere agberarago, wa akpata, azuũ, arungo tipa aũzegino, kuondiko, akaza, na zavura kpio, si adunga berewe te. Aboro araka rogo bawene zereda na nikpamiakpamiayo tiibe gu ga Mbori Kindo nika zogarago ninyemuse. Ani nirengo na bakere nyemu ka raka rogo gu Paradiso re!—Yesaya 9:6, 7; Yugoti 21:4, 5.
2. Tipagine Yekova atadianga ga Satana zegino ti ni kindi kusayo ya?
2 Yekova a wo, ko namaabangiriko amaa tipa gu regbo ko ka sigira Paradiso auru kpotosende. Nirengo, ko nga bakpinyemu ruru mangapai na ruru sarangbangaa. (Atambuahe 33:5) Si afunga ngbarago fuko ka bi gu zegino du kpasiaka watadu du nzengerenzengere kuti gako ruru bangua arugute, gu zegino nasogote pa gako pagbia, na kini rungosi gako aboro te. Wa vura duhe wo, wene nduapai kinaho nga gu ko aguaringa ti ni ka dia gi ga Satana gbegbere zegino re kusayo ya. Gu nduapai re, si tipa gu ngbangaa du tipa gako bakere pagbia. Rogo sapa agi angbangaa re, Yekova nayugo gu kparakpara sino ima ngba gbe, nga zerangbaduse, nga gu sino du dungu aboro areme na zingoho.
3. (a) Gine nga rogo gu fugo Giriki na fugo Ebere i asaha nga “zerangbaduse” rogo Ziazia Kekeapai? (b) Gini asanahe ani ka wisigoho awere?
3 Fugo Giriki gu duho rogo gu Ziazia Kekeapai nga New World Translation i asaha bara biata nga “zerangbaduse.” Rogoyo ngburungburu nga “gbanga toro” si ki ta du were, i kini saha dedede nga “gbanga hipai” na ki saha bara sa nga, “zerangbaduse.” Boro ndikidi rogo gu fugo Giriki na fugo Ebere du tipa gu fugo nga “zerangbaduse” re, si nafu gu berã nga ga gbanga hipai na padu boro nibayee ni ka zinga. Wai ani agbia undo be ga Yekova zerangbaduse? Giniapai rengbe ani ka wirikaha be ga Yekova zerangbaduse na gbanga hipai na be gu gako ruru amoyambu ayugoho? Wai ani aino gupai nga, ga Yekova zerangbaduse azanganga digidoho te? Ani bingoho.
Ani Makianga Pa ga Yekova Zerangbaduse
4. Nibipa ga Yekova zerangbaduse, ginipai gu mokedi nangia Petero akehe?
4 Nibipa ga Yekova zerangbaduse, gu mokedi nangia Petero akepai tipaha ki yaa: “Ono abadiangba, ka gi pai sa re go nga bangironi ya, nga, uru sa . . . bangiri Gbia wa agarã 1000, agarã 1000 ki du wa kina uru sa. Gbia narungbura nga pati gako kidohe, wa agu yo naberã pa rungbura, te; ono ko du na gbanga hipai fu roni, ko akpi nga nyemu aboro kpi wa sa te, ono ko nakpi nyemu aboro da ti zungadi tiyo dunduko.” (2 Petero 3:8, 9) Ani nahõpai beroni, oni kparianga gu bangiriapai ue gumba yo ho herẽ nga gu rengbe ka undo rani ani girogo ga Yekova zerangbaduse yo.
5. Wai du gu gene Yekova abi regbo ngbaha na ome kurii gako mangaapai?
5 Bambatapai ngawee, Yekova abinga regbo wa gu ani abihe te. Tipa gu Boro naraka nyeanye kindi, agarã kutu sa funi gbua nga uru sa. Regbo akanga na gene beko tipa gupai ko aida ka mangaha te, watadu ka sosoda ko a ko mangipai te, wa vura duhe wo, ko akeesanga ti mangapai a te. Mbiko wa du Yekova na gu tatamana beko adunga digidoho ti ni ya, ko ima ino kina boro gu regbo nzunzu ngbaa gbe tipa ka mangapai tipa si undo agu aboro dunduko du rogo azingo, na ko napido gu regbo re na zerangbaduse si ye. Ono tie, wa vura duhe were, si aidanga ani dakuti gupai ngawee du Yekova adu kpasiaka kuti agu arungo gako amoyambu ambu behe vuru gi regbo re te. Ko nga gu Mbori nga ga “ngbadu weneringise” ko, nga kina boro nyemuse nitihe. (Ruka 1:78; 1 Yoane 4:8) Ko ima rengbe ka mbakada gu kereapai dunduko na nyeanye kindi, nga gu ko ambugene fuhe si naamanga vuru gi ngbutuko regbo re.—Atambuahe 37:10.
6. Ginipai si aidanga ani gumbaha tipa Mbori ya, na tipagine?
6 Rengo ngaha nga, anga si nitaatapai boro naapido gupai du ni na nyemuhe te. (Asanza 13:12) Si ki ta du were, ho aboro adigisonga gayo akidohe ni niipo ya, gu kura aboro rengbe ka berã ya i aidanga ka mangaha te. Nairiwo gu zanga tatamana kangiaha ka boro berẽ gupai re tipa Mbori! Ka ani ingisi giarogopai tipa ga Mbori zerangbaduse kini berẽhe ya ko nakeesa akeesa, ani tona atona kaa kapa na kpotoraniyo ki tona kaa zera, na si ki da na ani rogo gu kerepai nga kadu na gu nyomoro tirani nga ga toro. Ono gu tie gbere gbe nga, agu airasawia zanga idapase Petero aza rani tipa yo mbata, i rengbe arengba ka ingisa rani. Ngbatunga agu aboro re nasawia rani niyaa: “Wari du gu kidohe ni [du] tipa ye ko berewe? Bambiko tona ti rago ti abarani ni rame, ahe dunduko nanye wa si adu rago tonatona manga ahe.”—2 Petero 3:4.
7. Gine nga gu ngbanyaa du dagba ga Yekova zerangbaduse na gu gako nyemupai du tipa aboro sa gayo berã?
7 Gu ue nyanyakipa pai rengbe ani ka bihe rogo afugo Petero ngawee Yekova na zerangbaduse bambiko ko nakpinyemu aboro dunduko sa gayo berã. Agu aboro naká nikeretu ki zanga mbu gayo gbegbere agene, Yekova aimo yo aimo. Ono tie, Mbori na ngbarago tipa kpio boro ingapai te. Kuba gure, ko na ngbarago tiko ka bi aboro i nasa gayo berã, ki mbu gayo gbegbere agene, na kini raki kindi. (Yezekere 33:11) Si ki ta du were, ko na zerangbaduse na kini mbugene i naatungusa wene pangbangaa rogo zegino dunduko tipa wa ka aboro gbia amamu dunduko tipa kaa raka.
8. Wai ani abi ga Mbori zerangbaduse rogo gako mangaapai na gu rikaaboro nangia aYisaraere?
8 Ani nabi ga Mbori zerangbaduse a rogo gu gako mangaapai nadu na gu rikaaboro nangia aYisaraere nadumbata. Wo ko anaahi gayo basasangbaa tipa dungu akama agarã. Rogo gu gene nangia ga gako anebi, wo ko anaangarasa yo dedede kini yaa: “Oni sá tironi ti gaoni gbigbitapai, ki ka kuti sangbare na gi rugaapai, ku sangba agu arugute yo dunduko nga gu mi arugu atitaroni kuti ni, nga gu mi akedi he fu roni ku ngba gimi amoyambu nangia anebi.” Gine nangia sangbanaha? Nigbegberepai, i “akpi nga nyemu ka dega tuyo te.”—2 Abakindo 17:13, 14.
9. Wai ga Yesu zerangbaduse ayugupa ga Bako zerangbaduse?
9 Niyangaraha, Yekova akedi Wiriko, nga gu kumba nanaatungusapai zanga pirigo fu aYuda tipa i mbakadi gayo ngbanyaa berewe na Mbori. Ga Yesu zerangbaduse ayugupa ga Bako zerangbaduse teketeke. Fuo ruga Yesu tiko na gupai wenengai nga regbo adu koyo ngbutuko i ki imiko, ko yaa: “Ako aboro Yerusarema, aboro Yerusarema, ninaimo anebi, ki nizumudi agu yo i akedi yo fuo roni! mi akpi nyemu dungura awironi a wa kondo nadungura awiru ku tii puporu bara wãi, ka oni aida nga ha ya!” (Matayo 23:37) Anga agi afugo nunga re nga afugo kere sino basapungbangaa nga guni duna nyemu ka fu mbusa fu aboro te, ono si nga afugo gu bakure duna nyemuse na kidu na zerangbaduse na aboro. Yesu, wa kina Bako du ngbangbaturũ yo, aidi aboro sa gayo berã na ki bati be gbarasangbangaa fuyo. Bete aguyo akaragapai wenengai kuti agu arugute Yesu afuhe fuyo na i ki ne gu kere sarangbangaa naye kurii Yerusarema rogo 70 F.B.K.—Ruka 21:20-22.
10. Rogo gini agene ga Mbori zerangbaduse naundo rani?
10 Ya mo anga ga Mbori zerangbaduse ni gupai du ni iiriwoho tirani tee? Wa vura du bakio ga aboro basasangbaa nibakerehe gbe, Yekova ima mbugene fu rani nibasasa kodihe na kura abirioni aboro, tipa gu mamu nga ani iniko na ki di gu maabangirise nga ga bata kugume. Petero akepai fu akurako aKristano ki yaa: “Oni . . . ini he ya gu hipai nga ga gaani Gbia si nga gene bata.” (2 Petero 3:15) Ya mo anga ani na tambuahe mbiko ga Yekova zerangbaduse ima zaka gene fu rani tipa bata tee? Ya mo ani akparanga kpee ya Yekova naahipai fu rani kindi wa ani amangasunge fuko na aʹuru nibasasa tee?—Matayo 6:12.
11. Gine pa gia ani rogo ga Mbori zerangbaduse nika fõngbaduraniyo ani mangihe?
11 Ho ani arugatirani ni na ndu gupai Yekova ahipai ti ni, si naundo rani ani naapido gu bata na zerangbaduse ko ka ye nani, na ani ki zanga da kuti gu digisopai wagusa nga ko nakeesa akeesa. (Abia Kpenunga 3:26) Wa ani kaa kparakpee kindi tipa ga Mbori Kindo ye, ani naa kido ya Mbori ima ino gu regbo ngbaa kisusi tipa karaga ko pai sa gu kpee re. Kurii gure, si nafõngbaduraniyo ani wiriki mangapai wa Yekova niyugo ani gu zerangbaduse duwa ga Mbori rogo gaani mangaapai na awirinarani gbiati agu aboro ani atungusapai fuyo. Ani awo, ani akpinga nyemu i imi aboro te ono ani naida i sa gayo berã na kidu na gu maabangirise tipa nyenye unga du berani.—1 Timoteo 2:3, 4.
Ani Makianga Pai Tipa gu Zerangbaduse Nangia ga Anebi
12, 13. Niringbisaha kuti Yakoba 5:10, wai gu nebi nangia Yesaya aduna zeresangbaduse?
12 Niwisigo ani ga Yekova zerangbaduse, si naundo rani ani bihe na nyanyakipaha na si ki undo rani a ani sonosihe. Anga si nitaatapai fu kpakpa aboro i sonosi zerangbaduse te, ono i rengbe arengba ka mangaha. Ani nawirikapai be gu ga Mbori amoyambu nadumbata. Gu bawiriki nangia Yakoba akepai ki yaa: “Awirinami, oni dí agu anebi nagumba pai ni rimo Gbia, ni gaoni kpia hipai na zadapai.” (Yakoba 5:10) Si ni gupai nafu wasa na kini ngarasi rani ka ino gupai nga, kura aboro aima diabe apai wa kina gu namanga rani.
13 Nikpiapai, gu nebi nangia Yesaya aaida zerangbaduse nirengo, ti regbo gu sunge i afuhe fuko. Yekova aya fuko wee: “Mo ndú, ki gumba ha fu agi aboro re: ‘Oni gí he, ono oni arúga nga tironi na ni te; oni ngére, ono oni abí nga he te.’ I nyákasi kpoto agi aboro yo re, ki kisi tuyo, ki kisi bangiriyo; i ka ngera ni bangiriyo, ki gi pai ni tuyo, ki rugu tiyo na pai kpotoyo yo, ki sa tiyo berewe ki hu.” (Yesaya 6:9, 10) Wa aboro avura du sakparakpa kuti ga Yekova arugute, Yesaya atakipande ga Yekova azahe nizerangbaduse tipa agarã kandara 46! Teketeke wa kina gure a, zerangbaduse nika undo rani ani kpatagara kuti gaani sunge tungusa wene pangbangaa, zavura gupai nga du dungu aboro adu sakparakpa vurũ.
14, 15. Gine naundo Yeremaya ko sovura kuti kereapai gbiati zerakpotoseyo?
14 Rengo ngaha nga, wa anebi aamanga gayo asunge, si aidanga gbua i sovura na diabese kina kuti sakparakpa sa te, ono si aida i hi agu arungosi aboro aarungosi yo nani a. I amoi Yeremaya kurogo angboro, ki kisi ko ku “bambukisa yo,” na ki ba ko kurogo gu due-ime, ime aima uguda rogoho. (Yeremaya 20:2; 37:15; 38:6) Kina boro agu aboro nzunzu ko aaida ka undoyo namangi ko na agi arungosi re. Wa si avura du wo, ngbadu Yeremaya aimanga fuyo te, na ko airanga bape kutiyo a te. Ko ahipai nizerangbaduse tipa dungu agarã.
15 Pa rungosiyo Yeremaya na kini sawia ko asanga ko ko mbu gako sunge te, na si asanga rani areme a ani mbu gaani asunge te. Rengo ngaha nga, kpotoraniyo rengbe arengba ka zera ti kura aregbo a wa kpoto Yeremaya yo azere. Ko akepai ki yaa: “Sangba Yekova sa tihe fere ni ũgbarasarimo na ni ũumohe na uru pitipiti kindi. . . Mi [ki] ya, ‘Mi apé nga pa ko te, watadu gumba pai berewe ti rimoko te.’” Ginipai namangi fuo gure? Ya mo Yeremaya ambu tungusapai? Ko aafura kindi niyaa: “Si [fugo Mbori] kpotore yo wa . . . we kisi yo ku rogo amemere yo, mi ki nimbu be zada ha koyo, ka mi arengba nga na ni ya.” (Yeremaya 20:8, 9) Oni kparia gupai nga, ho ko amoi berãko ni fuo gu sawia aboro aasawia ko nani, ko adunga berewe na ngbarago te. Ono ho ko akaraga tiko ni fuo gu pangbangaa ko anaatungusaha na kini kparia ngbanyaaha, gako ngbarago akaragatihe kubaha. Kurii gure, Yekova aduna Yeremaya “wa kikii borosovura,” kini nyakasi ko ko naatakapande fugo Mbori zaaza zanga gunde.—Yeremaya 20:11.
16. Wai rengbe ani ka banda ngbarago tingba gaani sunge tungusa wene pangbangaa?
16 Ya mo gu nebi nangia Yeremaya re agbia ngbarago rogo gako sunge? Ii nirengo! Ko aya fu Yekova wee: “Mi bi gamo apai, mi ki ri he, ga pai ki sa tihe fere ni ngbarago ni gu pai kpotore yo nangi mbiko ho; bambiko i yambu re ti rimoro, Ako Yekova, Mbori nga ga arimbasa ko.” (Yeremaya 15:16) Yeremaya aduna ngbarago wa ko aamangasunge kuba ndikidi Mbori na kini tungusi fugoko. Ani a wo, ani rengbe arengba kadu na ngbarago. Kurii gure, ani nangi angi a wa agu amaraika angi du ngbangbaturũ yo, bambiko rogo zegino dunduko, dungu aboro nadia gu pangbangaa kugume nga ga Kindo, kini sa gayo berã, na kini moi nduyo ngbagene nyenye unga.—Ruka 15:10.
“Gu Zadapase [“Gbanga Hipai,” NW] Nga ga Eyobo”
17, 18. Rogo gini gene Eyobo ahipai nigbangaha, na gine nangia sangbanaha?
17 Fuo gu bawiriki nangia Yakoba fura tipa agu anebi nadumbata, ko akepai tipa yo ki yaa: “Oni agi pa gu zadapase [“gbanga hipai,” NW] nga ga Eyobo, oni ki bi wai Gbia amangi fu ko ti digidaha, wa du ko na bakere nunga ti ko, na bakere inapai.” (Yakoba 5:11) Gu fugo Giriki i asaha herẽ nga “gbanga hipai,” si na rogoyo wa kina gu fugo Yakoba amangisunge nani rogo gu veresi ye mbata tipa gu fugo nga “zerangbaduse.” Wa wene bawirikipai sa aayugo gu kparakparapai du dagba agu afugo du ue re, ko akepai ki yaa: “Ani nidu na gbanga hipai ho boro amanga rani ni gbegberee, ani nidu na zerangbaduse ho ani akpatagara ni kindi kuti manga rurupai ho du ani ni rogo fudifudiapai.”
18 Eyobo adu rogo bakere rungosi. Ko arungo be gbarasapa gako ahe, i ki imi awiriko, na kere kaza ki zi ko. Ko asovura a kuti akitangbaanga ko niziree ya Yekova du naafu mbusa fuko. Eyobo arungonga kukiri te; ko akpakanahe tipa agu apai naamanga ko na ki gumbapai giihe yo ya ko gako pai aru angianga ga Mbori ya. (Eyobo 35:2) Ono tie, bangiriko agonga ti gako idapase te, na ko aka kindi kuti gako ruru mangaapai. Ko agberanga ngbakoyo fu Mbori wa gu Satana agumbaha ya ko amangaha te. (Eyobo 1:11, 21) Gine nangia sangbanaha? Yekova “afu maku fu Eyobo ti kusa rago susi gu naadu mbata.” (Eyobo 42:12) Yekova ahusi Eyobo, ki kiisi gako kumuko bara ue, na ki fu maku gbiati wene raka fuko nga ga ngbarago na gako aborokporo. Ga Eyobo gbanga ruru hipai asako a ko ini sino Yekova wenengai gbe.
19. Ginipai ani awirikaha be gu hipai nizerangbaduse nangia ga Eyobo?
19 Gine ani awirikaha be ga Eyobo hipai nizerangbaduse? Wa kina Eyobo, si rengbe arengba kadu nga ani narungo be kaza watadu kura agberango. Si rengbe kadu nga ani aruganga tirani wenengai na ndu gupai Yekova ambugene ti ni fu kura asada si ye sa rani te. Ono, wa vura duhe wo, gupai rengbe ani ka rugatirani nani nga: Ka ani nye nikina ruru rani, ani agbia maku agbia. Zanga kapa, Yekova nafu mosoro afu fu agu aboro nagbata ko kakaka. (AEbere 11:6) Yesu ayaa: “Gu ni ka hi pai dati yangara rago kindi, i abátasa gu ni abatasa re.”—Matayo 10:22; 24:13.
‘Gu Uru Nga ga Gbia Si Ayéayé’
20. Tipagine rengbe ani ka rugatirani ti ni zanga kapa na gupai nga, ga Yekova uru ayeaye?
20 Wa vura duhe nga Yekova nga boro zerangbaduse, ko a nga boro ruru mangaapai, sidu ko ahinga gbegbereapai nyeanye kindi te. Digido gako zerangbaduse kina ti ni. Petero akepai ki yaa: “[Mbori] ahe nga . . . [fu mbusa] fu kuru zegino te.” Wa Mbori abanda Noa gbiati gako aborokporo, ko agbarasi gu zegino nazanga sinombori na ime akangbii. Yekova asaringbangaa a kuti Sodomo na Amora, ki zoho kina kukuhe ki nye. Gi sarangbangaa re angia ‘kpiapai tipa agu api nika ye fu agu aboro nakpinyemu kadu ni azangasinombori.’ Gupai ini ani he zanga kapa nga: ‘Gu uru nga ga Gbia [Yekova], si ayeaye.’—2 Petero 2:5, 6; 3:10.
21. Wai rengbe ani ka yugo gupai nga ani na zerangbaduse gbiati hipai, na gini riipai ani ka wisigoho rogo gu papara kekeapai naye fuo gere?
21 Fuo duhe tie were, ani wiriki mangaapai na zerangbaduse wa ga Yekova, niundo ani aboro i sa gayo aberã tipa wa ka i batasiyo. Ani wiriki mangaapai wa anebi a nitungusa ani wene pangbangaa na zerangbaduse, agu aboro ki vura du sakparakpa ani atungusapai fuyo vurũ. Kurii gure, ka ani hi aʹasada wa Eyobo, ani aduna kido ya Yekova afu maku afu fu rani kpaima, ka ani kakuti gaani ruru mangaapai. Ani na dungu nduapai berani kadu na ngbarago tingba gaani sunge tungusapai ho ani akpariapa ga Yekova bakere maku ni kurii gako aboro na gayo asadatise ka tungusa wene pangbangaa rogo zegino dunduko. Ani nika bi gipai re rogo gu papara kekepai naye fuo gere.
Oni Natingidaha?
• Tipagine Yekova ahipai ti ni?
• Gine ani awirikaha be gu zerangbaduse nangia ga anebi?
• Wai Eyobo ahipai, na gine nangia sangbanaha?
• Wai ani aino gupai nga, ga Yekova zerangbaduse azanganga digidoho te?
[Gu kpiahe du ti kpewaraga 15]
Ga Yesu zerangbaduse ayugukpiapai tipa gu nga ga Bako ziazia
[Gu kpiahe du ti kpewaraga 16]
Wai Yekova afu mosoro fu Yeremaya tipa gako zerangbaduse?
[Gu kpiahe du ti kpewaraga 17]
Wai Yekova afu mosoro fu Eyobo tipa gako hipai?