Lanmityé Ka Pousé Nou Pou Kontiné Pwéché!

1. An mitin spésyal-la pou lanné dé mil venntwa (2023), kisa nou apwann?

PWENSIPAL konmité-a ka tjenn on mitin spésyal toulé lanné. An mitin spésyal-la pou lanné dé mil venntwa (2023) a, nou wisivwè on pli mèyè lakopwann asou adan sé bagay-la nou ka kwè adan. Osi, nou té wisivwè déotwa anonsman ki té byen èksité lè i vini pou minis nou. Pou ègzanp, nou apwann moun pé ni òpòtyounité-a pou aksèpté lavéwité-a èk vini adowé Jéhova ansanm épi pèp li apwé yo détwi gwan vil Babilonn-an. Nou osi apwann, koumansé mwa Novanm lanné dé mil venntwa (2023), si nou pa ka wann sèvis an plen, nou pa bizwen bay on wakont pou tout sa nou fè an minis-la. Bon. Ès sé chanjman sala vlé di, minis nou pa enpòtan ankò? Awa, janmen!

2. Pouki twavay pwèchman-an ka vini pli enpòtan jou apwé jou? (Mak 13:10)

² Chak jou ki pasé, twavay pwèchman-an ka vini pli enpòtan. Pouki nou ka di sa? Sé paski nou pa ni djè tan ankò avan bout-la wivé. Konsidiwé sa Jézi té di konsèné twavay pwèchman-an an dènyé tan-an. (Li Mak 13:10, Maf. 24:14.) Èspwèsyon-an, “bout-la”, vlé di Jéhova kay mennen an bout pou tout vyé sistèm Satan. Èk i ja désidé “jou-a èk nèditan-an” i kay fè sa. (Maf. 24:36; 25:13; Twav. 1:7) Chak jou ki pasé ka mennen nou pli pwé jou sala. (Ronm 13:11) Konsa, paditan nou ka èspéwé jou sala, annou kontiné pwéché.

3. Kisa ki ka pousé nou pou ay pwéché?

³ Mi on kèstyon ki enpòtan nou tout vlé katjilé asou. Kèstyon-an sé: Pouki nou ka pwéché bon nouvèl-la? Wépons-lan sé: paski nou enmen bon nouvèl-la, nou enmen moun, èk pli enpòtan toujou, nou enmen Jéhova épi non’y. Annou konsidiwé chak an sé wézon sala.

NOU KA PWÉCHÉ PASKI NOU ENMEN BON NOUVÈL-LA

4. Ki mannyè nou ka santi lè nou twapé bon nouvèl?

⁴ Ès ou ka chonjé kouman ou té santi, lè’w té twapé on bon nouvèl? Pitèt on moun an fanmi’w té fè on bébé, ében on moun té ba’w on twavay ou té byen bizwen. Ou pitèt té si tèlman kontan, ou pa té sa èspéwé pou di fanmi’w èben jan’w konsèné bon nouvèl sala. Ès sé kon sa ou té santi lè ou té tann bon nouvèl-la konsèné wéyòm Bondyé—pli bon nouvèl-la on moun sa janmen tan an lavi’y?

5. Ki mannyè ou té santi lè ou vini apwann lavéwité-a ki an Pawòl Bondyé? (Gadé sé pòtwé-a osi.)

⁵ Pou on ti moman, katjilé asou mannyè-a ou té ka santi lè ou vini apwann lavéwité-a an Pawòl Bondyé. San dout, i té touché tjè’w lè ou vini apwann Papa nou Jéhova enmen’w anpil, épi i vlé’w vini an manm an fanmi’y ki ka adowé’y. Épi lè ou vini apwann i fè on pwonmèt pou mété on bout pou soufwans èk penn, èk i ba’w èspwa pou wè moun ou enmen ki mò wésisité adan on latè nèf, sa té fè zyé’w kléwé èk ba’w tjè kontan. (Louk 24:32) Èk sé pa sa tousèl, ou vini apwann lòt bagay Bondyé pwonmèt pou fè! (Mak 10:29, 30; Jan 5:28, 29; Ronm 8:38, 39; Wév. 21:3, 4) Kon ou vini enmen sa ou té ka apwann-lan, ou té santi, ou pa té sa tjenn sé lavéwité sala pou kò’w. Ou oblijé té ni pou di lézòt!​—Gadé Jérémaya 20:9.

6. Kisa Ernest èk Rose té fè paski yo enmen konmisyon Wéyòm-lan?

⁶ Annou konsidiwé èspéyans yon fwè, non’y sé Ernestb. Lè i té bò dis nanné, papa’y mò. Ernest di: “Mwen té ka katjilé: ‘Ès i an syèl? Ès i té mò pou tout tan?’ Mwen té ka jalou manmay ki té ni papa yo toujou.” Ernest té ka alé bò senmityè-a wéglé. I té ka ajounou bò tonm papa’y, épi i té ka pwédyé: “Bondyé, mwen vlé sav koté papa mwen yé souplé.” Apipwé disèt (17) lanné apwé lanmò papa’y, Tèmwen Jéhova ofè’y on létid Bib, épi i aksèpté’y. Ernest té byen kontan pou apwann, moun ki mò pa konnèt anyen ankò, sé konmsi yo ofon sonmèy. I té byen kontan pou apwann osi, Bib-la pwonmèt la kay ni on wézèwèksyon. (Éklé. 9:5, 10; Twav. 24:15) Alafen défen, i twapé wépons pou sé kèstyon-an i té ni-an pou an chay tan. Konsa, Ernest té byen kontan épi sa i té ka apwann an Bib-la. Madanm li, Rose, té ka étidyé Bib-la ansanm épi’y, épi menm kon mawi’y Ernest, Rose té enmen konmisyon Wéyòm-lan. An lanné mil nèf swasant dizwit, (1978), yo toulédé batizé. Yo té ka palé bay fanmi yo, jan yo, èk tout lòt moun yo té ni chans-lan pou palé épi, pou di yo konsèné lavéwité-a. Annékòz di éfò yo, Ernest èk Rose ja édé plis pasé swasant dis (70) moun vini konnèt Jéhova èk batizé.

7. Lè nou enmen sa nou ka apwann an Bib-la, kisa nou kay fè? (Louk 6:45)

⁷ I byen a klè, lè nou enmen sa nou ka apwann an Bib-la, nou ka di tout moun konsèné’y. (Li Louk 6:45.) Nou ka santi menm kon sé disip Jézi-a an pwenmyé syèk-la ki di an Twavay 4:20: “Nou pa sa doubout palé sé bagay sala nou wè èk tann-an.” Anvéwité, nou enmen lavéwité-a si tèlman, nou vlé patajé’y épi tout moun.

NOU KA PWÉCHÉ PASKI NOU ENMEN MOUN

8. Pouki nou ka fè tout sa nou pé pou di moun konsèné bon nouvèl-la? (Osi, gadé enfòmasyon-an anba sijé-a: “Enmen Moun—Èk Édé Yo Vini Disip Jézi.”) (Gadé pòtwé-a osi.)

⁸ Menm kon Jéhova, èk gason’y Jézi, nou enmen moun. (Pwov. 8:31; Jan 3:16) Nou ni konpasyon pou sé sa ki ka viv “san Bondyé” épi “san èspwa”. (Èfés. 2:12) Jòdi jou, moun ni tèlman pwòblenm. Yo ka santi akonmsi yo adan on gwo tou ki byen fon, èk yo pa sa sòti. Sa yo bizwen, sé an kòd pou édé yo sòti an tou sala. Bon. Nou ni kòd-la ki sa édé yo sòti an tou-a. Èk sa sé Bon Nouvèl Wéyòm Bondyé. Alò, paski nou enmen yo, èk nou ni tèlman konpasyon pou yo, nou vlé fè tout sa nou pé pou di yo konsèné Bon Nouvèl-la. Nouvèl sala ni an chay valè. I ka ba yo èspwa, édé yo pou ni an pli mèyè lavi ki posib apwézan, èk an tan pou vini lavi étonnèl an latè nèf-la. Épi sé sa ki “vwéman lavi”! ​—1 Tim. 6:19.

9. Kisa nou ka di moun ki kay fèt touswit? Èk pouki? (Izikèl 33:7, 8)

⁹ Paski nou enmen moun, nou ni an chay konpasyon pou yo. Nou ni konpasyon pou manm fanmi nou ki pa ka sèvi Jéhova, pwochen nou, èk osi moun nou pa konnèt. Èk sa ka pousé nou pou di yo, bout sistèm sala tou pwé. (Li Izikèl 33:7, 8.) An chay moun ka viv lavi yo sa yo sav sa ki ka vini. Mafyou 24:21 ka di nou on tan ka vini, èk “tan sala kay pli mové pasé pyès lézòt tan ki ja janmen ni, dépi an koumansman latè-a pou jis atjwèlman, ni la pa kay janmen ni on tan ki mové kon sa ankò.” Konsa, nou vlé moun sav kisa ki kay fèt diwan tan jijman sala. Bon. Pwenmyé bagay ki kay fèt sé fò wilizyon kay détwi. Èk apwé sa, tout vyé sistèm Satan kay détwi an Anmagèdonn. (Wév. 16:14, 16; 17:16, 17; 19:11, 19, 20) Alò, lapwiyè nou sé sa, pou tout moun kouté sa nou ka di yo èk vini adowé Jéhova épi nou. Kanmenm, nou sav sé pa tout moun ki kay kouté sa nou ka di yo apwézan-an. Mé kèstyon sé sa: kisa ki pé wivé sé moun-lan ki pa ka kouté nou apwézan-an?

10. Pouki i enpòtan pou nou kontiné ka di moun konsèné sa ki kay fèt touswit?

¹⁰ Kon nou té èspliké an atik-la avan sala, Jéhova pé sové moun ki koumansé mété lafwa an li lè yo wè gwan vil Babilonn-an détwi. Épi si sé sa, i byen enpòtan pou nou kontiné vèti yo konsèné déstwiksyon sala apwézan. Tjenn an lidé, sa nou di yo apwézan pé wèsté an lidé yo. (Gadé Izikèl 33:33.) Pitèt yo kay chonjé sa nou té di yo, épi a lè sala, yo pé pawé pou adowé Jéhova ansanm épi nou avan i twò ta. Konsa, menm kon chèf pwizon-an an Filipay ki té mété lafwa an Bondyé sèlman apwé gwo twanblanntè-a té fèt, adan moun jòdi jou menm mannyè-a. (Twav. 16:25-34) Yo pa ka kouté Bon Nouvèl-la, mé pitèt apwé yo wè gwan vil Babilonn-an détwi, yo kay koumansé mété lafwa an Bondyé.

NOU KA PWÉCHÉ PASKI NOU ENMEN JÉHOVA ÉPI NON’Y

11. Ki mannyè nou sa onnowé èk glowifyé Jéhova? (Wévélasyon 4:11) (Gadé sé pòtwé-a osi.)

¹¹ Pli gwo wézon-an nou ka pwéché, sé paski nou enmen Jéhova èk non’y. Konsa, nou tout ka dakò épi sa Wévélasyon 4:11 ka di. (Li’y) Bon. Yon mannyè nou ka onnowé èk glowifyé Jéhova, sé lè nou patajé Bon Nouvèl-la épi lézòt. Nou ka fè yo sav, sé Bondyé ki “fè tout bagay” èk nou vivan paski sé li ki ban nou lavi. Wi, nou ka onnowé Jéhova lè nou sèvi tan nou, fòs nou, èk sa nou ni, silon sitiwasyon nou, pou sipòté twavay pwèchman-an. (Maf. 6:33; Louk 13:24; Kòl. 3:23) Anfen, pou mété’y senp, nou enmen Bondyé èk nou enmen palé konsèné’y. Wi, nou enmen palé konsèné non Bondyé èk ki moun i yé. Mé pouki?

12. Kisa nou ka fè pou moutwé nou ka pòté non Jéhova wèspé?

¹² Nou enmen Jéhova. Konsa, nou ka pòté non’y wèspé. (Maf. 6:9) Lanmityé-a nou ni pou li ka pousé nou pou di moun Satan sé on mantè, épi tout sa i ka di asou Jéhova sé on mansonj. (Jen. 3:1-5; Jòb 2:4; Jan 8:44) Dézi nou, sé pou di tout moun ki kay kouté ki moun Jéhova yé èk sa ki vwéman kawaktè’y. Konsa, lè nou ka pwéché, nou vlé fè défans Jéhova, pou di tout moun lavéwité-a konsèné’y. Épi nou vlé moun sav, pli bèl kawaktè Jéhova sé lanmityé; épi mannyè-a i ka kondwi jis èk dwèt. Nou vlé yo sav osi, touswit wéyòm li kay mété on bout pou tout soufwans; èk moun kay pwan plézi an kantité lapé-a yo kay ni-a. (Sam 37:10, 11, 29; 1 Jan 4:8) Lè nou di sé bèl bagay sala konsèné Jéhova, nou ka ba’y lonnè èk wèspé. Èk kon Tèmwen Jéhova, nou vwéman ni tjè kontan pou sav nou pa ka dézapwenté’y kon i ka sèvi nou kon tèmwen’y.

13. Pouki nou ka santi i sé on lonnè pou nou sé Témwen Jéhova? (Izaya 43:10-12)

¹³ Li Izaya 43:10-12. Wi, Jéhova ja chwézi nou pou vini ‘témwen’y’. Détwa lanné ki pasé, Pwensipal Konmité-a té di andan on lèt: “Pli gwo lonnè-a népòt di nou sa ni, sé pou moun kwiyé nou on Tèmwen Jéhova.”c Pouki i sé pli gwo lonnè-a? Èben, ann di ou ni pou alé lodyans, èk ou bizwen on moun pou di jij-la ki kalité moun ou yé. Ès ou pa té kay chwézi on moun ou byen konnèt èk ki ni on bon wépitasyon? Absoliman! Èben, an menm mannyè-a, Jéhova chwézi nou pou vini témwen’y paski i byen konnèt nou, èk i ka konfyé nou pou di moun sé li yonn ki Dyé lavéwité-a. Bon. Sa ka fè nou santi i sé on lonnè pou vini témwen’y. Konsa, nou ka pwan tout òpòtyounité nou jwenn, pou di moun konsèné non Bondyé èk lavéwité-a konsèné’y. Lè nou fè sa, nou ka moutwé nou vwéman sé Tèmwen Jéhova!​—Sam 83:18; Ronm 10:13-15.

NOU KAY KONTINÉ PWÉCHÉ POU JIS LÈ BOUT-LA WIVÉ

14. Kisa ki kay fèt paski Jéhova ka benni twavay pwèchman-an?

¹⁴ Konsa, kon Témwen Jéhova, nou kay kontiné pwéché bon nouvèl-la jis lè bout-la wivé. Nou sav, gwan twibilasyon-an kay tan-an ki kay pli difisil pasé pyès lòt tan moun ja janmen wè. Mé nou asiwé, Jéhova ka benni twavay pwèchman-an, èk la kay ni moun ki kay aksèpté lavéwité-a avan gwan twibilasyon-an koumansé. Épi, nou byen èksité pou konnèt ki diwan gwan twibilasyon-an, la pé ni pli moun toujou ki kay tounen do yo asou latè Satan èk vini adowé Jéhova épi nou!​—Twav. 13:48.

15-16. Kisa nou ditèminé pou fè èk kilè nou kay doubout fè’y?

¹⁵ Konsa fwè èk sè, nou ni twavay pou fè. Èk twavay sala byen enpòtan, épi i sé on gwan pwivilaj paski twavay sala pa kay janmen fèt ankò. Konsa, sé pou nou kontiné pwéché bon nouvèl-la konsèné Wéyòm Bondyé an tout latè-a. Épi an menm di tan, nou vlé kontiné di moun vyé sistèm sala pa ni djè tan ankò, i kay bout touswit. Èk lè tan jijman-an wivé, moun kay sav sé Jéhova ki té ban nou konmisyon-an nou té ka pwéché-a.​—Izik. 38:23.

¹⁶ Alò, kisa nou ditèminé pou fè? Èben, nou ditèminé pou kontiné pwéché bon nouvèl-la épi tout tjè nou. Épi nou pa kay fè dèyè lè nou ni pou alé pwéché. Nou pa kay doubout tout tan Jéhova pa di i lè pou doubout. Wi, nou zélé paski nou enmen bon nouvèl-la, nou enmen moun, èk anho tout bagay, nou enmen Jéhova èk non’y!