Аамҭа умган!

Ҳсаит адизаин рыԥсахижьҭеи, Абиблиа аҵаразы азыҳәамҭақәа рхыԥхьаӡара акырӡа еиҳахеит. Иара убас ауаа рацәа ахьеизо аҭыԥқәа рҿы ажәабжь заҳаны аинтерес аазырԥшыз Абиблиа аҵара иаҳәоит. Вефиль инеиуа арҭ азыҳәамҭақәа ирласны аус адырулоит. Иаҳҳәап азыҳәамҭа асаит jw.org аҿы ихарҭәаазар, уи ауаҩы дахьынхо атерриториаҿы иҟоу аизарахь афилиал аҟынтәи ҩымш рыла аацҳара рышьҭуеит. Аха ҭагылазаашьақәак рҿы ажәабжьҳәаҩцәа мчыбжьқәак рышьҭахь ауп ари ауаҩы ианиҭаауа. Иҟаҳҵар ҳалшозеи ҳара, ауаҩы иааирԥшыз аинтерес ицәымӡырц? (Мар. 4:14, 15).

Аинтерес аазырԥшыз ауаҩы даҽа еизарак иаҵанакуа атерриториаҿы дынхозар, иаразнак ихарҭәаа абланк «Ҳуҳәоит, ари ауаҩы уиҭаа» (S-43), нас иааиуа аизара иахмырԥакәа аизара амаӡаныҟәгаҩ иҭ. Амаӡаныҟәгаҩ асаит jw.org аҿы иҟоу агәылаҵа «Аизара» ихы иархәаны, мышкы-ҩымш ирылагӡаны афилиал ахь аинформациа дәықәиҵоит. Аизара аиҳабацәа иааиԥмырҟьаӡакәа асаит ахь иҭалалароуп. Дара аинтерес аазырԥшыз ауаҩы изкны аацҳара роузар, аамҭа рымгароуп. Ари ауаҩы иҭаарц ажәабжьҳәаҩ идырҵазар, иара ари аус зегь раԥхьаӡа иргылар ауп. Ауаҩы аҩны дыҟамзар, ҳазлаиԥшааша аинформациа нҳажьыр ҟалоит.