Тимофе́и ауаа дрыцхраалар иҭахын

Тимофеи гәахәарыла ауаа ирыцхраауаз иқәыԥшыз арԥысын. Иара ирацәаны дныҟәон ауаа дрыцхраарц азы, убри аҟнытә иԥсҭазаарагьы даара аинтерес аман. Иуҭахума уара уи атәы еилукаар?~

Тимофеи ақалақь Ли́стра аҟны изҳаит. Иара даныхәыҷыз ианду Лои́деи иан Евни́кеи Иегова иӡбахә изеиҭарҳәон. Тимофеи ианизҳа, иҭаххеит егьырҭ Иегова иӡбахә рзеиҭеиҳәаларц.

Тимофеи данарԥысыз апостол Павел иеиҳәеит ажәабжь бзиа рылаҳәаразы атәыла харақәа рахь диццарц. Тимофеи иаразнак аҭак ҟаиҵеит: «Ааи, сцоит!» Уи дазхиан ауаа рыцхраара.

Тимофеи Павел дицны ддәықәлеит македониатәи ақалақь Фессало́никаҟа. Раԥхьа урҭ акыраамҭа шьапыла амҩа иқәын, нас — ӷбала. Фессалоника иахьнеиз Павели Тимофеи аӡәырҩы Иегова иеилкаара ирыцхрааит. Аха Фессалоника иқәынхоз џьоукы урҭ зҿыз ргәамԥхеит. Дара Павел иҩызцәеи иареи ирԥырхагахарц рҭахын. Убри аҟынтә Павел ицызи иареи уи ақалақь ааныжьны, даҽа ҭыԥк ахь ицаны ажәабжь аҳәара рықәшәеит.

Мызқәак рышьҭахь Павел Тимофеи диҳәеит ҿыц Фессалоникаҟа дхынҳәны, ажәабжь здызкылаз аишьцәа дрыцхраарц. Уи ақалақь ахь агьежьразы агәымшәара ду аҭахын! Аха Тимофеи дымшәаӡеит. Иара Фессалоникаҟа дцеит, избанзар уа инхоз игәрахаҵара ицеиҩызшоз дрызхәыцуан. Иара даныхынҳә, иааигаз ажәабжь Павел даргәырӷьеит, избанзар фессалоникатәи аишьцәа агәрахаҵара ӷәӷәа шрымаз изеиҭеиҳәеит.

Тимофеи Павел шықәсы рацәала амаҵ ициуан. Ҽнак зны Павел иҩит Тимофеи егьырҭ зегь раасҭа аизарақәа рыцхраара шилшаз. Иара Иеговеи ауааи даара бзиа ибон.

Бзиа иубома уара ауаа, насгьы ирзеиҭоуҳәалома урҭ Иегова иӡбахә?~ Ааи акәзар, усҟан уара уԥсҭазаара, Тимофеи иԥсҭазаара еиԥш, насыԥла иҭәуеит, аинтересгьы амазаауеит!