KWÈSYON JENN MOUN KA MANDÉ
Ki Mannyè Bib-la Sa Édé Mwen?—Pwèmyé Pa-a: Ègzanminé Bib Ou
Briana ni kenz (15) lanné. I di: “Mwen ja éséyé pou li Bib-la. Mé mwen té vini dékouwajé, paski Bib-la sé an gwo liv, èk i kay pwan an chay tan pou fini li’y.”
Ès ou ka santi menm kon Briana? Ében atik sala kay édé’w!
Pouki i enpòtan pou li Bib-la?
Ès ou ka katjilé, lè’w ka li Bib-la sa ka fè’w santi annwi? Si sé sa ou ka katjilé, nou sa konpwann sa. Pitèt ou ka di an lidé’w, Bib-la sé an gwo liv ki ni pli pasé yon mil (1000) paj. Èvèk sé paj-la ni ékwiti ki piti asou yo, èk yo pa ni pyès pòtwé. Konsa ou pa ka kwè ou kay enjwi li Bib-la kon’w ka enjwi gadé pòtwé asou télévizyon, ében asou intannèt-la!
Mé katjilé asou sa: Si’w twapé an gwo bwèt ki plen bijou, ès ou pa té kay kontan pou ouvè bwèt-la èk ègzanminé sé bijou-a pou kò’w?
Ében Bib-la menm kon an gwo bwèt bijou ki byen valowab. Anfen, lasajès-la ki an Bib-la otan pli valowab pasé bijou. Lasajès-la ki an Bib-la sa édé’w pou
Fè bon disizyon
Ni an bon wilasyon épi pawan’w
Chwazi bon jan
Aji épi tèt cho
Ki mannyè an liv ki té ékwi tèlman lontan sa édé nou jòdi jou? 2 Timòfi 3:16 di: “Sé Bondyé ki annékòz nonm matjé tout lévanjil-la.” Konsa, menm si Bib-la té ékwi tèlman lontan, konsèy-la ki an Bib-la sa édé nou jòdi jou paski, i sòti hòd pli mèyè Sous-la ki ni.
Menm kon on gwo bwèt ki plen bijou ki byen valowab, Bib-la plen lasajès ki byen valowab
Diféwan mannyè pou li Bib-la
Yon mannyè pou li Bib-la sé pou koumansé épi liv Jennésis pou wivé liv Wévélasyon. Lè’w li Bib-la konsa, sa ka ba’w an ti lidé konsèné konmisyon-an ki an Bib-la. Mé la ni plizyé diféwan mannyè pou li Bib-la. Annou konsidiwé dé (2) ègzanp:
Ou sa li sé swasant sis (66) liv-la ki an Bib-la yonn apwé lòt. Koumansé épi liv Jennésis jistan ou wivé liv Wévélasyon.
Ou sa li sé wakont-la ki an Bib-la annòd. Sa vlé di, li yo yonn apwé lòt menm mannyè-a yo té fèt.
An ti pwen: Appendix A7 an Bib-la New World Translation ni an lis ki annòd konsèné sé pli gwo bagay-la ki té wivé Jézi diwan tan-an i té asou latè-a.
An dézyenm mannyè pou li Bib-la sé pou chwazi yon wakont ki ni pou fè épi on sitiwasyon ou ka èspéyansé. Pou ègzanp:
Ès ou té kay kontan ni bon jan ou sa konfyé? Li wakont-la konsèné Jonatann épi David an 1 Sanmyèl, chapit 18-20. Apwé ou li’y, ou sa sèvi worksheet-la ki ni tit-la, “How to Find Loyal Friends” pou édé’w apwann sé bèl lison-an ki an wakont sala.
Ès ou té kay kontan fòtifyé détèminasyon’w pou pa tonbé anba tantasyon? Ou sa li wakont-la konsèné mannyè Jozèf té doubout fò anba tantasyon an Jennésis, chapit 39. Apwé ou li’y, ou sa sèvi sé worksheet-la ki ni tit-la, “How to Resist Temptation . . . Jozèf—Pwèmyé Pa-a” èk “Falsely Accused! Jozèf—Dézyenm Pa-a,” pou édé’w apwann sé bèl lison-an ki an wakont sala.
Ès ou té kay kontan konnèt ki mannyè lapwiyè sa édé’w? Ou sa li konsèné èspéwéyans Néhimaya an Néhimaya, chapit 2. Apwé ou li’y, ou sa sèvi worksheet-la ki ni tit-la, “God Answered His Prayer” pou édé’w apwann sé bèl lison-an ki an wakont sala.
An ti pwen: Lè’w ka li Bib-la, fè asiwé plas-la ou yé-a pa ni dézòd. Lè sala ou kay sa fiksé asou sa ou ka li-a.
An twazyenm mannyè pou li Bib-la sé pou chwazi yon wakont ében yon sam, èk apwé ou li’y katjilé asou diféwan mannyè ou sa sèvi enfòmasyon-an an lavi’w. Apwé ou li’y ou sa mandé kò’w sé kwèsyon sala:
Pouki Jéhova té mété wakont sala, ében sam sala an Bib-la?
Kisa wakont sala, ében sam sala ka di mwen konsèné kawaktè Jéhova, ében konsèné mannyè-a Jéhova ka fè bagay?
Ki mannyè mwen sa sèvi enfòmasyon sala an lavi mwen?
An ti pwen: Sèvi Bib-la New World Translation study Bible pou jwenn vidiyo, kat, èk lòt bagay ki kay édé’w konpwann pli bagay lè’w ka li Bib-la.