Ukuhambisa Izikhokhelo Endlini Ngendlu
1 Injongo ye-Phaphama! ishiwo ngokucacile ekhasini 4 kumagazini ngamunye: “Lomagazini wakha ithemba esithembisweni soMdali sezwe elisha elinokuthula nelilondekile ngaphambi kokuba isizukulwane esabona izenzakalo zika-1914 sidlule.” Ngokuqinisekile umagazini onjalo ufanelwe ukusakazwa kabanzi ngangokunokwenzeka enkonzweni yethu yendlu ngendlu! Phakathi no-October sinethuba lokuhambisa isikhokhelo salomagazini omuhle kakhulu kubantu abaningi ngangokunokwenzeka.
2 I-Phaphama! iyindlela enhle kakhulu yokuvusa isithakazelo sabantu okungenzeka abathambekele ezintweni ezingokomoya. Lapho ufunda umagazini ngamunye, bheka amaphuzu afanelekayo ongawahlanganyela nabanye. Abanye abamemezeli babhala amaphuzu komagazini babo siqu, futhi ngaphambi kokuba baye enkonzweni yasensimini nalowomagazini, babukeza amaphuzu abawabhalile ukuze bakhumbule amaphuzu athile abazowahlanganyela nabaninikhaya.
3 Singase sikhethe ukuqala intshumayelo yethu ngokukhulumela ngokuqondile indaba okuxoxwa ngayo kumagazini i-Phaphama! esiwusebenzisayo.
Ngemva kwesethulo esifushane singethula umagazini, mhlawumbe ngokuthi:
◼“Lesihloko se-Phaphama! sixoxa ngalendaba ngokuningiliziwe.” Khona-ke funda umusho owodwa noma emibili oyikhethe kusengaphambili, bese uqhubeka: “Njengoba ubonakala unesithakazelo kulendaba, ungathanda yini ukufunda lesihloko kanye nezinye izihloko ezifike ngesikhathi ezikule-Phaphama!? Uma kunjalo, ngingakujabulela ukukuhlelela ukuba wenze isikhokhelo salomagazini omuhle kakhulu ngomnikelo ka-R19,00 kuphela ngonyaka. Khona-ke uyothola omagazini abangu-24 ngeposi.” Uma umninikhaya esenqaba isipho sesikhokhelo, mkhuthaze ukuba athathe omagazini ababili. Uma umninikhaya ebamukela omagazini, kungase kufaneleke ukusho okuthile okunjengalokhu: “Sicela umnikelo ka-R1,60 ukuze sihlangabezane nezindleko zokunyathelisa labomagazini bobabili.”
4 Uma umninikhaya esibonisa ngokucacile isithakazelo ezintweni ezingokomoya, singase sivule umbhalo, onjengeyesi-2 Thimothewu 3:1-5 okhuluma ngezinsuku zokugcina. Ngemva kwalokho, ukuze simenze abe nesithakazelo komagazini bethu, singafunda ngokuqondile ekhasini 2 likamagazini wamuva INqabayokulinda engxenyeni eqala ngokuthi: “Injongo ye-Nqabayokulinda.” Ngemva kwalokho, mhambisele isikhokhelo.
5 Ezindaweni eziningi abantu bakhathazekile ngezimo zomnotho eziya ziba zimbi noma ngokwanda kobugebengu nobudlova. Ungase uthande ukuthi:
◼“Sihlanganyela nomakhelwane bethu umbono oqondile ngekusasa. Uzizwa kanjani ngesikhathi esizayo esingekude? Ingabe nawe ukhathazekile ngezimo zomnotho eziya ziba zimbi nangokwanda kobugebengu nobudlova? [Lindela impendulo.] Ingabe unomuzwa wokuthi ukhona onekhambi langempela lalezinkinga? [Lindela impendulo.] Ngiye ngathola iBhayibheli liwusizo kakhulu kulokhu.” Sebenzisa umbhalo owodwa noma ngaphezulu kwesencwadini ethi Ukubonisana emakhasini 357-62, echaza lokho uMbuso kaNkulunkulu oyokwenzela isintu. Donsela ukunakekela komninikhaya esihlokweni esifanelekile esiku-Nqabayokulinda. Hambisa isikhokhelo.
6 Njengoba sihambela indlu nendlu, masikhumbule ukuthi sinamathuluzi amabili kwamahle kunawo wonke emhlabeni okusiza abantu bathuthuke ngokomoya, INqabayokulinda ne-Phaphama! Kwangathi singazibekela umgomo wokwenza abaninikhaya babe nesithakazelo kulabomagazini futhi sihambise isikhokhelo ngawo wonke amathuba.