Jézi, Pli Ho Chèf Pwèt Nou Ka Konpwann Byen Mannyè Nou Ka Santi

1-2. (a) Pouki Jéhova voyé Jézi asou latè-a? (b) Kisa nou kay diskité an atik sala? (Hibrou 5:7-9)

APIPWÈ dé mil «2,000» lanné ki pasé Jéhova voyé Jézi asou latè-a. Mé pou ki wézon i fè sa? Èben yon wézon sété pou tiwé lézòm anba péché èk lanmò, èk pou tiwé tout sé pwoblenm-lan Satan ha annékòz. (Jan 3:16; 1 Jan 3:8) Osi, Jéhova té sav èspéyans Jézi kon an nonm asou latè-a té kay pwépawé’y pou vini Pli Ho Chèf Pwèt-la ki té kay byen konpwann mannyè nou ka santi. Èvèk Jézi koumansé wann sèvis kon Pli Ho Chèf Pwèt sala apwé batenm li an lanné vent nèf «29» an lépòk nou.a

² Konsa an atik sala, nou kay diskité mannyè lavi Jézi kon an nonm asou latè-a, té édé’y pou vini Pli Ho Chèf Pwèt-la ki ka byen konpwann mannyè nou ka santi. Èvèk i byen enpòtan pou nou konpwann sa, paski sa kay fè’y pli ézé pou nou pwédyé èk vansé pli pwé Jéhova, èspwèsman lè nou twis a kòz di lèwè nou.​—Li Hibrou 5:7-9.

GASON BONDYÉ VINI ASOU LATÈ-A

3-4. Ki sakwifis Jézi té fè pou’y vini asou latè-a, èvèk ki kalté lavi i té ni asou latè-a?

³ Bon. An chay di nou ha èspéyansé chanjman an lavi nou. Pitèt nou té ni pou kité an plas nou té enmen, èben pitèt nou té ni pou kité fanmi nou èben jan nou dèyè. Non, i pa té ézé pou nou fè sé chanjman sala. Kanmenm pyès lézòm p’òkò janmen fè chanjman kon Jézi té ni pou fè. Chonjé, Jézi sété pwèmyé èk pli enpòtan nanj-lan an syèl. Papa’y té enmen’y, èk i té ni an chay lajwa paski i té ka toujou twavay ansanm épi Papa’y. (Sam 16:11; Pwov. 8:30) Mé Filipay 2:7 di, Jézi “mété tout sa i té ni asou koté” èk i vini viv asou latè-a kon an nonm.

⁴ Osi, katjilé asou lavi Jézi asou latè-a lè’y té jenn. Pou ègzanp, fanmi Jézi té pòv. Èvèk nou sav sa paski lè’y té fèt, pawan’y té sa sèlman ofè dé «2» ti jibyé kon an sakwifis an tanp-lan. (Livi. 12:8; Louk 2:24) An plis di sa, lè Wa Hèròd tann Jézi té fèt, i té vlé tjwé’y. Anfen pou sové lavi Jézi, fanmi’y té ni pou kouwi alé péyi Éjip. (Maf. 2:13, 15) Wi, lavi Jézi asou latè-a té byen diféwan épi lavi-a i té ni an syèl!

5. Kisa Jézi té wè padan i té asou latè-a, èk ki mannyè sa édé’y vini Pli Ho Chèf Pwèt-la ki ka byen konpwann mannyè nou ka santi? (Gadé pòtwé-a osi.)

⁵ Bon, padan Jézi té asou latè-a i té ka wè mannyè an chay moun té ka soufè. Osi, Jézi té pèd moun i té konnèt èk enmen an lanmò, pou ègzanp pitèt papa’y Jozèf. Konsa i té vin konpwann pli mèyè mannyè nou ka santi lè nou pèd an moun nou enmen an lanmò. Èvèk padan i té ka fè minis li, Jézi té wè moun ki té malad, avèg, enfim, èben moun ki té pèd ich yo an lanmò. Èk i té ni konpasyon pou yo. (Maf. 9:2, 6; 15:30; 20:34; Mak 1:40, 41; Louk 7:13) Bon. Sé vwé, Jézi té ka wè moun ka soufè padan i té an syèl, mé lè’y vini asou latè-a kon an nonm, i té sa konpwann pli mèyè mannyè moun ka santi lè yo ka soufè. (Izay. 53:4) Èvèk menm kon tout lézòm, Jézi té ka vini las, i té ka ni tèt cho, èk délè i té ka santi twis.

JÉZI TÉ MOUTWÉ MOUN KONPASYON

6. Silon Mafyou 12:17, 20, kisa nou apwann an sa pwòfèt Izaya té di konsèné konpasyon-an Jézi té kay ni pou moun?

⁶ Diwan minis li, Jézi té moutwé konpasyon pou moun ki té fèb èk moun lézòt té ka maltwété. Èk sa akonpli sa pwòfèt Izaya té di. Bon. Sé lévanjil Hibrou-a ka konpawé moun ki wich èk fò, épi an jaden ki pwé dlo, èben épi pyé bwa ki ho èk fò. (Sam 92:12; Izay. 61:3; Jér. 31:12) Mé yo ka konpawé sé moun-lan ki pòv èk sé moun-lan lézòt ka maltwété, épi moun ki fèb èk ki dékouwajé. (Li Mafyou 12:17, 20) Wi, Jéhova sèvi sa pwòfèt Izaya té di pou moutwé lanmityé-a èk konpasyon-an Jézi té kay moutwé moun lézòt té ka maltwété.

7-8. Ki mannyè Jézi té fè sa pwòfèt Izaya té di i té kay fè?

⁷ Mafyou moutwé Jézi té fè sa pwòfèt Izaya té di i té kay fè, lè’y té di: “I pa kay maltwété moun ki fèb, épi i kay édé sa ki dékouwajé.” (Mafyou 12:20) Wi, Jézi té fè an chay miwak pou édé moun lézòt té ka maltwété, èk moun ki pa té ni èspwa lavi yo té kay vini pli mèyè. Pou ègzanp, Jézi té djéwi an nonm ki té ni on mové maladi ki té ka anpéché’y vin oliwon moun. Nonm sala pitèt pa té ni pyès èspwa i té kay djéwi, èben i té kay janmen vin ansanm épi fanmi’y èben jan’y ankò. (Louk 5:12, 13) Jézi té osi édé an lòt nonm ki té soud èk i pa té sa palé byen. Imajiné mannyè nonm sala té ka santi lè’y té ka wè lézòt ka palé épi yonn a lòt, mé i pa té sa konpwann anyen yo té ka di. (Mak 7:32, 33) Mé sé pa sa tousèl.

⁸ An tan Jézi, an chay Jwif té ka kwè moun té malad èben yo té enfim, paski Bondyé té ka pini yo pou péché yo èben péché pawan yo. (Jan 9:2) Bon. Sa pa té vwé, mé mansonj sala té ka annékòz yo pou maltwété sé moun sala, èk sa ka santi dékouwajé yo. Mé menm kon pwòfèt Izaya té di, Jézi djéwi sé moun sala, èk i bati konfyans yo ki, Jéhova té vwéman mélé épi yo. Bon. Lè nou wéfléchi asou konpasyon-an Jézi té ni pou moun an tan sala, kisa sa ka enstwi nou konsèné mannyè Jézi ka santi konsèné nou jòdi?

9. Ki mannyè Hibrou 4:15, 16 ka moutwé, Jézi ka vwéman konpwann mannyè nou ka santi?

⁹ Li Hibrou 4:15, 16. Wi, nou sa ni asiwans-lan ki, Jézi kay toujou konpwann mannyè nou ka santi. Sa vlé di, i ka vwéman konpwann twistès nou èk penn nou. Wi, lè nou wè mannyè Jézi té édé moun, nou ka wè i té ni an chay konpasyon pou yo. Non. Jézi pa té annèk djéwi moun paski i té santi i té ni pou fè sa. I té vwéman mélé épi yo èk i té vlé édé yo. Pou ègzanp, lè’y té djéwi nonm-lan ki té ni maladi-a an lapo’y, i pa té ni pou touché’y. Mé i touché nonm-lan. Èk pitèt sa sété pwèmyé fwa-a an konmen lanné dépi an moun té touché’y! Èben lè’y té djéwi nonm-lan ki té soud, i mennen’y adan an plas ki pa té ni moun avan i djéwi’y. Èk ès ou chonjé sa ki té fèt lè fanm vyé lavi-a ki té wépanti, mouyé pyé Jézi èk glo zyéʼy èk i swiyé pyé Jézi èk chivéʼy? Bon. Yon Fawizyen pa té moutwé madanm sala jantiyès, mé Jézi pwotéjé’y èk i kowijé Fawizyen-an. (Maf. 8:3; Mak 7:33; Louk 7:44) Non. Jézi pa té séwé hòd moun ki té malad èben moun ki té fè péché ki gwav. Anfen i envité yo pou vin jwenn li, èk i moutwé yo an chay lanmityé. Alò nou sa ni konfyans-lan ki, jòdi jou, Jézi ka vwéman konpwann mannyè nou ka santi.

SWIV ÈGZANP PLI HO CHÈF PWÈT NOU JÒDI

10. Kisa nou sa sèvi jòdi pou édé moun ki soud èk moun ki avèg? (Gadé sé pòtwé-a osi.)

¹⁰ Bon. Paski nou vlé swiv ègzanp Jézi, nou ka fè tout sa nou pé pou moutwé moun lanmityé èk konpasyon. (1 Pita 2:21; 3:8) Sé vwé, nou pa sa fè moun ki soud tann èben fè moun ki avèg wè. Mé nou sa édé yo apwann pli konsèné Jéhova èk vansé pwé’y. Pou ègzanp, nou ni piblikasyon an pli pasé yon san «100» diféwan langaj sin. Èk pou moun ki pa sa wè byen èben ki avèg, nou ni piblikasyon spésyal an plis pasé swasant «60» langaj. Èk osi, an pli pasé yon san «100» langaj nou ni vidiyo ki ni vwa ki ka èspliké sa ki ka fèt an vidiyo-a. Wi, nou ka fè tout sa, pou édé moun ki soud èk moun ki avèg vansé pli pwé Jéhova èk Gason’y Jézi.

11. Ki mannyè ògannizasyon Jéhova ka moutwé menm konpasyon-an Jézi ni pou tout moun? (Twavay 2:5-7, 33) (Gadé sé pòtwé-a osi.)

¹¹ Ògannizasyon Jéhova ka fè an chay éfò pou édé moun an tout latè-a vansé pwé Jéhova. Chonjé, apwé Jézi wésisité, i vidé lèspwi Bondyé asou sé disip li-a pou yo té sa pwéché bon nouvèl-la. Èk i fè sa, pou sé moun-lan ki atandé Fèt Pentikòs-la tann bon nouvèl-la an langaj yo menm. (Li Twavay 2:5-7, 33.) Bon. Jòdi jou, Jézi ka diwèkté ògannizasyon Jéhova pou pwodwi piblikasyon ki bazé asou Bib-la, an pli pasé yon mil, yon san «1,100» diféwan langaj. Èk Jézi ka fè sa pou édé moun vin konnèt Jéhova, magwé sé pa djè moun ki ka palé adan sé langaj sala. Pou ègzanp, nou ka pwodwi piblikasyon an langaj tèl kon Chol, Tzeltal, èk lòt langaj yo ka palé an Mexico èk sé péyi-a oliwon’y. Wi, ògannizasyon-an ha pwodwi piblikasyon an pli pasé yon san swasant «160» an sé langaj sala. Osi nou ni piblikasyon an pli pasé ven «20» diféwan langaj Romany. Èvèk plizyè mil moun ki ka palé sé langaj sala ha aksèpté lavéwité-a.

12. Ki lòt bagay ògannizasyon Jéhova ka fè pou édé moun jòdi?

¹² Bon. Ògannizasyon Jéhova pa ka sèlman édé moun apwann konsèné bon nouvèl-la. I ka osi édé moun ki ka soufè a kòz di dézas. Anfen, la ni plizyè mil fwè èk sè ki pawé pou édé sé moun sala. An plis di sa, ògannizasyon-an ka osi bati plas adowasyon koté moun sa alé pou apwann pli konsèné mannyè Bondyé enmen yo.

PLI HO CHÈF PWÈT NOU SA ÉDÉ NOU

13. An ki diféwan mannyè Jézi ka édé nou?

¹³ Bon. Bon bèwjé nou Jézi, ka fè asiwé nou ni tout sa nou bizwen pou wèsté pwé Jéhova. (Jan 10:14; Èfés. 4:7) Kanmenm délè nou ka santi dékouwajé, pitèt paski nou malad, paski nou fè an lèwè, èben paski nou té ni an dézagwéman épi yon fwè èben sè an kongwigasyon-an. Anfen délè i pli ézé pou nou fiksé asou sé pwòblenm nou-an èk sé bagay-la nou ka soufè apwézan, pito nou fiksé asou bèl èspwa-a nou ni pou tan-an ki ka vini. Mé toujou chonjé, Jézi ka konpwann sé difikilté-a nou ka èspéyansé, èk i konnèt mannyè nou ka santi. Èk paski i ni konpasyon pou nou i vlé édé nou. Pou ègzanp, i sa sèvi lisentèspwi-a pou fòtifyé nou lè nou dékouwajé. (Jan 16:7; Titòs 3:6) Osi, i sa sèvi sé ansyen-an èben lòt fwè èk sè an kongwigasyon-an pou ankouwajé nou èk pou édé nou.​—Èfés. 4:8.

14. Kisa nou sa fè lè nou ka santi dékouwajé?

¹⁴ Lè nou ka santi dékouwajé, nou ni pou chonjé Jézi sé Pli Ho Chèf Pwèt nou. Bon. Kisa sa vlé di pou nou? Èben chonjé, Jéhova pa té sèlman voyé Jézi asou latè-a pou mò ban nou. I osi voyé’y pou édé’y konpwann sé pwòblenm-lan nou ka èspéyansé pli mèyè. Konsa lè nou ka santi dékouwajé pou lapéti fèblès nou èben péché nou, chonjé Jézi toujou pawé pou édé nou a bon lè-a.​—Hib. 4:15, 16.

15. Kisa ki édé yon fwè viwé an kongwigasyon-an?

¹⁵ Jézi ka osi djidé pèp li kon yo ka édé moun ki kité Jéhova viwé an kongwigasyon-an. (Maf. 18:12, 13) Pou ègzanp, apwé Stefanob kité Jéhova pou douz «12» lanné, i désidé pou atandé yon mitin. I di: “I pa té ézé pou mwen. Mé mwen té vlé sèvi Jéhova épi sé fwè èk sè mwen-an ankò. Alò sé ansyen-an ki té jwenn épi mwen moutwé mwen an chay jantiyès. Kanmenm, lè mwen chonjé mannyè mwen kité Jéhova, délè sa té ka dékouwajé mwen, èk mwen pa té vlé witounen an kongwigasyon-an. Mé sé ansyen-an fè mwen chonjé ki, Jéhova èk Jézi pa té vlé mwen doubout. Èvèk apwé mwen viwé an kongwigasyon-an, tout sé fwè èk sè-a byen wisivwè mwen èk fanmi mwen. Pli ta madanm mwen koumansé étidyé Bib-la, èk jòdi nou ka sèvi Jéhova kon an fanmi.” Wi, pa dé kontan Pli Ho Chèf Pwèt nou ka kontan, lè’y wè nou tout ka édé fwè èk sè ki wépanti witounen an kongwigasyon-an!

16. Pouki nou ni bon wézon pou wimèsyé Jéhova?

¹⁶ Bon. Diwan lavi’y asou latè-a, Jézi té édé an chay moun. Èvèk jòdi nou sa ni konfyans-lan ki, i kay édé nou tou, népòt lè nou bizwen èd. Èvèk an Pawadi-a, i kay édé nou ni an bon lavi san pyès péché. Konsa nou ka wimèsyé Jéhova, paski i enmen nou si tèlman, i ban nou Gason’y Jézi kon Pli Ho Chèf Pwèt nou ki konnèt byen mannyè nou ka santi!