Ukuqalisa Ingxoxo Lapho Wenza Impindelo
1 Ukuze uphumelele ekuqaliseni ingxoxo nothile oye wabonisa isithakazelo ekuhambeleni kokuqala, zama ukwakhela kulokho okwatholakala ngalesosikhathi sokuqala. Inhloso iwukusiza lowomuntu ukuba aqaphele ukubaluleka kwamaphuzu nezincwadi ashiyelwa zona esikhathini esidlule.
2 Yiba nesikhathi sokulungiselela ukwenza impindelo. Khetha ukukhulumela okuvusa isithakazelo okusencwadini oyiqokomisayo. Sebenzisa ukuqonda ukuze ubone ukuthi kungakanani ukwaziswa okumelwe kuhlanganiswe nesikhathi okumelwe usihlale. Ezimweni eziningi ingxoxo emfushane yephuzu elilodwa noma amabili ingcono kakhulu ngaphandle kokuba kuboniswe isithakazelo esingavamile. Cabangela izihloko ezilandelayo:
3 Iziphi izimo zesikhathi esizayo esingalindela ukuba zilethwe emhlabeni ukuze ube yikhaya lomuntu laphakade? Lengxoxo isekelwe kusAmbulo 11:18 nakuIsaya 35:1, 2, njengoba kuchazwa futhi kuboniswa encwadini ethi Ukuthula Kweqiniso emakhasini 97-8.
Ingxoxo ingethulwa ngokuthi:
◼ “Ngenkathi ngikuvakashele, saxoxa ngendlela uNkulunkulu ahlose ngayo ukuba umhlaba uhlale phakade. Kodwa ngakushiya nombuzo okwakumelwe ucabange ngawo: Yiziphi izimo okumelwe zichume ngalesosikhathi? Ngiyajabula ukubuya ngizohlanganyela nawe kafushane impendulo yeBhayibheli.”
4 Lokho okumelwe sikwenze ukuze sijabulele ukuphila ngaphansi koMbuso kaNkulunkulu. Lesihloko singacatshangelwa ngokusebenzisa uDuteronomi 30:15, 16, 19 noJohane 4:23, njengoba kuchazwa encwadini ethi Ukuthula Kweqiniso ekhasini 93.
Ekuqaliseni, ungase uthi:
◼ “Ngayijabulela ingxoxo yami nawe ngesithembiso sikaNkulunkulu sokuqeda ububi. [Mcele ukuba alande incwadi yakhe ethi Ukuthula Kweqiniso.] Umbuzo okumelwe ukhathaze ngamunye wethu uwukuthi, Yini esingayenza ukuze sibe khona lapho futhi sizuze kulolushintsho? Phawula lokho uJesu akusho kuJohane 4:23, njengoba kucashunwe ekhasini 93 encwadini yakho.”
5 Yiziphi izidingo eziyokwaneliswa emhlabeni oyiPharadesi? Ungasebenzisa iHubo 67:6, 7 no-72:16 noma uMika 4:3, 4 noIsaya 65:21, 22. Encwadini ethi Ukuthula Kweqiniso emakhasini 97-100 kunikezwa ukukhulumela okufanele.
Ekuqaliseni ungase uthi:
◼“Ngenkathi ngilapha [yisho usuku], saphawula ngesithembiso sikaNkulunkulu ngeNdodana yakhe sokuvusela abathandekayo abafile emhlabeni oyiPharadesi. Yiziphi ezinye zezibusiso eziyojatshulelwa ngalesosikhathi? Incwadi yakho ikuphawula ngokomBhalo ukuthi ezinye zazo ziyoba yini.” Ngesisekelo sokukhulumela okungenhla, funda eBhayibhelini umbhalo owodwa noma emibili ekhonjiwe nokukhulumela okusencwadini, mhlawumbe izigaba 11, 15 no-16 emakhasini 97-100.
6 Abantu abaningi baye babonisa isithakazelo esigijimini soMbuso esisishumayelayo. Abaningi kakhulu baye bazamukela izincwadi zethu. Kwezinye izimo, saphawula ukwazisa ngengxoxo yethu yokuqala engokomBhalo. Ngakho-ke, yenza izimpindelo kubo bonke ababonise isithakazelo, futhi uzame ukubafundisa iqiniso.—Math. 10:11; 28:19, 20; Joh. 21:17; IsAm. 22:17.