Indima Yakho Ekwakheleni Ikusasa

¹ Namuhla amaKristu ayaqhubeka enakekela umsebenzi wokwakha ongokomoya lowo uJesu awuqala cishe eminyakeni engu-1960 edlule lapho eqala ukubuthela ndawonye abafundi. (Math. 4:17; 7:24, 25, 28; Joh. 7:46) UJehova uye wawubusisa kakhulu lomsebenzi. (IzAga 10:22) Njengoba siqhubeka simemezela ngoMbuso kaNkulunkulu, nathi siyakha ukuze sinakekele ukwanda kwesikhathi esizayo.—UmSh. 11:6.

² Nakuba amanye amaHholo oMbuso amadala kumelwe avuselelwe, kudingeka amahholo amaningi engeziwe ukuze ahlalise amabandla amasha nasekhona kakade. Kudingeka kokubili izimali nezisebenzi zokuzithandela ukuze lemisebenzi yokwakha iqedwe ngokuphumelelayo. Isimo sengqondo esiqondile esitusekayo sabazalwane ekufezeni lesidingo sivuzwa ngokucebile.—IHu. 41:1; IzAga 19:17; UmSh. 11:1; Luka 14:13, 14.

ABANINGI BANIKEZA USIZO LOTHANDO

³ Sibonisa uthando lwethu “ngayo yonke inhlangano yabazalwane” ngokunikelela Isikhwama SeNhlangano SamaHholo OMbuso. (1 Pet. 2:17, NW) Kodwa isidingo siyaqhubeka sikhula njengoba umsebenzi wokubutha ushesha. Ngakho uJehova uyaqhubeka ebusisa lelilungiselelo, futhi abadala kumelwe baqikelele ukuba ibhokisi lesiKhwama SeNhlangano SamaHholo OMbuso libonakale ngokucacile futhi bonke bakwazi ukulifinyelela. Iminikelo etholakalayo kanye nezimali ezivela ekukhokhweni kwezimali ebezibolekisiwe kusetshenziselwa ukwakha amaHholo oMbuso amasha.

⁴ INhlangano, kanye nawo wonke amabandla azuzayo kulelilungiselelo, bazwakalisa ukwazisa okujulile kubantu abaningi kanye nemikhaya abanikela njalo esiKhwameni SeNhlangano SamaHholo OMbuso. Amabandla amaningi aye enza izwi lesinqumo lokunikela kulesikhwama. Ezinye izifunda ngothando ziye zenza izinqumo ezifanayo. Eqinisweni, sijabula kakhulu ngokubika ukuthi amabandla angu-504 kwangu-1195 kumanje ayasisekela lesikhwama. Njengoba kuyilungelo ukusiza abazalwane bethu, amanye amabandla angekucabangele yini ngokungathi sína ukwenza okufanayo? Lokhu kungazandisa ngokushesha okukhulu izimali ezikhona, ngaleyondlela kwenze amabandla amaningi akwazi ukuzuza.

KUDINGEKA IZISEBENZI ZOKUZITHANDELA EZENGEZIWEB2

⁵ Ingabe unguchwepheshe emsebenzini wokwakha? Uma kunjalo, futhi ungatholakalela ukusiza ekwakhiweni kwamaHholo oMbuso, ungazisa abadala bebandla lakini noma umbonisi wesifunda ngalokhu. Izisebenzi zokuzithandela ezingochwepheshe zidingeka ezweni lonke. Okwamanje ababaningi ochwepheshe bezokwakha abakhona okusho ukuthi umsebenzi wokwakha amaHholo oMbuso usemahlombe abazalwane abambalwa kuphela. Labazalwane banaso isifiso, kodwa bayakuzwa ukucindezeleka kokuhlala befunwa ngapha nangapha. Ngaphandle kwalokhu banezinye izibopho, njengemithwalo yemfanelo yemikhaya neyebandla. Ngakho umbuzo uyaphakama, Singabatholaphi abakhi abengeziwe abanolwazi? Ngokubaqeqesha!

⁶ Sinxusa bonke, ikakhulukazi abazalwane abasebasha abaqinile ngokomzimba, ukuba bazise abadala basemabandleni abakuwo noma umbonisi wesifunda ngesifiso sabo sokukhonza. IKomiti Yokwakha Yesifunda iyokuqeqesha ngesikhathi usebenza. Amakhono okwakha angafundwa ngokushesha. Ngesikhathi sakha ikhaya laseBethel eRoodekrans sabaswela ngempela ochwepheshe bokwakha, khona-ke saqeqesha abazalwane abayizimfunda ukuba babe abakhi, abaplasteli, abasebenza ngamapayipi, nababazi, njll. Ngisho nodade baqeqeshelwa imisebenzi enjengokufaka amatile nokupenda, futhi bakwenza kahle ngempela.

⁷ Sikhuthaza amaKomiti Okwakha Ezifunda ukuba avuse ugqozi lwabazalwane. Amadoda anolwazi mawaqeqeshe abazalwane nodade abanesifiso. Nakuba lokhu kungase kuwenze uhambe kancane umsebenzi ekuqaleni, ngokuhamba kwesikhathi kuzoba khona amadoda anolwazi engeziwe ukuba anakekele izakhiwo eziningi. Lokhu kuyophumela ekwabiweni ngokulingana komthwalo womsebenzi futhi ngaleyondlela kusheshise umsebenzi wokwakha. Enye inzuzo iwukuthi kujabulisa ngokwengeziwe ukusebenza nabantu okholwa nabo ekwakhiweni kwamaHholo oMbuso amahle.

⁸ Ngakho, kungani ungazenzi utholakale MANJE. Uyothola ukuqeqeshelwa isici esithile sokwakha ngesikhathi esifanayo ukhumbula ukuthi uIsaya 65:21, 22 ubonisa ukuthi amakhono akho ayosetshenziswa ezweni elisha.

INDIMA YAMAKOMITI OKWAKHA EZIFUNDA

⁹ AmaKomiti Okwakha Ezifunda angu-22 anikeza usizo kuwo wonke amazinga okuhlela nokwakha. Abazalwane abakhonza kulamakomiti bangabadala abanokuhlangenwe nakho, futhi banganikeza ukusikisela okuwusizo kokwakha amaHholo oMbuso anesizotha nakhangayo kanye nokokonga isikhathi nemali. Ngenxa yokuhlangenwe nakho kwabo, bangasiza abadala bebandla ukuba banqume ukuthi kuyoba ngcono yini ukuvuselela iHholo LoMbuso elikhona kakade noma ukwakha elisha, futhi bangabasiza ukuba banqume ngaphambi kokuthenga ukuthi isiza esicatshangelwayo sifanelekile yini. Futhi bangasiza abadala ukuba bazicabangele ngokuthe ngqo izindleko zokwakha nemali yokuthengiswa kweHholo LoMbuso elikhona elingase lidayiswe.

¹⁰ Ngaphambili kakhulu kokuthenga indawo, kuwukuhlakanipha ukubonana neKomiti YoKwakha Yesifunda. Lamakomiti abelwe ukusiza ekwakhiweni kwamaHholo oMbuso endaweni ekhonjiwe, futhi angakwazi ukusiza ekuthengeni indawo. Aneziqondiso zokusiza abazalwane ukuba bagweme ubunzima okungase kuhlangatshezwane nabo ekuthengeni indawo. Umbonisi wesifunda ngamunye utshelwe igama, ikheli, nenombolo yocingo kasihlalo wekomiti futhi angahlanganyela lokhu kwaziswa nabadala bebandla lapho kunesidingo.

¹¹ Lapho bekhetha indawo yokwakha iHholo LoMbuso edolobheni elinamabandla angaphezu kwelilodwa, abadala bebandla kumelwe baxoxe neKomiti Yokwakha Yesifunda, umbonisi noma ababonisi besifunda, umbonisi wedolobha, futhi ngokunokwenzeka nabadala bamabandla angomakhelwane. Lokhu kungasiza abadala bebandla elakhayo ekukhetheni isiza esizozuzisa amabandla ahilelekile ekwakheni futhi ngokunokwenzeka kunciphise ukugcwala ngokweqile kwamaHholo oMbuso angomakhelwane, kuyilapho kuvumela futhi ukwanda kwesikhathi esizayo kuleyondawo. Ezindaweni ezisemadolobheni, iHholo LoMbuso elilodwa livame ukusetshenziswa amabandla amathathu noma ngaphezulu. Ngisho nasezindaweni ezingenabo abantu abaningi, kungase kukhethwe indawo engase ikhonze amabandla amabili noma ngaphezulu. Sikhuthaza amabandla ukuba awasebenzise ngokugcwele amaHholo oMbuso awo.

¹² Esebenzisa iziqondiso ezivela eNhlanganweni, amaKomiti Okwakha Ezifunda anikeza inkonzo eyigugu njengoba esiza amabandla endawo ekuvuseleleni nasekwakheni kwawo izakhiwo ezintsha. Phakathi nesikhathi sokwakha, izisebenzi zokuzithandela zihlelelwa isikhathi eziyodingeka ngaso kakhulu kuphela esakhiweni ukuze zingaphuthelwa ukuhlanganyela emihlanganweni nasenkonzweni yasensimini nebandla lazo. Enye iKomiti Yokwakha Yesifunda yathi: “Ngemizamo yethu eqhubekayo yokusebenzisa iziqondiso zeNhlangano, siye sasizwa ukuba senze lula futhi sisheshise izinqubo zokwakha.” Ukuhleleka namakhono okufundwe kulezizakhiwo kuyoba usizo ekwakhiweni kwamaHholo Omhlangano nasekusizeni abazalwane ukuba bakhe kabusha ngemva kwezinhlekelele ezingokwemvelo. Eqinisweni, ezinye zezikhonzi zokuzithandela eziqeqeshwe iNhlangano ziye zasiza ekwakhiweni kwamahhovisi abahumushi eWindhoek futhi ezinye zizosetshenziselwa ukwakha isakhiwo esisha sokunweba iBethel.

¹³ Sonke singabonisa isithelo somusa ekusebenzelaneni nalabo abaqondisa umsebenzi wokwakha. Ngalendlela umsebenzi odingekayo ‘uyafezwa’ futhi wenziwe ‘ngokuthokoza hhayi ngokububula.’ (IzEnzo 14:26; Heb. 13:17) IKomiti Yokwakha Yesifunda yakwazi ukubika: “Ukubambisana phakathi kwamabandla amathathu kwakukuhle ngendlela ekhethekile. . . . Bonke abazalwane babonisa ukuvuthwa ngokomoya. Kwakujabulisa ukusebenza nabo. Lesisakhiwo siyohlala sikhumbuleka.”

UKUKHOKHELA UKWAKHIWA KWAMAHHOLO OMBUSO

¹⁴ Amalungiselelo anoma iziphi izimali ezidingekayo kumelwe enziwe zisuka. (Luka 14:28-30) Abadala kumelwe bathole ukuthi ibandla lizokwazi ukukhokhela izindleko ezihilelekile ngokuhlola ukuze babone (1) ukuthi imalini ezonikelwa njengesamba ukuze isize ekuthengeni indawo nezindleko zokwakha, (2) imalini engabolekwa ebandleni nobude besikhathi izimali eziyoba khona ngaso, nokuthi (3) imalini abamemezeli abacabanga ukuyinikela nyanga zonke ukuze kukhokhelwe noma iyiphi imali edingekayo ebolekiwe ngaphezu kweyokunakekela izindleko ezivamile zokwakha.

¹⁵ Ngemva kwalokho, abadala bamabandla afisa ukuthola usizo lwezimali esiKhwameni SeNhlangno SamaHholo OMbuso kumelwe baxoxe nombonisi wesifunda ngesakhiwo abasihlongozayo nezimali abazozidinga, ongabasiza ngokutshela iNhlangano ngezidingo zabo nemininingwane yesakhiwo. Ngemva kokuba umbonisi wesifunda esethumele ukwaziswa eNhlanganweni, incwadi ithunyelwa ngokuqondile emabandleni ahilelekile. Usizo lwezimali lunikezwa njalo njengoba izimali zitholakala futhi kuye ngesidingo.

UKULONDOLOZA UMOYA WENKUTHALO

¹⁶ Bonke kumelwe batuswe ngokuphana kwabo ekusekeleni isikhwama seNhlangano SamaHholo OMbuso. Kuye kwatholakala amazwi okwazisa evela emabandleni aye asizwa. Emabandleni “kwaba khona ukulingana.” (2 Kor. 8:14, 15) Amabandla amane kwenye indawo abhala: “Yeka ukuthi sisazisa kanjani lesimiso esihle kangaka, futhi yeka ukuthi sibabonga kanjani bonke abazalwane abaphanayo abaye banikela esiKhwameni SeNhlangano SamaHholo OMbuso. . . . Ngempela, uthando oluvelele lobuKristu luye lwaboniswa kithi. Sizani namukele ukubonga kwethu ngalo lonke usizo lwenu ekwenzeni lomsebenzi wokwakha amaHholo oMbuso ube yimpumelelo.” Elinye ibandla eNatali labhala: “Khona-ke bazalwane injongo yalencwadi, iwukunibonga kakhulu ngokusiboleka isamba semali ukuze sakhe ihholo lethu. Ngaphandle kwalemali eyaziswa kakhulu, bazalwane, besingeke sikwazi ukwakha leliHholo LoMbuso. Ngakho bazalwane, siyaphinda sithi ‘Siyabonga Kakhulu.’”

¹⁷ Phakathi nesikhathi sokwakha iHholo LoMbuso elisha, intshiseko, ugqozi nomoya oqondile kuba nengxenye ekuphumeleleni kwesakhiwo. Wona lowomoya kumelwe uqhubeke njengoba sifuna ukuqoqela abantu abengeziwe olwazini lweqiniso futhi sibakhuthaze ukuba bahlangane nathi eHholo LoMbuso. Intshiseko enjalo iwukuboniswa obala kokwazisa okuphumela ekwandeni okuphawulekayo emananini ababakhona nasengqikithini yokwanda ebandleni.

¹⁸ Njengoba siqhubeka sandisa inkonzo yethu, sizikhandla ngentshiseko emsebenzini esinawo, akungabazeki ukuthi isibusiso sikaJehova siyoqhubeka sinathi. (Luka 13:24) Asazi ukuthi ikuphi ukwanda okusilindele esikhathini esizayo. Kodwa sidinga ukulungela ukwamukela noma ikuphi ukwanda kwabakhulekeli kwesikhathi esizayo. Lokho kudinga ukulungiselela ngasohlangothini lwethu. Ngakho-ke, sithandazela isibusiso sikaJehova esiqhubekayo nesiqondiso. Ekwakheleni ikusasa, kwangathi sonke singaba izisebenzi kanye noJehova—ngokomzimba, ngokwezinto ezibonakalayo, nangokomoya. Ngokuqinisekile uyosibusisa njengoba sibanakekela kahle labo abagijimela enhlanganweni yoMbuso wakhe phakathi nengxenye yokugcina yalezinsuku zokugcina.—Isaya 60:8, 10, 11, 22.