Mannyè Ou Sa Tjenn Djèwté’w Lè’w Ka Gadé Apwé An Moun Ki An Laj Èben Ki Malad

1-2. Si’w ka gadé apwé an moun ki an laj èben ki malad, ki mannyè Jéhova ka santi konsèné’w? (Pwovèb 19:17) (Gadé sé pòtwé-a osi.)

YON fwè ki sòti Korea, non’y sé Jinoua di: “Mwen èk madanm mwen ha mayé pou plis pasé twant dé «32» lanné. Mé pou senk «5» lanné madanm mwen si tèlman malad, i bizwen èd mwen. I ni an mové maladi ki ka fè’y difisil pou’y maché èben fè bagay pou kò’y. Wi, mwen vwéman enmen madanm mwen, èk mwen kontan pou gadé apwé’y. Pou ègzanp, toulé swè i ni pou dòmi asou an kouch spésyal. Mwen ka dòmi pwé’y, èk nou ka tjébé lanmen yonn a lòt kon nou ka dòmi.”

² Bon, pitèt ou osi ka gadé apwé an moun ou enmen, tèl kon pawan’w, mawi’w èben madanm ou, manmay ou, èben an bon jan. San dout, ou kontan pou gadé apwé yo, paski ou enmen yo. Èk ou ka osi fè sa paski ou enmen Jéhova. (1 Tim. 5:4, 8; Jémz 1:27) Kanmenm, i pa ézé pou gadé apwé an moun, èk délè ou ka èspéyansé difikilté lézòt pa konnèt. Èk ou pé jis santi pyèsonn pa sa konpwann soufwans ou. Sé vwé, moun ka wè’w ka souwi, mé yo pa ka wè lè’w ka pléwé. (Sam 6:6) Mé magwé lézòt pa konnèt mannyè ou ka santi, toujou chonjé, Jéhova konnèt èk i ka konpwann santiman’w. (Gadé Ègzodòs 3:7.) Anfen, lam dlo zyé’w, èk sé sakwifis-la ou ka fè ni an chay valè pou li. (Sam 56:8; 126:5) Èk Jéhova di, lè’w ka gadé apwé moun ou enmen, sé konmsi ou ka fè’y an favè. Wi, i kay wékonpansé’w pou tout sa ou ka fè.​—Li Pwovèb 19:17.

3. Pouki i pitèt té difisil pou Abrahanm èk Sara gadé apwé Tira?

³ La ni an chay moun an Bib-la ki té ni pou gadé apwé an lòt moun ki té an laj, èben ki té malad. Pou ègzanp, katjilé asou Abrahanm èk Sara. Lè Abrahanm èk Sara té kité vil Ou, papa yo, Tira, té ni apipwé dé san «200» lanné. Mé magwé i té tèlman vyé, i alé épi yo. Wi, yo té ni pou voyajé apipwé sis san «600» lyé pou wivé vil Harann. Èk sa té pwan yo plizyè simenn. (Jen. 11:31, 32) San dout Abrahanm èk Sara té enmen Tira, mé nou sav i pa té ézé pou yo gadé apwé’y kon yo té ka voyajé. Chonjé, yo pa té ni motoka an tan sala, sé asou kanmèl èk bouwik yo té ka voyajé. Konsa i pa té ézé pou Tira mouté désann sé zannimo sala, èk pou voyajé asou yo pou plizyè simenn. Pitèt délè Abrahanm èk Sara té ka byen las. Mé Jéhova té ka ba yo fòs-la yo té bouzwen. Èvèk menm kon Jéhova té édé Abrahanm èk Sara, i kay ba’w fòs-la ou bizwen pou ou sa kontiné gadé apwé moun-lan ou enmen.​—Sam 55:22.

4. Kisa nou kay diskité an atik sala?

⁴ Bon, i kay pli ézé pou kontiné gadé apwé an moun ki an laj èben ki malad, si’w tjenn djèwté’w. (Pwov. 15:13) Èvèk ou sa tjenn djèwté’w, menm si lavi difisil. (Jémz 1:2, 3) Mé kisa ou ni pou fè pou’w sa kontiné ni tjè kontan? Èben ou sa pwédyé bay Jéhova èk mandé’y pou édé’w ni djèwté. Bon, an atik sala nou kay diskité lòt bagay ou sa fè pou’w sa tjenn djèwté’w. Nou kay osi wè sa lézòt sa fè pou édé’w. Mé pwèmyéman, annou wè pouki ou ni pou tjenn djèwté’w lè’w ka gadé apwé an moun ki an laj èben ki malad. Èvèk nou kay osi wè sé bagay-la ki sa fè’w pèd djèwté’w.

KISA KI SA FÈ’W PÈD DJÈWTÉ’W LÈ’W KA GADÉ APWÉ AN MOUN KI AN LAJ ÈBEN KI MALAD

5. Pouki i enpòtan pou ou tjenn djèwté’w, lè’w ka gadé apwé an moun ki an laj ében ki malad?

⁵ Bon, si’w pèd djèwté’w, sa pé annékòz ou pou pèd fòs-la ou bouzwen pou byen gadé apwé moun-lan. (Pwov. 24:10) Èk lè’w pèd fòs ou, sa sa anpéché’w moutwé moun-lan jantiyès èben édé’y mannyè-a ou vlé. Alò, kisa ki sa fè’w pèd djèwté’w lè’w ka gadé apwé an moun ki an laj ében ki malad?

6. Pouki adan moun ka vini byen las lè yo ka gadé apwé moun ki an laj èben ki malad?

⁶ Bon, ou sa vini byen las lè’w ka gadé apwé an moun ki an laj èben ki malad. Pou ègzanp, yon sésé, non’y sé Leah di: “Menm si tout bagay alé byen pou jounen-an, an bout jounen-an mwen ni an chay strès, èk mwen ka pèd tout kouway mwen. Délè mwen pa menm ni asé fòs pou wéponn yon tèks.” Bon, pitèt ou pa ka ni asé tan pou pozé. Pou ègzanp yon sésé, non’y sé Inés di: “Mwen pa ka dòmi asé, paski mwen ni pou lévé plizyè fwa pou swè-a pou gadé apwé bèlmè mwen. Anfen, sé plizyè lanné dépi mwen èk mawi mwen p’òkò pwan an vakans.” Wi, menm kon sésé sala, pitèt ou pa sa menm pasé tan épi fwè èk sè an kongwigasyon-an, èben fè sèten bagay an sèvis Jéhova, paski ou ka gadé apwé an moun ou enmen. Èvèk a kòz di sa, ou ka santi byen twis, paski lavi’w ha chanjé si tèlman.

7. Pouki adan moun ka santi koupab èben twis, lè yo ka gadé apwé an moun yo enmen?

⁷ Ou sa santi byen twis èben koupab, lè’w ka gadé apwé an moun ou enmen. Èvèk sa sé paski ou pé kwè ou pa ka fè asé pou édé moun-lan, ében paski ou ka wè mannyè maladi-a ka afèkté moun-lan. Pou ègzanp, yon sésé, non’y sé Jessica di: “Byen souvan mwen ka santi mwen ni pou fè pli pou édé papa mwen, èk lè mwen pwan an ti pòz, mwen ka santi koupab, paski mwen ka kwè mwen ka gadé pou kò mwen tousèl.” Bon, pitèt menm kon Jessica ou ka santi ou pa ka fè asé pou édé moun-lan. Èk délè pitèt ou ka santi ou pa sa kontiné gadé apwé’y. Ében délè, lè’w las pitèt ou ka di ében fè bagay ki pa janti. Èk tout sé bagay sala sa fè’w santi koupab. (Jémz 3:2) Èvèk osi, lè’w wè moun-lan ou enmen-an ka vini pli malad, sa ka kasé tjè’w. Yon sésé, non’y sé Barbara di: “I ka kasé tjè mwen, paski jou apwé jou mwen ka wè jan mwen ka vini pli malad.”

8. Ki mannyè moun ka santi, lè moun-lan yo ka otjipé-a di yo, yo ka apwésyé sa yo ka fè ba yo? Ba yon ègzanp.

⁸ Pitèt ou ka santi moun-lan ou ka otjipé-a pa ka apwésyé sa ou ka fè ba li. Bon, kisa ki sa fè’w santi kon sa? Ében pitèt sa sé paski, moun-lan pa ka wimèsyé’w èben aplodi’w pou sa ou ka fè ba li. Wi, lè an moun wimèsyé’w pou sa ou ka fè, sa ka ankouwajé’w. (1 Tèsa. 5:18) Yon sésé, non’y sé Melissa, di: “Délè mwen ka santi si tèlman las èk dékouwajé, mwen ka jis pléwé. Mé lè moun-lan mwen ka gadé apwé-a di, ‘mèsi an pil pou tout sa ou ka fè ban mwen’, sa ka fè mwen santi pli mèyè. Èk sa ka pousé mwen pou kontiné édé’y.” Èvèk yon fwè yo ka kwiyé Paulb di: “Mwen èk madanm mwen ka gadé apwé nyès nou ki byen malad. Bon, magwé nyès nou pa ka konpwann tout sa nou ka fè pou otjipé’y, nou ka ni tjè kontan lè’y ka wimèsyé nou, èk lè’y ka di nou i enmen nou.”

SA OU SA FÈ POU TJENN DJÈWTÉ’W

9. Kisa ki kay édé an moun konnèt sa’y sa fè, le’y ka gadé apwé an moun ki an laj èben ki malad?

⁹ Konnèt sa ou sa fè èk sa ou pa sa fè. (Pwov. 11:2) Bon. Nou pyès pa ni tout tan-an èben tout kouway-la pou fè tout sa nou vlé. Konsa nou ni pou désidé sa nou sa fè. Èk délè sa vlé di nou pa kay sa fè sa lézòt moun vlé nou fè. Èk lè sa fèt, nou pa ni pou santi koupab, paski sa ka moutwé nou konnèt diféwans-lan ant sa nou sa fè èk sa nou pa sa fè. Osi lè lézòt moun vlé édé’w, moutwé apwésiyasyon èk kité yo édé’w. Pou ègzanp, yon fwè, non’y sé Jay di: “Ou sa sèlman fè sèten bagay épi tan-an èk kouway-la ou ni pou jounen-an. Konsa si’w vlé tjenn djèwté’w, pa éséyé fè pli pasé ou sa fè.”

10. Lè’w ka gadé apwé an moun ou enmen, kisa i enpòtan pou’w konpwann? (Pwovèb 19:11)

¹⁰ Apwann pouki moun-lan ka fè èben di sèten bagay. (Li Pwovèb 19:11.) Wi, si’w ni bon lakopwann, ou sa wèsté kam lè moun-lan ou enmen-an di èben fè bagay ki pa janti. Osi bon lakopwann kay édé’w wéyalizé adan maladi ka fè moun di èben fè sèten bagay ki pa bon. (Éklé. 7:7) Pou ègzanp, pitèt moun-lan té janti, mé apwézan i enmen babyé, kwititjé, èk i ka vin faché vit. Konsa, i kay bon pou apwann pli konsèné maladi-a, paski sa kay édé’w konpwann pouki i ka di èben fè sèten bagay.​—Pwov. 14:29.

11. Si’w ka gadé apwé an moun ou enmen, kisa i enpòtan pou’w fè touléjou? (Sam 132:4, 5)

¹¹ Fè tan pou fòtifyé wilasyon’w épi Jéhova. Bon. Sa vlé di ou pé ni pou pasé mwens tan asou sèten bagay, pou ou sa ni asé tan pou fè bagay ki pli enpòtan. (Filip. 1:10) Èk yonn an sé bagay-la ki pli enpòtan sé pou’w kontiné vansé pwé Jéhova. Pou ègzanp, Wa David té ni an chay bagay pou fè, mé bagay-la ki té pli enpòtan pou li sété pou adowé Jéhova. (Li Sam 132:4, 5.) Bon. Menm kon Wa David, menm si ou ni an chay bagay pou fè, ou ni pou fè tan pou li Bib-la èk pou pwédyé touléjou. Yon sésé, non’y sé Elisha di: “Mwen ka pwédyé bay Jéhova, li sé Samz-la, èk mèdité asou sa mwen ka li. Èk sa ka fè mwen santi kam, èk i ka ban mwen tjè kontan. Wi, lè mwen ka pwédyé bay Jéhova, sé sa ki ka vwéman édé mwen. Konsa plizyè fwa pou jounen-an, mwen ka mandé Jéhova pou édé mwen wèsté kam.”

12. Pouki i bon pou moun ki ka pwan ka lézòt otjipé kò yo?

¹² Fè tan pou otjipé kò’w. Bon, paski ou ka gadé apwé an moun ou enmen, pitèt ou pa ni an chay tan pou alé achté èben pwépawé bon kalté manjé. Kanmenm, i enpòtan pou’w fè tout sa ou pé pou’w manjé byen èk pwan lézèksis, si’w vlé kò’w èk sèvèl ou wèsté an bon santé. (Èfés. 5:15, 16) An plis di sa, i enpòtan pou’w twapé asé sonmèy, paski sa kay édé sèvèl-la wanjé kò’y. (Éklé. 4:6) Anfen dòktè ka di, lè nou dòmi byen, nou pa ka twakasé kò nou twòp, èk nou ka wèsté kam anba mové sitiwasyon. Osi i enpòtan pou’w fè tan pou fè bagay ou ka enjwi. (Éklé. 8:15) Yon sè ki ka gadé apwé moun ki an laj èben ki malad di: “Lè tan-an bèl, mwen ka alé dèwò èk enjwi sòlèy-la. Èvèk menm si sé yon fwa pou mwa-a, mwen ka fè kéchòy mwen ka enjwi épi an bon jan. Èk sé bagay sala ka édé mwen pou tjenn djèwté mwen.”

13. Pouki i bon pou wi? (Pwovèb 17:22)

¹³ Pa obliyé wi. (Li Pwovèb 17:22; Éklé. 3:1, 4) Wi, lè nou ka wi, sa bon pou kò nou èk sèvèl nou, èk nou ka ni mwens strès. Bon. Byen souvan, lè’w ka gadé apwé an moun ou enmen, bagay ou pa ka èspéwé ka fèt. Mé si’w sa wi konsèné sé bagay sala, ou pa kay vini twò faché. Èvèk si’w sa wi ansanm épi moun-lan ou ka otjipé-a, sa kay édé zòt vansé pli pwé yonn a lòt.

14. Pouki i bon pou palé épi an bon jan si’w pèd djèwté’w?

¹⁴ Palé épi an bon jan. Menm si ou fè tout sa ou pé pou tjenn lajwa’w, délè ou sa pèd lajwa’w. Konsa lè sa fèt, i kay bon pou ou palé épi an bon jan ki pa kay jijé’w. (Pwov. 17:17) Pito sa, i kay byen kouté’w èk ankouwajé’w, èk sa sa édé’w pou ni lajwa ankò.​—Pwov. 12:25.

15. Lè’w ka toujou palé konsèné Pawadi-a, ki mannyè sa ka édé’w pou tjenn djèwté’w?

¹⁵ Imajiné ni ou ni moun-lan ou ka otjipé-a an Pawadi-a. Toujou chonjé, ou pa kay ni pou otjipé an moun ki an laj èben ki malad pou tout tan. Anfen sé pa twavay kon sa Jéhova té vlé nou fè. (2 Kòr. 4:16-18) Pito sa, an tan pou vini nou kay enjwi bèl lavi-a Jéhova té vlé ban nou. (1 Tim. 6:19) Alò i kay bon pou zòt palé konsèné sé bagay-la zòt vlé fè an Pawadi-a. Èk sa kay ba zòt an chay djèwté. (Izay. 33:24; 65:21) Pou ègzanp, yon sésé, non’y sé Heather di: “Byen souvan mwen ka di sé moun-lan mwen ka otjipé-a, ‘touswit nou kay koud ansanm, nou kay kouwi ansanm, èk nou kay rayd bisiklèt ansanm. Wi nou kay fè pen, èk nou kay pwépawé manjé pou jan nou èk fanmi nou lè yo wésisité.’ Èk osi nou ka wimèsyé Jéhova pou bèl èspwa-a i ban nou-an.”

MANNYÈ NOU SA ÉDÉ

16. Ki mannyè nou sa édé an fwè èben sè ki ka gadé apwé an moun ki an laj èben ki malad? (Gadé pòtwé-a osi.)

¹⁶ Édé moun-lan ki ka gadé apwé moun-lan ki an laj èben ki malad. Pou ègzanp, nou sa ofè pou pasé tan épi moun-lan yo ka gadé apwé-a. Sa kay édé yo twapé an ti tan pou pozé èben fè bagay yo bizwen fè. (Gal. 6:2) Osi, adan fwè èk sè ha ékwi an plan pou yo sav ki moun ki kay édé moun-lan ki an laj, èben ki malad chak simenn. Natalya sé yon sésé, èk mawi’y pa sa maché. I di: “La ni yon fwè an kongwigasyon-an ki ka vini yonn èben dé fwa pou simenn-lan pou pasé tan épi mawi mwen. Yo ka fè minis-la, yo ka palé épi yonn a lòt, èk yo ka jis gadé mouvi. Mawi mwen ka enjwi sa si tèlman, èk sa ka osi ban mwen tan pou pozé èk pou fè lòt bagay mwen ka enjwi fè, tèl kon alé pou an ti maché.” An plis di sa, adan fwè èk sè an kongwigasyon-an sa pasé an swè épi moun-lan ki an laj èben ki malad, èk sa kay bay moun-lan ki ka gadé apwé yo-a an chans pou dòmi byen.

17. Ki mannyè nou sa édé fwè èk sè ki ka otjipé lézòt lè yo vin mitin?

¹⁷ Édé fwè èk sè ki ka otjipé lézòt lè yo atandé mitin. Bon. Lè yon fwè èben sè atandé mitin, asanblé, èben konvansyon épi moun-lan yo ka gadé apwé-a, i pa ézé pou yo kouté. Konsa nou sa édé yo, si nou asiz épi moun-lan ki an laj èben ki malad pou an ti tan diwan mitin-lan, èben si’y posib, pou tout mitin-lan. Osi, si moun-lan ki an laj èben ki malad pa sa kité kay li, nou sa ofè pou wèsté épi’y, padan moun-lan ki ka gadé apwé’y atandé mitin an Kingdom Hall-la.

18. Ki lòt bagay nou sa fè pou édé moun ki ka otjipé lézòt?

¹⁸ Nou sa ankouwajé yo èk pwédyé ba yo. Sé ansyen-an ni pou fè tan pou toujou ankouwajé moun ki ka otjipé lézòt. (Pwov. 27:23) Èvèk nou tout ni pou di yo ki otan nou enmen yo, èk nou ka apwésyé sa yo ka fè. Èk nou sa osi mandé Jéhova pou kontiné ba yo fòs, èk pou édé yo tjenn djèwté yo.​—2 Kòr. 1:11.

19. Ki bèl bagay nou kay èspéyansé an tan pou vini?

¹⁹ Bon, touswit Jéhova kay tiwé tout sé mové bagay-la ki ka annékòz nou soufwans èben twistès. Wi, maladi èk lanmò pa kay la ankò! (Wév. 21:3, 4) An tan sala, ‘moun ki enfim kay soté menm kon sèf’. (Izay. 35:5, 6) Osi nou pa kay soufè a kòz di vyéyès, èk nou pa kay wè moun nou enmen vin vyé èben tonbé malad. Anfen, nou pa kay menm chonjé sé mové bagay sala. (Izay. 65:17) Èk padan nou ka èspéwé pou sé pwonmèt sala fèt vwé, nou sa ni tout konfyans-lan ki, Jéhova kay toujou édé nou. Konsa si nou kontiné dépan asou’y pou ban nou fòs, i kay édé nou ‘doubout fò épi pasyans èk lajwa an tjè nou.’—Kòl. 1:11.