“Ou Kay An Pawadi Èk Mwen”

1. Avan Jézi mò, kisa i té di yonn an sé kwiminèl-la ki té ka pann a koté’y? (Louk 23:39-43)

JÉZI épi sé dé (2) kwiminèl-la ki té a koté’y té ka soufè, èk yo té kay mò. (Louk 23:32, 33) I a klè sé dé kwiminèl sala pa té disip Jézi, paski yo toulé dé té ka ensilté’y. (Maf. 27:44; Mak 15:32) Mé yonn di yo chanjé atitid li. I di: “Jézi, chonjé mwen lè ou kay vini kon wa.” Jézi wéponn li: “Mwen ka di’w sa, jòdi-a ou kay an pawadi èk mwen.” (Li Louk 23:39-43.) La pa ni anyen an Bib-la ki ka moutwé nonm sala té aksèpté konmisyon Wéyòm-lan lè Jézi té ka pwéché. Èk Jézi pa janmen di, nonm-lan té kay an Wéyòm-lan an syèl. (Maf. 4:17) Jézi té ka palé konsèné Pawadi asou latè-a. Pouki nou sa di sa?

2. Kisa ki ka moutwé kwiminèl-la ki wépanti-a sété on Jwif?

² I ka sanm kwiminèl-la ki wépanti-a sété on Jwif, paski i di lòt kwiminèl-la: “Ès ou pa pè Bondyé? Nou tout anba menm pinisyon.” (Louk 23:40) Sé Jwif-la té ka adowé yon Dyé, mé sé moun-lan an sé lòt nasyon-an té ka adowé plizyè diféwan dyé. (Ègz. 20:2, 3; 1 Kòr. 8:5, 6) Alò, si sé kwiminèl-la pa té Jwif, yo pitèt té kay mandé: “Ès ou pa pè sé dyé-a?” Osi, Jéhova voyé Jézi “pou sé Jwif-la ki ja kité Bondyé-a,” èk pa pou sé nasyon-an. (Maf. 15:24) Èvèk Bondyé té ja fè sé jan Izwayèl-la konnèt, i té kay wésisité lé mò. Konsa, pitèt kwiminèl-la té konnèt konsèné wézèwèksyon-an, èk sa’y di ka moutwé i té ni èspwa-a ki, Jéhova té kay wésisité Jézi pou kondwi Wéyòm Bondyé. Èk i ka sanm kwiminèl-la té ni èspwa-a Jéhova té kay wésisité’y osi.

3. Kisa ki pitèt vini an lidé kwiminèl-la lè’y tann Jézi mansyonnen Pawadi? Èspliké. (Jennésis 2:15)

³ Kwiminèl-la ki wépanti-a sété an Jwif, konsa san dout i té konnèt sa Bib-la té di konsèné Adanm épi Èv. Èk konsèné bèl Pawadi-a Jéhova té fè ba yo-a. Konsa lè’y tann Jézi mansyonnen Pawadi, pitèt sa ki vini an lidé’y sé an bèl jaden asou latè-a.​—Li Jennésis 2:15.

4. Kisa sa Jézi té di kwiminèl-la sipozé pousé nou pou fè?

⁴ Sa Jézi té di kwiminèl-la sipozé pousé nou pou katjilé konsèné mannyè lavi kay yé an Pawadi-a. Kanmenm, nou sa apwann konsèné Pawadi-a an mannyè-a la té ni lapé lè Sòlomonn té ka kondwi kon wa. Bib-la di Jézi pli enpòtan pasé Sòlomonn. Èvèk nou ni èspwa-a ki, Jézi kay twavay épi sé moun-lan ki kay kondwi épi’y an syèl pou fè latè-a on bèl Pawadi. (Maf. 12:42) Konsa i a klè, sé ‘lòt mouton-an’ sipozé antéwésé an sa yo ni pou fè pou kwalifyé pou lavi étonnèl an Pawadi.​—Jan 10:16.

KI MANNYÈ LAVI KAY YÉ AN PAWADI-A?

5. Ki mannyè ou ka kwè lavi kay yé an Pawadi-a?

⁵ Kisa ki ka vini an lidé’w lè’w katjilé asou Pawadi-a? Ès ou ka imajiné an bèl jaden menm kon jaden Édenn? (Jen. 2:7-9) Pitèt ou ka chonjé sa pwofèt Mayka té ékwi konsèné pèp Bondyé. I té di: ‘Chak moun kay asiz anba pyé wézen’y èk pyé fig fwans li.’ (Mayk. 4:3, 4) Ében pitèt ou ka chonjé, Bib-la di la kay ni an chay bon manjé. (Sam 72:16; Izay. 65:21, 22) Konsa ou ka imajiné kò’w adan an bèl jaden ki ni an tab ki plen bon manjé. Ou ka imajiné sé bèl lòdè-a sé flè-a ni-an. Èk ou ka tann vwa fanmi’w, jan’w, èk lòt moun ki wésisité kon yo ka wi èk palé èk enjwi bèl tan épi yonn a lòt. Non, sé bagay sala sé pa annèk an wèv. Asiwé yo kay vwéman fèt asou latè-a. Kanmenm, nou kay osi ni twavay pou fè an Pawadi-a, twavay nou kay vwéman enjwi.

6. Ki kalité twavay nou kay enjwi an Pawadi? (Gadé pòtwé-a.)

⁶ Jéhova fè nou épi abilité-a pou enjwi twavay nou. (Éklé. 2:24) Kanmenm, nou kay ni an chay twavay pou fè diwan mil (1,000) lanné-a Jézi ka kondwi kon Wa. Chonjé, moun ki chapé anba gwan twibilasyon-an èk moun ki wésisité, kay bizwen had, manjé, èk kay pou yo wèsté. Magwé nou kay ni pou fè an chay twavay pou potjiwé sé bagay sala, nou kay enjwi twavay nou. Menm kon Adanm épi Èv té ni pou twavay pou fè tout latè-a an Pawadi, nou kay ni bèl pwivilaj-la pou twavay èk fè tout latè-a vini an Pawadi. Osi, imajiné djèwté-a nou kay ni lè nou ka enstwi moun ki wésisité konsèné Jéhova épi divwa’y! Èk lè’y vini pou moun fidèl ki té viv avan Jézi té vini asou latè-a, nou kay osi ni an chay djèwté pou enstwi yo.

7. Ki konfyans nou sa ni, èk pouki?

⁷ Nou sa ni konfyans-lan ki, tout moun kay viv an lapé an Pawadi-a. Osi nou kay ni tout sa nou bizwen, èvèk tout bagay kay byen ògannizé. Ki mannyè nou sav sa? Sé paski Jéhova ja ban nou an bèl ègzanp pou moutwé nou mannyè lavi kay yé anba kondwit Gason’y Jézi. Ègzanp sala, sé sa ki té fèt anba kondwit wa Sòlomonn.

KONDWIT WA SÒLOMONN KA MOUTWÉ NOU MANNYÈ LAVI KAY YÉ AN PAWADI-A

8. Ki mannyè pawòl wa David an Sam 37:10, 11, 29 té fèt vwé apwé i ékwi yo? (Gadé “Questions From Readers” an Gad-la pou Désanm 2022 an Annglé.)

⁸ Wa David té ékwi konsèné mannyè lavi té kay yé lè wa-a ki ni lasajès èk ki fidèl ka kondwi. (Li Sam 37:10, 11, 29.) Souvan nou ka li Sam 37:11 lè nou ka palé épi moun konsèné Pawadi-a. Èk nou ni bon wézon pou fè sa paski Jézi té sèvi lévanjil sala lè’y té ka pwéché asou montany-lan. An mannyè sala Jézi moutwé sé pawòl sala té kay akonpli an tan pou vini. (Maf. 5:5) Mé sa wa David té di an Sam sala, ka osi moutwé mannyè lavi té kay yé lè Sòlomonn té wa. Lè Sòlomonn té ka kondwi kon wa an Izwayèl, pèp Jéhova enjwi an chay lapé épi bennédiksyon adan an péyi ki té ‘ka koulé épi lèt èk siwo myèl.’ Bondyé té di yo: ‘Si zòt kontiné maché silon lwa mwen èk zòt tjenn koumandman mwen èk obéyi yo . . . , Mwen kay mété lapé an péyi-a, èk zòt kay kouché èk pyèsonn pa kay fè zòt pè.’ (Livi. 20:24; 26:3, 6) Sé pwonmèt sala té vini vwé lè Sòlomonn té ka kondwi kon wa. (1 Kw. 22:9; 29:26-28) Osi, Jéhova té pwonmèt “sé méchan-an kay dispawèt.” (Sam 37:10) Alò, sa ki ékwi an Sam 37:10, 11, 29 té fèt vwé an tan pasé èk i kay fèt vwé an tan pou vini.

9. Kisa wenn péyi Chiba té di konsèné kondwit wa Sòlomonn?

⁹ Wenn péyi Chiba té tann nouvèl-la konsèné lapé-a épi bon lavi-a jan Izwayèl té ka enjwi anba kondwit wa Sòlomonn. Konsa, wenn sala kité péyi’y, i voyajé an lonng distans, èk i alé Jérouzalèm pou’y wè pou kò’y. (1 Wa 10:1) Apwé i ègzanminé wéyòm Sòlomonn, i di: ‘Sa mwen té tann pa té menm dimi. . . . Pa dé bon i bon pou pèp ou, èk pa dé bon i bon pou sé sèvant ou-a ki ka toujou doubout douvan’w pou kouté lasajès ou!’ (1 Wa 10:6-8) Mé mannyè bagay té yé anba kondwit Sòlomonn, sété annèk an ti ègzanp pou moutwé nou sa Jéhova kay fè bay lézòm anba kondwit Gason’y Jézi.

10. An ki diféwan mannyè Jézi pli enpòtan pasé Sòlomonn?

¹⁰ An tout diféwan mannyè, Jézi otan pli enpòtan pasé Sòlomonn. Pou ègzanp, Sòlomonn pa té pawfé, èk i té fè lèwè ki té byen sèwyé èvèk sa té mennen an chay pwoblenm asou pèp Bondyé. Okontwè, Jézi sé on Wa ki pawfé, èk i pa ka fè lèwè. (Louk 1:32; Hib. 4:14, 15) Jézi wèsté fidèl pou Jéhova magwé i té èspéyansé an chay tès ki té byen difisil anba Satan. Konsa, Jézi moutwé a klè, i pa kay janmen péché ében fè anyen ki kay annékòz pèp Bondyé pou soufè. Alò, Jézi sé vwéman pli mèyè Wa-a nou sa janmen ni.

11. Ki moun ki kay édé Jézi pou kondwi?

¹¹ San kawant kat mil-la (144,000) kay kondwi épi Jézi, èvèk yo kay twavay ansanm épi’y pou otjipé lézòm èvèk pou akonpli divwa Bondyé pou latè-a. (Wév. 14:1-3) Sé moun sala ki kay kondwi épi Jézi, té èspéyansé an chay soufwans épi difikilté lè yo té asou latè. Konsa yo kay ni an chay konpasyon pou nou, paski yo sa konpwann sé difikilté-a nou ka èspéyansé asou latè-a. Mé, ègzaktiman kisa sé moun sala kay fè?

KI TWAVAY SÉ MOUN-LAN KI KA ALÉ AN SYÈL KAY FÈ?

12. Ki bèl pwivilaj Jéhova bay san kawant kat mil-la (144,000)?

¹² Jézi épi sé moun-lan ki kay kondwi épi’y an syèl ni an chay pli twavay pou fè pasé sa Sòlomonn té ni pou fè. Wa Sòlomonn té ni pou otjipé plizyè milyon moun ki té ka wèsté an yon péyi. Mé Jézi épi sé moun-lan ki kay kondwi épi’y-la kay ni pou otjipé bilyon di moun ki ka viv oliwon latè-a. Vwéman, Jéhova bay san kawant kat mil-la (144,000) an bèl pwivilaj!

13. Ki wèskonsabilité san kawant kat mil-la (144,000) kay ni?

¹³ Menm kon Jézi, san kawant kat mil-la (144,000) kay wann sèvis kon wa épi pwèt. (Wév. 5:10) Lè jan Izwayèl té anba lwa Moziz, sé pwèt-la té ni wèskonsabilité-a pou édé sé moun-lan wèsté an bon santé, èvèk pou vansé pli pwé Jéhova. Hibrou 10:1 di: “Lwa sé Jwif-la sété yon ti lonbwaj sé bon bagay-la ki kay vini-an.” Konsa nou sa ni èspwa san kawant kat mil-la (144,000) kay ni wèskonsabilité-a pou édé pèp Jéhova wèsté an bon santé épi pou wèsté pwé Jéhova. Bon, nou pa konnèt ki mannyè san kawant kat mil-la (144,000) kay konminiké épi moun asou latè-a lè yo ka wann sèvis kon wa épi pwèt an Wéyòm Bondyé. Mé nou sa ni konfyans-lan ki, népòt mannyè yo chwazi pou konminiké épi nou, Jéhova kay fè asiwé nou wisouvwè tout sé diwèksyon-an nou bizwen an Pawadi-a.​—Wév. 21:3, 4.

KISA SÉ ‘LÒT MOUTON-AN’ NI POU FÈ POU KWALIFYÉ POU VIV AN PAWADI-A?

14. Pouki nou sa di ‘ti twipo-a’ èk sé ‘lòt mouton-an’ an lilyon?

¹⁴ Jézi kwiyé sé moun-lan ki kay kondwi épi’y an syèl an ‘ti twipo’. (Louk 12:32 NWT ) I osi palé konsèné an dézyenm gwoup èvèk i kwiyé gwoup sala, sé ‘lòt mouton-an’. Mé sé dé (2) gwoup sala sé yon twipo èk yo an lilyon. (Jan 10:16) Tout sé moun-lan an sé dé (2) gwoup sala ja ka twavay ansanm. Èvèk yo kay kontiné twavay ansanm lè latè-a vini an Pawadi. Lè latè-a vini on pawadi, ‘ti twipo-a’ kay an syèl déja, èk sé ‘lòt mouton-an’ kay ni èspwa-a pou enjwi lavi asou latè-a pou tout tan an Pawadi-a. Mé la ni bagay sé ‘lòt mouton-an’ sipozé fè apwézan pou yo sa kwalifyé pou viv an Pawadi-a.

15. (a) Ki mannyè sé ‘lòt mouton-an’ sa moutwé yo ka sipòté sé fwè Jézi-a? (b) Ki mannyè ou sa imité ègzanp fwè-a ki an boutik-la? (Gadé pòtwé-a.)

¹⁵ Kwiminèl-la ki té wépanti asou poto-a, té mò avan i té sa moutwé Jézi apwésiyasyon pou sa i té fè ba’y. Mé sé ‘lòt mouton-an’ ni an chay òpòtyounité apwézan pou moutwé Jézi apwésiyasyon. Pou ègzanp, yo ka moutwé yo enmen Jézi an mannyè-a yo ka twété sé fwè Jézi-a. Anfen Jézi té di, i té kay jijé sé mouton-an silon mannyè-a yo té twété sé fwè’y-la. (Maf. 25:31-40) Lè nou zélé an twavay pwèchman-an, sa sé yon mannyè nou sa moutwé nou ka sipòté sé fwè Jézi-a. (Maf. 28:18-20) Sé pou wézon sala, nou vlé fè asiwé nou sèvi Bib-la épi sé piblikasyon-an sé fwè-a ka ban nou pou sèvi an minis-la, tèl kon liv-la Ou Sa Ni On Bon Lavi Pou Tout Tan! Alò, si’w p’òkò ka étidyé Bib-la épi on moun, i kay bon pou’w ofè moun ou ka palé épi an minis-la, épi lòt moun ou konnèt, an létid Bib.

16. Kisa nou sa fè apwézan pou pwépawé pou viv anba Wéyòm Bondyé?

¹⁶ Nou pa ni pou èspéwé jistan nou wivé an Pawadi-a pou nou fè sé chanjman-an Jéhova vlé nou fè. Dépi apwézan nou sa fè éfò pou vini moun ki onnèt an pawòl nou épi an aksyon nou. Èk nou sa koumansé fè éfò pou vini moun ki wézonnab an tout sa nou ka fè. Osi, nou sa moutwé nou fidèl pou Jéhova, pou moun-lan nou mayé épi-a, épi pou sé fwè èk sè nou-an. Si nou ka toujou obéyi Jéhova paditan nou ka viv an vyé latè sala, i kay pli ézé pou nou obéyi’y lè nou an Pawadi-a. Nou sa osi dévlopé ladwès épi labitid ki ka moutwé nou ka pwépawé pou viv an latè nèf-la.b

17. Pouki nou pa sipozé santi dékouwajé pou lapéti péché nou té fè an tan pasé? Èspliké.

¹⁷ An lòt bagay nou ni pou fè sé sa, nou ni pou éséyé doubout santi koupab paski nou té fè an péché ki gwav an tan pasé. Bon, sa pa vlé di nou kay sèvi wanson sakwifis Jézi kon an èskiz pou nou ‘kontiné péché èspwé.’ (Hib. 10:26-31) Mé si nou té fè an péché ki gwav èk nou ja wépanti, nou ja mandé Jéhova épi sé ansyen-an pou édé nou, èvèk nou ja chanjé vyé kondwit nou, nou sa ni asiwans-lan ki Jéhova ja pawdonnen nou konplètman. (Izay. 55:7; Twav. 3:19) Chonjé sa Jézi té di sé Fawizyen-an. I té di yo: “Mwen pa vini an latè-a pou moun ki dwèt, mé [mwen vini] pou sé péchè-a.” (Maf. 9:13) Wi wanson sakwifis Jézi ni asé pouvwa pou kouvè tout péché nou.

OU SA VIV POU TOUT TAN AN PAWADI

18. Kisa ou té kay vlé di kwiminèl-la ki té mò a koté Jézi?

¹⁸ Imajiné kò’w an Pawadi-a ka palé épi kwiminèl-la Jézi té palé épi-a. San dout, ni ou ni li, kay di mannyè zòt ka apwésyé sakwifis Jézi. Pitèt ou kay mandé kwiminèl-la pou di’w lòt bagay ki té fèt diwan tan-an Jézi té asou poto soufwans-lan, èk mannyè i té ka santi lè Jézi wéponn li. Èk pitèt i menm kay mandé’w pou di’y mannyè lavi té yé diwan sé dènyé jou-a an vyé sistenm Satan-an. Pa dé kontan nou kay kontan pou étidyé Bib-la épi moun kon nonm sala!​—Èfés. 4:22-24.

19. Ki mannyè nou sav nou pa kay annwi an Pawadi-a? (Gadé pòtwé-a ki asou kouvèti Gad-la.)

¹⁹ Nou pa kay janmen annwi an Pawadi-a. Nou kay toujou ni an chay moun pou palé épi, èk nou kay ni an chay bon twavay pou fè. Sa ki kay pli bon sé sa, chak jou nou kay vini konnèt Papa nou an syèl pli mèyè, èk nou kay sa enjwi tout sa i potjiwé ban nou. Osi, nou kay toujou ni on chay bagay pou apwann konsèné Jéhova, èk pa dé bagay nou kay apwann konsèné kwéyasyon’y! Èvèk pli nou viv, sé pli lanmityé nou pou Jéhova kay vini pli fò. Konsa jis apwézan, nou ka wimèsyé Jéhova épi Jézi paski yo ban nou an bèl pwonmèt, lavi pou tout tan an Pawadi-a!