Ацәгьара зегьы аҵыхәтәа

ИУБОИ араҟа? Ииашоуп — аҽы шкәакәақәа ирықәтәоу аруаа. Аха цқьа уахәаԥш — дара ахьынтәаауа. Ажәҩан аҟынтә, аԥҭақәа ирылаланы! Аха ажәҩан аҟны аҽқәа ыҟоума?

Мап, убри азоуп арҭ уаҩы иимбац аҽқәа изреиԥшу. Иаабац аҽқәа аԥҭақәа ирылаланы аҩра рылшома? Аха Абиблиа иаҳәоит ажәҩан аҟны иҟоу аҽқәа ртәы. Избан удыруазар?

Избанзар ажәытәан аибашьрақәа раан аҽқәа рхы иадырхәон. Абиблиаҿы ажәҩанаҿы иҩуа аҽқәа ртәы аҳәоит, Анцәа адгьыл иқәынхо ауаа дышрабашьуа аанарԥшырц. Иудыруама, ари аибашьра мҩаԥысраны иахьыҟоу иахьӡу? Армагеддон. Ари аибашьраҿы инырҵәахоит адгьылаҿы цәгьарас иҟоу зегьы.

Армагеддон амш аҽны аибашьра напхгара азиулоит Иисус. Иугәаларшәа — Иегова иеиҳабыра аҳас далихит Иисус. Убри азоуп Иисус аҳцәа ргәыргьын зихоу. Аҳәа иаанагоит, уи Анцәа иаӷацәа зегьы шықәихуа. Аха ихауҵарыма уара, Анцәа ауаа цәгьақәа зегьы шықәихуа?

Уазхьаԥш 10-тәи ажәабжь. Иубои уаҟа? Ииашоуп — адунеизегьтәи аӡхыҵра ауаа цәгьақәа зегьы ықәнахуеит. Ари аӡхыҵра ҟазҵада? Анцәа Иегова. Уажәшьҭа 15-тәи ажәабжь уахәаԥш. Иубои уаҟа? Иегова илаишьҭыз амца Содоми Гоморреи ықәнахуеит.

Уажәшьҭа 33-тәи ажәабжь уахәаԥш. Ирыхьзеи мсыраа рыҽқәеи реибашьыгатә ҽыуардынқәеи? Урҭ аӡы рылазҵада? Иегова. Убас уи иуаажәлар ихьчоит. Уахәаԥши 76-тәи ажәабжь. Уаҟагьы иубоит, Иегова жәларыс имаз — израилаагьы — рус бааԥсқәа рзы иқәырхыртә ишыҟаиҵаз.

Убри аҟнытә уамашәа иҳамбозароуп ҳара, Иегова жәҩантәи ир аашьҭны, адгьылаҿы цәгьарас иҟоу зегьы рҵыхәтәа шааиго. Аха уазхәыц — ари зегь иаанаго! Иаарҳәы адаҟьа, нас уи закәу еилаҳкаап.