Pwépawé Apwézan Pou Jou-a Ki Pli Enpòtan An Lanné-a

1. Pouki jou Mémoriyal-la sé jou-a ki pli enpòtan an lanné-a? (Louk 22:19, 20)

POU pèp Jéhova, jou Mémoriyal lanmò Jézi, sé jou-a ki pli enpòtan an lanné-a. Èk lokazyon sala sé sèl lokazyon-an Jézi koumandé disip li pou òbzòvé. (Li Louk 22:19, 20 NWT.) Mé la ni plizyè wézon pouki Mémoriyal-la sé yon lokazyon ki byen spésyal pou nou. Konsa annou konsidiwé yonndé an sé wézon sala.

2. Pou ki diféwan wézon Mémoriyal-la sé yon lokazyon ki byen spésyal pou nou?

² Mémoriyal-la ka édé nou pou mèdité asou mannyè wanson sakwifis Jézi enpòtan, asou tout sé bennédiksyon-an nou kay twapé gwanmèsi wanson-an, èk, i ka fè nou chonjé diféwan mannyè nou sa moutwé nou ka apwésyé sakwifis Jézi. (2 Kòr. 5:14, 15) Osi, lè nou atandé Mémoriyal-la, nou ka “édé lafwa yonn a lòt vini fò.” Konsa Mémoriyal-la ka ban nou òpòtyounité pou ankouwajé yonn a lòt. (Ronm 1:12) On lòt bagay sé sa, chak lanné, plizyè fwè èk sè ki doubout atandé sé mitin-lan, ka atandé Mémoriyal-la. Adan di yo pé jis désidé pou viwé jwenn Jéhova senpliman paski, nou byen vini yo èk nou moutwé yo lanmityé épi jantiyès, lè yo atandé Mémoriyal-la. Èk i bon pou nou chonjé, la ni moun ki pa Témwen Jéhova ki ka atandé Mémoriyal-la. An chay di yo ka tèlman apwésyé sa yo tann èk èspéyansé diwan Mémoriyal-la, sa ka motivé yo pou pwan démach pou koumansé étidyé Bib-la. Pou tout sé diféwan wézon sala, Mémoriyal-la sé vwéman, yon lokazyon ki byen spésyal pou nou.

3. Lè nou atandé Mémoriyal-la, ki mannyè sa ka moutwé nou an lilyon épi tout sé fwè èk sè nou-an oliwon latè-a? (Gadé pòtwé-a osi.)

³ On lòt wézon pouki nou kontan atandé Mémoriyal-la sé sa, nou sav lè nou atandé, nou an lilyon épi tout sé fwè èk sè nou-an owon latè-a. Paski jou sala, kon sòlèy ka kouché oliwon latè-a, Tèmwen Jéhova ka asanblé pou òbzòvé Mémoriyal-la. Nou tout ka kouté on bèl diskou ki ka fiksé asou mannyè wanson sakwifis Jézi enpòtan. Nou ka chanté dé (2) chanson pou glowifyé Dyé nou, Jéhova. Nou ka pasé pen-an épi diven-an, èvèk nou ka di “ensiswatil” an finisman chak sé kat (4) lapwiyè-a nou ka kouté diwan Mémoriyal-la. An apipwé venn kat (24) nèditan, tout sé kongwigasyon-an oliwon latè-a ka swiv menm modèl-la. Ès ou sa imajiné kantité lajwa Jéhova épi Jézi ka ni, lè yo wè nou tout owon latè-a ka onnowé yo an mannyè sala?

4. Kisa nou kay diskité an atik sala?

⁴ An atik sala, nou kay diskité sé kwèstyon sala: Kisa nou sa fè pou moutwé apwésiasyon pou Mémoriyal-la? Kisa nou sa fè pou édé lézòt moun twapé bennéfis an Mémoriyal-la? Èk, lè’y vini pou sé fwè èk sè nou-an ki doubout atandé sé mitin-lan, kisa nou sa fè pou édé yo? Sé wépons-lan pou sé kwèstyon sala kay édé nou pwépawé pou lokazyon sala ki si tèlman enpòtan.

KISA NOU SA FÈ POU MOUTWÉ APWÉSIASYON POU MÉMORIYAL-LA?

5. (a) Pouki i bon pou mèdité asou mannyè wanson-an enpòtan? (Sam 49:7, 8) (b) Kisa’w apwann an vidiyo-a Pou Ki Wézon Jézi Mò?

⁵ Yonn an sé pli enpòtan bagay-la nou sa fè pou moutwé apwésiasyon pou Mémoriyal-la, sé mèdité asou mannyè wanson sakwifis Jézi enpòtan. Kon tout lézòm sé péchè, la pa ni anyen pyès di nou té sa fè pou sové kò nou anba péché épi lanmò. (Li Sam 49:7, 8; osi, gadé vidiyo-a Pou Ki Wézon Jézi Mò?)a Konsa Jéhova fè awanjman pou Jézi bay lavi’y pou sové nou. Sa sété on gwo sakwifis Jéhova épi Jézi fè ban nou. (Ronm 6:23) Èvèk pli nou mèdité asou sa yo fè ban nou, sé pli nou kay dévlopé apwésiasyon pou wanson-an. Alò, nou kay konsidiwé yonndé an sé bagay-la Jéhova èk Jézi fè épi tout tjè yo pou sové nou. Mé pwèmyéman, annou wéponn kwèstyon sala: ‘Pouki i té nésésè pou Jézi bay lavi’y kon yon wanson?’

6. Pouki i té nésésè pou Jézi bay lavi’y kon yon wanson?

⁶ Yon wanson sé pwi-a ou ka péyé pou libéwé on moun, ében pou achté an bagay ki té pèd. Mé pouki yon wanson té nésésè? Ében, lè Jéhova fè pwèmyé nonm-lan, Adanm, i té pawfé. Wi, Adanm pa té ni pyès péché, èk i té ni bèl òpòtyounité-a pou viv pou tout tan. Mé lè’y dézobéyi Bondyé, i vini yon péchè, èvèk i pèd lavi étonnèl pou kò’y épi pou tout désandan’y. Pou achté viwé sa Adanm té pèdi-a, Jézi té ni pou bay lavi pawfé’y kon yon sakwifis. Diwan tout tan-an i té asou latè-a, Jézi “pa janmen péché ében . . . manti.” (1 Pita 2:22) Èk lè Jézi mò, i té pawfé, menm kon Adanm té yé avan i péché. Konsa, Jézi té sa bay lavi’y kon yon sakwifis pou achté viwé lavi pawfé-a Adanm té pèdi-a.​—1 Kòr. 15:45; 1 Tim. 2:6.

7. Mansyonnen adan sé difikilté-a Jézi èspéyansé lè’y té asou latè-a.

⁷ Lè Jézi té asou latè-a, i èspéyansé an chay difikilté. Kanmenm, i obéyi Papa’y an tout bagay, menm si délè i té difisil pou fè sa. Pou ègzanp, Jézi té pawfé èk pawan’y pa té pawfé, konsa san dout, i té sa wè lèwè yo, mé i té ka toujou obéyi pawan’y. (Louk 2:51) Osi, kon on jennès, Jézi té ni pou tjébé fò èk wèsté fidèl lè moun pitèt té ka bay chalè pou fè’y dézobéyi pawan’y ében dézobéyi Bondyé. Èvèk lè Jézi té on gwan nonm, i té ni pou tjébé fò anba tantasyon Satan, paski Satan té vlé fè’y péché. Satan jis di Jézi diwèktiman, pou tounen do’y asou Bondyé. (Maf. 4:1-11) Anfen, Satan té sav, Jézi pa té kay sa péyé pwi-a pou wanson si’y té péché. Konsa, i fè tout sa’y té pé pou fè Jézi péché.

8. Ki lòt difikilté Jézi èspéyansé?

⁸ Mé la ni lòt difikilté Jézi èspéyansé lè’y té ka fè minis li asou latè-a. Pou ègzanp, sé lèlmi’y-lan té ka pèsikité’y èk yo té vlé tjwé’y. (Louk 4:28, 29; 13:31) Osi chonjé, sé disip li-a pa té pawfé. Konsa yo té ka fè lèwè, èk Jézi té ni pou aji épi sa. (Mak 9:33, 34) An plis di sa, lè sé moun-lan té mennen Jézi douvan lalwa, yo pwan’y sèvi wizib èk yo fè’y an chay kwiyoté. Lè yo fini, yo pann li kon yon kwiminèl. (Hib. 12:1-3) Mizi soufè Jézi soufè, èk i té ni pou tjébé fò anba soufwans sala san pwotèksyon Papa’y.b​—Maf. 27:46.

9. Lè nou katjilé asou tout sa Jézi fè ban nou, ki mannyè sa ka fè nou santi? (1 Pita 1:8)

⁹ Wi, i a klè, Jézi soufè an chay pou’y té sa péyé pwi-a pou wanson-an. Èvèk i fè sa épi tout tjè’y, paski i enmen nou. Lè nou katjilé asou sakwifis Jézi épi tout sé bagay-la i soufè pou lapéti nou, nou ka santi tjè nou plen épi lanmityé pou Jézi.​—Li 1 Pita 1:8.

10. Ki sakwifis Jéhova fè pou’y kité Jézi péyé pwi-a pou wanson-an?

¹⁰ Bon, lè’y vini pou Jéhova, ki sakwifis ou kwè i fè pou’y kité Jézi péyé pwi-a pou wanson-an? Ében, la pa ni pyès papa ki sa ni an pli bon wilasyon épi gason’y pasé wilasyon-an Jéhova épi gason’y Jézi ni. (Pwov. 8:30) Konsa ou sa imajiné mannyè Jéhova té ka santi, lè’y wè tout sé difikilté-a Jézi té ka èspéyansé asou latè-a. San dout, Jéhova té an gwo lapenn, èk i té ka santi twis pou wè mannyè yo maltwété èk widjèkté Jézi, èvèk mannyè Jézi soufè.

11. Ba yon ègzanp ki ka édé nou konpwann mannyè Jéhova té ka santi lè yo pann Jézi.

¹¹ Pou édé nou konpwann mannyè Jéhova té ka santi lè Jézi mò, annou pwan ègzanp on pawan épi ich li. Népòt pawan ki ja pèdi yon ich an lanmò sav, sa sé an bagay ki ka vwéman kasé tjè’w. Èk wi, nou ni lafwa ki byen fò an èspwa wézèwèksyon-an. Mé magwé sa, lè an moun nou enmen mò, nou ka santi an chay lapenn an tjè nou. Ègzanp sala ka édé nou konpwann, mannyè Jéhova té ka santi lè’y gadé Gason’y soufè èk mò jou sala, an lanné twant twa (33) an lépòk nou.c​—Maf. 3:17.

12. Pou pwépawé tjè nou, kisa nou sa fè an sé simenn-lan avan Mémoriyal-la?

¹² Pou pwépawé tjè nou, mi an bon bagay nou sa fè an sé simenn-lan avan Mémoriyal-la. Pou Létid Fanmi nou ében an létid pèsonnèl nou, nou sa fè éfò pou étidyé pli konsèné wanson-an. Pou fè sa nou sa sèvi piblikasyon-an, Research Guide for Jehovah’s Witnesses (an Annglé), èk lòt piblikasyon ki ka ban nou pli détay konsèné wanson-an.d Osi, fè asiwé ou swiv pwogwanm-lan pou: Li On Pòsyon An Bib-la Diwan Sézon Mémoriyal-la, an Ti Liv Mitin Nou. Èk jou Mémoriyal-la, chonjé pou gadé pwogwanm spésyal-la, Diskasyon Labib Pou Jou Mémoriyal-la. Lè nou byen pwépawé tjè nou pou Mémoriyal-la nou kay sa édé lézòt twapé bennéfis an Mémoriyal-la.​—Èzra 7:10.

ÉDÉ LÉZÒT MOUN TWAPÉ BENNÉFIS AN MÉMORIYAL-LA

13. Pou édé lézòt moun twapé bennéfis an Mémoriyal-la, kisa ki pwèmyé bagay-la nou ni pou fè?

¹³ Bon, kisa nou sa fè pou édé lézòt moun twapé bennéfis an Mémoriyal-la? Ében pwèmyé bagay-la nou ni pou fè, sé envité yo. Èk ki moun nou sa envité? Apa di sé moun-lan nou ka jwenn an minis-la, nou sa fè on lis èk ékwi non lòt moun nou vlé envité. Nou sa ékwi non moun tèl kon, moun an fanmi nou, moun nou ka twavay ében alé lékòl épi, èk lòt moun nou konnèt. Èvèk menm si nou pa ni asé envitasyon pou bay chak moun yon envitasyon an lanmen yo, nou sa voyé link-la pou envitasyon-an ba yo, èk yo kay li’y asou intannèt-la. Pitèt nou kay byen sipwi pou wè kantité moun ki atandé Mémoriyal-la!​—Éklé. 11:6.

14. Bay on èspéyans ki ka moutwé kisa ki pé fèt lè’w bay an moun on envitasyon pou Mémoriyal-la.

¹⁴ Lè’w bay an moun on envitasyon pou Mémoriyal-la, sa pé motivé yo pou atandé. Mi yon èspéyans ki ka moutwé sa. Yon jou, on sè té byen sipwi lè mawi’y vini di’y, i kay atandé Mémoriyal-la épi’y. Sè-a té sipwi paski mawi’y pa té on Tèmwen Jéhova, èk i té ja envité’y Mémoriyal plizyè fwa, mé mawi-a pa janmen atandé. Konsa, pouki i té vlé atandé kou sala? Mawi-a di: “An moun ba mwen yon envitasyon.” Wi, yonn an sé anyen-an i té konnèt bay on envitasyon an lanmen’y. An wézilta di sa, mawi-a atandé Mémoriyal-la lanné sala, èk pou plizyè lanné apwé sa i té ka atandé Mémoriyal-la.

15. Lè nou ka envité moun Mémoriyal, kisa nou ni pou chonjé?

¹⁵ I bon pou chonjé, sé moun-lan nou envité-a pé mandé nou kwèstyon konsèné Mémoriyal-la, èspwèsman, si yo p’òkò atandé sé mitin nou-an. Konsa nou sa katjilé asou diféwan kwèstyon yo pé mandé, èk pwépawé pou wéponn sé kwèstyon sala. (Kòl. 4:6) Pou ègzanp, adan moun pé mandé: ‘Kisa ki ka pwan kou an Mémoriyal-la?’ ‘Pou ki mizi tan pwogwanm-lan ka diwé?’ ‘Ki mannyè mwen sipozé abiyé?’ ‘Ès mwen ni pou péyé pou atandé?’ ‘Ès zòt ka anmasé latjèt?’ Lè’w ka envité on moun ou sa annèk mandé yo, “Ès ou ni pyès kwèstyon konsèné Mémoriyal-la?” Èk la menm ou kay sa wéponn kwèstyon yo. Osi, ou sa sèvi sé vidiyo-a Chonjé Lanmò Jézi èk Kisa Ki Ka Pwan Kou An Sé Mitin Nou-an? pou édé moun-lan konpwann mannyè nou ka fè sé mitin-lan. Lison 28 an liv-la, Ou Sa Ni On Bon Lavi Pou Tout Tan! ni an chay bon pwen nou sa sèvi pou édé moun-lan.

16. Ki lòt kwèstyon moun ki atandé Mémoriyal-la pé mandé?

¹⁶ Apwé yo atandé Mémoriyal-la, moun ki antéwésé an lavéwité-a pé ni lòt kwèstyon. Pou ègzanp, lè’y vini pou pen-an épi diven-an, yo pé mandé pouki pyèsonn pa manjé pen-an èk bwè diven-an, ében pouki sé sèlman yonndé moun ki fè sa. Osi, yo pé mandé konmen fwa pa lanné nou ka òbzòvé Mémoriyal-la, ében si tout sé mitin nou-an ka fèt menm kon Mémoriyal-la. Èk menm si fwè-a ka kouvè adan sé pwen sala an diskou Mémoriyal-la, nou pé ni pou bay moun ki atandé Mémoriyal-la pou pwèmyé fwa-a pli enfòmasyon. Atik-la “Pouki Témwen Jéhova Pa Ka Tjenn Dènyé Wipa Senyè-a Menm Kon Lòt Wilizyon?” asou jw.org, sa édé nou wéponn adan sé kwèstyon-an moun pé mandé konsèné Mémoriyal-la. Konsa, annou fè tout sa nou pé avan, diwan, èk apwé Mémoriyal-la pou édé moun ki ni ‘bon dispozisyon’ twapé bennéfis an lokazyon spésyal sala.​—Twav. 13:48 NWT.

ÉDE FWÈ ÈK SÈ KI DOUBOUT ATANDÉ SÉ MITIN-LAN

17. Kisa sé ansyen-an sa fè pou édé sé fwè èk sè-a ki doubout atandé sé mitin-lan? (Izikèl 34:12, 16)

¹⁷ An sé simenn-lan avan èk apwé Mémoriyal-la, kisa sé ansyen-an sa fè pou édé sé fwè èk sè nou-an ki doubout atandé sé mitin-lan? Ében, sé ansyen-an ni pou moutwé sé fwè èk sè sala, yo vwéman mélé épi yo. (Li Izikèl 34:12, 16.) Konsa avan Mémoriyal-la, sé ansyen-an bizwen fè asiwé yo kwiyé ében vizité sé fwè èk sè sala, èk ba yo asiwans-lan ki, yo enmen yo an chay, èk yo vlé fè tout sa yo pé pou édé yo viwé jwenn Jéhova. Ansyen, envité sé fwè èk sè sala pou atandé Mémoriyal-la. Èk si yo atandé, byen vini yo épi bwa gwan ouvè. Nou enmen sé fwè èk sè sala an chay. Èk mizi kontan nou té kay kontan pou wè yo witounen an bwa Jéhova. Konsa ansyen, pa ladjé sé fwè èk sè sala apwé Mémoriyal-la. Kontiné kwiyé yo èk vizité yo pou ankouwajé yo. Èk ba yo èd-la yo bizwen pou viwé jwenn Jéhova.​—1 Pita 2:25.

18. Kisa nou tout sa fè pou édé sé fwè èk sè nou-an ki té doubout atandé sé mitin-lan? (Ronm 12:10)

¹⁸ Lè sé fwè èk sè nou-an ki té doubout atandé sé mitin-lan atandé Mémoriyal-la, nou tout sa édé yo. Kisa nou sa fè pou édé yo? Ében, nou sa byen vini yo èk twété yo épi lanmityé, jantiyès èk wèspé. (Li Ronm 12:10.) Chonjé, pitèt i pa té alèz pou yo vini mitin ankò. Wi, pitèt yo té pè nou pa té kay wisouvwè yo byen.e Konsa, nou ni pou fè asiwé nou fè sé fwè èk sè sala santi konfòtab. Èvèk sé pa pou nou mandé yo kwèstyon ki sa fè yo santi hont, ében di yo bagay pou blésé tjè yo. (1 Tèsa. 5:11) Chonjé yo sé fwè èk sè nou, èvèk nou ka chéwi yo an chay. Konsa, sé pa dé kontan nou kontan pou yo adowé Jéhova épi nou ankò!​—Sam 119:176; Twav. 20:35.

19. Ki bennéfis nou ka twapé lè nou òbzòvé Mémoriyal lanmò Jézi?

¹⁹ Nou kontan Jézi koumandé nou pou òbzòvé Mémoriyal lanmò’y chak lanné. Èvèk nou sav sa sé on bagay ki byen enpòtan. Paski lè nou atandé Mémoriyal-la nou ka twapé an chay bennéfis èk nou ka édé lézòt osi. (Izay. 48:17, 18) Pou ègzanp, lanmityé nou pou Jéhova épi Jézi ka vini pli fò. Nou ka moutwé apwésiasyon pou sa Jéhova épi Jézi ja fè ban nou. Nou ka vini pli pwé sé fwè èk sè nou-an. Èvèk nou sa édé lézòt moun apwann konsèné sé bennédiksyon-an yo sa wisouvwè gwanmèsi wanson-an. Konsa annou tout fè tout sa nou pé pou pwépawé pou Mémoriyal-la lanné sala—jou-a ki pli enpòtan an lanné-a!