Phindela Ngenjabulo Uyosiza Abathakazelayo
1 Wonke umuntu ohlanganyela emsebenzini wendlu ngendlu unesifiso sokusiza abantu abathakazelayo. Ngokunikeza usizo olunjalo, sithola injabulo ejulile nokwaneliseka. (Qhathanisa neHubo 126:5, 6.) Lokhu kudinga ukuba silungiselele.
2 Ukulungiselela kuqala ngokugcina ukwaziswa okunemininingwane embhalweni wethu wendlu ngendlu. Phawula indaba okwaxoxwa ngayo ekuhambeleni kokuqala nendlela umninikhaya asabela ngayo. Ungase ngisho uphawule nendlela ofuna ukuqalisa ngayo ingxoxo lapho uphindela.
3 Ngokwesibonelo, uma ekuqaleni wawubhekisele eMthandazweni WeNkosi wabe usuhambisa incwajana engangomagazini ethi “UHulumeni,” kafushane nje ungasho okuthile okunjengalokhu:
◼“Ekuhambeleni kwami okudlule, saxoxa ngendlela intando kaNkulunkulu ezokwenziwa ngayo emhlabeni nokuthi kuyoba khona ukuthula kuzo zonke izindawo. Kulencwajana engayishiya, siza uphawule lokho ekushoyo ekhasini 29 ngezinye izibusiso eziyolethwa uMbuso kaNkulunkulu esintwini.”
4 Uma umuntu ayethambekele ekubeni ongakholelwa kuNkulunkulu, yisho okuthile okunjengalokhu:
◼“Lapho ngifika esikhathini esidlule, saxoxa ngephuzu uPawulu alisho kumaHeberu 3:4, enikeza izizathu ezinengqondo zokuphetha ngokuthi kumelwe kube khona uMenzi ohlakaniphile wazo zonke izinto.” Phinda ufunde lomBhalo bese ubhekisela emakhasini 4 kuya ku-9 encwajana ethi Ingabe UNkulunkulu Uyasikhathalela Ngempela?, uxhume lapho ingxoxo yakho yokuqala yagcina khona. Buza umbuzo bese ufunda isigaba, uvumele umninikhaya aphendule umbuzo. Uma kungenzeka, mcele ukuba athathe incwajana yakhe bese nicabangela lokhu kwaziswa ndawonye.
5 Uma umninikhaya ayebonakala anelisekile, ngokwezinto ezibonakalayo noma ngokunye, phakathi nokuhambela kwakho kokuqala, ungaphinde ubhekisele epheshaneni elithi Ingabe Lelizwe Liyosinda? bese ufunda lokho okushiwo ekhasini 6. Buza umninikhaya ukuthi uyafisa yini ukuhlala epharadesi elihle emhlabeni. Ukuze uthole ukuthi usenaso yini isithakazelo, ungase ucele ukukhulumela kwakhe ngesithombe esikhuthazayo noma ukwaziswa okukumagazini owusebenzisayo.
6 Lesingeniso esifanayo esiyisisekelo singasetshenziswa nesihloko esiku-Nqabayokulinda noma i-Phaphama! okungenzeka saqokonyiswa. Bhekisela esihlokweni esaqokonyiswa ekuhambeleni kwakho kokuqala bese uphawula elinye iphuzu elithakazelisayo elisesihlokweni esifanayo noma elinye elikomunye umagazini owuphethe. Uma kungenzeka, fundani umbhalo ndawonye bese ucela ukukhulumela komninikhaya. Khona-ke khuthaza umninikhaya ukuba enze isikhokhelo sikamagazini.
7 Sifuna ukuba nesimo sengqondo esihle ngokuphathelene nesikhokhelo phakathi no-May. Kungani singabakhuthazi abantu abasemizileni yethu kamagazini ukuba benze isikhokhelo sikamagazini? Lapho abantu bebonise isithakazelo eqinisweni noma bemukele izincwadi kithi esikhathini esidlule, masibakhuthazele nokuba benze isikhokhelo.
8 Khumbula injongo yakho yokuqalisa isifundo seBhayibheli. Ngokuvamile kudinga ukuhambela okuningana ukuze uthuthukise isithakazelo size sifinyelele kulelozinga. Bonisa ukukhathalela komuntu siqu ngomninikhaya ngokuphindela kuye ngokushesha ngangokunokwenzeka.
9 Izindaba ezinhle esizimemezelayo ziletha injabulo enkulu. (Luka 2:10) Lapho abantu abathakazelayo besabela emizamweni yethu, ngokuqinisekile lokhu kufanele kusenze sijabule. (Fil. 4:1) Masithole injabulo enjalo ngokuphindela siyosiza abathakazelayo esibathola ensimini.