«Аҵыхәтәантәи амшқәа раан» Анцәа игәаԥхара анагӡараҿы шәхы шәамеигӡалан

1. Иабантәиҳдыруеи аҵыхәтәантәи амшқәа рзы ҳшынхо?

ШӘАРА 1914-тәи ашықәс ашьҭахь шәизар, шәаниз инаркны аҵыхәтәантәи амшқәа рзы шәынхоит (2 Тим. 3:1). Иисус ԥааимбаражәаны иҳәеит аҵыхәтәантәи амшқәа рзы иҟалараны иҟаз: аибашьрақәа, амлакра, адгьылҵысрақәа, ачымазара бааԥсқәа, азакәандара. Уи адагьы, Иисус иҳәеит Иегова ижәлар ишрышьҭашәарыцало (Матф. 24:3, 7—9, 12; Лука 21:10—12). Ҳара урҭ ахҭысқәа рыӡбахә ҳаҳауеит, ма ҳхаҭа ҳрықәшәоит. Иара убас ҳара иаҳбоит ауаа апостол Павел ишиҳәахьаз еиԥш рхы шымҩаԥырго. (Шәахәаԥш арамка «Иахьа ауаа зеиԥшроу».) Ҳара, Иегова ишаҳаҭцәа, агәра ганы ҳаҟоуп аҵыхәтәантәи амшқәа рзы ҳшынхо (Мих. 4:1).

2. Иарбан зҵаарақәоу зҭак ҳдыруазар ҳахәҭоу?

² 1914 шықәса инаркны имаҷымкәа аамҭа цахьеит, ус анакәха, ҳара «аҵыхәтәантәи амшқәа» рынҵәамҭазы ҳанхоит. Аҵыхәтәа ааигәаӡоуп аҟынтә, ихадоу абарҭ азҵаарақәа рҭак ҳдыруазар ауп: иарбан хҭысқәоу иҟало аҵыхәтәантәи амшқәа рынҵәамҭазы? Насгьы дыззыԥшузеи ҳара ҳҟынтә Иегова уи аамҭа ааиаанӡа?

ИҞАЛОЗЕИ «АҴЫХӘТӘАНТӘИ АМШҚӘА» РЫНҴӘАМҬАЗЫ?

3. Иарбан лаҳәароу ажәларқәа иҟарҵо, 1 Фессалоникаа рахь 5:1—3 иану инақәыршәаны?

³ Шәаԥхьа 1 Фессалоникаа рахь 5:1—3. Ара Павел Иегова имш аӡбахә иҳәоит. Апостол Павел дызлацәажәо Иегова имш иаҵанакуа мышкы заҵәык акәӡам. Уи алагоит «Вавилон ду» ма амцдинхаҵарақәа зегьы рықәхра ианалаго, инҵәоит Армагеддон аҿы (Аат. 16:14, 16; 17:5). Уи «амш» аҿаԥхьаҵәҟьа ажәларқәа «аҭынчреи ашәарҭадареи» рылаҳәахоит. Иахьа аҳәынҭқарцәа ажәларқәа рыбжьара аизыҟазаашьақәа реиӷьтәра ианалацәажәо, зны-зынла урҭ ажәақәа рхы иадырхәоитb. Аха «аҭынчреи ашәарҭадареи» иазку абиблиатә ԥааимбаражәа зынӡа даҽакала инаӡоит. Избан? Избанзар усҟан ауаа агәра ргоит аҳәынҭқарцәа адунеи аҿы аҭынчра шьақәдыргылеит ҳәа. Аха ииашаҵәҟьаны усҟан «арыцҳара ду» алагоит, иаалырҟьангьы зегь ықәӡаауеит (Матф. 24:21).

4. а) Иаҳзымдыруазеи ҳара макьана «аҭынчреи ашәарҭадареи» алаҳәара иазкны? б) Иаҳдыруазеи уи иазкны?

⁴ «Аҭынчреи ашәарҭадареи» иазкны иаҳдыруа ыҟоуп, аха иҟоуп иаҳзымдыруагьы. Ҳара иҳаздырӡом аҳәынҭқарцәа уи шыҟарҵо, насгьы уи аҟаҵара ргәазҭазҵо. Иара убас иҳаздырӡом уи алаҳәара зныкымкәа-ҩынтәымкәа иҟарҵоу, мамзаргьы лаҳәара заҵәык акәхоу иҟало. Ишыҟазаалакгьы, ҳара иаҳдыруеит аҳәынҭқарцәа адунеи аҿы аҭынчра шырзышьақәмыргыло. Убри аҟынтә уи алаҳәара агәра ҳамгар ауп. Абиблиа иҳанаҳәоит уи алаҳәара ҳазыԥшызар шҳахәҭоу, избанзар уи иҳаилнаркаауеит Иегова имш уажәымазар-уажәы ишалаго.

5. Иҟаҵатәузеи 1 Фессалоникаа 5:4—6 иану инақәыршәаны Иегова имш ҳазхиазарц азы?

⁵ Шәаԥхьа 1 Фессалоникаа рахь 5:4—6. Павел иажәақәа иаҳдырбоит Иегова имш ҳазхиоу-ҳазхиаму гәаҳҭарц азы иҟаҳҵар ҳалшо. Иара иҳәеит: «Ацәа ҳҽаҳамҭап, егьырҭ реиԥш». Павел иажәақәа инарықәыршәаны ҳара агәҽанызаара ааҳарԥшлароуп. Иаҳҳәап, ҳгәаҳҽанызароуп аполитикатә зҵаарақәа ҳаҽрылаҳамгаларц, насгьы ҳқьырсиантә неитралитет еилаҳамгарц азы. Ус ҟаҳамҵалар, ари адунеи ҳахәҭакхоит (Иоанн 15:19). Ҳара агәра ганы ҳаҟоуп адунеи аҿы аҭынчра шьақәзыргыло Анцәа Иаҳра заҵәык шакәу.

6. Иарбан цхыраароу ауаа ираҳҭарц ҳахәҭоу, насгьы избан?

⁶ Агәҽанызаара аарԥшра адагьы, ҳара егьырҭгьы ҳрыцхраалароуп ҳаԥхьаҟа иҟало аилкаара. Шәааи иаҳхаҳмыршҭлап «арыцҳара ду» аналагалак ашьҭахь ауаа Иегова имаҵ аура рҭаххаргьы, уи аҩыза алшара шырмоуа. Убри аҟынтә ажәабжьҳәаратә ус хырԥашьа амамc!

ГӘАЦԤЫҲӘАРАЛА АЖӘАБЖЬ ШӘҲӘАЛА

7. Дыззыԥшузеи Иегова ҳара ҳҟынтә уажәы?

⁷ Иегова «имш» алагаанӡа маҷк ауп иаанхаз, убри аҟынтә иара иҭахуп ҳара гәацԥыҳәарала ауаа ажәабжь рзеиҭаҳҳәаларц. Ҳхы ҳазҵаар ауп: «Иазыскуама сара сымч-сылшара зегьы Иҳақәиҭу исыдиҵаз аус анагӡара?» (1 Кор. 15:58). Иисус иҳәеит иарбан усу ҳара инаҳагӡало. Аҵыхәтәантәи амшқәа рзы иҟалараны иҟаз ахҭысқәа данрылацәажәоз иара иҳәеит: «Аха заа, абри аԥхьа, ажәларқәа зегьы рыбжьара Аевангелие рыларҵәахоит» (Марк 13:4, 8, 10; Матф. 24:14). Шәазхәыц, ажәабжьҳәара шәцацыԥхьаӡа шәара абиблиатә ԥааимбаражәа анагӡара шәҽалашәырхәуеит!

8. Ишԥеизҳазыӷьо ажәабжьҳәаратә ус?

⁸ Иаҳҳәар ҳалшозеи ажәабжьҳәаратә ус аизҳазыӷьара иазкны? Есышықәса уи аус еиҳа-еиҳа аҽарҭбаауеит. Ҳазхәыцып аҵыхәтәантәи амшқәа рзы адунеи ахьынӡанаӡааӡо Аҳра ажәабжьҳәаҩцәа рхыԥхьаӡара шеизҳауаз. 1914 шықәсазы ажәабжь бзиа зҳәоз 5 155-ҩык ракәын, насгьы урҭ ахьыҟаз 43 тәыла рҿы мацара акәын. Иахьа 240 тәыла рҿы 8 500 000-ҩык раҟара ажәабжьҳәаҩцәа ыҟоуп! Аха уи аус макьана ихыркәшам. Ҳара анаҩсгьы ауаа ирылаҳҳәалароуп рыуадаҩрақәа зыӡбо Анцәа Иаҳра мацара шакәу (Аԥсал. 145:11—13).

9. Избан анаҩсгьы Аҳра иазку ажәабжь аҳәара зҳахәҭоу?

⁹ Иегова ажәабжьҳәаратә ус хыркәшоуп ҳәа иҳәаанӡа ҳара уи наҳагӡалоит. Шаҟа аамҭа рымоузеи ауаа Иеговеи Иисуси ирызку аҵабырг аилкаара иахьӡарц азы? (Иоанн 17:3). Ҳара уи ҳаздыруам. Аха иаҳдыруеит «арыцҳара ду» алагаанӡа «наӡаӡатәи аԥсҭазаарахь уназго аҵабырг аилкаара» зҭаху макьана ажәабжь бзиа рыдыркылар шрылшо (Аус. 13:48, АдҾ). Ишԥаҳалшо урҭ ҳрыцхраар аамҭа ыҟанаҵы?

10. Дышԥаҳацхраауеи Иегова ауаа аҵабырг дырҵара?

¹⁰ Иегова иорганизациа ала ауаа аҵабырг дҳарҵаларц азы иаҭаху зегь ҳаиҭоит. Иаҳҳәап, есымчыбжьа ҳара аусура амшқәа рзы имҩаԥысуа аизараҿы аҵара ҳҵоит. Уи аизараҿы ҳара еилаҳкаауеит ауаҩы раԥхьаӡа ҳаниацәажәо иаҳҳәаша, насгьы анаҩс ҳаннеиуа ҳаицәажәара ишацаҳҵаша. Иара убасгьы уа абиблиатә ҵарақәа рымҩаԥгашьа ҳҵоит. Уи адагьы, Иегова иорганизациа ала Арҵаразы амыругақәа ҳаиҭоит. Урҭ амыругақәа ҳацхраауеит:

• аицәажәара алагара,

• ауаа аинтерес рызцәыргара,

• Абиблиа иазкны еиҳаны аилкаара ргәазҭаҵара,

• абиблиатә ҵара анымҩаԥаҳго аҵабырг дырҵара,

• аинтерес аазырԥшуа ҳсаит дырбара, насгьы Аҳратә зал ахь ааԥхьара рыҭара.

Ҳәарада, урҭ амыругақәа баша иахьҳамоу џьаргьы иҳахәаӡом. Урҭ ҳхы иаҳархәалароупd. Иаҳҳәап, аинтерес аазырԥшыз ауаҩы шәаниацәажәа ашьҭахь абуклет ма ажурнал изыншәыжьзар, ҽазны шәиҭаанӡа даԥхьар илшоит. Ҳара зегьы иҳалшо зегь ҟаҳҵалароуп есымза иахьынӡаҳалшо еиҳаны ажәабжь ҳҳәаларц азы.

11. Хықәкыс ирымоузеи Абиблиа аҵаразы иҟоу онлаин аурокқәа?

¹¹ Ауаа аҵабырг аилкаара дрыцхраарц азы Иегова иара убас ихы иаирхәоит асаит jw.org^® аҿы Абиблиа аҵаразы иҟоу онлаин аурокқәаe. Хықәкыс ирымоузеи урҭ? Есымза жәа-нызқьла ауаа аинтернет аҿы Абиблиа аҵара иуцхраауа аурокқәа ирышьҭоуп. Ҳсаит аҿы иҟоу аурокқәа ус еиԥш иҟоу ауаа Анцәа Иажәа иану аҵабырг аилкаара ирыцхраауеит. Иҟалап ажәабжьҳәараҿы ишәықәшәо ауаа шьоукы Абиблиа аҵара алагара рзымгәаӷьуазар. Ус акәзар, идшәырба ҳсаит аҿы иҟоу онлаин аурокқәа, мамзаргьы азхьарԥш рзынашәышьҭ.

12. Еиликаар илшозеи ауаҩы Абиблиа аҵаразы иҟоу онлаин аурокқәа рыцхыраарала?

¹² Абиблиа аҵаразы иҟоу онлаин аурокқәа рҿы абарҭ атемақәа еилыргоуп: «Абиблиеи уи Автори», «Абиблиаҿы зыӡбахә ҳәоу ауаа», «Агәыӷра узҭо абиблиатә аацҳара». Арҭ атемақәа рыбзоурала ауаа еилыркаар рылшоит:

• Абиблиа ауаҩы ицхраар шалшо

• Иеговеи, Иисуси, амаалықьцәеи зусҭцәоу

• Анцәа ауаа зишаз

• Агәаҟрақәеи ацәгьареи зыҟоу

Уи адагьы, урҭ аурокқәа рҟынтә дара еилыркаауеит Иегова:

• агәаҟрақәеи аԥсреи ықәигарц азы иҟаиҵо,

• иԥсхьоу рыԥсы шҭеиҵо,

• ауаа рнапхгара Анцәа Иаҳра ала ишиԥсахуа.

13. Абиблиатә ҵара аҭыԥан аума онлаин аурокқәа зеиҿкааз? Иҳаилшәыркаа.

¹³ Онлаин аурокқәа зеиҿкааз абиблиатә ҵара аҭыԥан акәӡам. Иисус аҵаҩцәа разыҟаҵара аус ҳара иҳадиҵеит. Онлаин аурокқәа еиҿкаауп аинтерес змоу ауаҩы урҭ дрыԥхьартә, еиликааз игәаԥхартә, насгьы еиҳаны аилкаара иҭаххартә еиԥш. Иҟалап усҟан иара абиблиатә ҵара изымҩаԥыргаларц иҭаххар. Аурокқәа зегьы рынҵәамҭаҿы ауаҩы идыргалоит Абиблиа ирҵара зылшо ицхыраара даҳәарц. Ҳсаит аҿы есымза 230-ҩык абиблиатә ҵара иаҳәоит! Аӡәы ицхыраарада Абиблиа аҵара залшом!

АНАҨСГЬЫ АҴАҨЦӘА АЗЫҞАШӘҴАЛА

14. Иҟаҳҵалар акәзеи ҳара Матфеи 28:19, 20 иану инақәыршәаны, насгьы избан?

¹⁴ Шәаԥхьа Матфеи 28:19, 20. Абиблиатә ҵара анымҩаԥаҳго ҳара ҳҽазаҳшәоит аҵаҩцәа разыҟаҵара, насгьы Иисус иҳадиҵаз зегь ақәныҟәашьа дырҵара. Ҳара ауаҩы иеилҳаркаароуп Иегова иган аанкылара шаҟа ихадоу. Уи азы ауаҩы игәазҭаҳҵалароуп иеиликаауа инақәыршәаны анхара, иԥсҭазаара Иегова изкра, насгьы аӡы аҽӡаахра. Убасҟан ауп Иегова имш аан уи деиқәхар анилшо (1 Пиотр 3:21).

15. Изакәазы иҳамамзеи аамҭа, насгьы избан?

¹⁵ Хыхь ишҳәаз еиԥш, адунеи аҵыхәтәа ааиаанӡа инхаз аамҭа маҷуп. Убри аҟынтә ауаҩы Иегова имаҵ аура далагарц азы аԥсахрақәа ҟаимҵозар, Абиблиа ирҵаразы аамҭа иқәҳарӡӡом (1 Кор. 9:26). Ҳус хырԥашьа амам! Аамҭа ыҟанаҵы Аҳра иазку ажәабжь заҳҳәаша рацәоуп.

АМЦДИНХАҴАРА ИАДҲӘАЛОУ ЗЕГЬЫ ШӘҼЫРЦӘЫШӘЫХЬЧАЛА

16. Иҟаҳҵар акәзеи ҳара зегьы, Аатра 18:2, 4, 5, 8 иану инақәыршәаны? (Шәахәаԥш албаага.)

¹⁶ Шәаԥхьа Аатра 18:2, 4, 5, 8. Арҭ ажәеинраалақәа рҿы иануп Иегова имаҵзуҩцәа рҟынтә дыззыԥшу. Ииашаҵәҟьоу ақьырсианцәа Вавилон ду иадҳәалоу зегьы рҽырцәырыхьчалароуп. Иҟалап ауаҩы Абиблиа аҵара далагаанӡа даҽа динхаҵарак имазҭгьы, адинхаҵаратә маҵзурақәа рахь дныҟәозҭгьы, насгьы иҽрылаирхәуазҭгьы, мамзаргьы уи иҟанаҵоз ахарџь ахҩара дацхраауазҭгьы. Иӡаахым жәабжьҳәаҩыс дҟалаанӡа иара амцдинхаҵара иадҳәалоу зегьы аанижьроуп. Иаҳҳәап, иара илшоит ауахәамахь, мамзаргьы амцдинхаҵара иадҳәалоу аиҿкаарахь асаламшәҟәы иҩыр, уаҳа уи дшахәҭакым деилиркаарц азыf.

17. Иарбан усурақәоу ақьырсиан иҽызцәихьчалар ихәҭоу, насгьы избан?

¹⁷ Иара убас ақьырсиан иусура амцдинхаҵара иадҳәаламзароуп (2 Кор. 6:14—17). Ҳара ауахәамаҿы аусура ҳалагом. Иаҳҳәап, фымцеибыҭаҩыс аус ҳуазар, амцмҵахырхәараҿы рхы иадырхәо ахыбразы аусутә анагӡара ҳақәшаҳаҭхаӡом. Ҳхатә бизнес ҳамазаргьы, аԥара ҳарҳарц азы Вавилон ду иадҳәалоу иарбан усзаалак ҳҽалаҳгалаӡом. Избан? Избанзар ҳара иаҳҭахӡам Анцәа иҿаԥхьа агәнаҳа зуа адинхаҵарақәа русқәеи рыгәнаҳаи ҳаҽрылаҳҟьашьырц (Ис. 52:11)g.

18. Ишԥааирԥши иашьак аусура иадҳәалоу абиблиатә принципқәа шеилеимго?

¹⁸ Аизара аиҳабыс амаҵ зуаз иашьак дуасҭан. Шықәсқәак раԥхьа иара ауахәамаҿы аусутә идыргалеит дахьынхоз ақалақь аҿы. Уи аусутә идызгалаз ауаҩы идыруан ҳашьа ауахәамаҿы аус аура еснагь мап шацәикуаз. Аха иара уаҳа аӡәгьы дизымԥшааит. Ус шакәызгьы, ҳашьа абиблиатә принципқәа еилеимгаӡеит, насгьы уи аус мап ацәикит. Мчыбжьык ашьҭахь аҭыԥантәи агазеҭ уи ауахәама аџьар кыдызҵоз ауасҭа ипатреҭ анырҵеит. Шәазхәыц, аиашьа уи аусура дақәшаҳаҭхазҭгьы, агазеҭ ианырҵоз иара иакәхон. Шәхаҿы иаажәг аишьцәеи аиаҳәшьцәеи ргәы иаанагарыз! Шәазхәыц Иегова уи шаҟа игәы инархьуаз!

ЕИЛАҲКААЗЕИ ҲАРА?

19, 20. а) Еилаҳкаазеи ари астатиа аҟынтә? б) Еилаҳкаауазеи анаҩстәи астатиа аҟынтә?

¹⁹ Абиблиа ишаҳәо еиԥш иаарласны инаӡоит аҵак ду змоу аԥааимбаражәа — аҳәынҭқарцәа ауаа «аҭынчреи ашәарҭадареи» рыларҳәоит. Аха Иегова ҳара иаҳзааиртит урҭ ииашаҵәҟьоу аҭынчра шырзышьақәмыргыло. Иҟаҳҵалар акәзеи ҳара уи алаҳәара ҟарҵаанӡа, насгьы иаалырҟьаны аҵыхәтәа ааиаанӡа? Иегова иҭахуп ҳара гәацԥыҳәарала ауаа Аҳра иазку ажәабжь рылаҳҳәаларц, насгьы аҵаҩцәа азыҟаҳҵаларц. Убри аамҭазгьы ҳара амцдинхаҵарақәа ҳхы рцәаҳахьчалароуп. Ҳара Вавилон ду иадҳәалоу аиҿкаарақәа ҳрыламзароуп, ҳусурагьы уи иадҳәаламзароуп.

²⁰ «Аҵыхәтәантәи амшқәа» рзы ажәлар «аҭынчреи ашәарҭадареи» анрылаҳәахалак ашьҭахь еиҭа даҽа хҭысқәакгьы ҟалоит. Иарбану урҭ, насгьы дыззыԥшлозеи усҟан Иегова ҳара ҳҟынтә? Ишԥаҳалшо иаҳзыԥшу урҭ ахҭысқәа ҳҽырзыҟаҳҵар? Арҭ азҵаарақәа анаҩстәи астатиаҿы еилҳаргоит.