Nou Sa Ni Djèwté Menm Si Nou An Laj

1-2. Ki mannyè Jéhova ka gadé fwè èk sè ki an laj? (Sam 92:12-14; Gadé pòtwé-a osi.)

BON, adan sèten kilti moun ka gadé vyéyès kon an lonnè, mé adan lòt kilti moun ka fè tout diféwan bagay pou yo sa wèsté jenn. Pou ègzanp, kon yo wè chivé blan-an pawèt, yo ka tiwé’y. Kanmenm, népòt sa nou fè nou pa sa wèsté jenn pou tout tan.

² Alò, ki mannyè Jéhova ka gadé sé sèvant li-a ki an laj? (Pwov. 16:31) Ében Jéhova ka konpawé yo épi bèl pyé bwa. (Li Sam 92:12-14.) Bon, pouki Jéhova ka konpawé fwè èk sè ki an laj épi pyé bwa? Èben sa sé paski, byen souvan, pyé bwa ki ha viv pou an chay tan byen bèl, paski yo plen fèy èk flè. Pou ègzanp, la ni an kalité pyé bwa an péyi Japon ki ka viv pou an chay lanné. Èvèk adan sé pyé bwa sala ni pli pasé yon mil lanné èk yo vwéman bèl. Bon, an menm mannyè-a sèvant Jéhova ki an laj bèl, èk yo ni an chay valè an zyé’y. Wi, yo ha sèvi Jéhova pou plizyè lanné anba tout diféwan kalté sitiwasyon, èvèk Jéhova ka apwésyé sé bèl kawaktè yo-a.

3. Ki ègzanp ki ka moutwé Jéhova ha sèvi moun ki an laj pou fè twavay li?

³ Bon. Sèvant Jéhova ki an laj, pa ka pèd valè an zyé’y.a Anfen, byen souvan Jéhova ha sèvi moun ki an laj pou fè twavay li. Pou ègzanp, Sara té ha an vyéyès li, lè Jéhova di’y i té kay ni an gason. Èk gason sala té kay vini an gwo nasyon, èk Mèsaya-a té kay désandan’y. (Jen. 17:15-19) Osi, Moziz té ja an laj lè Jéhova voyé’y pou fè sé jan Izwayèl-la sòti anba èslavaj an péyi Éjip. (Ègz. 7:6, 7) Èvèk zapòt Jan té ja an vyéyès li lè Jéhova sèvi’y pou ékwi senk «5» liv an Bib-la.

4. Silon Pwovèb 15:15, kisa ki sa édé fwè èk sè ki an laj pou tjébé wèd lè yo ka èspéyansé difikilté? (Gadé pòtwé-a osi.)

⁴ Bon, lè an fwè ében sè ka vini an laj, byen souvan, i ka èspéyansé pwòblenm épi santé’y èk lòt difikilté. Pou ègzanp, yon sésé ki an laj an péyi Congo di: “Lè’w ka vini an laj, ou bizwen an chay kouwaj, paski vyéyès pa ézé.” Mé kanmenm, Jéhova sa édé’w pou ni tjè kontan,b pou ou sa enjwi lavi magwé sé difikilté-a. (Li Pwovèb 15:15.) Alò an atik sala, nou kay diskité kisa fwè èk sè ki an laj sa fè pou yo pa pèd djèwté yo. Èk nou kay osi diskité sa lézòt fwè èk sè an kongwigasyon-an sa fè pou édé sé fwè èk sè-a ki an laj. Mé pwèmyéman, annou diskité pouki i difisil pou tjenn djèwté nou lè nou ka vini an laj.

BAGAY KI SA FÈ’Y DIFISIL POU NOU TJENN LAJWA NOU LÈ NOU VINI AN LAJ

5. Kisa ki sa dékouwajé adan fwè èk sè lè yo vini an laj?

⁵ Bon, pitèt i ka dékouwajé’w paski ou pa sa fè sa ou té ka fè avan. Èk ou ka avoudwé tan-an lè’w té jenn èk an bon santé. (Éklé. 7:10) Pou ègzanp, yon sésé yo ka kwiyé Ruby di: “Byen souvan, i wèd pou mwen mété had mwen pa kò mwen, paski mwen pa fò kon avan, èk souvan mwen adan an chay penn. Lanmen mwen ka fè mwen mal, èvèk i difisil pou fè jis ti bagay.” Èk an fwè ki ka wann sèvis an Bèfèl, non’y sé Harold, di: “Délè mwen ka santi faché, paski mwen pa sa fè sé bagay-la mwen té ka enjwi. Mwen té benyen fòs, èk mwen té enmen jwé spò. An tan sala yo té ka di: ‘Bay Harold bol-la. I kay édé nou ganyen.’ Mé apwézan, bol-la ka annèk gadé mwen.”

6. (a) Ki lòt bagay ki sa dékouwajé moun ki an laj? (b) Kisa ki sa édé moun ki an laj désidé si pou kontiné drayv opa? (Gadé osi atik-la “Should I Stop Driving?”)

⁶ Bon, pitèt ou dékouwajé, paski an tan pasé ou té ka fè bagay pou kò’w, mé apwézan ou ni pou dépan asou lòt moun. Pa palé si’w ni pou dépan asou an moun pou otjipé’w, ében si’w ni pou alé viv épi yonn an sé ich ou-a. Ében pitèt ou dékouwajé, paski an tan pasé ou té ka drayv, ében alé népòt plas ou té vlé pa kò’w. Mé apwézan an lòt moun ni pou drayv ou, ében alé épi’w, paski ou pa ka wè byen, ében pou lapéti santé’w. Èk sa ka fè’w santi byen twis. Bon, magwé ou pa sa fè sé bagay-la ou té ka fè avan, i enpòtan pou chonjé, Jéhova ka konpwann mannyè-a ou ka santi. Anfen, Jéhova konnèt ki otan ou enmen’y, èk ki otan ou enmen sé fwè’w èk sè’w-la. Èk sé sa ki enpòtan pou li.​—1 Sm 16:7.

7. Kisa ki sa édé’w si’w ka santi twis paski ou kwè ou kay mò avan Anmagèdonn?

⁷ Bon. Pitèt ou ka santi twis paski ou kwè ou kay mò avan Jéhova détwi latè méchan sala. Ében si’w ka santi konsa, i kay édé’w si’w ka toujou chonjé ki, Jéhova ni bon wézon poutji i ka èspéyé avan i détwi mové sistèm sala. (Izay. 30:18) Èk pasyans Jéhova ka bay milyon di moun òpòtyounité-a pou vin konnèt li èk vin jan épi’y. (2 Pita 3:9) Alò népòt lè ou ka santi dékouwajé, chonjé ki, an chay moun sa vini konnèt Jéhova avan bout-la wivé. Èk pitèt adan manm fanmi’w kay anpami sé moun sala.

8. Lè fwè èk sè ki an laj malad èben yo an penn, kisa yo pé fè?

⁸ Ki nou jenn ki nou an laj, lè nou malad èben nou an penn, délè nou sa di èben fè bagay ki pa bon. (Éklé. 7:7; Jémz 3:2) Pou ègzanp, lè Jòb té ka soufè, Bib-la di, i té ‘ka di an chay vyé pawòl.’ (Jòb 6:1-3) An menm mannyè-a, fwè èk sè ki an laj pé di èben fè bagay ki pa bon, pou lapéti maladi-a yo ni èben wimèd-la yo ka pwan. Bon, menm si nou malad èben nou an laj, nou vlé toujou moutwé moun jantiyès. Konsa, si nou wéyalizé nou ha di an moun an bagay ki pa bon, ében nou twété yo adan an mannyè ki pa janti, nou vlé fè apoloji vitman.​—Maf. 5:23, 24.

BAGAY OU SA FÈ POU TJENN DJÈWTÉ’W

9. Pouki i bon pou mandé lézòt pou édé’w? (Gadé sé pòtwé-a osi.)

⁹ Mandé lézòt pou èd. (Gal. 6:2) Bon. Sa pa toujou ézé pou fè. Pou ègzanp, yon sésé, non’y sé Grètalc di: “Délè i wèd pou mwen mandé lézòt pou édé mwen, paski mwen pa vlé anbété yo. I pwan mwen an chay tan pou chanjé katjil mwen èk pou mwen té sa di mwen bizwen èd.” Wi, lè’w aksèpté èd hòd lézòt, ou ka ba yo an chans pou èspéyansé djèwté. (Twav. 20:35) Èk ou kay ni djèwté tou, pou wè mannyè lézòt enmen’w èk mannyè-a yo vlé édé’w.

10. Pouki i bon pou moutwé apwésiyasyon? (Gadé pòtwé-a osi.)

¹⁰ Moutwé apwésiyasyon. (Kòl. 3:15; 1 Tèsa. 5:18) Lè lézòt fè bon bagay ban nou nou ka apwésyé sa. Mé kanmenm, délè nou ka obliyé pou wimèsyé yo. Konsa i bon pou chonjé, lè nou souwi èben nou wimèsyé yo, yo kay konnèt nou ka apwésyé sa yo ka fè ban nou. Pou ègzanp, Leah, yon sè ki ka gadé apwé sé fwè èk sè-a ki an laj an Bèfèl di: “Yonn an sé sésé-a mwen ka gadé apwé-a ka toujou wimèsyé mwen. I ka ékwi ti nòt ban mwen. Yo kout, mé yo tèlman dou! Mwen enmen li yo. Èk i ka fè mwen kontan pou konnèt i ka apwésyé sa mwen ka fè ba li.”

11. Ki mannyè ou sa édé lézòt? (Gadé pòtwé-a osi.)

¹¹ Fè tout sa ou pé pou édé lézòt. Lè’w ka katjilé asou lézòt èk ou ka fè sa ou pé pou édé yo, sa ka tiwé lidé’w asou sé pwòblenm ou-a. Nou sa konpawé fwè èk sè ki an laj épi liv ki ni an chay bèl lison. Kanmenm si moun pa li sé liv sala, yo pa kay twapé bennéfis an yo. Èvèk an menm mannyè-a, ou ni an chay bèl èspéyans. Mé sé jenn fwè èk sè-a pa sa apwann sé bèl lison-an ou sa enstwi yo, si’w pa palé épi yo èk di yo konsèné adan sé bagay-la ou konnèt. Alò fè tan pou vin konnèt sé jennès-la. Mandé yo kèstyon. Èk byen kouté lè yo ka di’w konsèné kò yo. Èvèk si’w fè sa, ou kay sa di yo mannyè Jéhova ja édé’w an lavi’w, èk mannyè yo kay ni lakontantman si yo obéyi Jéhova. Wi, lè’w fè tan pou konfòté èk ankouwajé sé jenn fwè èk sè’w-la, sa kay édé’w tjenn lajwa’w an vyéyès ou.​—Sam 71:18.

12. Silon Izaya 46:4, kisa Jéhova pwonmèt pou fè pou moun ki an laj? (Gadé pòtwé-a osi.)

¹² Mandé Jéhova pou ba’w fòs. Délè, pitèt ou ka santi dékouwajé paski ou ka santi fèb èk las. Mé chonjé, Jéhova benyen pouwa! Anfen Bib-la ka di: ‘I pa sa janmen vini las ében fatigé.’ (Izay. 40:28) Konsa, i kay ba’w tout fòs-la ou bizwen. (Izay. 40:29-31) Anfen, Jéhova pwonmèt pou édé’w. (Li Izaya 46:4.) Èvèk Jéhova ka toujou tjenn sé pwonmèt li-a. (Jòch. 23:14; Izay. 55:10, 11) Wi, lè’w pwédyé bay Jéhova i kay ba’w èd-la ou bouzwen. Èvèk a lè sala ou kay santi ki otan i enmen’w, èk sa kay édé’w tjenn djèwté’w menm si ou an laj.

13. Silon 2 Kòrint 4:16-18, kisa nou ni pou chonjé? (Gadé pòtwé-a osi.)

¹³ Toujou chonjé ou kay vini jenn èk an bon santé ankò. Bon, i pli ézé pou nou tjébé fò anba an mové sitiwasyon, lè nou sav i pa kay diwé pou tout tan. Èk Bib-la ka ban nou asiwans-lan ki, vyéyès èk maladi pa la pou tout tan. (Jòb 33:25; Izay. 33:24) Alò, ou sa ni lajwa paski pli bon lavi’w sé pa lavi-a ou té ni an tan pasé. Wi, pli bon lavi’w sé lavi-a ou kay ni an tan pou vini. Paski a lè sala, ou kay ni tout fòs ou, ou kay an bon santé, èk ou kay pli bèl pasé avan. (Li 2 Kòrint 4:16-18.) Mé kanmenm, kisa lézòt sa fè pou édé fwè èk sè ki an laj? Ann’ diskité sa.

BAGAY NOU SA FÈ POU ÉDÉ FWÈ ÈK SÈ KI AN LAJ

14. Poutji i enpòtan pou vizité èben kwiyé fwè èk sè ki an laj?

¹⁴ Vizité èben kwiyé fwè èk sè ki an laj souvan. (Hib. 13:16) Bon, délè fwè èk sè ki an laj ka santi byen twis, paski yo ka pasé an chay tan pa kò yo. Karld sé yon fwè ki ka santi kon sa. I di: “Délè mwen ka ni tèt cho èk mwen ka jis faché, paski mwen pa sa kité kay mwen, èk mwen pa ni djè bagay pou fè.” Konsa lè nou vizité fwè èk sè ki an laj, nou ka moutwé yo, yo enpòtan pou nou, èk nou enmen yo. Bon, pitèt sa ha wivé nou tout, nou té vlé kwiyé èben vizité an fwè èben sè ki an laj, mé nou pa té fè sa. Bon, sé vwé, nou tout ni an chay bagay pou fè, mé Bondyé vlé nou “toujou chwazi sa ki pli bon”. Èk yonn an sé bagay-la ki pli bon, sé pou nou vizité fwè èk sè ki an laj. Konsa, kisa nou sa fè ki kay édé nou pou fè sa? (Filip. 1:10) Èben nou sa ékwi non sé fwè èk sè-a ki an laj an kongwigasyon nou, èvèk jou-a nou vlé voyé yo an tèks, kwiyé yo, èben vizité yo.

15. Kisa jenn moun èk fwè èk sè ki an laj sa fè ansanm?

¹⁵ Bon, si ou sé an jenn moun, pitèt ou ka katjilé ou pa sav sa pou palé konsèné, èben sa ou kay fè épi an fwè èben sè ki an laj. Mé ou pa ni pou bay kò’w tèt cho konsèné sa, annèk moutwé ou sé an bon jan. (Pwov. 17:17) Pou ègzanp, pitèt ou sa fè tan pou palé épi an fwè èben sè ki an laj avan èben apwé mitin. Ou sa mandé yo ki vèwsé an Bib-la yo enmen, èben kisa yo té ka enjwi fè lè yo té jenn. Ou sa envité yo pou vin gadé an pwogwanm asou JW Broadcasting^® ansanm épi’w. Osi, ou sa édé yo épi an bagay yo pa sa fè pou kò yo. Pou ègzanp, ou sa fè asiwé pòtab yo ka twavay byen, èk yo ni tout sé piblikasyon nèf-la. Yon sésé ki an laj, non’y sé Carol di: “Ofè pou fè bagay ou menm ka enjwi épi fwè èk sè ki an laj. Pou ègzanp, mwen ni ti miyèt laj, mé mwen vlé enjwi lavi toujou. Wi, mwen enmen alé an sé magazen-an, manjé an bèl wipa épi jan mwen, vizité bèl plas, èben enjwi kwiyasyon Jéhova.” An lòt sésé, non’y sé Maira di: “Mwen ni twant twa «33» lanné, mé yonn an sé pli bon jan mwen-an ni katwiven dis «90» lanné. Mé magwé i otan pli vyé pasé mwen, byen souvan mwen pa ka menm chonjé sa. Paski nou ka pasé tan ansanm, nou ka wi ansanm, nou ka gadé TV ansanm, èk lè nou ni pwòblenm, nou ka wédé yonn a lòt.”

16. Lè an fwè èben sè ki an laj ka alé wè dòktè-a, pouki i bon pou alé épi yo?

¹⁶ Lè an fwè èben an sè ki an laj ka alé wè dòktè-a, alé épi’y. Bon, ou sa mennen fwè èben sè ki an laj pou alé wè dòktè-a èben pou alé lopital. Mé i kay osi bon pou’w wèsté épi yo, pou fè asiwé dòktè-a ka twété yo byen, èk i ka vwéman ba yo èd-la yo bizwen (Izay. 1:17) Pitèt ou sa ékwi sa dòktè-a di yo. Yon sésé, non’y sé Ruth di: “Byen souvan, lè mwen alé wè dòktè-a pa kò mwen, i pa ka kwè sa mwen ka di’y. I ka di bagay tèl kon, ‘Ou pa malad, pwòblenm-lan an tèt ou.’ Mé lè an lòt moun vin épi mwen, dòktè-a ka twété mwen pli mèyè. Wi, mwen ka wimèsyé sé fwè èk sè mwen-an ki ka fè tan pou vin épi mwen pou wè èk palé épi dòktè-a.”

17. Kisa nou sa fè ki kay édé nou pou pwéché épi fwè èk sè ki an laj?

¹⁷ Fè tan pou pwéché épi fwè èk sè ki an laj. Bon, adan fwè èk sè ki an laj pa sa alé pwéché kay an kay. Mé pitèt yo sa fè ‘cart-la’ épi nou si nou envité yo. Nou sa jis mennen an chèz pou yo asiz asou. Ében nou sa envité yo asou yonn an sé létid Bib nou-an. Pitèt i kay posib pou tjenn létid-la lakay yo menm. Osi, si’y posib, pitèt sé ansyen-an sa awanjé pou nou jwenn pou mitin-lan pou sèvis-la lakay yo, paski sa sa ankouwajé yo pou alé pwéché épi nou. Wi, i ka bay Jéhova tjè kontan, lè nou fè sa nou pé pou moutwé fwè èk sè ki an laj, nou enmen yo èk nou ka wèspèkté yo.​—Pwov. 3:27; Ronm 12:10.

18. Kisa nou kay diskité an lòt atik-la?

¹⁸ Bon, atik sala fè nou chonjé ki, Jéhova enmen èk i ka apwésyé fwè èk sè ki an laj. Èk nou tout an kongwigasyon-an ka apwésyé yo, èk nou enmen yo tou! Alò fwè èk sè ki an laj, nou sav ou ni an chay pwòblenm, mé Jéhova kay édé’w pou tjenn djèwté’w. (Sam 37:25) Èk chonjé, ou kay ni pli djèwté an tan pou vini, pasé lè’w té jenn! Kanmenm, lè’y vini pou nou ki ka otjipé fanmi ki an laj, ében pitèt an ti manmay, èben an jan ki malad, ki mannyè nou sa tjenn djèwté nou? Èben nou kay diskité sa an lòt atik-la.