Ingabe Usebenza Unenjongo?
1 UJehova unguNkulunkulu wenjongo. (Isaya 55:10, 11) Selulekwa ukuba simlingise. (Efe. 5:1) Lokhu kufanele kubonakale endleleni esenza ngayo inkonzo yethu. Ngakho lo mbuzo uyafaneleka: “Ingabe usebenza unenjongo?”
2 Ukushumayela kwakho endlini ngendlu, ukufakaza ngokwethukela nokuhambisa izincwadi, konke kuyingxenye yenkonzo enenjongo. Kodwa khumbula ukuthi umsebenzi wethu awuhileli nje ukushumayela kuphela kodwa futhi nokwenza abafundi. (Math. 28:19, 20) Ngemva kokuhlwanyela imbewu yeqiniso loMbuso, kufanele siphindele siyoyinisela futhi siyinakekele njalo kuyilapho sibheke kuJehova ukuba ayikhulise. (1 Kor. 3:6) Kufanele sibe qotho ekwenzeni izimpindelo nasekuqaleni izifundo zeBhayibheli.
3 Yandisa Inkonzo Yakho: Njalo uzizwa ujabula lapho ubheka emuva kulokho okwenzile enkonzweni bese uthi: “Ngiye ngakufeza ebengizimisele ukukwenza.” Njengoba kulotshwe kweyesi-2 Thimothewu 4:5, uPawulu weluleka: “Uyifeze ngokugcwele inkonzo yakho.” Lokho kuhlanganisa imizamo oyenzayo yokulandelela bonke abantu abathakazelayo obatholile. Esimisweni sakho senkonzo samasonto onke, hlela isikhathi esiqondile sokwenza izimpindelo. Sebenzela ukufinyelela umgomo wokuqala izifundo zeBhayibheli nalabo abathambekele ekulungeni. Lokhu kufanele kube yinjongo yakho lapho uhlanganyela enkonzweni.
4 Buza abamemezeli ukuthi bázizwa kanjani lapho bebona abantu ababefunda nabo iBhayibheli bebhapathizwa emhlanganweni. Bajabula cishe ngendlela efanayo neyalabo ababebhapathizwa. Babefinyelele umgomo omkhulu! Omunye umenzi wabafundi wakubeka ngale ndlela: “Ukwenza abafundi kusho ukwenza abadumisi bakaJehova abengeziwe. Kusho ukuphila kulabo abamukela iqiniso. Ngiyakuthanda ngempela ukufundisa abanye iqiniso—kuhle ngempela! . . . Abaningi balabo abaye bamthanda uJehova sebengabangane bami abakhulu.”
5 Cabanga nje ukuthi kunjani ukukwazi ukusiza umuntu abe inceku kaJehova ezinikezele! Yeka injabulo okuyiyo! Izithelo ezinjalo zibangelwa ukusebenza enkonzweni unenjongo.—Kol. 4:17.