Asuọr Dị Riḍur Ghan Iyira Ketumeri Enhaạn

Asuọr eḍighi imạ inmo k’aZihova. Ketue ni etir iitughiạn ayira, enme eten phọ epẹ yira olhoghoma bọ, eḅilhẹ inyu iyira oḍighi iyaạr omiteom. Ipẹ kụ idị asuọr abrokastịn phọ ayira erọl. Okạr oghaạph, asuọr phọ iphẹn phọ ketue ni eḍighi idị epu siphẹ: ketue ni iḍur iyira etumeri aZihova.

Emhiigh lhạ phọ 2014, asuọr abrokastịn dị momiteom mepel li 70, kụ iduọn rokaạph bọ esoorom pọ aḍiniin aḍuọr phọ edi ni runhụ aḍiaḅạ dị repel li 500! Kụ eeni nạ maakia ni mọ, ‘Abuọ anhịn kụ romoọr ghan bọ suọr phọ iphẹn phọ, kụ romiteom ghan ika?’

Miịn Ipẹ Abumor Phọ Romiteom Ghan Bọ Suọr Phọ

Ekpịgh asuọr siphẹ egu abumor phọ odi bọ Agạ Asividio r’Aroḍọgh dị rokumuam ghan eeḍiạn Ekụ Itughemhị Aloor Phọ Repogh Bọ kụ romiteom ghan suọr abrokastịn phọ. 13 Abumor r’abumaranhi phọ odi bọ ekpịgh asuọr phọ kụ rogẹ ghan, orekọd, ookolobian ilọ ipẹ komiteom bọ ḅilhẹ roḍighi oomo inhọn araraạr lọ emhoghi. Opumom isiphẹ Ekụ Igẹ Phọ momạ ni bumor dị omiteom loor orọl ghan olhoghi otu abidị okumuan oomo isiẹn aḅirinhi phọ olhoghonhaạn aḍighaạgh oḍighi phọ, emhiigh budị rogẹ ghan suọr, buọ iitia, kụ esi bumoọr suọr. Abumor r’abumaranhi phọ abuẹn phọ osooromhi loor roḍighinhom ghan sighalanyạ abidị kụ ro/wạ omiteom aḍien.

Ika kụ idị romiteom ghan ḍuọr abrokastịn? Eḅẹl phọ, Ekụ Igẹ Phọ kụ rosopha ghan esi aBaibul phọ kokpasị bọ ḍuọr phọ r’ipẹ rowạ bọ mọ etir we. Kụ ekpịgh asuọr phọ odiemi iiḍighi phọ buphẹ komiteom bọ iitia phọ r’abuphẹ kogẹ bọ ikpo-onhụ aḍuọr phọ. Kụ omiteom odị omhoọr ophogh. Ekụ Itughemhị phọ konaghạn ḍuọr phọ kụ oḅilhẹ osogh iitughiạn lọ ewạ. Ipẹ reten, kụ egu abumor phọ odi bọ ekpịgh asuọr phọ ooḅenhion ḍuọr phọ kọ omoọr ḍiphẹ komiteom bọ. Rotọl ghan rikpisi kirokirọ kụ orekọd suọr phọ, idiphọ ilạ agadạ r’asistudio dị edi ilhoghi aruutu awe.

Orue ogẹ ḅilhẹ r’orekọd aḍuọr abrokastịn, abumor r’abumaranhi phọ roḍighinhom ghan software kirokirọ siphẹ akomputa phọ. Oḍighi phọ aḅilhẹ kẹn ni amoghi inhọn araraạr dị ropeghom ghan suọr idiphọ, asimixer, amplifier, speaker, ḅilhẹ r’asimaikrofon. Oniin amaikrofon katue ni amạn $100 kụ esi $1,000 (U.S.). Lhạ phọ 2020, yira ulheom $116,000 (U.S.) oghoom araraạr asuọr.

Olọgh ighẹn ikuph omhiịn mọ u/lheom ikpoki ilọ ateẹny? Kparipẹ r’ookpomhoghi egu awe asuọr epẹ Betẹl, roḍighinhom ghan ghụn we dị odi ilhoghi aruutu abidị kụ rologhonhaạn ḍighaạgh. Ḅilhẹ kẹn, kparipẹ r’omhạgh dị ibadị abumoọr suọr kotu eniin esi kụ otọl oti iitia phọ oḅilhẹ omoọr, abumor phọ ayira romoọr ghan ghụn koḅilhẹ oti iitia phọ olhọgh sikomputa kụ osighẹ ookpomhoghi.

“Rekparamhị Ghan Omheeraam”

Abumor r’abumaranhi phọ rokelhọm ghan onhaghạn asuọr abrokastịn phọ. ATara, epẹ Germany, aḅẹm mọ: “Asuọr phọ repoomhị ghan ologhi amhị mem dị mị amoọgh ooḅaghamiạn aloor. Mem dị mị aphegh onhụ emhạ ayoor rekịgh ghan mudị aZihova kụ uḅol imhị.” Onyọ umor epẹ Kazakhstan dị oghol mọ Dmitry aḅẹm mọ: “Mị rakelhọm ghan onhaghạn asuọr phọ loor esi dị i/moghi mọ mị uuḅaghamhiạm loor mughumọ ikpo onhụ phọ kegbạgh ni sinhị-iilhogh aBaibul. Idị epelhom siphẹ, asuọr phọ riloghonhaạn ghan imhị ḍighaạgh ogbon araraạr dị kekparamhị siya phọ amhị r’aZihova.”

Onyọ umaranhi dị oghol mọ Delia, epẹ South Africa, aghaạph ipẹ odị raloghomha ghan bọ ilọ asuọr abrokastịn phọ mọ: “Asuọr phọ iphẹn phọ rekparamhị ghan omheeraam mọ amhị. Mem lọ mị aḅonyonhu azuan obobọ asoman ipaanhaạn, aḍuọr retọl ghan ni dị ekasiạn r’adọl phọ amhị oomo phọ amem mọ. Ibadị amem iitia phọ bịn rekasiạn ghan ni onme eten phọ epẹ mị alhoghomha bọ!”

Iniin asuọr abrokastịn phọ meḍighi igbogh asuọr ibadị awe. Onhọn onyọ umaranhi epẹ South Africa dị oghol mọ Lerato, aḅẹm aani mọ: “Asuọr phọ ‘Makạr Bịn Atuman Siẹn’ r’aḍiphẹ eḅẹm bọ mọ ‘Omhoom Aḅirihi Phọ’ reḍighi ghan idị mị kamiịn loor amhị mem mọ mị kaḅilhẹ bọ aḅol onhiin phọ amhị mamugh bọ. Torobọ amem dị mị anhaghạn suọr phọ iphẹn phọ mị ramiịn ghan dị odị araramhị righaạgh kụ aghiil ratu oḅol amhị.”

Aḍiniin aḍuọr abrokastịn ayira ikạr kụ elhoghonhaạn ḍighaạgh oḍoọgh dị odi 16 asiạ epẹ Sri Lanka. Odị aḅẹm mọ: “Anhịr dị rutughemhị ghan iyoor science ulhooghiọm ni imhị egbagarạ eten risigh abuẹn r’amhị odi bọ ekụ phọ loor iduọn mị aḍighi bọ onyọ Ogbaanhaạn aZihova. Mị u/legheri iyaạr oghaạph loor oghiilhaan. Mị rosi olhoghi otu kụ onhiin amhị uromha imhị onhaghạn aḍuọr phọ ‘Study Makes You Strong.’ Aḍuọr phọ ilhoghonhaạn imhị ḍighaạgh omhiịn mọ emoghi ni owaaghị ghan araraạr ophogh ḅilhẹ r’ omhaạr ookolobian ilọ ophagharanhaạn. Ḍio phọ etum bọ siphẹ, mị ughaaphạn ni otughemhiạ phọ ayoor. Odị alher ri rurụ ungọ imhị kụ asereghiạn omheeraam Abugbaanhaạn aZihova phọ. Mị rasẹph ni oḍighom mọ ongọ ayira suọr phọ iphẹn rikparamhị ghan bọ iyira idiphọ.”

Roteẹny ghan ika ikpoki phọ roḍighinhom ghan bọ suọr phọ? Rosighẹ ghan iisogh oomo isiẹn aḅirinhi phọ, ibadị iphẹn phọ rosogh ghan edaphạn reten phọ ogoolhạ bọ siphẹ donate.jw.org Meḍighi esi imạ eegharạ inmo phọ anyinha.