Ou Sa Ni Lapé Lè Ou Ka Èspéyansé Pwoblenm

1. Ki mannyè nou sa èspéyansé ‘lapé-a Bondyé ka bay an tjè nou èk an lidé nou?ʼ (Filipay 4:6, 7) Èk ki bennéfis nou ka twapé lè nou ni lapé sala?

LA ni an kalité lapé moun an latè-a pa konnèt. Lapé sala sé ‘lapé-a Bondyé ka ban nou an tjè nou èk an lidé nou.ʼ Nou ka èspéyansé lapé sala lè nou ni an bon wilasyon épi Papa nou ki an syèl. Lè nou ni lapé sala nou ka santi kam épi sòv. (Li Filipay 4:6, 7.) Osi, nou ka enjwi bon wilasyon épi moun ki enmen Jéhova, èvèk nou ka enjwi an bon wilasyon épi Jéhova, ‘Dyé-a ki ka bay lapé.ʼ (1 Tèsa. 5:23) Lè nou konnèt, konfyé, èvèk obéyi Papa nou Jéhova, lapé-a i ka bay sa kalmé tjè nou épi lidé nou lè nou ka èspéyansé pwoblenm.

2. Pouki nou asiwé nou sa ni lapé an tjè nou èk an lidé nou?

² Ès i vwéman posib pou nou ni lapé an tjè nou épi an lidé nou lè nou ka èspéyansé pwoblenm a kòz di maladi ki ka simen, dézas, pèsikasyon ében lè moun lévé wévòt? Sé bagay sala sa fè nou pè. Mé Jézi té di sé disip li-a: “Pa kité tjè zòt twakasé ni pa pè pou sa ki kay fèt.” (Jan 14:27) Nou byen kontan sé fwè èk sè nou-an ka swiv konsèy sala. Épi èd Jéhova yo té sa ni lapé an tjè yo épi an lidé yo paditan yo ka aji épi mové sitiwasyon.

OU SA TWAPÉ LAPÉ LÈ LA NI AN MALADI KI KA SIMEN

3. Ki mannyè on èpidenmik ében on panndèmik sa distwé lapé nou?

³ Yon èpidenmik ében yon panndèmik sa chanjé pwèskè tout bagay an lavi nou. Imajiné mannyè COVID-19 té afèkté lavi an chay moun. Pou ègzanp, yo mandé an gwoup moun ki mannyè COVID-19 té afèkté yo, èvèk an chay di yo di, yo pa té ka dòmi byen diwan panndèmik-la. Osi, COVID-19 té annékòz an chay pli moun pou èspéyansé tèt cho épi dipwèsyon. I annékòz pli moun pou abizé dwòg, èk pou vini vyolan an fanmi yo. Èvèk plis toujou, diwan panndèmik-la, la té ni pli moun ki té vlé tjwé kò yo. Alò, si péyi-a koté ou ka wèsté ni an maladi ki ka simen, kisa ou sa fè pouʼw ni mwens tèt cho, épi pouʼw ni lapé an tjèʼw èk an lidéʼw?

4. Lè nou konnèt sa Jézi té di konsèné sé dènyé jou-a, ki mannyè sa ka édé nou pou ni lapé?

⁴ Jézi té di la té kay ni “tout sòt diféwan maladi” an yon plas apwé an lòt diwan sé dènyé jou-a. (Louk 21:11) Kon nou konnèt sa, ki mannyè sa ka édé nou pou ni lapé? Nou pa ka sipwi lè nou wè maladi ka simen toupatou, paski nou ka wè sa ki ka fèt sé menm sa Jézi di ki té kay fèt. Konsa nou ni bon wézon pou swiv konsèy-la Jézi té bay moun ki ka viv an sé dènyé jou-a. I di yo: “Pa kité [sé bagay sala] twakaséʼw.”​—Maf. 24:6.

5. (a) Silon Filipay 4:8, 9, kisa nou sa pwédyé pou lè la ni an maladi ki ka simen? (b) Ki bennéfis nou sa twapé lè nou kouté Bib-la asou òdiyo?

⁵ Lè la ni an maladi ki ka simen, i byen ézé pou nou santi antjèt èk pè. Èk sé sa ki té wivé an sè yo ka kwiyé Desi.b Apwé tontonʼy, kouzin li, èk dòktèʼy mò épi COVID-la, i té pè i té kay jwenn maladi-a èk paséʼy ba manmanʼy ki té an laj. Osi, i té pè i té kay pèdi twavay li pou lapéti panndèmik-la. Konsa i té twakasé konsèné ki mannyè i té kay sa ganyen manjé épi péyé lwéay kay li. Sé bagay sala té fèʼy tèlman antjèt, i pa té sa dòmi. Mé Desi twapé lapé ankò. Ki mannyè? I mandé Jéhova pou édéʼy wèsté kam, épi pou katjilé asou bagay ki pozitiv. (Li Filipay 4:8, 9.) Osi i té ka kouté Bib-la asou òdiyo, èk sé konmsi i té ka tann Jéhova ka “palé” ba li lèʼy té ka kouté sé òdiyo-a. I di, vwa sé fwè-a ki té ka li asou òdiyo-a té ka fèʼy santi kam. Èk i té ka fèʼy chonjé Jéhova konsèné épiʼy.​—Sam 94:19.

6. Ki mannyè létid pèsonnèl ou épi sé mitin-lan sa édéʼw?

⁶ Lè péyiʼw ni an maladi ki ka simen, i pa ka toujou posib pouʼw fè tout sé bagay-la ou té akoutimé fè-a. Mé pa kité sa anpéchéʼw fè létid pèsonnèl ou, ében anpéchéʼw atandé sé mitin-lan. Sé èspéyans-lan ki an sé piblikasyon nou-an èk an sé vidiyo nou-an, kay fèʼw chonjé sé fwè èk sè nou-an ka tjébé fò magwé yo ni pwoblenm. (1 Pita 5:9) Èvèk sé mitin-lan kay édéʼw katjilé asou bagay ki an Bib-la ki sa ankouwajéʼw. Osi, lèʼw atandé sé mitin-lan, ou kay twapé òpòtyounité pouʼw ankouwajé lézòt épi pouʼw twapé ankouwajman tou. (Ronm 1:11, 12) Lèʼw mèdité asou mannyè-a Jéhova ka sipòté sèvant li lè yo malad, lè yo pè, ében lè yo ka santi yo pa kò yo, sa kay fòtifyé lafwaʼw èk ou kay ni asiwans-lan ki Jéhova kay sipòtéʼw osi.

7. Kisa ou sa apwann an ègzanp zapòt Jan?

⁷ Sé fwè èk sè nou-an sa édé nou pou ni lapé. Konsa fè tout saʼw pé pou konminiké épi sé fwè èk sè-a. Lè la ni an maladi ki ka simen, pitèt nou kay ni pou wèsté lwen moun, jis sé fwè èk sè nou-an. A lè sala ou pé santi menm kon zapòt Jan. I té vlé wè bon janʼy Gayòs pou yo té sa palé. (3 Jan 13, 14) Mé zapòt Jan wéyalizé sa pa té posib a lè-a. Konsa i fè saʼy té pé. I ékwi Gayòs an lèt. Alò, siʼy pa posib pouʼw pasé tan épi sé fwè èk sè-a fas an fas, ou sa kwiyé yo asou tèlifonn-lan, ou sa palé épi yo asou intannèt-la, ében ou sa voyé yo an ti tèks. Lèʼw ka toujou konminiké épi sé fwè èk sè nou-an, ou kay santi pli sòv épi pli kam, èk ou pa kay santi tèlman annwi. Osi, siʼw ka santi antjèt ou sa palé épi sé ansyen-an, èk aksèpté bèl ankouwajman-an yo kay baʼw.​—Izay. 32:1, 2.

OU SA NI LAPÉ LÈ OU ÈSPÉYANSÉ AN DÉZAS

8. Ki mannyè an dézas sa distwé lapéʼw?

⁸ Siʼw janmen èspéyansé an déliz, an twanblanntè, an gwo difé, ében an lòt dézas, san dout ou té ni an pil tèt cho pou an chay tan. Èk si diwan dézas sala ou té pèdi an moun ou enmen ében byenʼw, pitèt sa té fèʼw lapenn, pitèt ou té santi dékouwajé, ében pitèt ou té jis faché. Sa pa vlé di ou sé an moun ki ka vivi dèyè byen ében ou sé on moun ki pa ni lafwa. Mé sa ou té èspéyansé-a sé an sitiwasyon ki té byen difisil, èvèk adan moun pé di ou ni dwa-a pou ni sé santiman sala. (Jòb 1:11) Kanmenm, menm si ou ka èspéyansé sitiwasyon ki byen difisil kon sa, ou sa ni lapé. Ki mannyè?

9. Kisa Jézi té di pou pwépawé nou pou dézas?

⁹ Jézi té di sa ki té kay fèt an dènyé tan-an. Kanmenm adan moun ka kwè yo pa sa janmen èspéyansé an dézas. Mé nou sav la kay ni an chay pli dézas an tan nou, èvèk adan di yo sa afèkté nou. Jézi té di sé disip li-a, avan bout-la wivé la té kay ni “mové twanblanntè” èvèk lòt dézas. (Louk 21:11) I té osi di la té kay ni “tèlman movèzté”, èk nou ka wè sa jòdi jou. Pou ègzanp, latè-a ni an chay pli kwim, èvèk pli vyolans. (Maf. 24:12) Jézi pa janmen di sé dézas sala té kay afèkté moun ki pa sèvant Jéhova sèlman. Anfen plizyè sèvant Jéhova ja èspéyansé difikilté a kòz di dézas. (Izay. 57:1; 2 Kòr. 11:25) Chonjé, Jéhova pa kay pwotéjé nou hòd tout dézas, mé i kay toujou ban nou népòt sa nou bizwen pou nou wèsté kam.

10. Lè nou pwépawé pou an dézas andavans, ki mannyè sa ka moutwé nou ni lafwa? (Pwovèb 22:3)

¹⁰ Lè an bagay fèt sibitman, i kay pli ézé pou nou wèsté kam si nou ja pwépawé andavans. Mé lè nou pwépawé andavans, ès sa vlé di nou pa ni lafwa an Jéhova? Mé non! Anfen, lè nou pwépawé pou an dézas andavans, sé lè sala nou ka moutwé nou ni lafwa ki, Jéhova sa otjipé nou. Ki mannyè? Ében Pawòl Bondyé ka ankouwajé nou pou pwépawé pou dézas ki pé fèt. (Li Pwovèb 22:3.) Èk ògannizasyon Jéhova ka toujou ankouwajé nou pou pwépawé pou dézas èk lòt bagay ki pé fèt sibitman. Sé fwè-a ka sèvi diféwan atik, sé mitin-lan, épi anonsman pou fè nou chonjé mannyè i enpòtan pou pwépawé andavans.c Konsa, ès nou ka konfyé Jéhova? Si nou ka konfyé Jéhova, nou kay swiv konsèy-la i ka ban nou èk pwépawé apwézan avan an dézas fèt.

11. Kisa ou apwann an ègzanp sésé Margaret?

¹¹ Annou konsidiwé ègzanp sésé Margaret. Lè la té ni an gwo difé an konmin li, gouvèdman-an di tout moun pou kité konmin-lan èk alé an lòt plas ki pli sòv. Mé paski la té ni an chay vwati asou chimen-an, pyèsonn pa té sa pasé. Osi, lézè-a té plen lafimé nwè. Konsa sésé Margaret té ni pou wèsté an motokaʼy pou an lonng tan. Kanmenm i té byen pwépawé épi sé sa ki té tjenn li sòv. Pou ègzanp, i té ni on map an sak li, konsa i té sa twapé an lòt chimen pou pasé. Èk lèʼy té ka fè pwépawasyonʼy pou si antouka la té ni an dézas, i té jis pasé asou menm chimen-an pouʼy té sa konnèt li byen asé. Sé paski sésé Margaret té byen pwépawé i wèsté sòv lèʼy té ka chapé hòd gwo difé-a.

12. Pouki nou ka obéyi diwèksyon nou twapé pou tjenn nou sòv?

¹² Délè lè an dézas kay fèt, ében apwé i fèt, pou tjenn tout moun sòv, gouvèdman-an pé mété an ‘curfewʼ, èk yo pé mandé moun ki ka wèsté sèten plas pou alé wèsté an lòt koté ki pli sòv. Ében yo pé ban nou lòt diwèksyon. La ni moun ki ka tadé pou obéyi sé diwèksyon sala. Adan moun ka fè kòlonng paski yo pa vlé kité byen yo dèyè. Mé kisa Kwityen sipozé fè? Bib-la di nou: “Pou lapéti Senyè-a, obéyi tout sa ki ni lotowité anho zòt, menm si sé wa-a ki pli gwo chèf-la, ében gouvènè-a wa-a [mété-a].” (1 Pita 2:13, 14) Ògannizasyon Jéhova ka osi ban nou diwèksyon pou tjenn nou sòv. Pou ègzanp, yo ka toujou ankouwajé nou pou bay sé ansyen-an limowo tèlifonn nou, konsa yo sa fè kontak épi nou si an dézas fèt. Ès ou ja fè sa? Ògannizasyon-an pé di nou pou pa kité kay nou pou on sèten tan, épi pou fè asiwé nou ni asé manjé, glo, èk lòt bagay nou bizwen. Silon koté-a nou ka wèsté yo pé di nou pou alé adan an lòt koté ki pli sòv. Èvèk yo pé di nou ki mannyè èk ki lè nou sa édé lézòt. Si nou pa obéyi sé diwèksyon sala, nou pé mété lavi nou èvèk lavi sé ansyen-an anwis. Chonjé sé ansyen-an sé fwè ki fidèl èk yo ka gadé apwé nou tout lè. (Hib. 13:17) Sésé Margaret di: “Mwen asiwé mwen ka viv paski mwen obéyi diwèksyon-an mwen wisouvwè hòd sé ansyen-an épi ògannizasyon-an.”

13. Lè fwè épi sè ni pou kité kay yo a kòz di mové sitiwasyon, kisa ki ka édé yo pou tjenn djwèté yo épi pou ni lapé?

¹³ An chay fwè épi sè ja kité kay yo a kòz di dézas, ladjè, ében lè moun lévé wévòt an péyi yo. Mé magwé sitiwasyon nèf yo, yo ka fè tout sa yo pé èvèk yo ka kontiné fè pli an sèvis Jéhova. Sé fwè èk sè sala ka fè menm kon sé Kwityen-an an pwèmyé syèk-la ki té kité kay yo a kòz di pèsikasyon. Yo ka kontiné “pwéché Bon Nouvèl-la konsèné Jézi Kwi.” (Twav. 8:4) Lè yo pwéché sa ka édé yo fiksé asou Wéyòm-lan pito yo fiksé asou sitiwasyon yo. Sa ka édé yo tjenn djwèté yo èvèk i ka édé yo pou ni lapé an tjè yo èk an lidé yo.

OU SA NI LAPÉ LÈʼW KA ÈSPÉYANSÉ PÈSIKASYON

14. Lè nou ka èspéyansé pèsikasyon, ki mannyè sa pé afèkté lapé nou?

¹⁴ Pèsikasyon sa pwan sé bagay-la ki ka ban nou lapé. Pou ègzanp, lè nou sa atandé mitin, sa ka ban nou tjè kontan. Lè nou sa pwéché, sa ka fè nou djé. Èk lè nou sa fè sé bagay-la nou abitwé fè-a, nou ka santi alèz. Mé délè lè nou ka èspéyansé pèsikasyon, nou pa sa fè sé bagay sala. Èk délè nou ka pè yo awété nou èben mété nou an lajòl. Èvèk lè nou katjilé asou sa yo pé fè nou, tjè nou pé vini antjèt épi nou pé jis santi pè. Mé menm si ou pé santi kon sa, sé pa ou yonn, nou tout ka santi kon sa délè. Mé kanmenm, nou ni pou pwan pokosyon. Pouki? Paski Jézi té di, pèsikasyon pé annékòz nou pou pèd lafwa nou an li. (Jan 16:1, 2) Konsa, kisa nou sa fè pou tjenn lapé nou lè nou ka èspéyansé pèsikasyon?

15. Pouki nou pa sipozé pè pèsikasyon? (Jan 15:20; 16:33)

¹⁵ Pawòl Bondyé di nou: “Tout moun ki vlé viv an lavi ki nèt, menm kon Jézi Kwi moutwé yo pou fè, kay jwenn pèsikasyon.” (2 Tim. 3:12) Lè yo mété twavay nou anba bann an péyi fwè Andrei, i té twouvéʼy wèd pou kwè yo té kay pèsikité tout Témwen Jéhova ki an péyi-a. I di: ‘Péyi mwen ni si tèlman Témwen Jéhova, ki mannyè sé moun-lan an lotowité sa awété nou tout?ʼ Pito katjil sala ba Andrei lapé, i baʼy tèt cho. Mé sé lòt fwè-a kité sitiwasyon-an an lanmen Jéhova èvèk yo pa té ka twakasé lidé yo konsèné si yo awété yo opa. Sé fwè-a té sav pitèt yon jou yo té kay awété yo, mé yo pa té ni tèt cho kon Andrei. Konsa Andrei désidé pou chanjé atitid li épi pou mété tout konfyans li an Jéhova. Touswit apwé sa, i té ni lapé an tjèʼy épi an lidéʼy. Èk atjwèlman i ni djèwté magwé péyi-a ni pwoblenm toujou. Si nou fè kon Andrei èk mété tout konfyans nou an Jéhova, nou kay ni lapé an tjè nou épi an lidé nou. Wi Jézi té di, nou kay èspéyansé pèsikasyon, mé i té osi di, nou sa wèsté fidèl anba pèsikasyon.​—Li Jan 15:20; 16:33.

16. Lè nou ka èspéyansé pèsikasyon, diwèksyon ki moun nou ni pou obéyi?

¹⁶ Lè twavay nou anba bann, ében gouvèdman-an di nou pa sa fè sèten bagay, òfis bwanch-lan épi sé ansyen-an pé ban nou diwèksyon. Sé diwèksyon sala sé pou pwotéjé nou, pou fè asiwé nou kontiné wisouvwè manjé spiwityouèl, épi pou édé nou kontiné pwéché kon nou pé. Konsa fè tout saʼw pé pou obéyi sé diwèksyon sala, menm si ou pa byen konpwann pouki yo ban nou sé diwèksyon-an. (Jémz 3:17) Osi, fè asiwé ou pa bay népòt moun enfòmasyon konsèné sé fwè èk sè nou-an ében konsèné sa ki ka fèt an kongwigasyon-an.​—Éklé. 3:7.

17. Menm kon sé zapòt-la an pwèmyé syèk-la, kisa nou détèminé pou fè?

¹⁷ Yonn an sé wézon-an Satan ka pèsikité pèp Jéhova sé paski yo ka “kwè pawòl Jézi” èk yo ka pwéché bon nouvèl-la. (Wév. 12:17) Konsa pa kité Satan épi vyé latèʼy-la fèʼw pè. Lè nou kontiné pwéché èk enstwi moun bon nouvèl-la konsèné Wéyòm Bondyé, magwé pèsikasyon, sa ka ban nou djèwté èk lapé an tjè nou épi an lidé nou. An pwèmyé syèk-la, lè sé chèf pwèt-la épi sé ofisyé-a té di sé zapòt-la pou doubout pwéché, sé zapòt-la chwazi pou obéyi Bondyé. Konsa yo kontiné pwéché, èvèk sa ba yo tjè kontan. (Twav. 5:27-29, 41, 42) Kanmenm lè twavay nou anba bann, nou ni pou pwan pokosyon lè nou ka pwéché. (Maf. 10:16) Mé, si nou fè tout sa nou pé pou kontiné pwéché magwé pèsikasyon, nou kay ni lapé an tjè nou épi an lidé nou paski nou sav nou ka plè Jéhova.

“BONDYÉ KI KA BAN NOU LAPÉ AN TJÈ NOU KAY TOUJOU LA ÉPIʼW.”

18. Ki moun ki sa ban nou lapé an tjè nou èk an lidé nou?

¹⁸ Nou sa ni konfyans-lan ki, nou sa ni lapé menm si bagay vini byen mové. Konsa lè bagay vini mové, sé pou nou toujou chonjé nou bizwen lapé-a Bondyé ka bay. Sé sèlman Jéhova ki sa ban nou lapé sala. Konsa annou dépan asou Jéhova lè maladi ka simen, lè dézas fèt, ében lè nou ka èspéyansé pèsikasyon. Annou wèsté pwé ògannizasyon Jéhova, èk fiksé asou bèl èspwa-a nou ni pou tan ki ka vini. Siʼw fè sé bagay sala, ‘Bondyé kay baʼw lapé an tjèʼw èk i kay toujou la épiʼw.ʼ (Filip. 4:9) An lòt atik-la, nou kay konsidiwé kisa nou sa fè pou édé sé fwè èk sè nou-an pou ni lapé lè yo ka èspéyansé difikilté.