‘Ou Ni An Chay Valè An Zyé Jéhova’!

1-2. Ki mannyè ou sa asiwé, ou ni an chay valè an zyé Jéhova?

JÉHOVA ni an chay lanmityé pou chak sèvant li. Mé, adan sé fwè èk sè nou-an ka twapé’y wèd pou kwè Jéhova enmen yo, paskè pitèt on moun té maltwété yo, èk sa ka fè yo santi konmsi yo pa vo anyen. Bon, si’w ja èspéyansé sa, ki mannyè ou sa asiwé Jéhova enmen’w, èk ou ni an chay valè an zyé’y?

² Ében, la ni an chay wakont an Bib-la ki ka moutwé mannyè Jéhova vlé nou twété moun. Si’w li ében kouté sé wakont sala èk ou katjilé asou yo, sa kay édé’w pou konpwann kantité valè ou ni an zyé Jéhova. Pou ègzanp, Bib-la ka moutwé, Jézi té ka wèspèkté tout moun èk i té ka twété yo épi jantiyès. Èk chonjé, Jézi té ka fè tout sa i wè Papa’y fè. Konsa lè’w katjilé asou mannyè Jézi té ka twété moun sa kay édé’w pou wè, moun ni an chay valè an zyé’y, èk an zyé Papa’y. (Jan 5:19; Hib. 1:3) An atik sala nou kay konsidiwé: «1» mannyè Jézi édé moun pou konpwann valè-a yo ni pou Jéhova, èk «2» mannyè nou menm sa asiwé, nou ni an chay valè an zyé Jéhova.​—Hag. 2:7.

MANNYÈ JÉZI ÉDÉ MOUN POU KONPWANN VALÈ-A YO NI POU JÉHOVA

3. Ki mannyè Jézi té twété sé moun-lan an Galili ki té vini kouté’y-la?

³ Lè Jézi té ka pwéché an Galili, an chay moun vini pou kouté sa’y té ka di-a, èk pou’y djéwi yo. Lè Jézi wè tout sé moun sala, tjè’y fè’y mal pou yo paskè yo té an mové kondisyon, “menm kon mouton ki pa ni gadyenn.”(Maf. 9:36; gadé “study note-la” an Annglé pou vèwsé sala.) Mé pou sé mèt wilizyon-an, sé moun sala pa té vo anyen. Anfen, yo té ka gadé yo kon moun ki té kouyon, èk moun ki té “anba pinisyon Bondyé.” (Jan 7:47-49; gadé “study note-la” an Annglé pou vèwsé sala) Mé Jézi pa té kon sa. I moutwé sé moun-lan wèspé. I pwan tan pou enstwi yo konsèné Bondyé, èk i djéwi tout sa ki té malad. (Maf. 9:35) An plis di sa, i entwennen sé disip li-a pou pwéché èk pou enstwi moun Bon Nouvèl-la, èk i ba yo pouvwa-a pou djéwi moun ki té malad. Konsa, yo té kay sa édé pli moun ankò.​—Maf. 10:5-8.

4. Kisa nou ka apwann an mannyè-a Jézi té twété sé moun-lan an Galili?

⁴ Mannyè Jézi twété sé moun-lan an Galili ka moutwé, menm si moun ka gadé nou akwèdi nou pa vo anyen, pou Jéhova épi Jézi nou ni an chay valè. Konsa, si’w ka sèvi Jéhova, èk ou pa asiwé si’w ni valè an zyé’y, katjilé asou mannyè Jézi té twété sé moun-lan an Galili. Èk sa kay édé’w pou konpwann kantité valè ou ni an zyé Jéhova.

5. Kisa ki té wivé madanm Galili-a?

⁵ Jézi té ka enstwi moun kon on gwoup, mé i osi té ka pwan tan pou édé chak moun. Pou ègzanp lè’y té an Galili, i jwenn on madanm ki té malad pou douz «12» an. Madanm-lan té ni on mové maladi, ki té ka annékòz li pou pèdi san. (Mak 5:25) Bon, silon Lwa-a, madanm sala pa té sipozé anpanmi moun. Konsa sa vlé di, i pa té sa menm vini ansanm épi sé Jwif-la pou adowé Jéhova. (Livi. 15:19, 25) Ès ou sa imajiné mannyè madanm sala té ka santi? I té ka soufè an chay anba maladi-a, èk i té ni pou pasé an chay tan pa kò’y. Konsa, pitèt i té ka santi akwèdi pyèsonn pa té mélé épi’y, èk pitèt i té ka kwè i pa té vo anyen.​—Mak 5:26.

6. Ki mannyè madanm-lan ki té ka pèdi san-an djéwi?

⁶ Madanm-lan ki té ka pèdi san-an té ka soufè an chay èk i té vlé djéwizon, mé i té pè pou mandé Jézi pou èd. Pouki? Ében pitèt i té ka santi hont. Ében pitèt i té ka kwè Jézi té kay bay on jawé, paskè i pa té sipozé anpanmi moun. Mé népòt sa’y té yé-a, madanm-lan té asiwé, si’y té annèk touché had Jézi sèlman, i té kay djéwi. (Mak 5:27, 28) Konsa i touché bout had Jézi, èk lamenm i djéwi. Lè sala Jézi mandé, ki moun ki té touché had li. Madanm-lan té tèlman pè, i té ka twanblé. Mé, i tonbé an pyé Jézi, èk i di’y tout sa ki té wivé’y-la. Kisa Jézi fè?

7. Ki mannyè Jézi twété madanm-lan ki té touché’y-la? (Mak 5:34)

⁷ Jézi twété madanm-lan épi jantiyès èk wèspé. I òbzòvé madanm-lan ‘té tèlman pè, i té ka twanblé.’ (Mak 5:33) Konsa i palé adan on mannyè pou ankouwajé madanm-lan. I jis kwiyé madanm-lan, “ich mwen.” (Li Mak 5:34.) Sa sé sèl fwa-a Jézi kwiyé on madanm ‘ich mwen.’ Pitèt i fè sa paskè i té sa wè mannyè madanm-lan té pè, èk i té vlé soulajé’y. Ès ou sa imajiné mannyè madanm-lan santi, lè’y tann Jézi di sa? Wi, Jézi té vlé djéwi madanm-lan, mé i osi té vlé madanm-lan konnèt, i sété yon ich ki ni an chay valè pou Papa’y ki an syèl.

8. Ki difikilté on sè hòd péyi Brazil té ni?

⁸ Jòdi jou osi, adan sé fwè èk sè nou-an ka santi yo pa vo anyen, pou lapéti sèten maladi yo ni. Annou pwan ègzanp yon sè hòd péyi Brazil, yo ka kwiyé Maria.a Sè sala ka wann sèvis kon yon piyonnè wèglé, mé i enfim. I fèt san pyé, èk i ni yon lanmen. Sè-a di: “Manmay lékòl té ka maltwété mwen, èk yo té ka toujou kwiyé mwen vyé non paskè mwen enfim. Délè, jis moun an fanmi mwen ki té ka fè mwen santi akwèdi mwen pa té vo anyen.”

9. Kisa ki édé sè Maria pou wè, i ni an chay valè an zyé Jéhova?

⁹ Bon, kisa ki édé Maria? Ében, lè’y vini on Témwen Jéhova, sé fwè èk sè-a soulajé’y, èk yo édé’y pou wè kò’y mannyè-a Jéhova ka wè’y. Sè-a di: “La pa ni asé fèyèt an liv mwen pou mwen ékwi non tout moun ki ja édé mwen! Mwen ka wimèsyé Jéhova épi tout tjè mwen, paskè i mété mwen adan on bèl gwo fanmi.” Wi, sé fwè èk sè-a édé Maria pou konpwann, i ni an chay valè an zyé Jéhova.

10. Ki difikilté Mari Madlenn té ni? (Gadé sé pòtwé-a osi.)

¹⁰ Bon, annou konsidiwé mannyè Jézi édé on lòt madanm pou konpwann, i ni an chay valè an zyé Jéhova. Madanm sala sété Mari Madlenn, èk i té ni sèt «7» vyé lèspwi! (Louk 8:2) Ès ou sa imajiné mannyè Mari Madlenn té minab anba sé vyé lèspwi méchan sala! Pitèt yo té ka fè’y fè menm kon on fanm fòl, èk pitèt tout moun té pè’y. San dout, sa sété on tan ki té byen difisil pou Mari Madlenn. Pitèt i té ka santi i té pa kò’y, i pa té vo anyen, èk pyèsonn pa té sa édé’y. Mé i sanm, Jézi tiwé sé vyé lèspwi-a, èk Mari Madlenn koumansé swiv Jézi. Ki lòt bagay Jézi fè pou édé Mari Madlenn konpwann, i té ni an chay valè an zyé Bondyé?

11. Kisa Jézi fè pou édé Mari Madlenn wè, i té ni an chay valè an zyé Bondyé? (Gadé sé pòtwé-a osi.)

¹¹ On lòt bagay Jézi fè pou ankouwajé Mari Madlenn sé sa, i envité’y pou alé pwéché épi’y èk sé disip-la.b Sa sété on bèl pwivilaj pou Mari Madlenn, paskè i té kay jwenn an chay bennéfis kon’y kouté Jézi ka enstwi lézòt. Osi, jou-a Jézi wésisité, i pawèt douvan Mari Madlenn. Anfen, Mari sété yonn an sé pwèmyé disip-la Jézi palé épi apwé i wésisité. Èk Jézi di Mari, pou alé di sé zapòt-la li Jézi té wésisité. An tout sé diféwan mannyè sala, Jézi édé Mari Madlenn pou wè, i té ni an chay valè an zyé Jéhova!​—Jan 20:11-18.

12. Pouki Lidia té ka kwè, i pa té vo anyen?

¹² Menm kon Mari Madlenn, la ni an chay moun jòdi jou ki ka santi akwèdi yo pa vo anyen. Pou ègzanp, yon sè yo ka kwiyé Lidia hòd péyi Spain di, lè manman’y té ansent épi’y, manman-an té vlé jété’y. Èk sè-a ka chonjé mannyè manman’y té ka maltwété’y lè’y té on ti manmay, èk manman’y pa té ka bay pyès antansyon. Sè Lidia di: “Sa mwen té vlé pli an lavi, sé pou moun aksèpté mwen èk moutwé mwen lanmityé. Mé mwen té ka kwè pyèsonn pa té kay janmen enmen mwen, paskè manman mwen té fè mwen kwè mwen pa té bon.”

13. Kisa ki édé sè Lidia pou konpwann, i té ni an chay valè an zyé Jéhova?

¹³ Lè Lidia koumansé étidyé Bib-la, lavi’y chanjé toubonnman. Lapwiyè, pawòl Bondyé ki an Bib-la, èk mannyè sé fwè èk sè-a té ka twété’y, édé’y pou konpwann i té ni an chay valè an zyé Jéhova. Sè Lidia di: “Mawi mwen ka toujou di mwen mizi enmen i enmen mwen. Èk tanzantan, i ka fè mwen chonjé sé bèl kawaktè-a mwen ni-an. Osi, sé bon jan mwen-an ka fè menm bagay-la.” Ès ou sa katjilé asou on fwè ében on sè ki bizwen chonjé, yo ni an chay valè an zyé Jéhova? Pitèt ou sa fè, ében di on bagay pou édé moun sala.

ÉSÉYÉ POU WÈ KÒ’W MANNYÈ-A JÉHOVA KA WÈ’W

14. Silon 1 Sanmyèl 16:7 ki mannyè Jéhova ka wè moun? (Osi, gadé enfòmasyon-an ki anba sijé-a “Pouki Nou Sa Di, Pèp Jéhova Ni An Chay Valè Pou Li?”)

¹⁴ Chonjé, Jéhova pa ka wè’w menm mannyè-a moun an latè-a ka wè’w. (Li 1 Sanmyèl 16:7.) Sé pa lapawans ou, kantité lajan ou ni, ében si’w ni gwo endikasyon opa, ki ka fè’w ni valè an zyé Jéhova. Pou moun an latè-a, sé bagay sala enpòtan, mé sé pa kon sa i yé épi Jéhova. (Izay. 55:8, 9) Konsa, pito ou twakasé kò’w épi mannyè moun an latè-a ka wè’w, éséyé pou wè kò’w mannyè-a Jéhova ka wè’w. La ni wakont an Bib-la konsèné moun ki té ka kwè yo pa vo anyen. Moun tèl kon Ilaydja, Nayomi, épi Hanna. Si’w li sé wakont sala, ou kay wè mannyè Jéhova moutwé yo, yo té ni an chay valè pou li. Osi, ou sa katjilé asou sé diféwan mannyè-a Jéhova ja moutwé, i enmen’w èk ou ni an chay valè pou li. Èk ou sa jis ékwi sé bagay sala, pou’w chonjé yo. On lòt bagay ou sa fè, sé li ében kouté diféwan atik èk lòt enfòmasyon an sé piblikasyon nou-an ki ka moutwé kantité valè ou ni.c

15. Pouki Dannyèl té ni an chay valè an zyé Jéhova? (Dannyèl 9:23)

¹⁵ Toujou chonjé, ou ni valè an zyé Jéhova paskè ou ka wèsté fidèl pou li. La té ni on tan lè pwofèt Dannyèl té ka santi i té akablé épi twaka, èk i té dékouwajé. A lè sala i té pwèskè yon san «100» lanné. (Dann. 9:20, 21) Kisa Jéhova fè pou ankouwajé’y? Ében, Jéhova voyé nanj Gabwiyèl pou fè Dannyèl chonjé i sété “on moun ki té ni an chay valè,” èk pou fè’y konnèt, Bondyé té ka kouté lapwiyè’y. (Li Dannyèl 9:23.) Mé pouki Dannyèl té ni tout valè sala an zyé Jéhova? Ében Dannyèl té ni an chay bon kawaktè. Pou ègzanp i té fidèl, èk i té ka fè sa ki dwèt an zyé Bondyé. (Izik. 14:14) Jéhova mété wakont-lan konsèné Dannyèl an Bib-la pou ankouwajé nou, èk pou édé nou wè, nou sa tjébé fò. (Ronm 15:4) Konsa ou sa asiwé, ou ni an chay valè pou Jéhova paskè ou fidèl, èk ou ka fè sa ki dwèt an zyé’y. Èk i kay kouté lapwiyè’w menm kon’y té ka kouté lapwiyè Dannyèl.​—Mayk. 6:8, ftns.; Hib. 6:10.

16. Lè’w chonjé Jéhova sé Papa’w èk i enmen’w an chay, ki mannyè sa kay édé’w? Ba yon ègzanp.

¹⁶ Toujou chonjé, Jéhova sé Papa’w èk i enmen’w an chay. Wi, Jéhova ka gadé pou mannyè pou’y édé’w, i pa la ka konté chak ti défo ou ni. (Sam 130:3; Maf. 7:11; Louk 12:6, 7) Bèl ti katjil sala ja édé an chay fwè èk sè pou konpwann kantité valè yo ni an zyé Jéhova. Annou pwan ègzanp on sè yo ka kwiyé Eliana hòd péyi Spain. Mawi sé sala té ka maltwété’y pou plizyè lanné. I té ka sèvi pawòl li pou blésé santiman madanm li. Akòz di sa, sè-a tè ka santi akwèdi i pa té vo anyen. Mé sè-a di: “Népòt lè mwen ka santi mwen pa vo anyen, mwen ka imajiné kò mwen an dé «2» bwa Jéhova. Èk i ka pòté mwen, i ka pwotéjé mwen, èk i ka moutwé mwen lanmityé.” (Sam 28:9) On lòt sè hòd Soud Afwik, yo ka kwiyé Lauren ka di an tjè’y: “Jéhova moutwé mwen lanmityé, i mennen mwen vini jwenn li, i tjenn mwen pwé’y pou tout sé lanné sala, èk i ka jis sèvi mwen pou enstwi lézòt. Konsa asiwé, mwen ni valè pou li.”​—Hoz. 11:4.

17. Ki mannyè ou sa asiwé ou ni favè Jéhova? (Sam 5:12) (Gadé pòtwé-a osi.)

¹⁷ Toujou chonjé, ou ni favè Jéhova. (Li Sam 5:12.) Favè Jéhova sé on pwotèksyon. Anfen, David té konpawé’y épi on gwo bawad Jéhova ka sèvi pou pwotéjé moun ki ka fè sa ki dwèt an zyé’y. Konsa, lè’w chonjé ou ni favè Jéhova, sa kay anpéché’w kwè ou pa ni valè. Mé ki mannyè ou kay konnèt si’w ni favè Jéhova? Ében kon nou ja apwann, Jéhova ka sèvi Pawòl li pou ba’w asiwans sala. Osi, i ka sèvi sé ansyen-an, sé fwè èk sè-a, èk lézòt moun, pou fè’w chonjé kantité valè ou ni pou li. Konsa, lè on moun ka ankouwajé’w, kisa ou sipozé fè?

18. Lè on moun félicité’w, ében yo di’w yo ka apwésyé’w, pouki ou sipozé aksèpté sa?

¹⁸ Ében lè on moun félicité’w pou on bagay ou fè, ében yo di’w yo ka apwésyé’w, aksèpté sa. Paskè, pitèt sé Jéhova ki ka sèvi moun sala pou fè’w chonjé ou ni favè’y. Annou pwan ègzanp, sè Eliana. Nou té mansyonnen sè sala an paragraf 16. I di: “Lè moun sèvi bèl ti pawòl pou ankouwajé mwen, mwen ka twapé’y wèd pou kwè sa yo ka di mwen-an. Mé piti an piti, mwen ka apwann pou aksèpté’y, paskè mwen sav sé sa Jéhova vlé mwen fè.” Osi, sé ansyen-an moutwé sè Eliana lanmityé, èk yo édé’y pou konpwann mizi enmen Jéhova enmen’y. Atjwèlman, sè Eliana ka wann sèvis kon yon piyonnè, èk i ka sipòté twavay-la ki ka fèt an Bèfèl.

19. Pouki ou sa asiwé, ou ni an chay valè an zyé Jéhova?

¹⁹ Jézi ka fè nou chonjé mizi valè nou ni an zyé Papa nou ki an syèl. (Louk 12:24) Konsa, nou sa asiwé Jéhova enmen nou, èk nou ni an chay valè pou li. Sé pa pou nou janmen obliyé sa! Èk annou fè tout sa nou pé, pou édé lézòt konpwann, yo menm ni an chay valè an zyé Jéhova!