“Mwen Pa Kay Janmen Tounen Do Mwen Anlè Zòt”!

1. Ki lè tout sé lèwèstan annonté-a kay alé an syèl?

PLIZYÈ lanné pasé pèp Jéhova té ka mandé: “Ki lè tout sé lèwèstan annonté-a kay alé an syèl?’ Sa sé paski a lè sala, nou té ka kwè ki, adan sé annonté-a té kay viv an Pawadi asou latè pou tjèk tan apwé ladjè Anmagèdonn. Kanmenm, Gad-la li 15 Jwiyèt, lanné dé mil twèz (2013), fè nou apwann ki, tout sé lèwèstan annonté-a ki asou latè-a kay alé an syèl avan ladjè Anmagèdonn koumansé.​—Maf. 24:31.

2. (a) Ki kèstyon adan Kwityen pé mandé? (b) Èk kisa nou kay konsidiwé an atik sala?

² Kanmenm, adan di nou pé mandé: Kisa ki kay wivé sé ‘lòt mouton-an’ ki kay asou latè diwan gwan twibilasyon-an? (Jan 10:16; Maf. 24:21) Adan fwè èk sè ki ni èspwa pou viv asou latè-a pé santi antjèt paski yo kwè apwé sé annonté-a alé an syèl, yo pa kay ni pyèsonn pou djidé yo èk pitèt yo pa kay sav sa pou fè. Alò, an atik sala, nou vlé diskité dé (2) wakont an Bib-la ki pé fè yo santi kon sa. Èk apwé nou kay diskité poutji nou pa ni pyès wézon pou santi antjèt.

SA KI PA KAY WIVÉ SÉ LÒT MOUTON-AN

3-4. Kisa an chay moun pé katjilé, èk pou ki wézon?

³ Adan moun pé katjilé, si sé lòt mouton-an kay doubout sèvi Jéhova lè Pwensipal Konmité-a pa asou latè-a pou djidé yo. Èben la ni sèten wakont Bib ki pé annékòz yo pou katjilé kon sa. Alò, annou konsidiwé dé (2) ègzanp. Pwèmyé ègzanp-lan ni pou fè épi Chèf Pwèt Djèhòyada, ki té fidèl pou Bondyé. Djèhòyada èk madanm li, Jéhochabiyaf, té pwotéjé on jenn gason yo ka kwiyé Jèhowach lè gwan manman’y té vlé tjwé’y. Osi, yo léve’y pou vini on bon wa ki fidèl. Tout tan Chèf Pwèt Djèhòyada té vivan Jèhowach té ka fè bon bagay, èk i té ka adowé Jéhova. Malèwèzman, apwé Chèf Pwèt Djèhòyada mò, Jèhowach koumansé fè sa ki mové. Wi, Bib-la di, i kouté mové pwens an Jouda èk i doubout sèvi Jéhova.​—2 Kw. 24:2, 15-19.

⁴ Lòt ègzanp-lan sé konsèné sé Kwityen-an an pwèmyé syèk-la. Sa sé Kwityen ki té ka viv apwé sé zapòt-la mò. Dènyé zapòt-la ki mò sété zapòt Jan, èk diwan tout lavi’y i té ka wédé on pil Kwityen wèsté fidèl pou Jéhova. (3 Jan 4) Menm kon sé lézòt zapòt Jézi-a, Jan té ka twavay wèd pou pwotéjé kongwigasyon-an hòd népòt moun ki té ka enstwi fo lésisyon èk pwatik. (1 Jan 2:18; 2 Tèsa. 2:7) Malèwèzman, apwé Jan mò, an chay Kwityen tounen apòsta. Èk wézilta di sa, sé apòsta sala té ka enstwi fo lésisyon, èk yo té ka soutiwè mové kondwit an tout sé kongwigasyon-an.

5. Kisa nou pa vlé kwè sé dé (2) wakont sala ka di konsèné sé lòt mouton-an?

⁵ Ès sé dé (2) wakont sala ka moutwé sé lòt mouton-an kay vini mové ében tounen apòsta apwé sé annonté-a alé an syèl? Awa! Sa pa kay janmen fèt! Anfen, nou sa ni asiwans-lan ki, lè sé annonté-a alé an syèl, sé lòt mouton-an kay wèsté fidèl pou Jéhova, èk Jéhova kay kontiné otjipé yo. Mé, poutji nou sa ni konfyans sala?

PÈP JÉHOVA KAY TOUJOU KONTINÉ ADOWÉ’Y AN MANNYÈ-A I VLÉ

6. Ki twa (3) diféwan tan nou kay diskité?

⁶ Alò, pouki nou sa ni konfyans-lan ki, nou kay toujou kontiné adowé Jéhova an mannyè-a i vlé, menm si bagay vini difisil an tan pou vini? Ében sa sé paski, Bib-la ka èspliké ki, tan-an nou ka viv adan-an, otan pli diféwan pasé tan nasyon Izwayèl, èk épi tan-an apwé sé zapòt-la mò. Konsa, annou ègzanminé sé twa diféwan tan sala: (1) tan nasyon Izwayèl, (2) tan-an apwé sé zapòt-la mò, èk (3) tan nou, sa vlé di “[tan-an] Bondyé [kay] fè tout bagay viwé nèf.”​—Twav. 3:21.

7. Pouki jan Izwayèl ki té fidèl, pa té pèd èspwa lè sé wa-a èk lòt jan Izwayèl koumansé fè bagay ki pa té bon?

⁷ Tan nasyon Izwayèl. Djòs avan Moziz mò, i di nasyon Izwayèl: ‘Mwen sav apwé mwen mò zòt kay fè movèsté, èk zòt kay doubout swiv chimen-an mwen té koumandé zòt pou swiv-la.’ (Dito. 31:29) Osi, Moziz té di yo, si nasyon Izwayèl wébèl kont Jéhova, Jéhova té kay voyé yo adan on lòt péyi. (Dito. 28:35, 36) Alò, ès sé pawòl sala té vin’ vwé? Wi. Pou plizyè san lanné, an chay an sé wa-a fè sa ki té mové an zyé Jéhova, èk nasyon-an koumansé swiv mové ègzanp yo. Èk a kòz di sa, Jéhova pini nasyon Izwayèl, èk i pa té kité pyès jan Izwayèl kondwi nasyon-an kon wa ankò. (Izik. 21:25-27) Konsa, lè pawòl Jéhova vini vwé, sa bay jan Izwayèl ki té fidèl pou li kouwaj-la pou kontiné sèvi’y.​—Izay. 55:10, 11.

8. Ès i sipozé sipwi nou sé kongwigasyon-an an dézyenm syèk-la pa té ka adowé Jéhova an mannyè-a i té vlé? Èk pouki?

⁸ Tan-an apwé sé zapòt-la mò. Ès i sipozé sipwi nou sé kongwigasyon-an an dézyenm syèk-la pa té ka adowé Jéhova an mannyè-a i té vlé? Awa. Èvèk sa sé paski Jézi té di, an chay moun té kay tounen apòsta. (Maf. 7:21-23; 13:24-30, 36-43) Osi, zapòt Pòl, Pita, èk Jan té di pwofèsi Jézi té ja ka fèt vwé an pwèmyé syèk-la. (2 Tèsa. 2:3, 7; 2 Pita 2:1; 1 Jan 2:18) Èk djòs apwé dènyé zapòt-la mò, sé Kwityen-an ki té tounen apòsta vini an pa an Gwan vil Babilonn-an, sa vlé di fo wilizyon. Konsa, sa Jézi té di té vwéman fèt.

9. Ki mannyè tan nou diféwan épi tan nasyon Izwayèl èk tan sé Kwityen-an an dézyenm syèk-la?

⁹ “[Tan-an] Bondyé [kay] fè tout bagay viwé nèf”. Bon. Kisa nou ka kwiyé tan-an nou ka viv adan-an? Ében, nou ka kwiyé tan sala, “dènyé tan-an”. Wi, sa sé dènyé tan sistèm sala. (2 Tim. 3:1) Mé Bib-la ka moutwé ki, la ni on lòt tan ki pli enpòtan èk pli lonng pasé “dènyé tan-an” ki koumansé menm lè-a “dènyé tan-an” koumansé. Kanmenm, tan sala diféwan hòd tan nasyon Izwayèl èk tan-an apwé sé zapòt-la mò. Mé, an ki mannyè i diféwan? Ében, sa sé paski tan sala, sé “[tan-an] Bondyé [kay] fè tout bagay viwé nèf.” (Twav. 3:21) Wi, tan sala kay kontiné jis lè tout moun vini pawfé, èk latè-a kay vini on Pawadi anba Wéyòm Bondyé. Èk, tan sala koumansé an lanné mil nèf san katòz (1914). Mé, kisa Bondyé té fè viwé nèf a lè sala? Ében, a lè sala Jézi vini Wa an syèl. Konsa Jéhova té ni on kondwitè, yon désandan Wa David pou wépwézanté’y ankò. Kanmenm, sé pa wéyòm-lan tousèl Jéhova té fè viwé nèf. Anfen, touswit apwé sa, Jéhova édé sèvant li asou latè-a pou adowé’y ankò an mannyè-a i vlé yo adowé’y. (Izay. 2:2-4; Izik. 11:17-20) Alò, ès pèp Jéhova kay kontiné adowé Jéhova an mannyè-a i vlé?

10. (a) Kisa Bib-la té di konsèné mannyè-a Jéhova vlé nou adowé’y jòdi? (Izaya 54:17) (b) Èk pouki sé pwofèsi sala ka konsolé nou?

¹⁰ Li Izaya 54:17. Katjilé asou pwofèsi sala: ‘Népòt fèman yo fè kont ou pa kay ni siksé’! Wi, sa Izaya 54:17 di ka fèt vwé jòdi jou. Osi sa Izaya 54:13, 14 di ka konsolé nou jòdi. Sé vèwsé sala di: ‘Sé Jéhova ki kay enstwi tout zanfan’w, èk zanfan’w kay viv an lapé. Ou kay byen établi, paski ou ka fè sa ki dwèt. . . . Ou pa kay pè anyen, èk anyen pa kay fè’w pè, paski anyen pa kay vini pwé’w.’ (Izay. 54:13, 14) Èk sa vwé, paski pa menm Satan “mèt latè sala”, ki sa doubout twavay-la nou ka fè pou enstwi moun konsèné Jéhova. (2 Kòr. 4:4) Konsa, moun kay toujou kontiné adowé Jéhova an mannyè-a i vlé, èk pyèsonn pa kay sa anpéché sa fèt. Wi, nou kay kontiné adowé Jéhova an mannyè-a i vlé pou tout tan! Èk sa sé paski, népòt fèman yo fè kont nou pa kay ni siksé!

KISA KI KAY FÈT?

11. Poutji nou ni konfyans Jéhova pa kay abandonnen pèp li lè sé lèwèstan annonté-a alé an syèl?

¹¹ Lè sé lèwèstan annonté-a alé an syèl kisa ki kay wivé pèp Bondyé ki asou latè-a? Pou wéponn kèstyon sala nou ni pou chonjé sé Jézi ki Bèwjé nou, èk sé li ki ka kondwi sé kongwigasyon-an. Anfen, Jézi menm di “sé an sèl Mèt ki ni, [èk] sa sé Mèsaya-a.” (Maf. 23:10) Konsa, kon Wa nou, Jézi kay toujou otjipé sé disip li-a. Èk paski Jézi kay toujou djidé pèp li, sé disip li-a ki kay asou latè-a pa ni pyès wézon pou santi pè. Sé vwé, nou pa konnèt tout sé détay-la konsèné mannyè Jézi kay diwèkté pèp li diwan tan sala. Mé annou konsidiwé déotwa ègzanp an Bib-la ki kay bati konfyans nou ki Jéhova pa kay janmen tounen do’y anlè nou.

12. (a) Ki mannyè Jéhova té otjipé pèp li apwé Moziz mò? (b) Ki mannyè Jéhova té otjipé pèp li apwé i té bay Ilaydja an lòt ansayman? (Gadé pòtwé-a osi.)

¹² Avan nasyon Izwayèl té antwé Tè Pwonmèt-la, Moziz mò. Lè sa fèt, ès Jéhova té doubout édé pèp li? Mé non! Anfen, tout tan yo té wèsté fidèl pou li, Jéhova kontiné otjipé yo. Osi, avan Moziz mò, Jéhova té di’y pou apwenté Jòchwa pou kondwi nasyon-an. Èk pou plizyè lanné Moziz té ka étwennen Jòchwa pou ansayman sala. (Ègz. 33:11; Dito. 34:9) An plis di sa, la té ni plizyè lòt nonm an nasyon Izwayèl ki té savan, èk ki té ni èspéyans. Alò Moziz té apwenté yo ‘chèf gwoup ki ni yon mil moun, chèf gwoup ki ni yon san moun, chèf gwoup ki ni senkant moun, [èk jis] chèf gwoup ki ni dis moun’. (Dito. 1:15) Konsa, menm si Moziz pa té la, Jéhova té byen otjipé pèp li. Mi an lòt ègzanp. Pwòfèt Ilaydja té twavay wèd pou an chay lanné pou édé jan Izwayèl an nòd-la pou adowé Jéhova. Kanmenm, pli ta Jéhova chanjé ansayman’y èk voyé’y édé jan Izwayèl an Jouda an soud-la. (2 Wa 2:1; 2 Kw. 21:12) Ès sa vlé di Jéhova té tounen do’y anlè sé dis bwanch lafanmi Izwayèl an nòd-la? Non, Jéhova pa té fè sa. Chonjé, Ilaydja té étwennen Ilaycha pou plizyè lanné. Èk apa di sa, ‘sé gason sé pwòfèt-la’ té wisivwè entwennman tou. (2 Wa 2:7) Alò, la té ni asé nonm pou djidé èk wédé pèp Bondyé. Konsa, divwa Jéhova té ka kontiné fèt èk Jéhova kontiné otjipé pèp li.

13. An dènyé pòsyon-an an Hibrou 13:5, kisa Jéhova ka pwonmèt nou? (Gadé pòtwé-a osi.)

¹³ Lè nou katjilé asou sé dé (2) ègzanp-lan nou mansyonnen-an, kisa ou kwè ki kay fèt lè sé lèwèstan annonté-a alé an syèl? Ében nou pa ni pou twakasé lidé nou, paski Bib-la ka di nou Jéhova pa kay janmen tounen do’y asou pèp li ki kay asou latè-a. (Li Hibrou 13:5 dènyé pòsyon-an.) Wi, menm kon Moziz èk Ilaydja, Pwensipal Konmité-a ka byen kopwann enpòtans-lan pou étwennen lézòt. Anfen pou plizyè lanné, Pwensipal Konmité-a ka étwennen fwè anpami sé lòt mouton-an pou pwan ka pèp Bondyé. Pou ègzanp, yo ja ògannizé plizyè lékòl pou étwennen sé ansyen-an ki an sé kongwigasyon-an, sé ansyen-an pou sé sékyout-la, sé fwè-a ki asou sé Konmité Bwanch-la, sé ansyen-an ki ka pwan douvan an Bèfèl èk lézòt fwè. Osi, Pwensipal Konmité-a ka étwennen sé fwè-a ki ka asisté sé diféwan konmité-a ki anba Pwensipal Konmité-a. Apwézan sé fwè sala ka pòté an chay wèskonsabilité. Alò yo byen pwépawé pou kontiné otjipé pèp Bondyé apwé sé lèwèstan annonté-a alé an syèl.

14. Kisa nou vlé chonjé?

¹⁴ Bon. Mi bagay-la nou vlé chonjé-a: Lè sé lèwèstan annonté-a alé an syèl bò bout gwan twibilasyon-an, pèp Jéhova asou latè-a kay wèsté fidèl. Wi, gwan mèsi diwèksyon Jézi yo kay kontiné adowé Jéhova. Osi a lè sala, yon gwoup nasyon Bib-la ka kwiyé Gòg ki sòti péyi Magòg kay ataké pèp Bondyé. (Izik. 38:18-20) Èk yo kay éséyé anpéché nou adowé Jéhova. Kanmenm yo pa kay éwisi paski Jéhova kay pwotéjé pèp li! Nou sav sa paski Bondyé té bay zapòt Jan an vizyon koté i wè an “gwan popilas moun” ki “pasé anba gwo soufwans-lan”. (Wév. 7:9, 14) Wi, Jéhova kay tjenn pèp li sòv. Alò, sa ka moutwé a klè Jéhova kay pwotéjé pèp li!

15-16. Silon Wévélasyon 17:14, kisa sé annonté-a kay fè diwan ladjè Anmagèdonn, èk pouki sa ka ankouwajé nou?

¹⁵ Mé kisa sé moun-lan ki annonté-a kay fè lè yo alé an syèl? Ében, Bib-la ka ban nou wépons-lan an Wévélasyon 17:14 (Li’y). Lévanjil sala di, sé gouvèdman latè-a “kay fè ladjè kont Ti Mouton Bondyé-a”. Ès sé gouvèdman-an kay pèd ladjè-a? Wi, yo oblijé pèd! Paski lévanjil-la di: “Ti Mouton-an . . . kay genyen yo.” Èk ki moun ki kay édé Ti Mouton-an? Ében lévanjil-la osi di, sé moun-lan i té “kwiyé”, “chwazi”, èk “ki toujou ka kwè an li” kay édé Ti Mouton-an. Alò, ki moun sé moun sala yé? Ében, sé moun sala sé tout annonté-a an syèl! Wi, djòs avan bout gwan twibilasyon-an, sé lèwèstan annonté-a ki asou latè-a kay alé an syèl. Èk yonn an sé pwèmyé ansayman-an yo kay ni, sé pou goumen. Wi, sa sé vwéman on bèl ansayman! Anfen, avan adan di yo té vini Témwen Jéhova yo té ka toujou goumen, èk adan di yo té jis sòlda. Mé lè yo vini Témwen Jéhova yo apwann mannyè pou viv an lapé épi lézòt. (Gal. 5:22; 2 Tèsa. 3:16) Konsa yo doubout sipòté ladjè. Mé kanmenm, lè yo alé an syèl, yo kay goumen kont lèlmi Bondyé ansanm épi Jézi èk sé nanj-lan.

¹⁶ Katjilé asou sa! Apwézan, adan sé fwè-a ki ka alé an syèl an laj, èk yo pa fò ankò. Mé, lè yo alé an syèl, yo kay ni an chay fòs, èk yo pa kay janmen mò. Wi, yo kay goumen an ladjè Anmagèdonn ansanm épi Wa yo, Jézi Kwi. Osi, apwé ladjè Anmagèdonn, yo kay twavay épi Jézi pou édé lézòm vini pawfé. Anfen, yo kay sa édé sé fwè èk sè yo-a pli lè yo an syèl, pasé lè yo té asou latè-a.

17. Koumannyè nou sav tout sèvant Jéhova kay sòv diwan ladjè Anmagèdonn?

¹⁷ Ès ou ni èspwa pou viv asou latè-a? Bon, si sa sé èspwa’w, kisa ou ni pou fè lè ladjè Anmagèdonn koumansé? Ében, sa’w ni pou fè sé sa: ‘Konfyé Jéhova èk swiv diwèksyon’y.’ Ki diwèksyon nou pé twapé? Ében nou pé twapé diwèksyon-an ki an Izaya 26:20. La i di: ‘Antwé andidan chanm ou, épi fenmen lapòt-la dèyè’w. Séwé kò’w pou an ti mouman, jistan kòlè-a pasé.’ Wi, tout sèvant Jéhova, ni an syèl ni asou latè-a, kay sòv diwan ladjè Anmagèdonn. Bon. Menm kon zapòt Pòl, nou ni konfyans-lan ki, népòt “bagay ki ka fèt apwézan ében sa ki kay fèt pli ta, ni pouvwa, ni syèl-la ki anho-a ében sa ki anba-a, . . . pa kay sa janmen tiwé nou an lanmityé-a Bondyé sèvi Jézi Kwi Senyè nou pou ban nou-an.” (Ronm 8:38, 39) Èk toujou chonjé: ‘Jéhova enmen’w, èk i pa kay janmen abandonnen’w’!