Yenza Isethulo Esishukumisayo
1 Kokubili INqabayokulinda nePhaphama! kuwusizo ekutshaleni imbewu yeqiniso ezingqondweni nasezinhliziyweni zabafundi. Ngakho-ke, sifuna ukwenza izindlela eziphumelelayo zokuhambisa labomagazini emakhaya abantu abangazuza kulamagugu angokomoya abawaqukethe.
2 Abanini-khaya bangashukunyiselwa kanjani ukuba bamukele futhi bafunde omagazini bethu? Okuningi kuxhomeke endleleni esibethula ngayo. Ukusikisela okuhle kakhulu kokulungiselela izethulo eziphumelelayo kutholakala encwadini ethi Ukubonisana, amakhasi 9-15.
3 Lapho uhambisa INqabayokulinda kaOctober 1, ungase uzame ukusebenzisa ukusikisela kwesithathu ngaphansi kwesihloko esithi “Izenzakalo Zangalesosikhathi” ekhasini 11 lencwadi Ukubonisana.
Ngemva kokuzethula, ungase uthi:
◼ “Uma ubungakhetha, iyiphi ezinkingeni eziningi ezibhekene nomhlaba manje obungathanda ukuba ilungiswe kuqala?” Lalela impendulo yomnini-khaya, futhi ubonise ukwazisa ngokukhathalela kwakhe. Khona-ke ungase uqhubeke, uthi: “Cabangela lokho iBhayibheli elikunikezayo njengekhambi lezinkinga ezinjalo. [Funda uIsaya 9:6, 7.] Ngakho ikhambi langempela lazo zonke izinkinga zesintu lixhomeke ekubuseni kokulunga kukaMesiya, uJesu Kristu.” Khona-ke phendukela ekhasini 8 futhi uqondise ukunakekela ezigabeni ezintathu zokugcina zesihloko esithi “UMesiya—Ithemba Langempela?”
4 Ezinye izethulo ezimbili ongazisebenzisa neNqabayokulinda kaOctober 1 zitholakala ekhasini 14 lencwadi ethi Ukubonisana, ngaphansi kwesihloko esithi “Umsebenzi/Indawo Yokuhlala.” Ungaveza lemibono nalemibuzo ngamazwi akho siqu noma uphinde lokho okushiwo encwadini ethi Ukubonisana. Ngemva kokubonisa ukwazisa ngokusabela komuntu, qhubeka nokuhlanganyela naye inkulumo ethakazelisayo esesigabeni sokuqala ekhasini 4 ngaphansi kwesihlokwana esithi “Ingabe Alikho Ikhambi?” Khona-ke ngokufunda uIsaya 65:21-23, veza izibusiso ukubusa kukaMesiya okuyoziletha.
5 Uma usebenzisa iPhaphama kaOctober 8 enesihloko esithi “Ungakwazi Ukunqoba Imizwelo Ephambene,” ungase uzame isingeniso sesithathu ngaphansi kwesihloko esithi “Ukuphila/Injabulo” esisemakhasini 12-13 encwadi ethi Ukubonisana. Ngemva kokuhlanganisa iHubo 1:1, 2, ungase ulethe ukunakekela ephuzwini elifanele elikumagazini iPhaphama!
6 Ngokunokwenzeka uyohlangabezana nabanini-khaya abathi banezincwadi zabo siqu ezingokwenkolo. Ungase uchaze ukuthi nathi sinazo izincwadi esizisebenzisa ngokwethu siqu (njengeNkonzo Yethu YoMbuso); nokho, omagazini bethu bafundwa izigidi zabantu ezingebona oFakazi BakaJehova.
7 Kweyoku-1 Korinte 3:6 uPawulu wathi: “Mina ngatshala, uApholo wanisela, kepha uNkulunkulu wakhulisa.” Uma sifuna ukuba uJehova akhulise imbewu yeqiniso ezinhliziyweni zabantu abathakazelayo, kumelwe sikunakekele ukutshala lembewu ngokuphumelelayo ngokusebenzisa izethulo ezishukumisayo.