Jéhova Vlé Tout Moun Wépanti

1. Lè on moun wépanti kisa i ni pou fè?

LÈ NOU fè on bagay ki pa bon, i byen enpòtan pou nou wépanti. Bib-la di, lè on moun wépanti la ni twa bagay i ni pou fè. Yonn (1), i ni pou hayi bagay mové-a i té fè-a, dé (2), i nou pou doubout fè bagay mové-a, èk twa (3) i ni pou détèminé pou pa fè’y ankò.​—Maf. 3:8; Twav. 3:19; 2 Pita 3:9.

2. Pouki nou tout ni pou apwann konsèné wépantisman? (Néhimaya 8:9-11)

² Tout lézòm ni pou apwann konsèné wépantisman. Pouki nou ka di sa? Ében, sa sé paski kon désandan Adanm èk Èv nou tout éwityé péché èk lanmò. (Ronm 3:23; 5:1 2) Èk nou tout ka péché toulé jou, alò nou tout ni pou wépanti. Wi, jis moun ki té ni an chay lafwa kon zapòt Pòl té twapé’y wèd pou fè sa ki bon. (Ronm 7:21-24) Bon. Ès sa vlé di, paski nou ka péché nou sipozé santi dékouwajé tout lè? Non. Jéhova sé on Dyé ki plen mizéwikòd èk i vlé nou ni lakontantman. Alò, annou konsidiwé ègzanp sé Jwif-la an jou Néhimaya. (Li Néhimaya 8:9-11.) Bon. Jéhova pa té vlé yo santi twò twis a kòz di péché-a yo té fè-a. I té vlé yo adowé’y épi tjè kontan. Wi, Jéhova sav lè nou wépanti, sa ka ban nou tjè kontan, èk sa sé wézon-an i ka enstwi nou konsèné wépantisman. Wi, si nou wépanti hòd péché nou, nou sa ni konfyans-lan ki, Papa nou Jéhova kay padonnen péché nou.

3. Kisa nou kay konsidiwé an atik sala?

³ An atik sala nou kay apwann konsèné wépantisman, èk osi nou kay diskité sé twa bagay sala. Pwèmyéman, nou kay apwann sa Jéhova enstwi nasyon Izwayèl konsèné wépantisman. Dézyenman, nou kay apwann mannyè Jéhova ha édé moun pou wépanti. Èk finalman, nou kay wè sa Jézi enstwi sé disip li-a konsèné wépantisman.

SA JÉHOVA ENSTWI NASYON IZWAYÈL KONSÈNÉ WÉPANTISMAN

4. Kisa Jéhova enstwi nasyon Izwayèl konsèné wépantisman?

⁴ Lè Jéhova bay sé jan Izwayèl-la sé lwa’y-la, yo pwonmèt pou obéyi yo. Èk Jéhova pwonmèt yo, si yo obéyi sé lwa’y-la, i té kay pwotéjé yo èk benni yo. Konsèné sé lwa sala Jéhova di: ‘Konmandman sala mwen ka bay zòt jòdi-a pa twò difisil pou zòt konpwann, ni i pa twò difisil pou zòt obéyi.’ (Dito. 30:11, 16) Mé si yo pa té obéyi sé lwa’y-la, ében si yo té chwazi pou adowé fo dyé, Bondyé pa té kay kontiné pwotéjé yo èk yo té kay soufè. Mé ès sa vlé di, Jéhova té fini épi yo nèt? Non, paski lévanjil-la di, yo té sa ‘witounen pou Jéhova Dyé yo èk kouté vwa’y’. (Dito. 30:1-3, 17-20) Wi, yo té sa wépanti. Èk si yo té fè sa, Jéhova té kay vansé pwé yo, èk benni yo ankò.

5. Ki mannyè Jéhova moutwé i pa té tounen do’y asou pèp li? (2 Wa 17:13, 14)

⁵ Pèp Jéhova té ka toujou dézobéyi’y. Pou ègzanp, yo té ka adowé idòl èk yo té ka fè an chay lòt bagay ki té mové. Èk a kòz di sa, yo soufè. Kanmenm Jéhova pa té tounen do’y asou yo. I kontiné éséyé pou édé pèp li pou adowé’y ankò. Konsa i voyé sé pwòfèt li-a ankò èk ankò pou ankouwajé pèp li pou wépanti èk pou adowé’y épi tout tjè yo.​—Li 2 Wa 17:13, 14.

6. Ki mannyè Jéhova sèvi sé pwòfèt li-a pou ankouwajé pèp li pou wépanti? (Gadé pòtwé-a osi.)

⁶ Lè pèp Jéhova té ka dézobéyi’y, byen souvan Jéhova té ka voyé sé pwofèt li-a pou di yo sa ki té kay wivé yo si yo pa té chanjé mannyè yo, èk pou kowijé yo. Pou ègzanp Bondyé sèvi pwòfèt Jérémaya pou di yo: ‘Izwayèl viwé jwenn mwen . . . mwen pa kay mépwizé’w . . . mwen pa kay wèsté faché épi’w pou tout tan paski mwen fidèl. Sèl sa ou ni pou fè sé pou moutwé ou koupab, paski ou té wébélé kont Jéhova.’ (Jér. 3:12, 13) Osi, Jéhova sèvi pwòfèt Jowèl pou di pèp li: ‘Viwé jwenn mwen épi tout tjè zòt.’ (Jow. 2:12, 13) Èk Jéhova sèvi pwofèt Izaya pou di yo: ‘Fè kò zòt nèt, tiwé movèsté zòt douvan mwen, doubout fè sa ki mové.’ (Izay. 1:16-19) An plis di sa, Jéhova sèvi pwofèt Izikèl pou di pèp li: ‘Ès mwen ka pwan plézi an lanmò lé méchan? . . . Ès mwen pa té kay avoudwé wè an moun ki méchan chanjé mannyè’y èvèk kontiné viv? Mwen pa ka pwan plézi an lanmò pyèsonn, . . . konsa tounen viwé èk viv.’ (Izik. 18:23, 32) Wi i a klè, Jéhova ka ni an chay tjè kontan lè moun wépanti hòd péché yo, paski i vlé moun viv pou tout tan. Èk i pa ka èspéyé on moun pou fè chanjman avan i ofè’y èd. Bon. Annou gadé lòt ègzanp ki ka moutwé sa.

7. Lè Jéhova sèvi ègzanp Hozéya èk madanm li, kisa i té ka enstwi pèp li?

⁷ Jéhova sèvi ègzanp Hozéya èk madanm li Goma pou enstwi pèp li on bèl lison. Apwé Goma fè adiltè i kité mawi’y Hozéya pou lòt nonm. Bon, ès i té posib pou Goma wépanti èk chanjé. Ében, sé Jéhova ki ka li tjè moun. Alò, Jéhova di Hozéya: ‘Witounen, èk enmen madanm-lan an lòt nonm enmen èk ki ka fè adiltè, menm kon Jéhova enmen pèp Izwayèl magwé yo ka adowé fo dyé.’ (Hoz. 3:1; Pwov. 16:2) Alò, ès ou wéyalizé Jéhova di Hozéya, pou padonnen madanm li èk pou pwan’y déviwé magwé i té ka fè adiltè toujou? Bon. Jéhova sèvi ègzanp sala pou moutwé pèp li mannyè i ka santi konsèné yo.a Wi, i kontiné enmen yo magwé yo té ka fè mové bagay. Èk sé pou wézon sala, i kontiné voyé sé pwòfèt li-a pou édé yo wépanti èk pou fè chanjman an lavi yo. Anfen ègzanp sala ka moutwé nou ki, Jéhova konnèt tout bagay konsèné yon moun, èk i kay édé yon moun ki fè péché ki gwav pou wépanti. (Pwov. 17:3) Apwézan, annou gadé déotwa ègzanp an Bib-la ki ka moutwé mannyè Jéhova té fè sa.

MANNYÈ JÉHOVA KA WÉDÉ MOUN POU WÉPANTI

8. Kisa Jéhova té fè pou éséyé édé Kén wépanti? (Jennésis 4:3-7) (Gadé pòtwé-a osi.)

⁸ Kén sété pwèmyé gason Adanm èk Èv. Èk kon tout sé désandan yo-a Kén éwityé dézi-a pou fè sa ki pa bon. Bib-la di konsèné Kén: “I té ka fè twavay Denmou-an.” (1 Jan 3:12) Pitèt sa sé wézon-an poutji Jéhova pa té aksèpté Kén ében lofwann li. Èk pito Kén chanjé mannyè’y, ‘Kén vin faché an chay épi i té dékouwajé’. Alò kisa Jéhova fè? Ében Jéhova palé bay Kén. (Li Jennésis 4:3-7.) Bon, ès ou òbzòvé Jéhova té palé dous bay Kén. Wi, Jéhova di’y i té kay benni’y si’y fè sa ki bon. Jéhova osi di Kén waj li té kay fè’y fè an bagay ki pa bon. Malèwèzman, Kén pa té kouté Jéhova. I pa té kité Jéhova édé’y pou wépanti. Bon, ès Jéhova doubout wédé moun wépanti paski Kén pa té kouté’y? Non, Jéhova pa té fè sa!

9. Ki mannyè Jéhova té édé David pou wépanti?

⁹ Wa David sété an nonm Jéhova té vwéman enmen. Anfen, i jis kwiyé David “yon nonm ki [té] fè tjè mwen kontan an chay.” (Twav. 13:22) Kanmenm, David té fè bagay ki pa té bon. Pou ègzanp, i té fè adiltè èk i té tjwé an nonm ki té inosan. Silon Lwa-a Bondyé té bay Moziz, David té sipozé mò pou sa. (Lev. 20:10; Lim. 35:31) Mé, Jéhova té vlé édé David pou wépanti.b Konsa i voyé pwofèt Natan oti David menm si David p’òkò té konfèsé péché’y èk wépanti. Alò Natan sèvi an bèl pawabòl pou édé David konpwann ki otan gwav péché’y té yé. Èk sa annékòz David pou wéyalizé i té vwéman blésé tjè Jéhova, èk David wépanti. (2 Sm 12:1-14) Anfen, i jis ékwi an Sam pou moutwé ki otan i té wigwété sa i té fè-a. Wi, Sam senkantenyen (51) ha soulajé an chay moun ki ha péché èk i ha pousé yo pou wépanti. Bon. Ès i pa ka touché tjè nou pou wè mannyè Jéhova té enmen David, èk i té édé’y pou wépanti?

10. Ki mannyè i ka fè’w santi pou konnèt ki, Jéhova ni tèlman pasyans épi nou èk i pawé pou pawdonnen nou?

¹⁰ Jéhova hayi tout kalté péché. (Sam 5:4, 5) Kanmenm, Jéhova enmen nou. Alò lè nou péché, i vlé édé nou pou wépanti. Jéhova toujou pawé pou édé jis moun ki ka fè péché ki gwav pou wépanti èk vansé pwé’y. Bon. Ès i pa ka touché tjè’w pou konnèt ki Jéhova vlé pawdonnen nou! Wi, lè nou wéfléchi asou pasyans Jéhova èk pawdonnasyon’y, sa ka pousé nou pou wèsté fidèl pou li, èk pou fè démach pou wépanti vitman lè nou péché. Bon. Annou konsidiwé sa Jézi enstwi sé disip li-a konsèné wépantisman.

SA JÉZI ENSTWI SÉ DISIP LI-A KONSÈNÉ WÉPANTISMAN

11-12. Ki pawabòl Jézi sèvi pou moutwé Jéhova vwéman vlé pawdonnen nou? (Gadé pòtwé-a ki asou .)

¹¹ An pwenmyé syèk-la Mèsaya-a wivé. Èk kon nou té mansyonnen an atik-la avan, Jéhova sèvi ni Jan Batis ni Jézi Kwi pou enstwi pèp li pouki i byen enpòtan pou nou wépanti.​—Maf. 3:1, 2; 4:17.

¹² Lè Jézi té asou latè-a i édé moun wè Jéhova vwéman vlé pawdonnen nou. Yon mannyè i fè sa sé lè i té sèvi an bèl pawabòl konsèné an papa èk gason’y. Jenn nonm-lan chwazi pou kité kay papa’y èk i fè an chay mové bagay. Mé apwé tjèk tan lè i byen katjilé, i désidé pou witounen lakay papa’y. Mé kisa papa’y té kay fè? Ès i té kay byen wisouvwè’y? Ében tann sa Jézi di: “Mé lè i té on distans hòd kay papaʼy, papa-a wèʼy èk i té ni konpasyon asouʼy, i kouwi jwenn li èk i anbwaséʼy èk i boʼy.” Bon, gason-an pa té ka èspéyé papa’y té kay pawdonnen’y. Alò i mandé papa’y si i sa twavay kon an sèvant an kay-la. Mé papa-a té pawé pou pawdonnen’y. Anfen, i kwiyé’y “gason mwen-an” èk i aksèpté’y an fanmi’y ankò. Osi papa-a di: “I té pèdi èk mwen twapéʼy ankò.” (Louk 15:11-32) Bon, Jézi té sa sèvi pawabòl sala, paski lè’y té an syèl i té wè papa’y moutwé moun konpasyon èk pawdonnen yo plizyè fwa lè yo wépanti. Èk wi, listwa sala ka touché tjè nou paski i ka moutwé ki otan mizéwikòd Papa nou Jéhova ni!

13-14. (a) Kisa zapòt Pita apwann hòd Jézi konsèné wépantisman? (b) Kisa zapòt Pita enstwi lézòt moun konsèné wépantisman? (Gadé pòtwé-a osi.)

¹³ Zapòt Pita apwann an chay bagay konsèné wépantisman hòd Jézi. I apwann mannyè Jéhova pawé pou pawdonnen moun ki wépanti. Bon, Pita té fè an chay lèwè èk Jézi té pawé pou pawdonnen’y. Pou ègzanp, apwé Pita di i pa té konnèt Jézi twa fwa, sa fè Pita santi koupab an chay. (Maf. 26:34, 35, 69-75) Mé apwé Jézi wésisité, i ay chaché pou Pita èk i palé épi’y lè pyèsonn pa té la. (Louk 24:33, 34; 1 Kòr. 15:3-5) Wi, Jézi té sav Pita té wépanti èk i té vlé ba’y asiwans-lan ki i té pawdonnen’y.​—Gadé Mak 16:7.

¹⁴ Pita té kopwann mannyè moun ka santi lè yo wépanti èk èspéyansé pawdonnasyon Jéhova, paski i menm té ja éspéyansé’y. Konsa i té sa enstwi lézòt sa i té apwann. Pou ègzanp, déotwa jou apwé Fèt Pentikòs-la, Pita té ka palé bay an gwoup Jwif èk i di yo, yo té tjwé Mèsaya-a. Kanmenm, Pita osi ankouwajé yo. I di yo: “Kon sa tounen hòd péchéʼw épi vin jwenn Bondyé, épi i kay éfasi péchéʼw.” (Twav. 3:14, 15, 17, 19) Alò Pita enstwi ki, an moun ka wépanti lè i tounen hòd péché’y. Sa vlé di, i ni pou chanjé mové katjil li, i ni pou doubout fè sa ki mové, èk i ni pou koumansé fè bagay ki ka plè Bondyé. Zapòt Pita osi moutwé Jéhova té kay pawdonnen péché yo konplètman, akonmsi i té kay éfasi péché yo èk fè péché yo dispawèt. Èk plizyè lanné apwé, an 2 Pita 3:9, Pita bay Kwityen asiwans sala; i di: “[Jéhova] ni pasyans épi zòt, paski i pa vlé pyèsonn péwi, mé i vlé tout moun wépanti péché yo.” Alò, menm si nou fè péché ki gwav, i ka soulajé nou pou konnèt si nou wépanti, Jéhova kay pawdonnen nou konplètman!

15-16. (a) Kisa ki édé zapòt Pòl apwann konsèné pawdonnasyon Jéhova? (1 Timòfi 1:12-15) (b) Kisa nou kay diskité an lòt atik-la?

¹⁵ Pòl té fè an chay mové bagay. Pou ègzanp, i pèsikité sé disip Jézi-a. Èk plizyè an sé Kwityen-an té kwè i pa té kay janmen chanjé. Mé Jézi té sav Pòl té sa chanjé èk wépanti. Wi, ni Jézi ni Papa’y té wè bon kawaktè an Pòl. Anfen Jézi di: “Mwen ja chwazi [Pòl] pou sèvi mwen.” (Twav. 9:15) Èk i jis fè an miwak pou édé Pòl wépanti. (Twav. 7:58–8:3; 9:1-9, 17-20) Anfen apwé Pòl wépanti èk i vini an Kwityen, Jézi ba’y an chay bon twavay pou fè kon an zapòt. Èk byen souvan Pòl té ka palé konsèné jantiyès-la èk mizéwikòd-la Jéhova èk Jézi té moutwé’y. (Li 1 Timòfi 1:12-15.) Wi, zapòt Pòl té apwésyé bonté Jéhova tèlman i ékwi: “Wézon-an Bondyé otan bon pou nou-an sé paski i vlé nou wépanti.”​—Ronm 2:4.

¹⁶ Bon, yon jou, zapòt Pòl tann konsèné an nonm an kongwigasyon-an ki té ka fè imowalité sèksyouwal. Alò, kisa zapòt Pòl di yo? Ében, hòd sa zapòt Pòl di, nou ka apwann mannyè Jéhova ka moutwé lanmityé lè i ka kowijé sé sèvant li-an, èk mannyè i ka moutwé mizéwikòd lè yo wépanti. Èk nou ka osi apwann mannyè nou sa moutwé mizéwikòd menm kon Jéhova. Konsa an lòt atik-la nou kay diskité sa ki té fèt an kongwigasyon Kòrint.