Зықәрахь инеихьоу аишьцәеи аиҳәшьцәеи, шәара аизаразы шәыхә ҳаракуп
«Сҿара ансгәаласыршәо шаҟа ус ҟасҵоз џьасшьоит. Уқәра цацыԥхьаӡа, умчқәагьы каԥсоит» (Ко́нни, 83 шықәса).
Иҟалап шәаргьы уаанӡа ишәылшоз шәылымшозар. Шәара гәыкала Иегова имаҵ шәуеижьҭеи акыршықәса ҵуазар ауеит. Аха уаанӡа ишәылшози уажәы ишәылшои анеиҿшәырԥшуа, шәгәы каҳауазар алшоит. Ишәыцхраауазеи агәырӷьара амырӡра?
ИЕГОВА ШӘАРА ШӘҞЫНТӘ ДЫЗЗЫԤШУ
Шәхы шәазҵаа: «Дыззыԥшузеи Иегова сара сҟынтә?» 2 Коринфаа 8:12 аҿы иану шәгәы шьҭнахыр алшоит. Уа иҳәоуп: «Ауаҩы гәык-ԥсыкала иҭахны ак аныҟаиҵо, уи Анцәа игәы иахәоит, избанзар иара дыззыԥшу ауаҩы илшо ауп, илымшо акәӡам».
Ари ажәеинраала иаҳнарбоит Иегова имаҵ аураҿы ишәылшо ҟашәҵалар шиҭаху. Ари азхәыцра шәхы егьырҭ рыҿмырԥшра ишәыцхраауеит. Иара убас Иегова изы уаанӡа иҟашәҵози уажәы иҟашәҵои реиҿмырԥшра шәгәазҭанаҵоит.
Шәара еиҳа шәанҿаз Иегова зегь иреиӷьу ишәҭозҭгьы ҟаларын. Аха уажәы, шәҭагылазаашьа аҽанаԥсахгьы, Иегова зегь иреиӷьу иҭара шәаҟәымҵӡеит. Убри шәазхәыцыр, уаанӡа еиԥш уажәгьы Иегова зегь иреиӷьу шишәҭо еилышәкаауеит.
Еиҳа шәанқәыԥшыз Иегова зегь иреиӷьу ишәҭон. Уажәгьы, шықәрахь шәышнеихьоугьы, убасҵәҟьа ҟашәҵоит
ШӘԤЫШӘА ЕГЬЫРҬ АХӘАРҬА РЗААНАГАР АУЕИТ
Шәықәра иахҟьаны ишәзыҟамҵо азхәыцра аҭыԥан, шәанқәыԥшыз ишәзыҟамҵоз, аха уажәы иҟашәҵалар шәылшо шәазхәыц. Абар урҭ алшарақәа руак.
Шәԥышәа егьырҭ ирыцеиҩышәшала. Шәрызхәыц ҵаҟа иаагоу абиблиатә жәеинраалақәа.
Аҳ Давид: «Сара зны сқәыԥшын, уажәшьҭа сажәит, аха Анцәа ауаҩ иаша даанижьны сымбацызт, ихәыҷқәагьы ача иаҳәо исымбацызт» (Аԥсал. 37:25).
Иисус Навин: «Шәара ибзианы ижәдыруеит Шәынцәа Иегова ишәеиҳәаз иқьиоу ажәақәа рҟынтәи ажәакгьы намӡакәа ишнымхаз. Урҭ зегьы наӡеит. Ажәакгьы намӡакәа инымхеит» (Иис. Н. 23:14).
Давиди Иисус Навини акыршықәса Иегова имаҵ руан. Дара аԥсҭазаараҿы ирбахьаз рацәан, аԥышәа дугьы рыман. Убри аҟынтә ражәақәа амч рыман.
Шәаргьы Анцәа имаҵ шәуеижьҭеи акыршықәса ҵуазар, Иегова шәаргьы егьырҭ имаҵзуҩцәагьы шаҟа бзиара рзыҟаиҵахьоу еиҭашәҳәар шәылшоит. Иҟалап Иегова ижәлар дшырзылԥхаз иазку бзиа ижәбо хҭыск шәымазар. Ус акәзар, уи еиҭашәҳәа. Уи аишьцәеи аиҳәшьцәеи рхаҵара арӷәӷәоит, шәаргьы шәгәы шьҭнахуеит (Рим. 1:11, 12).
Егьырҭ ргәы ашьҭыхразы даҽа лшаракгьы шәымоуп — шәгәабзиара иауазар, аизарақәа авидеоконференциала рзыӡырҩра аҭыԥан, Иегова ишаҳаҭцәа рзал ахь шәныҟәала. Уи шәаргьы амч шәнаҭоит, аишьцәеи аиҳәшьцәеигьы ргәы шьҭнахуеит. Хыхь зыӡбахә ҳәаз Конни илҳәоит: «Аизарақәа сгәы акамыжьра исыцхраауеит. Сгәы шԥакасыжьуеи, Иегова ишаҳаҭцәа рзал ахь саннеиуа шаҟа бзиа сырбо анызбо? Сара урҭ идуӡӡаны иҭабуп ҳәа расҳәоит! Зны-зынла ҳамҭа хәыҷқәакгьы рзыҟасҵоит. Анаҩсгьы аишьцәеи аиҳәшьцәеи срывагыланы Иегова имаҵ зулар сҭахуп!»
ИЕГОВА ГӘЫКАЛА ИМАҴ АХЬЫЖӘУА АХӘ ҲАРАКНЫ ИШЬОИТ
Абиблиаҿы иануп Иегова имаҵ аураҿы шаҟа рҭахыз ззыҟамҵоз, аха уезгьы бзиа иибоз ирацәаҩны ауаа рыӡбахә. Даҳгәалаҳаршәап Симеон. Иисус дани иара дбыргхахьан. Симеон аныҳәарҭахь даннеиуаз ибон уа иқәыԥшыз ауаа аус хада шынарыгӡоз. Иҟалап иара аҿар Анцәа изы иҟарҵоз аҟара ахьизыҟамҵоз азы шьҭа сызхәарҭои ҳәа дхәыцуазҭгьы. Аха Иегова Симеон зынӡа даҽакала ауп дышихәаԥшуаз — «Анцәа иҿаԥхьа ииашаз, Анцәа ицәшәоз ауаҩы» иеиԥш. Иегова уи ҿыц ииз Иисус дибартә иҟаиҵеит. Убасала аҳаҭыр ду иаҭәеишьеит. Уи адагьы, Симеон ила Анцәа иҳәеит Иисус изқәыргәыӷыз Мессиа шиакәхо! (Лука 2:25—35). Иубаратәы иҟоуп ибыргыз уи ахаҵа «иԥшьоу адоуҳа... [шимаз]». Иегова изы ихадаз Симеон шаҟа амч имаз акәӡамызт, ихаҵара акәын.
Иегова Симеон дизылԥхеит — ҿыц ииз Иисус диирбеит, насгьы Иисус Мессиа шиакәхо ала аԥааимбаражәа иҳәартә алшара ииҭеит
Агәра ганы шәыҟаз: Иегова шәықәра шыҟоугьы, имаҵ ахьыжәуа ахә ҳаракны ишьоит. Ауаҩы илымшо акәымкәа, илшо аныҟаиҵо, уи Анцәа игәы ҟанаҵоит (2 Кор. 8:12).
Иҟашәҵалар шәылшо шәхы азышәышьҭла. Шәазхәыц иарбан маҵзура хкқәоу, маҷк иадамзаргьы, шәхы злашәырхәыр шәылшо. Ишәылшома иашьак ма иаҳәшьак ргәы шьҭышәхырц азы аҭел шәырзасыр, мамзаргьы аоткрытка рзыжәҩыр? Уи маҷушәа шәгәы иабар ауеит, аха шәазхәыц шаҟа ргәы ҟанаҵо акыршықәса Иегова имаҵ зуа ауаҩы иахьигәалашәаз.
Агәабзиара иадҳәалоу ауадаҩрақәа ҳамазаргьы, агәырӷьара мырӡкәа Иегова имаҵ ҳаулар ҳалшоит. Мрагыларатәи Африка иҟалаз хҭыск уи бзианы иунарбоит. Уи ахҭыс ануп арамка «Уи деиқәнархеит» аҿы.
Ишәхашәмыршҭлан иаашәырԥшуа ахаҵареи гәыкала Иегова имаҵ ахьыжәуеи егьырҭ ргәы шышьҭнахуа. Шәара ачҳара аарԥшны зегьы ахьышәхыжәго егьырҭ рзы ҿырԥш бзиоуп. Агәра ганы шәыҟаз: «Анцәа диашоуп, убри аҟынтә иахьа уажәраанӡа иԥшьоу рымаҵ уа, ихьӡ азы ижәбо аџьабааи иаашәырԥшуа абзиабареи ихашҭӡом» (Аур. 6:10).
АԤХЬАҞАГЬЫ ИШӘЫЛШО ҞАШӘҴАЛА
Аҭҵаарақәа излаҳдырбо ала, зықәрахь инеихьоу ауаа егьырҭ ианрыцхраауа ргәабзиара еиҳа еиӷьхоит, рыхшыҩ еиҳа ибзианы аус ауеит, акыршықәсагьы нырҵуеит.
Ҳәарада, егьа аус бзиа ҟаҳҵозаргьы, уеизгьы ҳажәуеит. Анцәа Иаҳра заҵәык ауп Адам иҟынтә иаҳҭынхаз анамӡара иахылҿиааз ажәреи аԥсреи ықәызхуа (Рим. 5:12).
Иегова имаҵ аураҿы иҟашәҵо зегьы ишәымоу агәыӷра амырӡра ишәыцхраауеит, уи шәгәабзиарагьы ибзианы ианыԥшыр ауеит. Ҳаҭыр зқәу зықәрахь инеихьоу аишьцәеи аиҳәшьцәеи, ҳшәыҳәоит Иегова изы иҟашәҵо зегьы ахә ҳаракны ишишьо шәхашәмыршҭлан. Шәхаҵара аизара зегь азы иҿырԥшыгоуп.