Touléjou Lavi Mwen Té Ka Vini Pli Mové

LAVI MWEN AN TAN PASÉ:

Mwen fèt an Los Angeles, California. Sé konmin-lan mwen sòti té ni plizyè gang èvèk moun té ka sèvi dwòg. Pawan mwen té ni sis ich èk sé mwen ki té dézyenm.

Dépi mwen té an jenn ti boug, manman mwen té ka mennen nou légliz épi’y. Mé kon mwen té ka vini pli gwan, mwen koumansé viv dé lavi. Lé Dimanch mwen té ka chanté an légliz, mé lèwèstan simenn-lan mwen té ka alé an fèt, kouwi vyé lavi èk pwan dwòg.

Mwen té vyolan èk mwen té ka anwajé vit. Ou wè, lè an moun fè mwen faché mwen té ka sèvi népòt bagay mwen twapé kon an fèman pou bat yo. Pou di’w lavéwité-a, sa mwen té apwann an légliz pa té ka édé mwen. Anfen, mwen té ka di, “Wivanj sé sa Bondyé èk sé mwen i té ka sèvi pou pwan wivanj ba li.” An lanné mil nèf san swasant «1960», lè mwen té an lékòl sèkondè, on gwoup yo té ka kwiyé Black Panthers té ni an gwo enflouwans asou mwen. Gwoup sala té ka mélé kò yo an zafè pòlitik èk yo té ka entwennen moun kon sòlda pou goumen pou dwa moun. Konsa, sa pousé mwen pou antwé adan an ti gwoup an lékòl mwen ki té ka goumen pou dwa moun. Nou pwotèsté an lékòl mwen plizyè fwa, èk chak fwa yo té ni pou fèmé lékòl-la pou an ti tan.

Paski mwen té an moun ki té vyolan, m’a té kontanté pou annik pwotèsté, mwen té vlé fè pli. Konsa, mwen koumansé fè bagay ki té pli vyolan. Pou egzanp, yon jou, mwen èk sé jan mwen-an alé tiyéta-a pou gadé on pòtwé. Pòtwé sala té konsèné jan Afwik ki té soufè kon èslav an Lanméwik. Sa nou wè an pòtwé sala fè nou vini anwajé. Alò, padan nou té an tiyéta-a, nou koumansé bat sé jenn moun-la ki té blan. Apwé sa, nou alé an sé konmin-lan ki té ni moun ki blan pou bat yo.

Lè mwen té apipwé diznèf lanné, tout moun té konnèt mwen èk sé fwè mwen-an kon kwiminèl. Nou té ka toujou twapé kò nou an dézagwéman épi polis paski nou té ka fè mové bagay. Anfen, yonn an sé fwè mwen-an té vini an manm adan an mové gang, èk mwen té fè jan épi yo. Akòz di sa, touléjou lavi mwen té ka vini pli mové.

MANNYÈ BIB-LA CHANJÉ LAVI MWEN:

Pawan bon jan mwen sété Témwen Jéhova. Yon jou, yo mandé mwen pou alé mitin épi yo. Mwen dakò magwé m’a té janmen alé mitin avan. Lè mwen wivé an Sal Wéyòm-lan, mwen té sa wè aklè mannyé sé Témwen-an té diféwan épi lòt moun. Diwan mitin-lan, tout moun té ka sèvi Bib yo. Èk, jis sé jenn moun-la ki té ka patispé an pwògwanm-lan. Mé sa ki vwéman touché mwen, sé lè mwen apwann non Bondyé, sé Jéhova. Pa dé kontan mwen té kontan lè mwen tann yo sèvi non sala. (Sam 83:18) An plis disa, kongwigasyon-an té ni moun ki té sòti an diféwan was èk nasyon. Mé i té byen klè, la pa té ni pyès divizyon anpami yo.

An koumansman-an, m’a té vlé étidyé Bib-la épi sé Témwen-an, mé mwen té kontan alé an sé mitin-lan. Yon swè, padan mwen té an mitin-lan, sé jan mwen-an té alé an fèt. Diwan fèt-la, yo bat an jenn moun jistan i mò. Wézon-an yo fè sa, sé paski i pa té vlé bay yo kanmizòl li. Li denmen, yo té ka bavadé konsèné sa yo té fè-a. Anfen, lè yo té an kay lodyans-lan, yo té ka jis wi paski yo pa té kwè sa yo té fè-a té sèwyé. Majèstwa-a té kondanné plizyè di yo pou lavi diwant an lajòl. Ében, pa dé kontan mwen té kontan mwen pa té la épi yo swè sala. Apwé sa fèt, mwen té détèminé pou chanjé lavi mwen èk koumansé étidyé Bib-la.

Paski mwen té ja èspéyansé èk wè an chay enjistis, la ni bagay mwen té wè anpami Témwen Jéhova ki té vwéman touché tjè mwen. Pou egzanp, lè on fwè blan té ni pou alé lòt péyi, i kité ich li épi on fanmi ki nwè. Osi, lè an jenn gason ki nwè té bizwen an plas pou wèsté, on fanmi blan wisivwè’y an kay yo. Sé bagay sala fè mwen asiwé Témwen Jéhova ka viv lavi yo an ling épi sa Jézi di an Jan 13:35, la i di: “Si zòt enmen yonn a lòt, sé lè sala tout moun kay sav zòt sé disip mwen.” Mwen té sav mwen té twapé lavéwité-a.

Sa mwen apwann an Bib-la té édé mwen pou wè, mwen té bizwen chanjé mannyè-a mwen té ka katjilé èk viv an lapé épi tout moun. Mwen té ni pou fè sa paski sa sé pli mèyè lavi-a pou viv. (Ronm 12:2) Mizi an mizi, mwen té ka fè chanjman an lavi mwen. Èk an Janvyé, lanné mil nèf san swasant katòz «1974», mwen té batizé kon an Témwen Jéhova.

Apwé mwen té batizé, mwen té ni pou kontiné apwann mannyè pou kontwolé kòlè mwen. Pou egzanp, yon jou lè nou té ka pwéché kay an kay, on vòlè antwé an motoka mwen èk i pwan radyo mwen. Menm lè-a, mwen kouwi dèyè’y. Kon mwen té ka vini pli pwé’y, i ladjé radyo-a atè-a èk i pitjé kouwi. Apwé sa fèt, lè mwen jwenn épi sé fwè-a, mwen di yo sa ki té wivé mwen. On ansyen ki té la mandé mwen, “Stephen, si ou té tjenbé vòlè-a, kisa ou té kay fè?” La menm, kwèsyon sala fè mwen katjilé èk mwen wéyalizé mwen té ni pou fè tout sa mwen pé pou kontiné viv an lapé épi tout moun.

An Oktòb, lanné mil nèf san swasant katòz «1974», mwen vini an piyonnè wéglé. Chak mwa mwen té ka pasé yon san «100» néditan ka pwéché bon nouvèl-la. Pli ta, mwen té ni bèl pwivilaj-la pou wann sèvis an pwensipal òfis Témwen Jéhova an Brooklyn New York. Bon. An lanné mil nèf san swasant dizwit «1978», mwen té viwé Los Angeles pou otjipé manman mwen. Dé lanné apwé, mwen mayé Aarhonda. I té an gwo sipò pou mwen. I té édé mwen pou otjipé manman mwen jistan manman mwen mò. Apwé an tan, mwen èk Aarhonda wisivwè an envitasyon pou atandé lékòl-la Watchtower Bible School of Gilead. Apwé nou fini lékòl-la, yo voyé nou Panama èk nou ka wann sèvis kon misyonnè an péyi sala.

Dépi mwen té batizé, mwen té èspéyansé an chay sitiwasyon ki té sa fè mwen pèdi pasyans mwen èk fè bagay ki vyolan. Mé mwen té apwann pou kontwolé kòlè mwen. Mwen wéyalizé la ni dé bagay mwen sa fè. Yonn «1» mwen sa tiwé kò mwen an sitiwayson-an, èben dé «2» mwen sa fè lapé. An chay moun ja wè sé chanjman-an mwen té fè-a, sitou madanm mwen. Yo tout ja di mwen yo kontan mannyè-a mwen ka aji épi sé sitiwasyon sala. Délè, mwen ka jis sipwi kò mwen. Mé m’a sa di mwen fè’y pa kò mwen, paski mwen asiwé sé Pawòl Bondyé ki té édé mwen fè sé chanjman sala an lavi mwen.​—Hibrou 4:​12.

MANNYÈ MWEN TWAPÉ BENNÉFIS:

Vwéman, Pawòl Bondyé ja bay lavi mwen an chay valè, èk i ka édé mwen pou viv an lapé épi tout moun. Mwen pa ka goumen épi pyèsonn ankò. Pito sa, mwen ka édé moun apwann konsèné Jéhova èk pou vini pwé’y. Yon moun mwen étidyé Bib-la épi, sété an nonm mwen té ka toujou goumen épi, lè mwen té an lékòl sèkondè. Apwé i té batizé, nou té ka wèsté an menm kay-la pou an ti tan. Dépi tan sala, nou sé bon jan. Bon. Pou li pwézan, mwen èvèk madanm mwen ja édé plis pasé katwiven «80» moun dédiké lavi yo bay Jéhova.

Mwen ka wimèsyé Jéhova touléjou paski i ja bay lavi mwen an chay valè. Osi, i ja ban mwen lakontantman èvèk fwè èk sè owon latè-a.